Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Oktubre 2016

Ipakitam ti Pammatim Kadagiti Kari ni Jehova

Ipakitam ti Pammatim Kadagiti Kari ni Jehova

Ti pammati ket ti natibker a pammaneknek kadagiti bambanag a saan a makita.—HEB. 11:1.

KANTA: 54, 125

1. Ania ti masapul a pangibilangantayo iti pammati?

NAKAPATPATEG ti pammati kadagiti Kristiano. Saan nga amin a tao ket addaan iti dayta. (2 Tes. 3:2) Ngem inikkan ni Jehova ti amin nga agdaydayaw kenkuana iti umno a “rukod ti pammati.” (Roma 12:3; Gal. 5:22) Masapul nga agyaman ti amin nga addaan iti dayta.

2, 3. (a) Ania dagiti bendision a mabalin a magun-odan dagiti addaan iti pammati? (b) Ania dagiti saludsod nga usigentayo?

2 Kinuna ni Jesu-Kristo a dagiti tattao ket iyasideg ti nailangitan nga Amana iti bagina babaen ti Anakna. (Juan 6:44, 65) No addaantayo iti pammati ken Jesus, mabalin a mapakawan dagiti basoltayo. Gapu iti dayta, posible a maaddaantayo iti agnanayon a pannakigayyem ken Jehova. (Roma 6:23) Ania ti inaramidtayo tapno maaddaantayo iti kasta a nagsayaat a bendision? Kas managbasol, ipapatay laeng ti pakaikariantayo. (Sal. 103:10) Ngem ammo ni Jehova a kabaelantayo ti agaramid iti naimbag. Gapu iti di kaikarian a kinamanangngaasina, impakaammona kadatayo ti naimbag a damag. Kalpasanna, nagtignaytayo maitunos iti pammatitayo  ken Jesus, ket naaddaantayo iti namnama a biag nga agnanayon.—Basaen ti 1 Juan 4:9, 10.

3 Ngem ania a talaga ti pammati? Basta laeng kadi panangammo kadagiti bendision nga isagsagana ti Dios kadatayo? Kanayonanna, kasanotayo a maipakita nga adda pammatitayo?

“WATWATEM TI PAMMATI ITI PUSOM”

4. Apay a ti pammati ket saan la a basta panangammo iti panggep ti Dios?

4 Ti pammati ket saan laeng a basta panangammo iti panggep ti Dios. Dayta ket nabileg a puersa a mangtignay iti maysa nga agbiag maitunos iti pagayatan ti Dios. Ti panamati ken Jesus ken iti Dios ti mangtignay iti maysa a mangipakaammo iti naimbag a damag. Inlawlawag ni apostol Pablo: “No silalatak nga ideklaram dayta a ‘sao iti bukodmo a ngiwat,’ a ni Jesus ket Apo, ket watwatem ti pammati iti pusom nga isu imbangon ti Dios manipud kadagiti natay, maisalakankanto. Ta buyogen iti puso watwaten ti maysa ti pammati maipaay iti kinalinteg, ngem buyogen iti ngiwat mangaramid ti maysa iti publiko a panangideklara maipaay iti pannakaisalakan.”—Roma 10:9, 10; 2 Cor. 4:13.

5. Apay a nagpateg ti pammati, ken kasanotayo a mapagtalinaed a natibker dayta? Iyilustrarmo.

5 Nalawag nga agbiagtayo laeng nga agnanayon iti baro a lubong nga ipaay ti Dios no adda pammatitayo ken no pagtalinaedentayo a natibker dayta. Ti agtultuloy a panangpatibker iti pammati ket kas iti kanayon a panangsibug iti mula. Saan a kas iti artipisial a mula, agtultuloy ti panagbalbaliw ti agpaypayso a mula. Malaylay no kurang ti pannakasibugna ngem agtultuloy a lumangto no kanayon a masibugan. Uray nalangto ti mula no kurang ti danum a maisibug, malaylay ken matay inton agangay. Kasta met ti pammatitayo—malaylay ken matay no mabaybay-an. (Luc. 22:32; Heb. 3:12) Ngem no aywanantayo a naimbag, agtultuloy nga agbiag ken ‘dumakkel’ dayta, iti kasta, ‘sumalun-at ti pammatitayo.’—2 Tes. 1:3; Tito 2:2.

TI PAMMATI SIGUN ITI BIBLIA

6. Sigun iti Hebreo 11:1, ania ti dua a pannakadeskribir ti pammati?

6 Nadeskribir ti pammati iti Hebreo 11:1. (Basaen.) Naipamaysa ti pammati iti dua a banag a saantayo a makita: (1) “Bambanag nga in-inanamaen”—mabalin a karaman iti daytoy dagiti naikari a mapasamak iti masanguanan ngem saan pay a natungpal, kas iti baro a lubong ken ti panagpatingga ti amin a kinadakes. (2) ‘Dagiti kinapudno a saan a makita.’ Iti daytoy a konteksto, ti Griego a sao a naipatarus kas “nabatad a parangarang” ket tumukoy iti natibker a pammaneknek kadagiti kinapudno a saan a makita, kas iti kaadda ni Jehova a Dios, ni Jesu-Kristo, dagiti anghel, ken ti mapaspasamak iti Pagarian idiay langit. (Heb. 11:3) Kasanotayo a maipakita nga agpaypayso ti namnamatayo ken mamatitayo kadagiti saan a makita a banag a dinakamat ti Sao ti Dios? Babaen ti sao ken aramidtayo—a no awan dagita, awan serserbi ti pammatitayo.

7. Kasano a makatulong ti ulidan ni Noe tapno maawatantayo no kasanotayo a maipakita ti pammati? (Kitaen ti ladawan iti rugi ti artikulo.)

7 Naitampok iti Hebreo 11:7 ti pammati ni Noe, a “kalpasan a naipaayan iti nadibinuan a pakdaar maipapan iti bambanag a saan pay a nakita, nangipakita . . . iti nadiosan a buteng ket nangibangon iti daong a pakaisalakanan ti sangakabbalayanna.” Impakita ni Noe ti pammatina idi inaramidna ti nagdakkel a daong. Dinamag la ketdi dagiti kaarrubana no apay nga agar-aramid iti daong. Nagulimek kadi ni Noe wenno imbagana a dida pakibiangan? Saan! Tinignay ti pammatina a situtured a mangasaba ken mangpakdaar kadagiti tattao maipapan iti asideg idin a panangukom ti Dios. Mabalin a maulit-ulit nga imbaga ni Noe kadakuada ti eksakto  nga imbaga ni Jehova kenkuana: “Ti panungpalan ti isuamin a lasag dimtengen iti imatangko, agsipud ta ti daga napno iti kinaranggas maigapu kadakuada . . . Adtoy iyegko ti layus ti dandanum iti rabaw ti daga tapno mangdadael iti isuamin a lasag a kadakuada aktibo ti puersa ti biag iti baba ti langlangit. Isuamin nga adda iti daga mauyosto ti biagda.” Sigurado nga inlawlawag met ni Noe kadagiti tattao ti kakaisuna a pamay-an tapno maisalakanda. Inulitna ti bilin ti Dios: “Masapul a sumrekka iti daong.” Gapu iti dayta, ad-adda a naipakita ni Noe ti pammatina babaen ti panagbalinna a “manangaskasaba iti kinalinteg.”—Gen. 6:13, 17, 18; 2 Ped. 2:5.

8. Ania ti inlawlawag ni adalan a Santiago maipapan iti kaipapanan ti pudno a pammati dagiti Kristiano?

8 Mabalin a naisurat ti libro a Santiago di unay nabayag kalpasan nga insurat ni Pablo ti pannakadeskribir ti pammati. Kas ken Pablo, inlawlawag ni Santiago a ti pudno a pammati dagiti Kristiano ket saan la a basta panamati; kasapulan ti aramid. “Ipakitam kaniak ti pammatim a naisina kadagiti aramid,” insurat ni Santiago, “ket ipakitak kenka ti pammatik babaen kadagiti aramidko.” (Sant. 2:18) Inlawlawagna pay a saan nga umdas a basta mamatitayo tapno makuna nga adda pammatitayo. Mamati dagiti demonio nga adda Dios, ngem awan ti pudno a  pammatida. Laplapdanda ketdi ti pannakatungpal dagiti panggep ti Dios. (Sant. 2:19, 20) Iti sabali a bangir, insaludsod ni Santiago ti maipapan iti nagkauna nga ulidan iti pammati: “Saan kadi a ni Abraham nga amatayo naideklara a nalinteg babaen kadagiti aramid kalpasan a naidatonna ni Isaac nga anakna iti rabaw ti altar? Makitam a ti pammatina nagtignay a maibuyog iti ar-aramidna ket babaen iti ar-aramidna naan-anay ti pammatina.” Tapno maipaganetget ni Santiago a ti pammati ket masapul a maipakita iti aramid, innayonna: “No kasano a ti bagi nga awanan espiritu ket natay, kasta met a ti pammati nga awanan ar-aramid natay.”—Sant. 2:21-23, 26.

9, 10. Kasano a makatulong ni apostol Juan tapno maawatantayo ti kinapateg ti panangipakita iti pammatitayo?

9 Nasurok a tallo a dekada kalpasanna, insurat ni apostol Juan ti Ebangheliona ken ti tallo a suratna. Impategna kadi ti sasao nga inusar ti dadduma a mannurat ti Biblia a mangilawlawag iti kaipapanan ti pudno a pammati dagiti Kristiano? Saan a kas iti dadduma a mannurat ti Biblia, ni Juan ti kaaduan a nangusar iti Griego a sao a maipatarus no dadduma kas “watwatem ti pammati.”

10 Kas pagarigan, inlawlawag ni Juan: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag, ngem agtalinaed kenkuana ti pungtot ti Dios.” (Juan 3:36) Ti pammati dagiti Kristiano ramanenna ti panagtulnog kadagiti bilin ni Jesus. Masansan a dinakamat ni Juan iti suratna dagiti sasao ni Jesus a mangipakita a masapul nga agtultuloy ti panangwatwat, wenno panangipakita, iti pammati.—Juan 3:16; 6:29, 40; 11:25, 26; 14:1, 12.

11. Kasanotayo a maipakita ti panagyamantayo ta naammuantayo ti kinapudno?

11 Agyamantayo ta inusar ni Jehova ti nasantuan nga espirituna a mangipakaammo kadatayo iti kinapudno ken tapno maaddaantayo iti pammati iti naimbag a damag! (Basaen ti Lucas 10:21.) Kanayon koma nga agyamantayo ken Apo Jehova gapu iti panangyasidegna kadatayo iti bagina babaen ti Anakna, ti “Kangrunaan nga Ahente ken Manangan-anay iti pammatitayo.” (Heb. 12:2) Tapno maipakitatayo ti panagyamantayo iti dayta a di kaikarian a kinamanangngaasi, masapul nga itultuloytayo a patibkeren ti pammatitayo babaen ti kararag ken panangadal iti Sao ti Dios.—Efe. 6:18; 1 Ped. 2:2.

Ipakitam ti pammatim babaen ti panangikasabam iti naimbag a damag iti aniaman a gundaway (Kitaen ti parapo 12)

12. Kadagiti ania a pamay-an a maipakitatayo ti pammatitayo?

12 Masapul nga itultuloytayo nga ipakita ti pammatitayo kadagiti kari ni Jehova. Masapul nga aramidentayo dayta iti pamay-an a nalawag a makita ti dadduma. Kas pagarigan, itultuloytayo nga ikasaba ti maipapan iti Pagarian ti Dios ken makiraman iti panagaramid iti ad-adalan. Masapul met nga itultuloytayo nga ‘aramiden ti naimbag kadagiti amin, ngem nangnangruna kadagidiay nainaig kadatayo iti pammati.’ (Gal. 6:10) Ikagumaantayo met nga ‘uksoben ti daan a personalidad agraman dagiti aramidna’ tapno maliklikantayo ti aniaman a mangpakapuy iti espiritualidadtayo.—Col. 3:5, 8-10.

TI PAMMATITAYO ITI DIOS KET PASET TI PUNDASIONTAYO

13. Kasano kapateg ti “pammati iti Dios”? Ania ti nakayariganna, ken apay?

13 Kuna ti Biblia a “no awan ti pammati isu di mabalin nga ay-aywen a naan-anay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Heb. 11:6) Dineskribir ti Biblia ti “pammati iti Dios” kas paset ti “pamuon,” wenno pundasion, a kasapulan ti maysa a tao tapno agbalin ken agtalinaed kas pudno a Kristiano. (Heb. 6:1) Dagiti Kristiano  masapul nga ‘inayonda iti pammatida’ ti dadduma a napateg a kualidad tapno ‘agtalinaedda iti ayat ti Dios.’—Basaen ti 2 Pedro 1:5-7; Jud. 20, 21.

14, 15. No ikompara iti ayat, kasano kapateg ti pammati?

14 Impaganetget dagiti Kristiano a mannurat iti Biblia ti kinapateg ti pammati babaen ti panangtukoyda iti dayta iti ginasut a daras. Awanen ti sabali a kualidad a kasta ti kaadu ti pannakaulitna. Kaipapanan kadi dayta a ti pammati ti kapatgan a kualidad a masapul a maadda kadagiti Kristiano?

15 Inkompara ni Pablo ti pammati iti ayat. Insuratna: “No addaanak iti amin a pammati tapno iyakarko dagiti bantay, ngem awan ayatko, awan kaes-eskak.” (1 Cor. 13:2) Inyunay-unay ni Jesus ti kapatgan a kualidad, ti panagayat iti Dios, idi sinungbatanna ti saludsod nga: “Ania ti kadakkelan a bilin iti Linteg?” (Mat. 22:35-40) Makatulong ti ayat tapno maaddaantayo iti adu a nagpateg a Nakristianuan a kualidad, a pakairamanan ti pammati. Kuna ti Biblia: “Ti ayat . . . patienna ti amin a bambanag.” Patienna ti amin nga imbaga ti Dios.—1 Cor. 13:4, 7.

16, 17. Kasano nga agpada a nadakamat iti Biblia ti pammati ken ayat, ngem ania kadagita ti kapatgan, ken apay?

16 Gapu iti kinapateg ti pammati ken ayat, namin-adu nga agpada a dinakamat dagiti Kristiano a mannurat ti Biblia dagitoy a kualidad, masansan nga iti maysa a sentensia wenno grupo dagiti sasao. Pinaregta ni Pablo dagiti kakabsat nga ‘ikapetda ti kabal ti barukong nga isu ti pammati ken ayat.’ (1 Tes. 5:8) Insurat ni Pedro: “Nupay saanyo a pulos nakita [ni Jesus], isu ay-ayatenyo. Nupay saankayo a kumitkita kenkuana iti agdama, kaskasdi a watwatwatenyo ti pammati kenkuana.” (1 Ped. 1:8) Insaludsod ni Santiago kadagiti napulotan a kakabsatna: “Saan aya a ti Dios pinilina dagidiay napanglaw maipapan iti lubong tapno agbalinda a nabaknang iti pammati ken agtawid iti pagarian, nga inkarina kadagidiay agayat kenkuana?” (Sant. 2:5) Insurat ni Juan: “Daytoy ti bilin [ti Dios], a maaddaantayo ti pammati iti nagan ti Anakna a ni Jesu-Kristo ken ayatentayo ti maysa ken maysa.”—1 Juan 3:23.

17 Nupay napateg ti pammati, mapukawton ti dadduma nga aspeto dayta inton matungpal dagiti kari ti Dios ken matagiragsaktayo ti namnamatayo kas Kristiano. Ngem kasapulanto latta nga ad-adda nga ayatentayo ti Dios ken dagiti tattao. Isu nga insurat ni Pablo: “Ita, nupay kasta, mataginayon ti pammati, namnama, ayat, dagitoy a tallo; ngem ti kadakkelan kadagitoy isu ti ayat.”—1 Cor. 13:13.

NABILEG A PAKAKITAAN ITI PAMMATI

18, 19. Ania ti nabileg a pakakitaan iti pammati ita, ken asino ti maikari a maidaydayaw gapu iti dayta?

18 Ipakpakita ita dagiti adipen ni Jehova ti pammatida iti naipasdeken a Pagarian ti Dios. Nagresulta dayta iti irarang-ay ti naespirituan a paraiso iti intero a lubong, nga addaan itan iti nasurok a walo a milion a tattao. Aglaplapusanan ti panangipakitada iti bunga ti espiritu ti Dios. (Gal. 5:22, 23) Talaga a nagbileg a pakakitaan dayta iti pudno a pammati ken ayat dagiti Kristiano!

19 Ti Diostayo ti makinggapuanan iti dayta, saan a tao. Mangmangted daytoy iti ‘kinalatak maipaay ken Jehova, maysa a pagilasinan agingga iti tiempo a di nakedngan a saanto a magessat.’ (Isa. 55:13) Ngarud, “sagut ti Dios” a ‘maisalakantayo babaen ti pammati.’ (Efe. 2:8) Agtultuloy a dumakkel ken rumang-ay ti naespirituan a paraisotayo agingga a mapno ti intero a daga kadagiti perpekto, nalinteg, ken naragsak a tattao nga agnanayon a mangidaydayaw iti nagan ni Jehova. Sapay koma ta itultuloytayo nga ipakita ti pammatitayo kadagiti kari ni Jehova!