Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Oktubre 2016

Diyo Lipatan ti Kinamanangngaasi Kadagiti Ganggannaet

Diyo Lipatan ti Kinamanangngaasi Kadagiti Ganggannaet

“Dikay lipatan ti kinamanagpadagus [wenno, kinamanangngaasi kadagiti ganggannaet].”—HEB. 13:2.

KANTA: 124, 79

1, 2. (a) Ania dagiti parikut a pakaipaspasanguan ita dagiti ganggannaet? (Kitaen ti ladawan iti rugi ti artikulo.) (b) Ania ti impalagip ni apostol Pablo, ken ania dagiti saludsod nga usigentayo?

NASUROK a 30 a tawen ti napalabasen idi simmangpet ni Osei [1] idiay Europe manipud Ghana. Saan pay idi a Saksi ni Osei. Malagipna: “Nadlawko nga awan bibiang kaniak dagiti tattao. Naikawaak met iti klima. Idi pimmanawak iti airport ken damo a nariknak ti lamiis, nagsangitak.” Gapu ta marigatan ni Osei iti lengguahe iti napananna, nasurok a makatawen nga awan ti nasayaat a trabahona. Naliday ni Osei ken mailiwen iti pamiliana gapu ta adayon kadakuada.

2 Panunotem no kasano ti kayatmo a pannakatrato no kasta ti situasionmo. Saan kadi a kayatmo a nabara ti panangabrasa kenka dagiti kakabsat iti Kingdom Hall, sadinoman ti naggapuam wenno aniaman ti pulim? Kinapudnona, iparegta ti Biblia kadagiti pudno a Kristiano: “Dikay lipatan ti kinamanagpadagus,” wenno kinamanangngaasi kadagiti ganggannaet. (Heb. 13:2) Usigentayo ngarud  dagitoy a saludsod: Ania ti panangmatmat ni Jehova kadagiti ganggannaet? Apay a mabalin a masapul a baliwantayo ti panangmatmattayo kadagiti ganggannaet? Ken kasano a maipariknatayo kadagiti naggapu iti sabali a lugar a komportableda ken paset ida ti kongregasiontayo?

TI PANANGMATMAT NI JEHOVA KADAGITI GANGGANNAET

3, 4. Sigun iti Exodo 23:9, kasano koma ti panangtrato dagiti nagkauna nga adipen ti Dios kadagiti ganggannaet, ken apay?

3 Kalpasan nga inispal ni Jehova dagiti adipenna manipud Egipto, nangted kadagiti linteg a nangipaay iti kanayonan a konsiderasion kadagiti saan nga Israelita a kimmuyog kadakuada. (Ex. 12:38, 49; 22:21) Saan a matagiragsak dagiti ganggannaet ti amin a tagtagiragsaken dagiti Israelita. Gapuna, siaayat a nangipaay ni Jehova iti urnos para kadakuada kas iti panagadas.—Lev. 19:9, 10.

4 Imbes nga ibilin ni Jehova kadagiti Israelita a raemenda dagiti ganggannaet, imbagana a kaasianda ida. (Basaen ti Exodo 23:9.) Ammoda ti rikna ti maysa a ganggannaet. Sakbay pay a maadipen dagiti Hebreo, ipuerpuera idan dagiti Egipcio. Mabalin a gapu ta nababa ti panangmatmatda kadagiti Hebreo wenno gapu iti relihionda. (Gen. 43:32; 46:34; Ex. 1:11-14) Naparparigat dagiti Israelita idi nagbalinda a ganggannaet iti Egipto, ngem namnamaen ni Jehova nga ibilangda kas kailianda dagiti ganggannaet nga agnanaed iti lugarda.—Lev. 19:33, 34.

5. Ania ti makatulong kadatayo a mangiparikna iti pannakaseknan ni Jehova kadagiti naggapu iti sabali a lugar wenno sabali ti pulina?

5 Masiguradotayo a maseknan met ita ni Jehova kadagiti makigimong iti kongregasiontayo a naggapu iti sabali a lugar wenno sabali ti pulina. (Deut. 10:17-19; Mal. 3:5, 6) Makapasarda iti panangidumduma wenno marigatanda a makikomunikar. No panunotentayo dagita a pakaipaspasanguanda, matignaytayo a mangaramid iti pamay-an a mangipakita kadakuada iti asi, kinaimbag, ken pannakipagrikna.—1 Ped. 3:8.

MASAPUL KADI A BALIWANTAYO TI PANANGMATMATTAYO KADAGITI GANGGANNAET?

6, 7. Ania ti mangipakita a nasursuro dagiti Kristiano idi umuna a siglo a baliwan ti panangidumduma a gagangay idi kadakuada?

6 Nasursuro dagiti Kristiano idi umuna a siglo a balbaliwan ti panangidumduma a gagangay kadagiti Judio. Idi Pentecostes 33 C.E., impakita dagiti agnanaed idiay Jerusalem ti kinamanagpadagus kadagiti kabbaro a Kristiano a naggapu iti nagduduma a lugar. (Ara. 2:5, 44-47) Impakita dagiti Judio a Kristiano ti naayat a pannakaseknan kadagiti kapammatianda a saanda a kailian. Patalgedan dayta a talaga nga ammoda ti kaipapanan ti sao a “kinamanagpadagus,” kayatna a sawen, kinamanangngaasi kadagiti ganggannaet.

7 Ngem bayat nga umad-adu dagiti Kristiano idi umuna a siglo, adda timmaud a problema a mabalin a gapu iti panangidumduma. Nagreklamo dagiti Judio a Griego ti pagsasaona ta saan a patas ti pannakatrato dagiti balo a kailianda. (Ara. 6:1) Tapno marisut dayta, nangdutok dagiti apostol iti pito a lallaki tapno masigurado nga awan ti mabaybay-an. Addaan met dagitoy a lallaki iti Griego a nagan. Mabalin nga ipakita dayta a kayat dagiti apostol a maikkat ti aniaman a di pagkikinnaawatan gapu iti puli a mabalin a napasamak kadagiti Kristiano idi.—Ara. 6:2-6.

8, 9. (a) Ania ti mabalin a mangipakita a mangidumdumatayo wenno ipagaruptayo a natantan-ok ti pulitayo? (b) Ania ti masapul a parutentayo iti pusotayo? (1 Ped. 1:22)

8 Kayattayo man wenno saan, dakkel ti impluensia kadatayo ti kulturatayo. (Roma 12:2) Kasta met, mabalin a mangngegtayo dagiti kaarruba, katrabahuan, wenno kaeskuelaantayo a manguyaw kadagiti naggapu  iti sabali a lugar, sabali ti tribuna, wenno pulina. Kasano kadakkel ti impluensia kadatayo ti kasta a panangidumduma? Ken ania ti reaksiontayo no pagkakatawaanda ti pulitayo gapu iti dadduma a pakabigbigan ti kulturatayo?

9 Adda met idi tiempo nga indumduma ni apostol Pedro dagiti saan a Judio, ngem in-inut a nasursurona nga ikkaten dayta iti pusona. (Ara. 10:28, 34, 35; Gal. 2:11-14) Kasta met, no madlawtayo nga adda uray bassit a panangidumdumatayo wenno ipagaruptayo a natantan-ok ti pulitayo, ikagumaantayo koma a paruten dayta iti pusotayo. (Basaen ti 1 Pedro 1:22.) Makatulong no bigbigentayo a saantayo koma a talaga a maikari a maisalakan; imperpektotayo amin, aniaman ti pulitayo. (Roma 3:9, 10, 21-24) Apay ngay ngarud nga ibilangtayo a natantan-oktayo ngem iti dadduma? (1 Cor. 4:7) Tuladentayo koma ti panangmatmat ni apostol Pablo. Binalakadanna dagiti padana a napulotan a Kristiano a ‘saandan a sangsangaili ken ganggannaet nga agnanaed, no di ket . . . kamkameng ti sangakabbalayan ti Dios.’ (Efe. 2:19) Ikagumaantayo a balbaliwan ti saan a nasayaat a panangmatmattayo kadagiti sabali ti pulina. Makatulong dayta kadatayo a mangikawes iti baro a personalidad.—Col. 3:10, 11.

NO KASANO NGA IPAKITA TI KINAMANANGNGAASI KADAGITI GANGGANNAET

10, 11. Iti pannakilangen ni Boaz iti Moabita a ni Ruth, kasano nga impakitana ti panangmatmat ni Jehova kadagiti ganggannaet?

10 Iti pannakilangen ni Boaz iti Moabita a ni Ruth, impakitana ti panangmatmat ni Jehova kadagiti ganggannaet. Bayat ti panagani, napan kinita ni Boaz ti talonna. Napaliiwna nga adda nagaget a ganggannaet a babai nga agad-adas a sumarsaruno kadagiti paraanina. Idi naammuan ni Boaz a nagpakada ni Ruth nga agadas—nupay karbenganna nga aramiden dayta uray saan nga agpakada—impalubosna nga agala uray kadagiti nareppeten a sebada.—Basaen ti Ruth 2:5-7, 15, 16.

11 Ipakita ti simmaruno a panagsaritada a talaga a maseknan ni Boaz ken ni Ruth ken iti narigat a sasaadenna kas ganggannaet. Imbagana ken Ruth a makikadua kadagiti babbai a paraanina tapno saan nga an-anuen dagiti lallaki nga agtrabtrabaho iti talon. Siniguradona pay nga adda umdas a makan ken inumenna, kas kadagiti trabahadorna. Kanayonanna, saan a nagsao ni Boaz iti mangipababa ken Ruth. Imbes ketdi, pinatibkerna ti pakinakemna.—Ruth 2:8-10, 13, 14.

12. Ania ti pagimbaganna no ipakitatayo ti asi ken kinaimbag kadagiti kabbaro a naggapu iti sabali a lugar wenno sabali ti pulina?

12 Natignay ti puso ni Boaz gapu iti panagsakripisio ken panagayat ni Ruth iti katuganganna a ni Noemi. Ad-adda pay a naapresiarna ni Ruth ta nagbalin nga adipen ni Jehova. Kinapudnona, ti kinaimbag nga impakita ni Boaz ket ebkas ti nasungdo nga ayat ni Jehova iti babai a ‘nagkamang iti sidong dagiti payak ti Dios ti Israel.’ (Ruth 2:12, 20; Prov. 19:17) Kasta met laeng ita. No naasitayo, matulongantayo ti “amin a kita ti tattao” a mangammo iti kinapudno ken matulongantayo ida a makarikna nga ay-ayaten ida ni Jehova.—1 Tim. 2:3, 4.

Nabara kadi ti panangawattayo kadagiti kabbaro a makigimgimong? (Kitaen ti parapo 13, 14)

13, 14. (a) Apay nga ikagumaantayo koma a kablaawan dagiti makigimong a ganggannaet? (b) Ania ti aramidem no saanka a komportable nga umasideg iti sabali ti kulturana?

13 Maipakitatayo ti asi ken kinaimbag kadagiti kabbaro a makigimgimong a naggapu iti sabali a lugar wenno sabali ti pulina no sibabara nga abrasaentayo ida. Mabalin a mapaliiwtayo a mababain wenno agpapaigidda. Gapu iti pannakapadakkel wenno kasasaad ti biagda, mabalin a mariknada a nababbaba ti pulida ngem iti sabali. Datayo koma ngarud ti umuna a mangipakita iti nabara ken pudpudno nga interes kadakuada. No magun-odan iti lengguaheyo ti JW Language app,  makatulong dayta tapno makablaawanyo ida iti lengguaheda.—Basaen ti Filipos 2:3, 4.

14 Mabalin a saanka a komportable nga umasideg kadagiti sabali ti kulturana. Tapno malabanam dayta, mabalin a mangyestoriaka iti maipapan kenka. Inton agangay, maammuam nga ad-adu gayam ti pagpadaanyo ngem iti pampanunotem a pagdumaanyo ken nagduduma ti paglaingan ken pagkapuyan ti tunggal kultura.

IPARIKNATAYO A KOMPORTABLEDA

15. Ania ti makatulong kadatayo tapno ad-adda a maawatantayo dagiti nabiit pay nga immakar iti pagiliantayo?

15 Tapno maipariknatayo iti dadduma a komportable ti riknada iti kongregasiontayo, isaludsodtayo iti bagitayo, ‘No addaak iti sabali a pagilian, kasano ti kayatko a pannakatrato?’ (Mat. 7:12) An-anusanyo dagiti nabiit pay nga immakar iti pagilianyo. Iti damo, mabalin a saantayo a naan-anay a maawatan ti panagpampanunot wenno panagtigtignayda. Ngem imbes a namnamaentayo a mairuamda iti kulturatayo, apay a saantayo lattan nga awaten ida?—Basaen ti Roma 15:7.

16, 17. (a) Ania dagiti mabalin nga aramidentayo tapno ad-adda nga umasideg ti riknatayo kadagiti sabali ti kulturana? (b) Kasano a matulongantayo dagiti kakabsat iti kongregasiontayo a naggapu iti sabali a pagilian?

16 No ammotayo ti maipapan iti lugar ken kultura dagiti ganggannaet, nalaklaka ti makilangen kadakuada. Mabalin a pagsasaritaantayo iti panagdaydayaw ti pamiliatayo ti maipapan iti kultura dagiti tattao a saantayo unay a pamiliar nga adda iti kongregasiontayo wenno iti teritoriatayo. Ti sabali pay a pamay-an tapno umasideg ti riknatayo kadagiti naggapu iti sabali a lugar wenno sabali ti pulina ket ti panangawis kadakuada iti pagtaengantayo para iti pannangan. Gapu ta linuktanen ni Jehova “kadagiti nasion ti ruangan nga agturong iti pammati,” saan kadi a masapul a luktantayo koma met ti ruangantayo para kadagiti ganggannaet a “nainaig kadatayo iti pammati”?—Ara. 14:27; Gal. 6:10; Job 31:32.

Managpadagus ken naasitayo kadi kadagiti kabbaro a naggapu iti sabali a pagilian? (Kitaen ti parapo 16, 17)

 17 No kanayon a makikaduatayo iti pamilia nga immakar iti pagiliantayo, ad-adda a maapresiartayo ti panagreggetda a makibagay iti kulturatayo. Ngem mabalin a makitatayo a kasapulanda ti tulong tapno masursuroda ti lengguahetayo. Kasta met, mabalin kadi nga isurotayo kadakuada no kasano a maaddaanda iti nasayaat a pagtaengan wenno trabaho? Dagita a panagsakripisio ket dakkel ti maitulongna iti biag ti kapammatiantayo.—Prov. 3:27.

18. Asino ti nagsayaat a tuladen dagiti naggapu iti sabali a pagilian maipapan iti panagraem ken panagyaman, ken kasano nga aramidenda dayta?

18 Siempre, ikagkagumaan dagiti naggapu iti sabali a pagilian ti mairuam iti kultura ti pagilian nga immakaranda. Nagsayaat ti ulidan nga impakita ni Ruth iti dayta. Umuna, rinaemna dagiti kaugalian ti baro a pagilianna idi nagpakada nga agadas. (Ruth 2:7) Saanna a ginundawayan dayta a kalintegan a kasla ketdi adda utang ti dadduma kenkuana. Maikadua, nagyaman a dagus gapu iti asi ken kinaimbag a naipakita kenkuana. (Ruth 2:13) No tuladen dagiti naggapu iti sabali a pagilian ti nagsayaat nga ulidan ni Ruth, ad-adda a magun-odda ti panagraem dagiti umili ken dagiti kapammatianda.

19. Ania dagiti rason nga awatentayo dagiti ganggannaet?

19 Makaparagsak ta gapu iti di kaikarian a kinamanangngaasi ni Jehova palpalubosanna a maammuan ti amin a kita ti tattao ti naimbag a damag. Iti pagilianda, mabalin a saan a posible a makipagadalda iti Biblia wenno makilangen kadagiti Saksi ni Jehova. Ngem ita ta makalangendatayon, saan kadi a nagsayaat no tulongantayo ida tapno dida marikna a ganggannaetda? No naasitayo kadakuada, uray no limitado ti material wenno praktikal a tulong a maitedtayo, iparpariknatayo kadakuada ti ayat ni Jehova. Gapuna, kas “tumutulad iti Dios,” aramidentayo ti amin a kabaelantayo a mangawat kadagiti ganggannaet.—Efe. 5:1, 2.

^ [1] (parapo 1) Nabaliwan ti nagan.