Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2016

 PAKASARITAAN TI BIAG

Panangtulad Kadagiti Nasayaat nga Ulidan

Panangtulad Kadagiti Nasayaat nga Ulidan

“Ammom kadi no mano ti tawenkon?” dinamagko. “Ammok,” insungbat ni Izak Marais, a timmawag kaniak manipud Patterson, New York idi addaak iti Colorado. Palubosandak a mangyestoria no apay a kasta ti nagsaritaanmi.

NAYANAKAK idiay Wichita, Kansas, U.S.A., idi Disiembre 10, 1936. Inaunaak iti uppat nga agkakabsat. Napeklan a Saksi ni Jehova dagiti nagannakko a da William ken Jean. Ni tatangko ti company servant, awag idi iti mangidadaulo iti kongregasion. Naammuan ni nanangko ti kinapudno ken nanangna a ni Emma Wagner. Karaman iti adu nga inyadalan ni Lola Emma ni Gertrude Steele, a nagserbi kas misionera idiay Puerto Rico iti adu a tawen. * Isu a nagadu ti nasayaat nga ulidan a mabalinko a tuladen.

PANANGLAGIP KADAGITI NASAYAAT NGA ULIDAN

Agipapaima ni Tatang iti magasin kadagiti aglabas iti igid ti kalsada

Iti maysa a rabii ti Sabado idi lima ti tawenko, kinaduak ni tatangko nga agipaima iti magasin a Pagwanawanan ken Consolation (Agriingkayo! itan) kadagiti aglabas iti kalsada. Karaman idi ti pagilianmi iti Gubat Sangalubongan II. Adda nabartek a doktor nga immasideg ken Tatang ket pinagsasawanna gapu ta neutral kas Kristiano. Takrot kano ni Tatang ken saanna a kayat ti agsoldado. Imbugkaw ti doktor iti rupa ni Tatang, “Apay a dinak danogen, takrot!” Nagbutengak ngem ad-adda pay a rinaemko ni Tatang. Intuloyna latta ti nagipaima iti magasin kadagiti nagaaribungbong a tattao. Idi kuan, adda soldado a limmabas, ket imbugkaw ti doktor, “Kitam man daytoy a takrot!” Nakita ti soldado a nabartek ti doktor isu nga imbagana, “Agawidkan tapno mausawanka!” Sa pimmanawda a dua. Imbag laengen ta pinatured ni Jehova ni tatangko. Adda dua a barbershop ni Tatang idiay Wichita, ket ti doktor ti maysa kadagiti agpappapukis sadiay!

Kaduak dagiti nagannakko a mapan makikombension idiay Wichita idi 1940’s

Idi walo ti tawenko, inlako dagiti nagannakko ti balaymi ken dagiti shop-mi. Nagaramidda iti bassit a balay a mayakar-akar (mobile home), sa immakarkami iti lugar nga addaan iti dakkel a panagkasapulan iti Colorado. Naggiankami iti asideg ti  Grand Junction, a nagpayuniran da Tatang ken Nanang. Part-time a nagtrabahoda iti talon ken rantso. Gapu iti pamendision ni Jehova ken iti kinaregtada, adda nabukel a kongregasion. Idi Hunio 20, 1948, iti maysa a waig, binautisarannak ni Tatang ken ti dadduma pay nga immawat iti kinapudno, a pakairamanan ni Billie Nichols ken ni baketna. Idi agangay, nagserbida iti sirkito, kasta met ti anakda ken ti asawana.

Nadekket ti panaglalangenmi ken makaparegta ti panagsasaritami iti adu a naregta a manangaskasaba iti Pagarian, aglalo iti pamilia Steele—da Don ken Earlene, da Dave ken Julia, ken da Si ken Martha—a dakkel ti impluensiada kaniak. Impakitada a no mayun-una ti Pagarian, makapnek ken naragsak ti biag.

IYAAKAR MANEN

Idi agtawenak iti 19, inawisnak ti gayyemko a ni Bud Hasty nga agpayunir iti makin-abagatan a paset ti United States. Insingasing ti manangaywan iti sirkito nga umakarkami idiay Ruston, Louisiana, ta adu sadiay ti limmamiis a Saksi. Naibilin kadakami a linawas latta nga aggimongkami, adda man umay wenno awan. Nakabirokkami iti mayat a paggimongan sa tinarimaanmi. Idi damo, duakami laeng ngem iparangmi ti amin a paset. Agsinnublatkami nga agpaset. Parasaludsod ti maysa, parasungbat met ti maysa. No adda demostrasion, addakami a dua iti sango, ket awan ti agbuya! Idi kuan, adda met laengen baket a kabsat a nakigimong. Idi agangay, nakigimong metten ti dadduma nga agad-adal iti Biblia, ken dadduma a di aktibo. Di nagbayag, rimmang-ay ti kongregasionmi.

Naminsan, nakasarakkami ken Bud iti ministro ti Church of Christ. Adda dagiti teksto nga imbagana a saanko nga ammo. Diak nakasungbat isu nga inggaedko ti nagadal. Makalawas nga impuyatak ti nagadal iti Biblia tapno masungbatak dagiti saludsodna. Nakatulong unay dayta tapno maipapusok ti kinapudno, ket magagaranak nga adda koma manen makasaritak a sabali pay a ministro.

Idi agangay, imbaga ti manangaywan iti sirkito nga umakarak tapno tumulong iti kongregasion idiay El Dorado, Arkansas. Bayat nga addaak sadiay, agkarasubliak iti Colorado tapno mapanak iti pagpasalistaan dagiti agsoldado (draft board). Naminsan, nagbiaheak a kaduak ti dadduma a payunir. Inusarmi ti luganko ket naaksidentekami idiay Texas. Awan nagbambanagan ti luganko. Nagpatulongkami iti maysa a kabsat ket impannakami iti balayna ken intugotnakami iti gimong.  Impakaammoda sadiay ti napasamak kadakami, ket nangted dagiti kakabsat iti gastuenmi. Inlako met ti kabsat ti luganko iti $25.

Nakapankami idiay Wichita, a pagpaypayuniran ti nasinged a gayyem ti pamiliami a ni E. F. “Doc” McCartney. Ti singin nga annakna a da Frank ken Francis ket nadekket a gayyemko agingga ita. Adda idi daan a luganda ket inlakoda kaniak iti $25, apagisu iti nakailakuan ti nadadael a luganko. Dayta ti damo a talaga a nakitak nga impaay ni Jehova ti kasapulak gapu ta inyun-unak ti Pagarian. Inyam-ammo kaniak dagiti McCartney ti maysa a nagpintas ken naregta a kabsat a ni Bethel Crane. Nakaregregta a Saksi ni nanangna a Ruth, a nagpaypayunir idiay Wellington, Kansas, uray idi agtawenen iti nasurok a 90. Awan pay makatawen kalpasanna, nagkasarkami ken Bethel idi 1958, sa nagpayunirkami idiay El Dorado.

DAGITI MAKAPARAGSAK NGA AWIS

Idi pinampanunotmi dagiti nagsasayaat nga ulidan a nakitami bayat ti panagdakkelmi, inkeddengmi nga awaten ti aniaman nga awis ti organisasion ni Jehova. Naibaonkami kas special pioneer idiay Walnut Ridge, Arkansas. Idi 1962, naragsakankami a nakaawat iti imbitasion para iti maika-37 a klase ti Gilead. Makaparagsak ta kaklasemi gayam ni Don Steele. Idi naggraduarkami, naibaonkami ken Bethel idiay Nairobi, Kenya. Nalidayankami idi panawanmin ti New York, ngem kasta unay ti ragsakmi idi sinabatdakami dagiti kakabsat iti airport idiay Nairobi!

Idiay Nairobi, kaduami a mapan mangasaba da Mary ken Chris Kanaiya

Nagustuanmi a dagus ti Kenya ken ti naragsak a ministeriomi sadiay. Da Chris ken Mary Kanaiya ti immuna nga inyadalanmi iti Biblia. Agingga ita, matalekda nga agserserbi iti amin-tiempo idiay Kenya. Iti simmaruno a tawen, naibaonkami idiay Kampala, Uganda. Dakami ti kaunaan a misionero sadiay. Nakaragragsak ta nagadu ti mayat nga agadal iti Biblia, ket nagbalinda a Saksi. Ngem kalpasan ti tallo ket kagudua a tawenmi idiay Africa, kayatmin ti agpamilia isu a nagawidkami iti United States. Nalidlidaykami idi panawanmi ti Africa ngem idi panawanmi ti New York. Nasursuromin nga ayaten dagiti taga-Africa ket namnamaenmi a makasublikaminto.

BARO A PRIBILEHIO

Nagyankami iti asideg ti makinlaud a kabambantayan ti Colorado, nga ayan dagiti nagannakko. Di nagbayag, nayanak ti inauna nga anakmi a ni Kimberly. Kalpasan ti 17 a bulan, nayanak met ni Stephany. Impasnekmi nga itungpal ti baro a pribilehiomi kas nagannak, ket insuromi a naimbag ti kinapudno kadagiti nagpipintas nga annakmi. Kayatmi a tuladen dagiti nagsasayaat nga ulidan a nakitami. Ammomi a dakkel ti impluensia ti nasayaat nga ulidan kadagiti annak, ngem dina kayat a sawen nga automatiko nga agserbidanto ken Jehova inton dumakkelda. Tinallikudan ngamin ti dua nga addingko ti kinapudno. Ngem sapay koma ta tuladenda manen dagiti nakitada a nasayaat nga ulidan.

Naragsakkami a mangpadakkel kadagiti annakmi ken inkagumaanmi nga aramiden dagiti bambanag kas pamilia. Gapu ta aggigiankami iti asideg ti Aspen, Colorado, sinursuromi amin ti ag-ski tapno sagpaminsan a makapagrelakskami. Dayta ti nangted kadakami iti gundaway a makisarita kadagiti annakmi aglalo no agkakalugankami iti ski lift.  Agkampingkami met no dadduma ket agiinnestoriakami bayat nga agin-inudokami. Uray no ubbingda pay idi, isalsaludsoddan ti “Anianto ti pagbalinak inton dumakkelak?” ken “Ania a klase ti lalaki ti pakiasawaak?” Inkagumaanmi nga isuro kadagiti annakmi dagiti prinsipio ti Biblia. Kanayon nga imparegtami kadakuada nga agserbida iti amin-tiempo ken makiasawada laeng iti addaan iti kasta a kalat. Insuromi kadakuada a nasaysayaat a saanda a makiasawa no ubingda pay unay. Nagaramidkami iti pagsasao nga “Awan ti makiasawa no di pay nag-23.”

Kas kadagiti nagannakmi, inkagumaanmi ti kanayon a makigimong ken mangasaba kas pamilia. Agawiskami idi kadagiti kakabsat nga adda iti amin-tiempo tapno agyanda iti balaymi. Kasta met, maragragsakankami a mangyestoria kadagiti kapadasanmi idi misionerokami pay. Nagsasaritaanmi a makapankamto koma nga uppat idiay Africa. Magagaran la unay dagiti annakmi.

Kanayon nga agadalkami kas pamilia. Idramami dagiti situasion a mabalin a mapasamak idiay eskuelaan. Dagiti annakmi ti agakem kas Saksi a mangsungbat kadagiti saludsod. Pagay-ayatda ti kasta a panagadal, ket dayta ti nangpatured kadakuada. Ngem idi dumakdakkeldan, agreklamodan no dadduma. Naminsan, imbagak a mapanda lattan iti kuartoda ket saankamin nga agadal. Nabiglada ket nagsangitda ken imbagada a kayatdan ti agadal. Naamirismi a natulonganmi met laeng ida a mangipapuso kadagiti naespirituan a bambanag uray ubbingda pay. Nasursuroda nga ipateg ti panagadal, ken nawayada a mangibaga iti rikriknada. Nagrigat laeng nga awaten no dadduma ta dida umanamong iti dadduma a sursuro ti Biblia. Ngem naammuanmi no ania a talaga ti adda iti pusoda. No mailawlawagmin ti panangmatmat ni Jehova kadagiti bambanag, makombinsirdan iti dayta.

PANNAKIBAGAY ITI DADDUMA PAY A PANAGBALBALIW

Saanmi a napupuotan ti panaglabas ti panawen bayat a pinadakkelmi dagiti annakmi. Gapu iti tulong ken panangiwanwan ti organisasion ti Dios, naikagumaanmi a padakkelen ida a mangayat ken Apo Jehova. Agyamyamankami ta agpada a nagpayunir dagiti annakmi idi naggraduarda iti hayskul, ken nagsursuroda kadagiti trabaho tapno masuportaranda ti bagida. Immakarda idiay Cleveland, Tennessee, a kadua ti dua a sister tapno agserbida iti lugar a dakdakkel ti panagkasapulanna. Kailiwmi unay idi ida, ngem naragsakkami ta us-usarenda ti biagda nga agserbi iti amin-tiempo. Nakapagpayunirkami manen ken Bethel. Gapuna, naaddaankami manen iti baro a makaparagsak a pribilehio. Nagserbiak kas suno a manangaywan iti sirkito ken nagserbikami ken baketko kadagiti trabaho bayat ti kombension.

Sakbay nga immakar idiay Tennessee dagiti annakmi, nagpasiarda idiay London, England, ken napanda iti sanga nga opisina. Agtawen idi ni Stephany iti 19. Idiay a naam-ammona ti maysa a Bethelite a ni Paul Norton. Idi nagpasiarda manen, naam-ammo met ni Kimberly ti maysa kadagiti katrabahuan ni Paul a ni Brian Llewellyn. Nagkasar da Paul ken Stephany—ngem idi nasuroken a 23 ti tawenna. Nagkasar met da Brian ken Kimberly iti simmaruno a tawen—idi agtawenen iti 25. Saanda ngarud a nakiasawa agingga a dida pay nag-23. Maragragsakankami iti nagsayaat a panagpilida iti pakiasawaan.

Kaduami da Paul, Stephany, Kimberly, ken Brian iti sanga nga opisina ti Malawi idi 2002

Imbaga dagiti annakmi a ti ulidan nga impakitami ken dagiti nagannakmi ti nakatulong kadakuada nga agtulnog iti bilin ni Jesus nga ‘itultuloy a sapulen nga umuna ti Pagarian,’ uray no awan gastuendan. (Mat. 6:33) Idi Abril 1998, naawis da Paul ken Stephany iti maika-105 a klase ti Gilead, ket naibaonda idiay Malawi, Africa. Naawis met da Brian ken Kimberly nga agserbi iti Bethel idiay London, ken idi agangay, nayakarda iti Bethel idiay Malawi. Kasta unay ti ragsakmi ta dayta ti kasayaatan a pangusaran dagiti agtutubo iti biagda.

MAKAPARAGSAK MANEN NGA AWIS

Idi Enero 2001, nakaawatak iti tawag kas nadakamat iti rugi. Inlawlawag ni Brother Marais, overseer ti Translation Services, a mangyur-urnos dagiti kakabsat iti kurso para kadagiti paraipatarus  iti intero a lubong tapno nalaklakada a maawatan ti Ingles. Kunana a maysaak kadagiti nairekomenda a masanay nga instruktor, nupay 64 ti tawenko idin. Inkararagmi dayta nga agassawa sa inlawlawagmi kadagiti baketen a nagannakmi. Agpada a kayatda a mapankami uray saanmi idan a maaywanan. Tinawagak ngarud ni Brother Marais ken imbagak a maragsakankami a mangawat iti daytoy nagsayaat a pribilehio.

Kalpasanna, nadayagnos nga adda kanser ni nanangko. Imbagak kenkuana a saankamin a pumampanaw tapno matulonganmi nga agaywan ti adingko a ni Linda. “Awan met laeng ti agbaliw,” kuna ni Nanang. “Nadagdagsen ti riknak no saankayo a mapan.” Kasta met laeng ti kuna ni Linda. Apresiarenmi ti sakripisioda ken ti tulong dagiti kakabsat iti lugarmi! Maysa nga aldaw kalpasan ti ipapanawmi a mapan iti Watchtower Educational Center idiay Patterson, timmawag ni Linda ket imbagana nga awanen ni Nanang. Kas iti kanayon idi nga iparparegta ni Nanang, nagpokuskami iti baro a trabahomi.

Maragsakankami ta ti umuna a destinomi ket iti sangay ti Malawi, a pagserserbian dagiti annakmi. Nakaragragsak dayta a panagkakaduami manen! Simmaruno a nagisurokami idiay Zimbabwe sa idiay Zambia. Kalpasan ti tallo ket kagudua a tawen a panagisuro, nagsublikami idiay Malawi tapno isuratmi ti kapadasan dagiti kakabsat a naidadanes gapu iti panagtalinaedda a neutral kas Kristiano. *

Kaduami dagiti appokomi iti pangasabaan

Idi 2005, nalidayankami manen ta nagsublikamin iti Basalt, Colorado, a nangituloyanmi iti panagpayunirmi ken Bethel. Idi 2006, immakar met da Brian ken Kimberly iti abay ti balaymi tapno padakkelen ti annakda a da Mackenzie ken Elizabeth. Adda pay laeng da Paul ken Stephany idiay Malawi. Agserserbi ni Paul a miembro ti Branch Committee. Dandani 80 ti tawenkon ket maragsakanak a makakita iti ubbing pay a kakabsat a lallaki a nakatrabahuak iti adu a tawen a mangibakbaklay kadagiti responsabilidad a naitalek kaniak idi. Ti ragsak a marikriknami ita ket nangnangruna a gapu kadagiti nasayaat nga ulidan a nakitami idi ken iti panangikagumaanmi a mangtulad kadagita para iti pagsayaatan dagiti annak ken appokomi.

^ par. 5 Kitaen dagiti magasin a Watchtower a Mayo 1, 1956, p. 269-272, ken Marso 15, 1971, p. 186-190, tapno ad-adu pay ti maammuam maipapan iti panagmisionero dagiti miembro ti pamilia Steele.

^ par. 30 Kas pagarigan, kitaen ti pakasaritaan ti biag ni Trophim Nsomba iti Pagwanawanan nga Abril 15, 2015, p. 14-18.