Mapan iti linaonna

Mapan iti listaan dagiti linaonna

 PAKASARITAAN TI BIAG

Nabendisionanak a Makipagtrabaho Kadagiti Naespirituan a Kakabsat

Nabendisionanak a Makipagtrabaho Kadagiti Naespirituan a Kakabsat

IDI katengngaan ti 1930’s, immakar da nanang ken tatangko—da James ken Jessie Sinclair—idiay Bronx, maysa nga ili ti New York City. Nagbalin a gayyemda ni Willie Sneddon, nga immakar met a naggapu idiay Scotland. Mano la a minuto kalpasan a nagaammoda, pagsasaritaandan ti pamiliada. Napasamak dayta sumagmamano a tawen sakbay a nayanakak.

Inyestoria ni nanangko ken Willie a sakbay la unay ti Dakkel a Gubat, nalmes da manong ken tatangna idi nakadungpar ti bangkada iti bomba idiay North Sea. Insungbat ni Willie, “Addan ni tatangmo idiay impierno!” Saksi ni Willie, ket dayta ti makapakigtot a damo a pannakaammo ni Nanang iti kinapudno iti Biblia.

Da Willie ken Liz Sneddon

Nasuron ni Nanang iti imbaga ni Willie ta ammona a nasingpet ni tatangna. Ngem innayon ni Willie, “Lumag-an kadi ti riknam no ibagak kenka a napan idi ni Jesus idiay impierno?” Nalagip ni nanangko ti lualo ti simbaan, a kuna dayta a napan ni Jesus iti impierno ken napagungar iti maikatlo nga aldaw. Isu a napampanunotna, ‘No umap-apuy a lugar ti impierno a pakadusaan dagiti managdakdakes, apay a napan ni Jesus sadiay?’ Gapu iti dayta, naginteres ni nanangko iti kinapudno. Nakigimgimong idiay Bronx Congregation ket nabautisaran idi 1940.

Kaduak ni Nanang, ken ni Tatangko

Saan idi a maparparegta dagiti Kristiano a nagannak a mangyadal iti Biblia kadagiti annakda. Idi agsursuroak pay la a magna, ni Tatang ti agaywan kaniak no mapan makigimong ken mangasaba ni Nanang. Kalpasan ti mano a tawen, makigimgimongkamin a tallo. Nakaregregta ni Nanang a mangasaba ken adu ti iyad-adalanna. Adda pay ketdi dagiti panawen a grupo ti panangyadalna ta agkakaarruba laeng ti dadduma nga iyad-adalanna. Kuyogek idi a mangasaba ni Nanang no bakasionmi. Gapu iti dayta, adu ti nasursurok iti Biblia ken no kasano nga isuro ti linaonna.

Makapaliday ta idi ubingak, saanko unay nga impateg ti kinapudno. Diak sinerioso dayta. Ngem idi 12 ti tawenko,  nangaskasabaakon ken kanayon idin a makiramanak iti ministerio. Idi agtawenakon iti 16, indedikarko ti biagko ken Jehova, ket nagbautisarak idi Hulio 24, 1954 iti kombension idiay Toronto, Canada.

PANAGSERBI ITI BETHEL

Adda idi dagiti agdama ken dati a Bethelite a kakongregasionmi. Dakkel ti impluensiada kaniak. Nagustuak ti laingda a mangilawlawag kadagiti kinapudno iti Biblia. Kayat dagiti titserko nga agkolehioak, ngem kayatko ti ag-Bethelite. Nagipasaak ngarud iti application-ko iti kombension idiay Toronto. Nagaplayak manen iti kombension idiay Yankee Stadium, New York City idi 1955. Di nagbayag, idi 17 ti tawenko, nakaawatak iti imbitasion nga agserbi iti Brooklyn Bethel idi Septiembre 19, 1955. Iti maikadua nga aldawko iti Bethel, nagtrabahoakon iti pagaramidan ti libro idiay 117 Adams Street. Nagopereytak metten iti makina a mamagtitipon kadagiti paset ti libro sakbay a madait dagita.

Idi 17 ti tawenko, nangrugiak nga agserbi iti Brooklyn Bethel

Kalpasan ti dandani makabulan iti pagaramidan ti libro, nayakarak iti Magazine Department ta ammok ti ag-type. Imakmakinilia idi dagiti kakabsat iti babassit a metal a plata (stencil) ti adres dagiti kabbaro a nagsuskribir iti The Watchtower ken Awake! Naglabas ti mano a bulan, nagtrabahoak iti Shipping Department. Ni Klaus Jensen ti department overseer. Dinamagna no kayatko a kuyogen ti drayber nga agideliber kadagiti kinarkarton a literatura iti pier tapno maipatulod dagita iti intero a lubong. Sinaksako met a magasin ti maipatulod iti post office para kadagiti kongregasion iti intero a United States. Kuna ni Brother Jensen a makatulong dayta iti bagik. Agarup 57 a kilo laeng ti kadagsenko ken nakakutkuttongak. Pimmigsa ti bagik  gapu kadagiti biahemi a mapan iti pier ken post office. Agpayso ti imbaga ni Brother Jensen!

Ti Magazine Department met ti mangisagana kadagiti magasin nga order dagiti kongregasion isu a naammuak dagiti lengguahe a pakayim-imprentaan dagiti magasintayo idiay Brooklyn sa maipatulod iti adu a lugar iti lubong. Awan a pulos ammok iti dadduma kadagita a lengguahe ngem naragsakak ta makadanon ti rinibribu a magasintayo kadagiti nakaad-adayo a lugar. Saanko idi nga ammo a kadagiti sumarsaruno a tawen, mabisitakto gayam ti kaaduan kadagita a lugar.

Kaduak da Robert Wallen, Charles Molohan, ken Don Adams

Idi 1961, nayakarak iti Treasurer’s Office nga idadauluan ni Grant Suiter. Kalpasan ti mano a tawen, inayabannak ni Nathan Knorr iti opisinana. Isu idi ti mangidadaulo iti sangalubongan a trabahotayo. Imbagana a makabulan nga agadal iti Kingdom Ministry School ti maysa a kabsat nga agtrabtrabaho iti opisinana ket mayakarto iti Service Department. Siak ti insukatda ket nakatrabahuak sadiay ni Don Adams. Nairana met a ni gayam Don idi ti nangawat iti aplikasionko iti Bethel iti kombension idi 1955. Da Robert Wallen ken Charles Molohan ti dua pay a katrabahuanmi. Nasurok a 50 a tawen a nagkakatrabahuankami. Nagmayat ti agserbi a kadua dagita a matalek a naespirituan a kakabsat!—Sal. 133:1.

Ti umuna a zone visit-ko idiay Venezuela, idi 1970

Manipud idi 1970, nadutokanak a mangbisita iti dadduma a sanga nga opisina ti Watch Tower Society, sumagmamano a lawas kada maysa wenno dua a tawen. Maaw-awagan idi dayta iti zone visit. Karaman iti dayta ti panangbisita kadagiti pamilia ti Bethel ken misionero iti intero a lubong  tapno maparegtada ken tapno makita dagiti rekord ti sanga nga opisina. Nakaragragsak a makita manen dagiti nabayagen a naggraduar iti Gilead a matalek latta nga agserserbi kadagiti destinoda! Nagragsak ken maysa a pribilehio a nabisitak ti nasurok a 90 a pagilian gapu iti dayta a trabaho.

Makaparagsak a bisitaen dagiti kakabsat iti nasurok a 90 a pagilian!

NAKASARAKAK ITI MATALEK A KADUA

Makigimgimong ti amin a Bethelite iti Brooklyn kadagiti kongregasion iti New York City. Idiay Bronx ti nakaipanak. Nagudua ti immuna a kongregasion iti dayta nga ili ta immadu ti bilangda. Naawagan iti Upper Bronx Congregation ti orihinal a kongregasion, nga isu idi ti pakigimgimongak.

Idi katengngaan ti 1960’s, adda pamilia a naggapu iti Latvia a nagbalin a Saksi idiay makin-abagatan a Bronx. Nagyanda iti lugar a sakup ti teritoria dayta a kongregasion. Nagpayunir ti inauna a balasangda a ni Livija idi naggraduar iti hayskul. Kalpasan ti mano a bulan, immakar idiay Massachusetts tapno tumulong iti lugar nga agkasapulan iti ad-adu a manangaskasaba. Sursuratak idi tapno padamagak maipapan iti kongregasionmi, ket agsubalit met maipapan iti balligi ti ministeriona idiay Boston.

Dakami ken Livija

Kalpasan ti sumagmamano a tawen, nagbalin nga special pioneer ni Livija. Kayatna nga aramiden ti amin a kabaelanna para ken Jehova, isu a nagaplay iti Bethel ket naawis idi 1971. Kasla daytoyen ti sungbat ni Jehova! Nagkasarkami idi Oktubre 27, 1973, ket ni Brother Knorr ti nagpalawag iti kasarmi. Kuna ti Proverbio 18:22: “Nakasarak kadi ti maysa iti naimbag nga asawa a babai? Isu nakasarak iti naimbag a banag, ket makagun-od iti naimbag a nakem manipud ken Jehova.” Nabendisionankami ken Livija nga agserbi iti Bethel iti nasurok nga 40 a tawen. Ket supsuportaranmi agingga ita ti maysa a kongregasion iti ili ti Bronx.

PANNAKIPAGTRABAHO KADAGITI KAKABSAT NI KRISTO

Nagragsak ti makipagtrabaho ken Brother Knorr. Nakagaggaget ken talaga nga ipatpategna dagiti misionero iti intero a lubong. Adu kadakuada ti kaunaan a Saksi iti pagilian a nakaibaonanda. Nagsakit a makita nga agrigrigat ni Brother Knorr gapu iti kanser idi 1976. Naminsan, idi saanen a makabangon, kunana nga ibasak kenkuana ti dadduma a maisagsagana a mayimprenta. Impaayabna kaniak ni Frederick Franz tapno mangngegna met ti basbasaek. Naammuak a gapu ta nakapsuten ti panagkita ni Brother Franz, ni Brother Knorr ti mangibasbasa idi kenkuana kadagita.

Zone visit idiay Togo idi 1977, kaduak da Daniel ken Marina Sydlik

Natay ni Brother Knorr idi 1977, ngem naliwliwa dagiti makaam-ammo ken mangay-ayat kenkuana ta matalek a naleppasna ti biagna ditoy daga. (Apoc. 2:10) Kalpasanna,  ni Brother Franz ti nangidaulon iti trabaho.

Kadagidi a tiempo, siak ti sekretario ni Milton Henschel, a dinekdekada a nakipagtrabaho idi ken Brother Knorr. Imbaga kaniak ni Brother Henschel a ti panangtulongko ken Brother Franz iti amin a kabaelak ti kangrunaanen a trabahok iti Bethel. Kanayon nga ibasak kenkuana dagiti maisagsagana a mayimprenta. Nakalalaing ni Brother Franz a manglagip kadagiti bambanag ken makapabilib ti laingna nga ag-concentrate iti maibasbasa. Talaga a nagragsak ti tumulong kenkuana agingga a nalpasna ti biagna ditoy daga idi Disiembre 1992!

Idiay 124 Columbia Heights, a nagtrabahuak iti adu a dekada

Nagalisto a naglabas ti 61 a tawen a panagserbik iti Bethel. Agpada a matalek ken Jehova dagiti nagannakko idi natayda, ket il-iliwek a makita manen ida iti adayo a napimpintas a lubong. (Juan 5:28, 29) Awan serserbina dagiti it-ited ti lubong no ikompara iti nagsayaat a pribilehio a makipagtrabaho kadagiti matalek a kakabsat para iti ili ti Dios iti intero a lubong. Maibagami ken Livija a bayat ti kaaddami iti amin-tiempo a panagserbi, “ti rag-o ni Jehova” ti nagbalin a pigsami.—Neh. 8:10.

Saan a nakadepende iti tao ti organisasion ni Jehova, ken agtultuloy latta ti panagwaras ti kinapudno maipapan iti Pagarian. Nagragsak ken maysa a pribilehio ti makipagtrabaho iti adu a matalek a kakabsat iti adu a tawen. Awanen ditoy daga ti kaaduan a napulotan a nakatrabahuak. Ngem naragsakak ta nakaduak dagita a matalek a naespirituan a kakabsat iti panagserbi ken Jehova.