Mapan iti linaonna

Mapan iti listaan dagiti linaonna

Siraragsak nga Agkantatayo!

Siraragsak nga Agkantatayo!

“Nasayaat ti mangipaay iti samiweng iti Diostayo.”—SAL. 147:1.

KANTA: 9, 138

1. Ania ti maaramidtayo no agkantatayo?

KINUNA ti maysa a nalatak a mannurat iti kanta: “Dagiti sasao pagpanunotendaka. Ti musika tulongannaka a mangrikna iti rikrikna. Ngem ti kanta makatulong a mangiparikna iti kapanunotan.” Adda kadi pay nasaysayaat a “rikna” ngem ti panangyebkastayo iti ayat ken panangidaydayaw iti nailangitan nga Amatayo a ni Jehova? Nalawag a napateg a paset ti nadalus a panagdaydayaw ti panagkanta, agmaymaysaka man wenno kaduatayo nga agkanta dagiti adipen ti Dios.

2, 3. (a) Ania ti marikna ti dadduma iti napigsa a panagkanta iti kongregasion? (b) Ania dagiti saludsod nga usigentayo?

2 Ngem ania ti panagriknam iti napigsa a panagkanta iti kongregasion? Nakababain kadi? Iti dadduma a kultura, alusiisen dagiti lallaki nga agkanta iti publiko. Mabalin nga apektaran dayta a kapanunotan ti kongregasion, nangruna no agpambar dagiti mangidadaulo tapno saanda nga agkanta wenno adda sabali nga aramidenda bayat nga agkankanta ti kongregasion.—Sal. 30:12.

3 No ibilangtayo ti panagkanta a paset ti panagdaydayawtayo, saantayo a kayat a panawan wenno langanan dayta a paset ti gimong. Gapuna, isaludsodtayo: ‘Ania ti panangmatmatko iti  panagkanta kadagiti gimong? Ania ti makatulong tapno saanak a mabain a siraragsak nga agkanta? Ken ania ti aramidek tapno mayebkasko a naimbag ti emosion ti kanta?’

PANAGKANTA—NAPATEG A PASET TI PUDNO A PANAGDAYDAYAW

4, 5. Kasano kadakkel ti nayurnos a panagkanta para iti panagdaydayaw iti nagkauna nga Israel?

4 Nabayagen nga us-usaren dagiti matalek nga agdaydayaw ken Jehova ti musika a mangidaydayaw kenkuana. Makapainteres ta idi simamatalek nga agserserbi ken Jehova dagiti nagkauna nga Israelita, nagpateg a paset ti panagdaydayawda ti panagkanta. Kas pagarigan, idi agsagsaganada para iti maysa a seremonia iti templo, inorganisar ni Ari David ti 4,000 a Levita nga agtokar ken agkanta iti pangidaydayaw. Adda 288 kadakuada a nasanay nga agkanta para ken Jehova, ‘nalaingda amin.’—1 Cron. 23:5; 25:7.

5 Idi naidedikar ti templo, nagpateg ti papel ti musika ken panagkanta. Kuna ti salaysay: “Apaman a nagmaymaysa dagiti tumutrumpeta ken dagiti kumakanta iti panangipangngeg iti maysa nga uni iti panangidaydayaw ken panagyaman ken Jehova, ken apaman nga impigsada ti uni buyogen dagiti trumpeta ken buyogen dagiti piangpiang ken buyogen dagiti pagtokar iti kanta ken buyogen ti panangidaydayaw ken Jehova, . . . ti dayag ni Jehova pinunnona ti balay ti pudno a Dios.” Makapabileg la ketdi iti pammati dayta nga okasion!—2 Cron. 5:13, 14; 7:6.

6. Iladawanmo ti espesial a panagkanta bayat ti panagturay ni Nehemias kas gobernador ti Jerusalem.

6 Idi indauluan ni Nehemias dagiti matalek nga Israelita a mangibangon manen iti pader ti Jerusalem, inorganisarna met dagiti kumakanta a Levita a madanggayan iti tokar ti adu nga instrumento. Idi naidedikar ti pader, nagdakkel ti naitulong ti espesial a panagtokar tapno agbalin a nakaragragsak ti okasion. Adda idi “dua a dadakkel” a grupo nga agkankanta para iti panagyaman. Agduma ti paggapuan dagitoy a grupo ti kumakanta, sa agsasabatda iti pader nga asideg ti templo tapno agpataudda iti uni a mangngeg iti adayo. (Neh. 12:27, 28, 31, 38, 40, 43) Sigurado a naragsakan ni Jehova a dimngeg iti panangidaydayaw dagiti adipenna kenkuana babaen ti naragsak a panagkantada.

7. Kasano nga impakita ni Jesus a napateg ti panagkanta iti panagdaydayaw dagiti Kristiano?

7 Idi naipasdek ti kongregasion Kristiano, nagtultuloy ti musika a napateg a paset ti pudno a panagdaydayaw. Iti kapatgan a rabii iti pakasaritaan ti tao, inraman ni Jesus ti panagkanta kalpasan nga inrugina ti Pangrabii ti Apo.—Basaen ti Mateo 26:30.

8. Ania nga ulidan ti impakita dagiti Kristiano idi umuna a siglo mainaig iti panagkanta iti panagdaydayaw?

8 Impakita dagiti Kristiano idi umuna a siglo ti ulidan iti panangidaydayaw iti Dios babaen ti agdadanggay a panagkanta. Nupay masansan nga agtitiponda kadagiti pribado a balay, ti kinanumo dagita a lugar saanna a pinabaaw ti regtada nga agkanta para ken Jehova. Napaltiingan ni apostol Pablo nga ibilinna kadagiti kapammatianna: “Itultuloyyo nga isuro ken bagbagaan ti maysa ken maysa babaen kadagiti salmo, daydayaw iti Dios, naespirituan a kankanta buyogen ti kinaparabur, nga agkankantakayo iti puspusoyo maipaay ken Jehova.” (Col. 3:16) Dagiti kanta iti pagkantaantayo ket talaga a naespirituan a kankanta a kantaen buyogen ti panagyaman. Karaman dagita kadagiti naespirituan a taraon nga ipapaay ti “matalek ken masirib nga adipen.”—Mat. 24:45.

 TI ARAMIDEM NO BUMDENGKA NGA AGKANTA

9. (a) Ania dagiti mabalin a makalapped iti dadduma a naragsak nga agkanta kadagiti gimong ken asambleatayo? (b) Kasano nga agkantatayo iti pangidaydayaw ken Jehova, ken asino koma ti mangidaulo? (Kitaen ti ladawan iti rugi ti artikulo.)

9 No ngay saan a gagangay ti panagkanta iti pamilia, kultura, wenno iti lugaryo? Gapu iti moderno a teknolohia, mabalin a magustuam ti dumngeg kadagiti propesional a kumakanta. Ngem mabalin a mabain wenno maupayka no ikomparam ti bosesmo kadakuada. Nupay kasta, saan koma a dayta ti manglapped iti rebbengem nga agkanta iti pangidaydayaw ken Jehova. Imbes ketdi, ingatom ti panangiggemmo iti pagkantaam, saanka nga agdumog, ken naimpusuan nga agkantaka! (Esd. 3:11; basaen ti Salmo 147:1.) Iti adu a Kingdom Hall ita, mabasa iti iskrin iti sango dagiti liriko ti kanta tapno napigpigsa ti panagkantatayo. Makapainteres pay a maammuan a nairamanen iti kurikulum dagiti panglakayen para iti Kingdom Ministry School ti panagkanta kadagiti kanta ti Pagarian. Ipaganetget dayta a masapul nga idaulo dagiti panglakayen ti panagkanta iti kongregasion.

10. Ania koma ti laglagipentayo no maamaktayo nga agkanta iti napigsa?

10 Adu ti maamak nga agkanta iti napigsa. Mabalin ngamin a napigsa unay ti bosesda wenno ipagarupda a saan a magustuan ti dadduma ti panagkantada. Nupay kasta, laglagipentayo a no agsaotayo, “maitibkoltayo amin iti adu a daras.” (Sant. 3:2) Ngem saan a dayta ti manglapped kadatayo nga agsao. Apay koma ngarud nga isardengtayo ti agkanta iti pangidaydayaw ken Jehova gapu ta saan a napintas ti bosestayo?

11, 12. Mangted iti singasing no kasano a mapasayaat ti panagkanta.

11 Nalabit bumdengtayo nga agkanta ta saantayo nga ammo no kasano ti agkanta. Ngem, mabalin a sumayaat pay ti  panagkantatayo no surotentayo ti dadduma a singasing. *

12 Masursurom ti napuersa ken napigsa a panagkanta babaen ti umiso a panaganges. Kas iti koriente a mangpasilaw iti bombilia, ti panaganges papigsaenna ti bosesmo no agsao wenno agkantaka. Pigsaam ti agkanta a kas iti kapigsa ti panagsaom wenno napigpigsa pay. (Kitaen dagiti singasing iti Magunggonaan iti Edukasion nga Ipaay ti Teokratiko nga Eskuelaan ti Panagministro, panid 181 agingga iti 184, iti subtitulo nga “Umiso a Panangkontrol iti Panaganges.”) Kinapudnona, no maipapan iti panagkanta iti pangidaydayaw, no dadduma ibilin ti Kasuratan kadagiti agdaydayaw ken Jehova nga ipukkawda ti ragsakda.—Sal. 33:1-3.

13. Ilawlawagmo no kasano a pumigsa ti kompiansatayo nga agkanta.

13 Bayat ti panagdaydayaw ti pamilia wenno iti personal a panagadalmo, padasem dagitoy: Mangpilika iti maysa kadagiti paboritom a kanta iti pagkantaantayo. Ipigsam a basaen dagiti sasaona. Kalpasanna, iti isu met laeng a kapigsa, basaem ti maysa a grupo ti sasao sakanto aganges. Sa iti kasta met laeng a kapigsa ti timek, kantaem dayta a grupo ti sasao. (Isa. 24:14) Iti kasta, rummuar ti bosesmo, ket nagsayaat dayta. Saanka nga agamak wenno mabain!

14. (a) Kasano a makatulong iti panagkanta no ilawlawam nga ungapen ti ngiwatmo? (Kitaen ti kahon a “ No Kasano a Sumayaat ti Panagkantam.”) (b) Ania dagiti nadlawmo a makatulong a singasing iti panangpasayaat iti boses?

14 Saan a rummuar ti talaga a bosesmo no saanmo nga ungapen ti ngiwatmo. Nagsayaat ngarud nga ilawlawam nga ungapen ti ngiwatmo no agkantaka ngem no agsasaoka. Ania ti aramidem no mariknam a nakapsut wenno nasinggit ti bosesmo? Adda dagiti praktikal a singasing iti Magunggonaan iti Edukasion nga Ipaay ti Teokratiko nga Eskuelaan ti Panagministro, panid 184, iti kahon a “Panangparmek Kadagiti Espesipiko a Problema.”

 NAIMPUSUAN NGA AGKANTA ITI PANGIDAYDAYAW

15. (a) Ania ti nayanunsio iti tinawen a miting idi 2016? (b) Ania dagiti rason a naaramid ti baro a pagkantaan?

15 Iti 2016 a tinawen a miting ti Watch Tower Bible and Tract Society of Pennsylvania, maragsakan dagiti kakabsat idi inyanunsio ni Brother Stephen Lett, a miembro ti Bagi a Manarawidwid, a dandanin mausar kadagiti gimong ti baro a pagkantaan a napauluan iti Siraragsak a Kantaantayo’ ni Jehova. Inlawlawagna a maysa a rason no apay a nabaliwan ti pagkantaan ket tapno maitunos dagiti kanta iti rebisado a New World Translation of the Holy Scriptures. Naikkat wenno nabaliwan ti dadduma a sasao a saanen a mabasa iti New World Translation a narebisar idi 2013. Nainayon pay dagiti kabbaro a kanta maipapan iti panangasaba ken iti panagyamantayo iti subbot. Kasta met, gapu ta napateg a paset ti panagdaydayawtayo ti panagkanta, nagaramid ti Bagi a Manarawidwid iti nalagda ken napintas a pagkantaan nga addaan iti akkub a kas iti rebisado a New World Translation.

16, 17. Ania dagiti naaramid a pannakapasayaat iti baro a pagkantaan?

16 Iti ‘Siraragsak a Kantaantayo’ ni Jehova, naurnos dagiti kanta sigun iti topiko tapno nalaklaka nga usaren dayta. Kas pagarigan, nainaig ken Jehova ti umuna a 12 a kanta, maipapan met ken Jesus ken iti subbot ti sumaruno a walo a kanta, ken dadduma pay. Makatulong met ti indise dagiti topiko iti panagpili iti makanta para iti palawag publiko.

17 Tapno naimpusuan ti panagkanta ti amin, nabaliwan ti dadduma a liriko tapno ad-adda a maawatan ti maysa a kapanunotan ken naikkat dagiti sasao a saanen a gagangay a maus-usar. Nasuktan ti dadduma a sasao kadagiti gagangay ken nalaklaka a maawatan. Nasuktan met ti paulo a “Mabayag a Panagitured” iti “Agan-anuskayo,” ken nabaliwan ti dadduma a lirikona. Maipakita met ti konsiderasion iti pannakabaliw ti paulo a “Saluadam ti Pusom” iti “Saluadantayo ti Pusotayo.” Apay? Kadagiti gimong ken asambleatayo, adu ti tumabtabuno a kabbaro, interesado, agtutubo, ken babbai, ket saanda a komportable no kantaenda dayta ta kasla ibagbagada ti rumbeng nga aramiden ti dadduma. Gapuna, nabaliwan ti paulo ken dagiti liriko.

Praktisenyo dagiti kanta bayat ti panagdaydayaw ti pamilia (Kitaen ti parapo 18)

18. Apay a rumbeng nga ammotayo dagiti kanta iti baro a pagkantaantayo? (Kitaen ti footnote.)

18 Adu kadagiti kanta iti ‘Siraragsak a Kantaantayo’ ni Jehova ti naaramid a porma ti kararag. Kadagitoy a kanta, mayebkasmo ti rikriknam ken Jehova. Makatulong met ti dadduma a kanta tapno maparegtatayo a mangipakita “iti ayat ken nasayaat nga ar-aramid.” (Heb. 10:24) Sigurado a kayattayo nga ikabesa ti tokar, kompas, ken liriko dagiti kantatayo. Maaramidmo dayta no denggem dagiti nairekord a kanta a magun-odan iti jw.org. No agpraktiska iti pagtaenganyo, sikokompiansa ken naimpusuan a makantam dagita. *

19. Kasano a mabalin a direkta a makiraman ti amin iti kongregasion iti panagdaydayaw ken Jehova?

19 Laglagipem a napateg a paset ti panagdaydayawtayo ti panagkanta. Nagsayaat a pamay-an dayta tapno maipakitatayo ti ayat ken panagyamantayo ken Jehova. (Basaen ti Isaias 12:5.) No siraragsak nga agkantaka, mapapigsam met ti kompiansa ti dadduma nga agkanta. Kinapudnona, mabalin a makiraman ti amin iti kongregasion—ubbing, nataengan, ken dagiti interesado—iti daytoy direkta a pamay-an ti panagdaydayaw ken Jehova. Saanka koma a bumdeng a mangyebkas iti rikriknam babaen ti panagkanta. Agtulnogka ketdi iti nalawag a bilin nga insurat ti salmista: “Kantaanyo ni Jehova!” Wen, siraragsak nga agkantatayo!—Sal. 96:1.

^ par. 11 Para iti kanayonan nga instruksion no kasano a parang-ayen ti boses iti panagkanta, kitaen ti Disiembre 2014 a binulan a programa iti JW Broadcasting (video category a FROM OUR STUDIO).

^ par. 18 Mangrugi dagiti sesion ti kombension ken asamblea iti 10 a minuto a musika tapno maipapusotayo ti agkanta. Naaramid dagitoy a musika iti pamay-an a mangisagana iti puso ken panunottayo iti programa. Gapuna, maparegtatayo a nakatugawtayo koman no mangrugin ti musika ket denggentayo a naimbag dagitoy.