Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2016

Patibkerem ti Pammatim iti In-inanamaem

Patibkerem ti Pammatim iti In-inanamaem

“Ti pammati isu ti sigurado a panangsegsegga iti bambanag nga in-inanamaen.”—HEB. 11:1.

KANTA: 81, 134

1, 2. (a) Ania ti nagdumaan ti namnamaen dagiti pudno a Kristiano ken ti namnamaen dagiti tattao iti lubong ni Satanas? (b) Ania dagiti napateg a saludsod nga usigentayo ita?

NAGSAYAAT ti namnama dagiti pudno a Kristiano! Amintayo, napulotan man wenno “sabsabali a karnero,” ket mangnamnama a matungpal ti orihinal a panggep ti Dios ken ti pannakasantipikar ti nagan ni Jehova. (Juan 10:16; Mat. 6:9, 10) Dagita ti kapatgan a namnamaentayo. Padpadaanantayo met ti naikari a gunggona a biag nga agnanayon, idiay man langit wenno ditoy daga. (2 Ped. 3:13) Iti agdama, namnamaentayo ti agtultuloy a naespirituan a panagrang-ay dagiti adipen ti Dios.

2 Adda met namnamaen dagiti tattao iti lubong ni Satanas, ngem agduaduada no pumudnonto met laeng dagita. Kas pagarigan, minilion ti agtaytaya iti lotto ket mangnamnamada a mangabakda, ngem saanda a sigurado iti dayta. Ngem ti pudno a pammati ket ti “sigurado a panangsegsegga” iti namnamatayo kas Kristiano. (Heb. 11:1) Ngem mabalin a mapanunotmo, kasano a masiguradom a matungpal ti namnamaem? Ken ania dagiti pagimbaganna no natibker ti pammatim iti in-inanamaem?

3. Apay nga adda pammati dagiti Kristiano?

3 Saantayo a nayanak nga addaan iti pammati. Saan met nga  automatiko a maadda dayta kadatayo. Resulta dayta ti panagtignay ti espiritu ti Dios iti situtulok a puso. (Gal. 5:22) Awan ti ibaga ti Biblia nga adda wenno kasapulan ni Jehova ti pammati. Ni Jehova ti mannakabalin-amin ken kasisiriban isu a matungpalna ti amin a panggepna. Masigurado ti nailangitan nga Amatayo a matungpal dagiti inkarina a bendision, a para kenkuana natungpalen dagita. Isu a maikunana: “Napasamakdan!” (Basaen ti Apocalipsis 21:3-6.) Adda pammati dagiti Kristiano gapu ta ammoda a ni Jehova ket “matalek a Dios,” a kanayon a mangtungpal iti karina.—Deut. 7:9.

DAGITI NAGKAUNA NGA ULIDAN ITI PAMMATI

4. Ania ti namnama dagiti ulidan iti pammati a nagbiag sakbay ti Kristo?

4 Iti kapitulo 11 ti libro a Hebreo, mabasatayo ti nagan dagiti 16 nga ulidan iti pammati. Ti mannurat dayta a libro dinakamatna met ida ken ti dadduma pay nga “adda panangsaksi a naited kadakuada babaen ti pammatida.” (Heb. 11:39) Addaanda amin iti “sigurado a panangsegsegga” iti inkari ti Dios a ‘bin-i,’ a mamagpatingganto iti panagrebelde ni Satanas ken mangitungpal iti orihinal a panggep ni Jehova. (Gen. 3:15) Natay dagiti ulidan iti pammati sakbay a ti ‘bin-i,’ ni Jesu-Kristo, linuktanna ti namnama a biag idiay langit. (Gal. 3:16) Ngem saan a mapaay dagiti kari ni Jehova. Mapagungardanto a perpekto ket agbiagda iti paraiso a daga.—Sal. 37:11; Isa. 26:19; Os. 13:14.

5, 6. Ania a namnama ti pinampanunot ni Abraham ken ti pamiliana, ket kasano a pinagtalinaedda a natibker ti pammatida? (Kitaen ti ladawan iti rugi ti artikulo.)

5 Kuna ti Hebreo 11:13 maipapan iti dadduma a nagbiag sakbay ti Kristo: “Iti pammati natay amin dagitoy, nupay saanda a nagun-odan ti kaitungpalan dagiti kari, ngem nakitada ida iti adayo ket inabrasada ida.” Maysa ni Abraham kadakuada. Pinampanunotna kadi ti naragsak a namnama a panagbiag iti panangituray ti naikari a ‘bin-i’? Nalawag ti sungbat iti dayta a saludsod idi imbaga ni Jesus kadagiti bumusbusor kenkuana: “Ni Abraham nga amayo nagrag-o unay iti inanama a pannakakita iti aldawko, ket nakitana dayta ken nagrag-o.” (Juan 8:56) Pinampanunot met da Sara, Isaac, ken Jacob, ken ti dadduma pay ti namnamada iti umayto a Pagarian, a “ti nangibangon ken nangaramid iti dayta . . . isu ti Dios.”—Heb. 11:8-11.

6 Kasano a pinagtalinaed ni Abraham ken ti pamiliana a natibker ti pammatida? Mabalin a naammuanda ti maipapan iti Dios babaen ti anghel, sirmata, wenno tagtagainep. Mabalin a dimngegda met kadagiti nagkauna a matalek a tattao wenno binasada dagiti mapagtalkan a nagkauna a sursurat. Kanayonanna, linaglagipda dagiti nasursuroda ken pinampanunotda dagiti kari ken bilin ti Dios ken inut-utobda dagita. Gapu ta siguradoda a matungpal ti namnamaenda, nakasaganada nga agtalinaed a nasungdo iti Dios uray no agpasarda iti rigat.

7. Ania dagiti probision nga impaay ni Jehova tapno maaddaantayo iti natibker a pammati, ken ania ti masapul nga aramidentayo kadagita?

7 Tapno agtalinaed a natibker ti pammatitayo, impaay ni Jehova ti kompleto a Saona, ti Biblia. Masapul nga inaldaw a basaentayo ti Sao ti Dios agingga a posible tapno ‘agballigitayo’ ken agbalintayo a “naragsak.” (Sal. 1:1-3; basaen ti Aramid 17:11.) Kas kadagiti nagkauna nga adipen ni Jehova a nagbiag sakbay ti Kristo, masapul met a kanayon nga utobentayo dagiti kari ti Dios ken agtulnogtayo kadagiti bilinna. Ipapaayannatayo met ni Jehova iti aglaplapusanan a naespirituan a taraon babaen ti “matalek ken masirib nga adipen.” (Mat. 24:45) Gapuna, no utobentayo a naimbag dagiti maadaltayo  kadagiti naespirituan a taraon nga ipapaay ni Jehova, maaddaantayo met iti “sigurado a panangsegsegga” iti Pagarian a kas kadagiti nagkauna nga ulidan iti pammati.

8. Kasano a patibkeren ti kararag ti pammatitayo?

8 Dakkel met ti naitulong ti kararag kadagiti saksi a nagbiag sakbay ti Kristo tapno agtalinaed a natibker ti pammatida. Bumileg idi ti pammatida no sungbatan ti Dios dagiti kararagda. (Neh. 1:4, 11; Sal. 34:4, 15, 17; Dan. 9:19-21) Mabalintayo met nga ibaga ken Jehova dagiti pakaseknantayo ta ammotayo a denggen ken pabilgennatayo nga agibtur nga addaan iti rag-o. No masungbatan dagiti kararagtayo, bumileg ti pammatitayo. (Basaen ti 1 Juan 5:14, 15.) Gapu ta ti pammati ket maysa nga aspeto ti bunga ti espiritu, masapul nga ‘itultuloytayo a dawaten’ ti espiritu ti Dios, kas imparegta ni Jesus.—Luc. 11:9, 13.

9. Asino pay ti masapul nga ikararagantayo malaksid iti bagitayo?

9 Saantayo laeng koma nga agkararag iti Dios tapno agdawat. Dagiti ‘nakaskasdaaw nga ar-aramid’ ti Dios ket ‘ad-adu ngem iti kabaelantayo’ a bilangen, ket dagita ti panggapuantayo nga agyaman ken mangidaydayaw kenkuana iti inaldaw! (Sal. 40:5) Maysa pay, ipakita koma dagiti kararagtayo a ‘sipapanunottayo kadagidiay sipaparaut iti pagbaludan a kasla naparautantayo a nairaman kadakuada.’ Kasta met, ikararagantayo koma dagiti kakabsattayo iti intero a lubong, aglalo dagiti ‘mangidadaulo kadatayo.’ Maragsakantayo no makitatayo a sungsungbatan ni Jehova ti agkaykaysa a kararagtayo!—Heb. 13:3, 7.

SAANDA A NAGKOMPROMISO

10. Siasino dagiti adipen ti Dios a saan a nangikompromiso iti pammatida, ken ania ti nakatulong kadakuada a mangaramid iti dayta?

10 Iti Hebreo kapitulo 11, dineskribir ni apostol Pablo dagiti pakasuotan nga inibturan ti adu a saan a nainaganan nga adipen ti Dios. Kas pagarigan, dinakamatna dagiti matalek a babbai a natayan kadagiti annak ngem napagungar met laeng. Sa dinakamatna ti dadduma a ‘saan nga immawat iti pannakaluk-at babaen iti aniaman a subbot, tapno maragpatda ti nasaysayaat a panagungar.’ (Heb. 11:35) Nupay saantayo a masigurado no siasino dagiti pampanunoten idi ni Pablo, naubor agingga a natay ti dadduma a kas kada Nabot ken Zacarias gapu ta nagtulnogda iti Dios ken inaramidda ti pagayatanna. (1 Ar. 21:3, 15; 2 Cron. 24:20, 21) Mabalin koma a mawayawayaan ni Daniel ken dagiti kakaduana no inkompromiso, wenno tinallikudanda, ti pammatida. Ngem ti pammatida iti Dios ti nakatulong kadakuada nga arig ‘nangapput iti ngiwngiwat dagiti leon’ ken ‘nangdepdep iti puersa ti apuy.’—Heb. 11:33, 34; Dan. 3:16-18, 20, 28; 6:13, 16, 21-23.

11. Ania dagiti inibturan ti dadduma a propeta gapu iti pammatida?

11 Gapu iti pammati da propeta Mikaias ken Jeremias, “inawatda ti suotda babaen ti pannakarabrabak . . . ken pannakaibalbalud.” Ti dadduma, kas ken Elias, “nagallaallada kadagiti desierto ken bambantay ken kadagiti rukib ken kadagiti gukayab ti daga.” Nagibturda amin gapu ta addaanda iti “sigurado a panangsegsegga iti bambanag nga in-inanamaen.”—Heb. 11:1, 36-38; 1 Ar. 18:13; 22:24-27; Jer. 20:1, 2; 28:10, 11; 32:2.

12. Asino ti kasayaatan nga ulidan iti panagibtur, ken ania ti nakatulong kenkuana a mangaramid iti dayta?

12 Kalpasan a dinakamat ni Pablo ti agduduma nga ulidan iti pammati, impaganetgetna no asino ti kasayaatan nga ulidan—ni Apo Jesu-Kristo. Kuna ti Hebreo 12:2 a “gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono  ti Dios.” Masapul ngarud nga ‘utobentayo’ a naimbag ti pammati ni Jesus idi naipasango kadagiti karirigatan a pannubok. (Basaen ti Hebreo 12:3.) Kas ken Jesus, dagiti napapatay a Kristiano a kas ken adalan nga Antipas, saanda nga inkompromiso ti pammatida. (Apoc. 2:13) Addaanda iti gunggona a panagungar idiay langit—“ti nasaysayaat a panagungar” ngem iti ninamnama dagiti nagkauna nga ulidan iti pammati. (Heb. 11:35) Kalpasan ti pannakaipasdek ti Pagarian idi 1914, amin dagitoy a napulotan a natay a matalek ket napagungar idiay langit kas espiritu tapno makipagturay ken Jesus.—Apoc. 20:4.

DAGITI ULIDAN ITI PAMMATI ITA

13, 14. Ania dagiti nakasubokan ni Rudolf Graichen, ken ania ti nakatulong kenkuana nga agibtur?

13 Minilion nga agdaydayaw iti Dios ita ti mangtultulad ken Jesus. Kanayon a pampanunotenda ti namnamada ken dida ipalpalubos a kumapuy ti pammatida gapu iti suot. Usigentayo ti kapadasan ni Rudolf Graichen, a nayanak idiay Germany idi 1925. Linaglagipna dagiti eksena iti Biblia nga adda iti retrato a naibitin iti diding ti balayda. Insuratna: “Makita iti maysa a retrato dagiti lobo ken karnero, kalding ken leopardo, baka ken leon a nakataltalna nga ay-aywanan ti maysa nga ubing a lalaki. . . . Nabati iti panunotko  dagita a ladawan.” (Isa. 11:6-9) Nupay adu a tawen a pinarparigat dagiti polis a Nazi, sa dagiti Komunista nga Stasi ti East Germany, nagtalinaed a natibker ti pammati ni Rudolf iti paraiso a daga.

14 Ti dadduma pay a nakaro a rigat nga inibturan ni Rudolf ket ti ipapatay ti dungdungnguenna nga ina, a natay iti tipus iti pagbaludan idiay Ravensbrück. Nakitana met a kimmapuy ti pammati ni tatangna agingga nga inkompromisona ti pammatina idi pinirmaanna ti dokumento a mangideklara nga isu ket saanen a Saksi ni Jehova. Idi nawayawayaan manipud iti pagbaludan, naragsakan ni Rudolf a nagserbi kas manangaywan iti sirkito sa nageskuela iti Gilead. Naibaon kas misionero idiay Chile sa nagserbi manen kas manangaywan iti sirkito. Ngem saan a dayta ti nagpatinggaan dagiti pakasuotanna. Makatawen kalpasan a nagasawada ken Patsy, a padana a misionero, natay ti anakda a babai. Idi agangay, natay met ni baketna, nga agtawen laeng idi iti 43. Inibturan amin dagitoy ni Rudolf. Nupay lakay ken masaksakit idin, payunir ken panglakayen pay laeng idi naisurat ti pakasaritaan ti biagna iti Pagwanawanan nga Agosto 1, 1997, panid 20-25. [1]

15. Asino dagiti Saksi ni Jehova nga ulidantayo ita a naragsak nga agib-ibtur iti pannakaidadanes?

15 Maragragsakan latta dagiti Saksi ni Jehova iti namnamada uray no nakaro ken agtultuloy a maidaddadanesda. Kas pagarigan, adu a kakabsattayo ti naibalud idiay Eritrea, Singapore, ken South Korea, a kaaduanna ket gapu iti panagtulnogda iti bilin ni Jesus a saanda nga agiggem iti kampilan. (Mat. 26:52) Karaman kadagitoy a rinibu a balud ket da Isaac, Negede, ken Paulos, a nasuroken a 20 a tawen a nakabalud idiay Eritrea! Nupay saanda a maaywanan dagiti nagannakda ken saanda a mabalin ti agasawa, nagtalinaed a matalek dagitoy a kakabsat uray nakaro ti pannakamaltratoda. Ti naragsak a rupada a makita iti website-tayo a jw.org ipakitana a pinagtalinaedda a natibker ti pammatida. Resrespetuen pay ketdi ida dagiti guardia iti nakaibaludanda.

Kasano a makatulong kenka ti ulidan dagiti nabileg ti pammatina a kakabsat iti kongregasionmo? (Kitaen ti parapo 15, 16)

16. Kasano a maprotektarannaka ti nabileg a pammati?

16 Sumagmamano laeng nga adipen ni Jehova ti maipaspasango iti nakaro a pannakaidadanes. Ngem sabali a pannubok iti pammati ti mapaspasaran ti kaaduan. Adu dagiti agib-ibtur iti rigat ti panagbiag, gubat, wenno natural a didigra. Dadduma ti kas ken Moises ken dagiti nagkauna nga adipen ti Dios a nangisakripisio iti nasayaat a biag wenno kinalatak iti lubong. Ikagkagumaanda a liklikan ti agbalin a materialistiko, wenno ti laeng bagida ti pampanunotenda. Ania ti nakatulong kadakuada? Ti ayatda ken Jehova ken ti natibker a pammatida nga ikkatento ti Dios ti amin a kinaawan hustisia ken gunggonaannanto dagiti matalek nga adipenna iti agnanayon a biag iti nalinteg a baro a lubong.—Basaen ti Salmo 37:5, 7, 9, 29.

17. Ania ti determinasionmo, ken ania ti mausig iti sumaruno nga artikulo?

17 Naadaltayo iti daytoy nga artikulo a makatulong ti kanayon a panagkararag ken panangutob kadagiti kari ti Dios tapno agtalinaed a natibker ti pammatitayo. Kas resulta dayta, kabaelantayo nga ibturan dagiti mangsubok iti pammatitayo bayat a nakapokustayo iti namnamatayo nga addaan iti “sigurado a panangsegsegga.” Ngem adda pay ramanen ti pammati a dinakamat ti Biblia, kas ipakita ti sumaruno nga artikulo.

^ [1] (parapo 14) Kitaen met ti artikulo a “Nupay Adu ti Pakasuotak, Nagtalinaed a Naraniag ti Namnamak” iti Agriingkayo! nga Abril 22, 2002, a mangisalaysay iti pakasaritaan ti biag ni Andrej Hanák a taga-Slovakia.