Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) NOBIEMBRE 2016

 MANIPUD ITI ARCHIVES

“Dakayo nga Agibumbunannag iti Pagarian iti Britain—Agriingkayo!!”

“Dakayo nga Agibumbunannag iti Pagarian iti Britain—Agriingkayo!!”

MAYSA a naganat a kiddaw: “Dakayo nga Agibumbunannag iti Pagarian iti Britain—Agriingkayo!!” (Informant, * Disiembre 1937, London edition) Kuna pay ti maysa a subtitulo: “Awan ti Nakaskasdaaw nga Irarang-ay iti Sangapulo a Tawen!” Paneknekan dayta ti makinsango a panid a pakakitaan iti report ti serbisio iti uneg ti sangapulo a tawen, manipud 1928 agingga iti 1937.

ADU UNAY A PAYUNIR?

Apay a gimminad ti panagrang-ay ti panangasaba idiay Britain? Dagiti kongregasion ket kasla “naigaluten” iti dati a nabuntog a panagrang-ay. Maysa pay, imbaga ti sanga nga opisina a ti Britain ket kabaelanen a trabahuen ti agarup 200 a payunir, nga adda kadagiti adayo a teritoria imbes a kadagiti kongregasion. Isu nga imbaga ti sangay kadagiti mayat nga agpayunir nga adu unayen ti payunir iti Britain. Naiparegta kadakuada nga agpayunirda lattan iti dadduma a pagilian ti Europe. Adu a payunir ti nagtulnog ket pimmanawda iti Britain sa napanda iti pagilian a kas iti France, nupay bassit wenno awan ti ammoda iti lengguahe sadiay.

“AWIS”

Nangipasdek ti 1937 Informant iti kalat para iti tawen 1938: Maysa a milion nga oras! Nalaka laeng a maabut dayta no tunggal agibumbunannag ket mangbusbos iti 15 nga oras iti kada bulan iti ministerio ken 110 nga oras met para kadagiti payunir. Naisingasing met a mangbukelda kadagiti grupo a mangbusbos iti lima nga oras iti kada panagruarda ken ipamaysada ti agsarungkar, nangruna kadagiti rabii iti tengnga ti lawas.

Sireregta nga impamaysa dagiti nararagsak a payunir ti panangasaba

Adu ti naragsakan iti dayta. “Awis dayta manipud iti hedkuarter, a kaaduan kadakami ti nangur-uray, ket nangyeg kadagiti nagsayaat a resulta,” nalagip ni Hilda Padgett. * Kinuna ni Sister E. F. Wallis: “Nagmayat ti naisingasing a panangasaba iti lima nga oras kada aldaw! Adda kadi pay naragragsak ngem iti panagserbi iti intero nga agmalem para iti Apo? . . . Mabalin a nabambannogkami no nakaawidkamin, ngem naragsakkami kadi? Wen!” Narikna ti agtutubo a ni Stephen Miller ti kinaganat ti trabaho isu a pinatganna ti awis. Kayatna nga aramiden dayta bayat nga adda pay gundawayna! Malagipna nga adda idi dagiti grupo dagiti agbisbisikleta nga agmalmalem a mangasaba ket kadagiti rabii ti kalgaw (summer) ipatokarda dagiti nairekord a palawag. Sireregta a nakipagmartsada nga addaan kadagiti plakard ken nagipaimada kadagiti magasin iti kalsada.

Impakaammo pay ti Informant daytoy a kiddaw: “Kasapulanmi ti 1,000 a payunir.” Adda pay baro a pamay-an. Saanen a masapul a mangasaba dagiti payunir a bukbukodda no di ket makipagtrabahodan iti kongregasion tapno tumulong ken mangparegtada. “Adu kadagiti kakabsat ti nariing nga  agpayunir,” malagip ni Joyce Ellis. “Nupay 13 laeng idi ti tawenko,” kinunana, “dayta ti kayatko nga aramiden; kayatko ti agpayunir.” Idi Hulio 1940, idi agtawen iti 15, naragpatna dayta a kalatna. Naammuan ni Peter, a nagbalin nga asawa ni Joyce, ti “Mangriing” a kiddaw, isu a dagus a “pinanunotna ti agpayunir.” Idi Hunio 1940, iti edad a 17, nagbisikleta iti 105 a kilometro (65 a milia) a napan idiay Scarborough tapno agpayunir.

Managsakripisio a payunir da Cyril ken Kitty Johnson. Inlakoda ti balayda ken dagiti sanikuada tapno adda usarenda nga agpayunir. Nagikkat ni Cyril iti trabahona, ket iti uneg ti makabulan, nakasaganadan nga agpayunir. Malagipna: “Talaga a desididokami idin. Kayatmi a talaga ken naragsakkami a mangaramid iti dayta.”

NAIPATAKDER DAGITI PAGDAGUSAN DAGITI PAYUNIR

Idi bigla nga immadu dagiti payunir, pinanunot dagiti mangidadaulo a kakabsat no kasano a matulonganda ida. Ni Jim Carr, nga agserserbi idi 1938 kas zone servant (pagaammo itan kas manangaywan iti sirkito), sinurotna ti singasing a mangipatakderda iti pagdagusan dagiti payunir kadagiti siudad. Naiparegta kadagiti payunir a maymaysa ti pagnaedan ken pangasabaanda tapno basbassit ti gastosda. Idiay Sheffield, adda dakkel a balay nga inabanganda, ket inaywanan ti maysa a kabsat a lalaki. Nangted dagiti kakabsat sadiay iti kuarta ken muebles. Malagip ni Jim: “Timmulong ti amin tapno agballigi dayta.” Sangapulo a nagagaget a payunir ti nagnaed sadiay, ket tinaginayonda ti nasayaat a naespirituan a rutina. “Binigat a mapagsasaritaan ti teksto iti panganan,” ken “inaldaw a mapan dagiti payunir kadagiti teritoriada iti nagduduma a paset ti siudad.”

Adu a kabbaro a payunir ti napan kadagiti teritoria ti Britain

Pinatgan dagiti agibumbunannag ken dagiti payunir ti awis, ket naabutda ti maysa a milion nga oras idi 1938. Kinapudnona, ipakita ti report a rimmang-ay ti amin nga aktibidad mainaig iti panangasaba. Iti lima a tawen, dandani nagtriple ti bilang dagiti agibumbunannag idiay Britain. Ti napabaro a determinasionda a mangipamaysa iti Pagarian ti nangpabileg kadagiti adipen ni Jehova bayat ti sumungsungad idi a gubat.

Ita, umad-adu manen ti bilang dagiti payunir idiay Britain bayat nga umas-asideg ti Armagedon, ti gubat ti Dios. Iti napalabas a sangapulo a tawen, nagtultuloy a ngimmato ti bilang dagiti payunir, ket agdagupen iti 13,224 idi Oktubre 2015. Siririing dagitoy a payunir iti kinapudno a ti panagserbida iti amin-tiempo ti maysa kadagiti kasayaatan a pangusaranda iti biagda.

^ par. 3 Naawagan idi agangay iti Ti Ministeriotayo iti Pagarian.

^ par. 8 Isalaysay ti Pagwanawanan nga Oktubre 1, 1995, p. 19-24 ti pakasaritaan ti biag ni Sister Padgett.