Mapan iti linaonna

Mapan iti listaan dagiti linaonna

Awan Koma ti Manglapped Kenka a Mangawat iti Gunggona

Awan Koma ti Manglapped Kenka a Mangawat iti Gunggona

“Awan koma ti tao a mangipaidam kadakayo iti gunggona.”—COL. 2:18.

KANTA: 122, 139

1, 2. (a) Ania a gunggona ti segseggaan dagiti adipen ti Dios? (b) Ania ti makatulong tapno agbalintayo a sipapanunot iti gunggona? (Kitaen ti ladawan iti rugi ti artikulo.)

KAS ken apostol Pablo, addaan dagiti napulotan a Kristiano ita iti nagpateg a namnama nga umawat iti “panagpangato nga ayab ti Dios.” (Fil. 3:14) Segseggaanda ti tiempo a makipagturaydanto ken Jesu-Kristo iti nailangitan a Pagarianna ken makikaduada kenkuana a mamagbalin a perpekto kadagiti tattao. (Apoc. 20:6) Nagsayaat dayta a kalat a ragpaten dagiti inawis ti Dios! Naiduma ti namnama ti sabsabali a karnero. Segseggaanda ti gunggona a biag nga agnanayon ditoy daga—nakaragragsak la ketdi dayta a namnama!—2 Ped. 3:13.

2 Tapno agtalinaed a matalek dagiti napulotan a Kristiano ken magun-odda ti gunggona, imparegta ni Pablo: “Pagtalinaedenyo a naipamaysa dagiti panunotyo iti bambanag sadi ngato.” (Col. 3:2) Masapul a sipapanunotda iti nagpateg a namnamada nga umawat iti nailangitan a tawid. (Col. 1:4, 5) Kinapudnona, makatulong iti amin nga adipen ti Dios ti panangpampanunot kadagiti bendision  nga insagana ni Jehova para iti ilina tapno sipapanunotda iti gunggona, idiay man langit wenno ditoy daga ti namnamada.—1 Cor. 9:24.

3. Maipapan iti ania dagiti pakdaar ni Pablo kadagiti kapammatianna?

3 Pinakdaaran met ni Pablo dagiti padana a Kristiano maipapan kadagiti peggad a manglapped kadakuada nga umawat iti gunggona. Kas pagarigan, sinuratanna ti kongregasion idiay Colosas maipapan kadagiti aginkukuna a Kristiano a nangpadas a manggun-od iti pabor ti Dios babaen ti panangtungpalda iti Linteg imbes a babaen ti pammati ken Kristo. (Col. 2:16-18) Dinakamat met ni Pablo dagiti peggad a mabalin a manglapped kadatayo nga umawat iti gunggona. Kas pagarigan, inlawlawagna no kasano a liklikan dagiti immoral a tarigagay, solbaren dagiti problema kadagiti kapammatian, ken pagballigian dagiti pakarigatan iti pamilia. Nagpateg kadatayo ita dagiti balakadna maipapan kadagitoy. Gapuna, usigentayo dagiti naayat a pakdaar ni Pablo kadagiti taga-Colosas.

PAPATAYENYO DAGITI IMMORAL A TARIGAGAY

4. Apay a malapdandatayo dagiti immoral a tarigagay nga umawat iti gunggona?

4 Kalpasan a pinalagipan ni Pablo dagiti kakabsat maipapan iti nakaskasdaaw a namnamada, insuratna: “Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum.” (Col. 3:5) Mabalin a nagpigsa ti impluensia dagiti immoral a tarigagay ket malapdandatayo nga umawat kadagiti naespirituan a gameng. Idi nakasublin iti kongregasion ti maysa a kabsat a naimpluensiaan kadagiti immoral a tarigagay, kinunana, “Nakabilbileg ti puersa a nangimpluensia kaniak isu a saanko a naisardeng ti ar-aramidek agingga a naladawen ti amin.”

5. Kasano a masalaknibantayo kadagiti napeggad a kasasaad?

5 Nakapatpateg nga agannadtayo nangruna no maipasangotayo kadagiti kasasaad a mangsulisog kadatayo a mangsukir kadagiti moral a pagalagadan ni Jehova. Kas pagarigan, iti pay laeng rugi ti panaginnarem ti dua nga indibidual, nainsiriban nga ikeddengdan dagiti limitasion maipapan iti panagsinnagid, panaginnungngo, wenno panagkadua nga is-isuda. (Prov. 22:3) Mabalin met a tumaud dagiti peggad maipapan iti moral no adda iti adayo ti maysa a Kristiano gapu iti trabaho wenno adda katrabahuanna a saanna a kasekso. (Prov. 2:10-12, 16) No kasta ti situasionmo, ibagam a maysaka a Saksi ni Jehova, agtignayka iti pamay-an a raemendaka, ken laglagipem a dakes ti ibunga ti pannaki-flirt. Nalaklakatayo met a matnag iti sulisog no malidlidayan wenno nakapuytayo. No dumteng dagita a tiempo, mabalin a kayattayo a marikna nga adda mangipatpateg kadatayo. Mabalin pay ketdi a mariknatayo a kasla kasapulantayo unay ti suporta ket awatentayon ti atension nga ipakita ti uray asino lattan. No mapasamak dayta, agpatulongka ken Jehova ken kadagiti adipenna tapno saanka a malapdan a mangawat iti gunggona.—Basaen ti Salmo 34:18; Proverbio 13:20.

6. No maipapan iti panagpili iti paglinglingayan, ania ti masapul a laglagipentayo?

6 Masapul a laksidentayo dagiti immoral a paglinglingayan tapno mapapataytayo dagiti immoral a tarigagay. Kaaduan kadagiti paglinglingayan ita ti mangiparang iti kababalin a gagangay idi iti Sodoma ken Gomorra. (Jud. 7) Iparparegta dagiti lider ti media dagiti kapanunotanda iti moral babaen ti panangipakitada a gagangay laengen ti seksual nga immoralidad ken awan ti dakes nga ibunga dayta. Agannadtayo a saantayo nga awaten lattan ti amin a kita ti paglinglingayan. Masapul a pilientayo dagiti paglinglingayan a saan a manglapped kadatayo nga agbalin a sipapanunot iti gunggona a biag.—Prov. 4:23.

 “KAWESANYO TI BAGBAGIYO” ITI AYAT KEN ASI

7. Ania dagiti problema a mabalin a tumaud iti kongregasion Kristiano?

7 Umanamongtayo amin a maysa a bendision ti agbalin a paset ti kongregasion Kristiano. Ti panagadal iti Sao ti Dios kadagiti gimongtayo ken ti naasi ken naayat a panagtitinnulongtayo ket makatulong tapno sipapanunottayo iti gunggona. Ngem no dadduma, mabalin nga adda di panagkikinnaawatan iti kongregasion. No saantayo a masolbar dagita a problema, nalaka laeng nga agturong dagita iti sakit ti nakem.—Basaen ti 1 Pedro 3:8, 9.

8, 9. (a) Ania dagiti galad a makatulong tapno magun-odtayo ti gunggona? (b) Ania ti makatulong tapno mapagtalinaedtayo ti talna no adda kapammatiantayo a makasair kadatayo?

8 Kasano a maliklikan a malapdannatayo ti sakit ti nakem a mangawat iti gunggona? Pinaregta ni Pablo dagiti taga-Colosas: “Kas pinili ti Dios, nasantuan ken ay-ayaten, kawesanyo ti bagbagiyo kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured. Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo. Ngem, malaksid kadagitoy amin a banag, kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”—Col. 3:12-14.

9 Tulongannatayo ti ayat ken asi nga agpipinnakawan. Kas pagarigan, no nasairnatayo ti kapammatiantayo iti sao man wenno aramid, mabalin a lagipentayo dagiti gundaway a nagsao wenno nakaaramidtayo iti saan a nasayaat. Saan kadi nga agyamantayo iti ayat ken asi dagiti kakabsat a nangpalabas kadagiti kamalitayo? (Basaen ti Eclesiastes 7:21, 22.) Nangnangruna nga agyamantayo iti asi ni Kristo a namagkaykaysa kadagiti pudno nga agdaydayaw. (Col. 3:15) Maymaysa ti ay-ayatentayo a Dios, ti ikaskasabatayo, ken dandani agpapada dagiti pakasuotantayo. No pakawanentayo ti sabsabali gapu iti ayat ken asi, makatulongtayo iti Nakristianuan a panagkaykaysa ken agbalintayo a sipapanunot iti gunggona a biag.

10, 11. (a) Apay a napeggad ti agimon? (b) Kasano a maliklikantayo ti imon a manglapped kadatayo a mangawat iti gunggona?

10 Palagipandatayo dagiti pagarigan iti Biblia a malapdannatayo ti imon a mangawat iti gunggona. Kas pagarigan, nagimon ni Cain iti kabsatna a ni Abel isu a pinatayna. Da Kore, Datan, ken Abiram binusorda ni Moises gapu iti imon. Nagimon met ni Ari Saul ken David isu a ginandatna a patayen. Kuna ti Sao ti Dios: “No sadino ti ayan ti imon ken rinnupir, adda sadiay ti riribuk ken isuamin a nakadakdakes a banag.”—Sant. 3:16.

11 No patanorentayo ti ayat ken asi iti pusotayo, saantayo a nalaka nga agimon. Kuna ti Sao ti Dios: “Ti ayat mabayag-panagituredna ken manangngaasi. Ti ayat saan a managimon.” (1 Cor. 13:4) Tapno saan nga agramut ti imon iti pusotayo, rumbeng nga ikagumaantayo a kitaen dagiti bambanag a kas iti panangmatmat ti Dios, a matmatantayo dagiti kakabsattayo kas paset ti maymaysa a Nakristianuan a bagi. Makatulong dayta tapno agbalintayo a mannakipagrikna, maitunos iti balakad ti Kasuratan: “No ti maysa a kameng maipadayag, amin dagiti dadduma a kameng agrag-oda a mairaman iti dayta.” (1 Cor. 12:16-18, 26) Ngarud, imbes nga agimontayo, maragsakantayo no mabendisionan ti dadduma. Usigentayo ti pagarigan ti anak ni Ari Saul a ni Jonatan. Saan a nagimon idi nadutokan ni David nga agtawid iti trono. Pinaregtana ketdi ni David. (1 Sam. 23:16-18) Agbalintayo kadi a naasi ken naayat a kas ken Jonatan?

 GUN-ODENYO TI GUNGGONA KAS PAMILIA

12. Ania a balakad ti masapul a suroten ti pamilia tapno magun-odda ti gunggona?

12 Mangyeg iti talna ken kinaragsak iti pamilia ti panangyaplikar kadagiti prinsipio ti Biblia, ken makatulong tapno magun-odda ti gunggona. Ania ti imbalakad ni Pablo kadagiti Kristiano idiay Colosas mainaig iti pamilia? Kinunana: “Dakayo nga assawa a babbai, agpasakupkayo kadagiti assawayo, yantangay mayanatup dayta iti Apo. Dakayo nga assawa a lallaki, itultuloyyo nga ayaten dagiti assawayo ket dikay agpungtot a sipapait kadakuada. Dakayo nga annak, agtulnogkayo kadagiti nagannakyo iti amin a banag, ta daytoy ket makaay-ayo unay iti Apo. Dakayo nga amma, dikay rurruroden ti annakyo, tapno saan a maupay ti riknada.” (Col. 3:18-21) Awan duadua nga umanamongka a makagunggona agingga ita kadagiti agassawa ken annak ti panangyaplikar kadagiti naipaltiing a balakad ni Pablo.

13. Ania ti mabalin nga aramiden ti Kristiano a babai tapno maiturongna ni lakayna iti kinapudno?

13 Kasano no maysaka nga asawa a babai, ket mariknam a saan nga umiso ti panangtrato kenka ti di manamati nga asawam? Mapasayaatmo ngata ti situasion no makiririka gapu iti kababalinna? Uray no mapasurotmo iti kayatmo nga aramidenna, maiturongmo ngata iti kinapudno? Nalabit saan. Ngem no raemem ti kinaulo ni lakaymo, makatulongka iti talna ti pamiliayo, maidaydayawmo ni Jehova, ken mabalin a maiturongmo ni lakaymo  iti pudno a panagdaydayaw; gapuna, magun-odyo a dua ti gunggona.—Basaen ti 1 Pedro 3:1, 2.

14. Ania ti masapul nga aramiden ti Kristiano a lalaki no saan a raraemen ti di manamati nga asawana?

14 Kasano no maysaka nga asawa a lalaki, ket mariknam a saannaka a raraemen ti di manamati nga asawam? Matignaymo ngata nga ad-adda a mangraem kenka no bugkawam tapno ipakitam no asino ti rumbeng a masurot? Saan! Namnamaen ti Dios nga ipakitam ti kinaulom iti naayat a pamay-an, a kas ken Jesus. (Efe. 5:23) Naayat ken naanus ti panangwatwat ni Jesus iti kinaulona iti kongregasionna. (Luc. 9:46-48) No tuladen ti asawa a lalaki ni Jesus, mabalin a maiturongna ni baketna iti pudno a panagdaydayaw.

15. Kasano a maipakita ti Kristiano nga asawa a lalaki ti panagayatna ken baketna?

15 Naibalakad kadagiti assawa a lallaki: “Itultuloyyo nga ayaten dagiti assawayo ket dikay agpungtot a sipapait kadakuada.” (Col. 3:19) Mapadayawan ti asawa a lalaki ni baketna no denggenna dagiti opinionna ken patalgedanna nga ipatpategna dagiti ibagana. (1 Ped. 3:7) Nupay saanna a kanayon nga aramiden ti kiddaw ni baketna, masansan a makaaramid iti nasayaat a desision no damagenna ti makuna ni baketna. (Prov. 15:22) In-inut a magun-odan ti naayat nga asawa a lalaki ti respeto ni baketna, saanna a dawaten dayta. No ti asawa a lalaki ay-ayatenna ni baketna ken ti annakna, naragragsakda nga agserbi ken Jehova ken magun-odda ti gunggona a biag.

Kasano a maliklikantayo dagiti pakasuotan ti pamilia a manglapped kadatayo a mangawat iti gunggona? (Kitaen ti parapo 13-15)

AGTUTUBO—SAANYO NGA IPALUBOS A MALAPDANKAYO A MANGAWAT ITI GUNGGONA!

16, 17. Kas agtutubo, ania ti aramidem tapno saanka unay a madismaya kadagiti nagannakmo?

16 Kasano no maysaka a tin-edyer, ket mariknam a saandaka a maawatan ken naistrikto dagiti Kristiano a nagannakmo? No maupayka, mabalin a pagduaduaamon no ti panagserbi ken Jehova ti kasayaatan a pangusaram iti biagmo. Ngem no agsardengka nga agserbi ken Jehova gapu ta maup-upayka, maammuamto nga awan ti sabali a pudno a mangipatpateg kenka no di dagiti managbuteng iti Dios a dadakkelmo ken ti kongregasionmo.

17 No saandaka a pulos dinisiplina dagiti nagannakmo, saan kadi a pagduaduaam no talaga nga impategdaka? (Heb. 12:8) Ngem nalabit saanmo a kayat ti pamay-an dagiti nagannakmo a mangdisiplina kenka. Imbes a kaguram ti pamay-anda, ikagumaam a bigbigen a mabalin nga adda makagapu no apay a kasta ti inaramidda. Gapuna, no kritikarendaka, agbalinka a kalmado ken saanka nga agrurod. Kuna ti Sao ti Dios: “Ti asinoman a mangmedmed iti sasaona agtagikua iti pannakaammo, ket ti tao nga addaan panangilasin nalamiis ti espirituna.” (Prov. 17:27) Ikagumaam ti agbalin a nataengan a tao a kalmado a mangawat iti balakad. Magunggonaanka iti dayta ta saanmo unay a pampanunoten ti pamay-an ti panangbalakadda. (Prov. 1:8) Bendision ti maaddaan kadagiti nagannak a talaga a mangay-ayat ken Jehova. Sigurado a kayatdaka a tulongan a manggun-od iti gunggona a biag.

18. Apay a determinadoka nga agtalinaed a sipapanunot iti gunggona?

18 Nakaskasdaaw a panunoten ti gunggona iti masanguanan—immortal man a biag idiay langit wenno agnanayon a biag iti paraiso a daga. Sigurado dayta a namnama, ta inkari dayta ti Namarsua. No maipapan iti Paraiso a daga, kuna ti Dios: “Ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” (Isa. 11:9) Suruanto ti Dios ti amin nga agnaed ditoy daga. Nagsayaat la ketdi dayta a gunggona a pagreggetan a gun-oden. Gapuna, sipapanunotka koma iti kari ni Jehova, ket saanmo nga ipalubos nga adda manglapped kenka a mangawat iti gunggona!