Mapan iti linaonna

Mapan iti listaan dagiti linaonna

 MAADAL NGA ARTIKULO 21

Ditay Agpaallilaw iti “Sirib Daytoy a Lubong”

Ditay Agpaallilaw iti “Sirib Daytoy a Lubong”

“Ti sirib daytoy a lubong ket kinamaag iti Dios.”​—1 COR. 3:19.

KANTA 98 Ti Kasuratan​—Impaltiing ti Dios

ITI DAYTOY A PANAGADAL *

1. Ania ti ipaay kadatayo ti Sao ti Dios?

KABAELANTAYO a sanguen ti aniaman a problema​—ta ni Jehova ti Naindaklan nga Instruktortayo. (Isa. 30:​20, 21) Ipaay ti Saona ti amin a kasapulantayo tapno “agbalin[tayo] a naan-anay a kualipikado” ken “naan-anay a nakasagana para iti tunggal naimbag nga aramid.” (2 Tim. 3:17) No surotentayo dagiti sursuro ti Biblia, agbalintayo a nasirsirib ngem kadagiti mangibagbaga a surotentayo ti “sirib daytoy a lubong.”​—1 Cor. 3:19; Sal. 119:​97-100.

2. Ania ti usigentayo iti daytoy nga artikulo?

2 Kas makitatayto, makaawis ti sirib ti lubong kadagiti nainlasagan a tarigagaytayo. Isu a mabalin a marigatantayo a manglaban iti impluensia ti panagpampanunot ken panagtigtignay dagiti taga-lubong. Dayta ti rason nga ibaga ti Biblia: “Agannadkayo tapno awan ti asinoman a mangsilo kadakayo babaen ti pilosopia ken ulbod a panagrasrason a maitunos iti tradision ti tattao.” (Col. 2:8) Iti daytoy nga artikulo, usigentayo ti nangrugian ti dua a pangallilaw wenno kinaulbod ti lubong. Iti tunggal kaso, makitatayo no apay a kinamaag ti sirib ti lubong ken no apay nga adayo a natantan-ok ti sirib iti Sao ti Dios ngem iti aniaman a maipaay ti lubong.

NAGBALIW A PANANGMATMAT ITI MORALIDAD

3-4. Ania a panagbalbaliw iti panangmatmat iti moralidad ti napasamak idiay United States iti umuna a paset ti maika-20 a siglo?

3 Iti umuna a paset ti maika-20 a siglo idiay United States, dakkel ti nagbaliwan ti panangmatmat dagiti tattao iti moralidad. Dati a patien ti adu a ti seks ket para laeng kadagiti agassawa ken saan a mapagsasaritaan iti publiko. Ngem nagbaliw  dayta a pagalagadan ket nagsaknap ti napanuynoy a kababalin.

4 Naawagan ti 1920’s iti Roaring Twenties ta nagdakkel ti nagbaliwan dagiti tattao. “Nagbalinen ti seks a gagangay a tema dagiti paglinglingayan a kas iti pelikula, pabuya iti teatro, kanta, nobela ken patalastas,” kuna ti maysa a researcher. Iti dayta a dekada, nagbalin nga ad-adda a makagargari ti estilo ti panagsalsala ken saan unayen a naemma ti panagbadbado dagiti tattao. Kas impakpakauna ti Biblia maipapan iti maudi nga al-aldaw, agbalin dagiti tattao a ‘managayat iti ragragsak.’​—2 Tim. 3:4.

Saan a nagpaimpluensia ti ili ni Jehova kadagiti nalulok a moral a pagalagadan ti lubong (Kitaen ti parapo 5) *

5. Ania ti napasamak iti panangmatmat ti lubong iti moralidad manipud idi 1960’s?

5 Idi 1960’s, nagbalin a gagangay ti panagkabbalay dagiti di pay nagkasar, homoseksual nga ar-aramid, ken panagdiborsio. Adu a kita ti paglinglingayan ti kimmaro ti panangitampokda iti seks. Ania ti resulta dagitoy? Insurat ti maysa nga autor a “ti di umiso a pagalagadan iti seks a mangim-impluensia kadagiti tattao ita” ket nagbanag iti pannakadadael ti pamilia, kaadda dagiti agsolsolo a nagannak, pannakadangran iti emosion, pannakaadikto iti pornograpia, ken dadduma pay a makapaladingit nga epektona. Ti panagsaknap dagiti sakit a mayakar babaen ti seks, kas iti AIDS, ket maysa laeng nga ebidensia a kinamaag ti sirib ti lubong.​—2 Ped. 2:19.

6. Kasano a ti panangmatmat ti lubong iti seks ket maitunos iti kayat ni Satanas?

Ti panangmatmat ti lubong iti seks ket maitunos iti kayat ni Satanas. Maragsakan la ketdi a makakita nga abusuen dagiti tattao ti sagut ti Dios a seksual a panagdenna ken saanda a respetuen ti panagasawa a sagut ti Dios. (Efe. 2:2) Saan laeng a dadaelen ti seksual nga immoralidad ti nagpintas a sagut ni Jehova a panagpaadu no di pay ket malapdanna dagiti agar-aramid iti dayta a manggun-od iti biag nga agnanayon.​—1 Cor. 6:​9, 10.

PAGALAGADAN TI BIBLIA ITI SEKSUAL A MORALIDAD

7-8. Ania ti nadayaw ken umiso a panangmatmat ti Biblia iti seksual a panagdenna?

7 Dagiti tattao a mangsursurot iti sirib daytoy a lubong lalaisenda dagiti moral a pagalagadan ti Biblia. Ibagbagada a saan a realistiko dagita. Mabalin nga isaludsodda, ‘Apay nga inaramidnatayo ti Dios nga addaan kadagiti seksual a tarigagay sa ibagana met laeng a kontrolentayo dagita?’ Naibatay daytoy iti kamali a kapanunotan a mabalin nga aramiden dagiti tattao ti aniaman a kayatda. Ngem  saan a kasta ti ibagbaga ti Biblia. Ipaayannatayo iti dignidad babaen ti panangisurona a kabaelantayo a kontrolen dagita a tarigagay. (Col. 3:5) Kanayonanna, inikkannatayo ni Jehova iti sagut a panagasawa, maysa nga urnos a mangpennek kadagiti seksual a tarigagaytayo iti nadayaw a pamay-an. (1 Cor. 7:​8, 9) Iti dayta nga urnos, matagiragsak dagiti agassawa ti panagdenna nga awan ti pagbabbabawyan ken pagdandanaganda a masansan a resulta ti immoralidad.

Saan a kas iti sirib daytoy a lubong, isursuro ti Biblia ti umiso a panangmatmat iti seksual a panagdenna. Bigbigenna a pagtaudan dayta ti ragsak. (Prov. 5:​18, 19) Ngem ibagbaga ti Biblia: “Masapul nga ammo ti tunggal maysa kadakayo a kontrolen ti mismo a bagina tapno agbalinkayo a nasantuan ken nadayaw. Diyo tultuladen dagiti nasion a di makaam-ammo iti Dios, a dida makontrol ti kinarasukda iti sekso ta saanda a mapmapnek.”​—1 Tes. 4:​4, 5.

9. (a) Ania ti nakatulong iti ili ni Jehova iti umuna a paset ti maika-20 a siglo tapno masurotda ti natantan-ok a sirib ti Sao ti Dios? (b) Ania ti nainsiriban a balakad ti 1 Juan 2:​15, 16? (c) Sigun iti Roma 1:​24-27, ania dagiti immoral nga aramid a masapul a liklikantayo?

9 Iti umuna a paset ti maika-20 a siglo, saan a nagpaimpluensia ti ili ni Jehova iti panangmatmat dagidiay “kimmalio ti konsiensiada.” (Efe. 4:19) Inkagumaanda a suroten dagiti pagalagadan ni Jehova. Kuna ti Mayo 15, 1926 a Watch Tower a “ti lalaki ken babai ket masapul a nadalus ken nasin-aw ti panunot ken aramidda, nangruna no maipapan iti di kasekso.” Aniaman ti ar-aramiden daytoy a lubong, sursuroten ti ili ni Jehova ti natantan-ok a sirib ti Sao ti Dios. (Basaen ti 1 Juan 2:​15, 16.) Anian a yamantayo iti Sao ti Dios! Agyamyamantayo met ta ipapaayannatayo ni Jehova iti naintiempuan a naespirituan a taraon tapno saantayo a maallilaw iti sirib daytoy a lubong maipapan iti moralidad. *​—Basaen ti Roma 1:​24-27.

NAGBALIW A PANANGMATMAT ITI PANAGAYAT ITI BAGI

10-11. Ania ti impakdaar ti Biblia a mapasamak iti maudi nga al-aldaw?

10 Impakdaar ti Biblia nga iti maudi nga al-aldaw, ‘ayatento laeng dagiti tattao ti bagbagida.’ (2 Tim. 3:​1, 2) Isu a saan a nakaskasdaaw no makitatayo nga iparparegta ti lubong ti kinamanagimbubukodan. Kuna ti maysa a reperensia nga idi 1970’s, immadu dagiti libro a mangipapaay iti balakad no kasano nga agballigi ti maysa a tao. Dadduma a libro ti “nangiparegta kadagiti agbasbasa nga ammuen ken akseptarenda ti kinasiasinoda ket pagragsakanda dayta.” Kas pagarigan, usigentayo ti imbaga ti maysa kadagita a libro: “Ayatem daydiay kapintasan, makapainteres unay, ken kalaingan iti intero a lubong​—sika.” Itantandudo dayta a libro ti makunkuna a “relihion ti bagi”​—ti panagdesision sigun iti konsiensiam, iti pagarupmo nga umiso, ken iti kombiniente kenka.

11 Pamiliarka kadi iti dayta nga ideya? Kasta ti imparegta ni Satanas nga aramiden ni Eva. Kunana nga agbalinto ni Eva “a kas iti Dios a makaammo iti naimbag ken dakes.” (Gen. 3:5) Adu ita ti nangato ti panagkitkitada iti bagbagida a ti panagkunada ket awan ti asinoman a makaibaga kadakuada no ania ti umiso ken di umiso​—uray ti Dios. Kas pagarigan, nakadkadlaw dayta a kababalin iti panangmatmat dagiti tattao iti panagasawa.

Iyun-una ti maysa a Kristiano ti kasapulan ti sabsabali​—nangnangruna ti kasapulan ti asawana (Kitaen ti parapo 12) *

12. Ania a panangmatmat iti panagasawa ti iparparegta ti lubong?

12 Ibilbilin ti Biblia a tungpalen ti asawa a  lalaki ken asawa a babai ti karida ken raemenda ti tunggal maysa. Iparparegta ti Biblia nga agtalinaed nga agkadua ti agassawa. Kunana: “Panawanto ti lalaki ti ama ken inana ket makitiponto iti asawana ket agbalindanto a maymaysa a lasag.” (Gen. 2:24) Ngem saan a kasta ti iparparegta dagiti naimpluensiaan iti sirib ti lubong, ta ibagbagada a masapul nga agpokus ti tunggal maysa iti bukodna a pagimbagan. “Iti dadduma a seremonia,” kuna ti maysa a libro maipapan iti panagdiborsio, “ti tradisional a panagkinnari dagiti agkasar a ‘bayat a sibibiagta’ ket nasuktanen iti mas limitado a kari a ‘bayat nga agin-innayatta.’ ” Gapu iti kasta a panangtagilag-an iti panagasawa, nasinasina ti adu a pamilia ken agsagsagabada iti nakaro a saem. Nalawag a kinamaag ti awanan panagraem a panangmatmat ti lubong iti panagasawa.

13. Ania ti maysa a rason a kagura ni Jehova dagiti natangsit?

13 Kuna ti Biblia: “Kagura ni Jehova ti asinoman a natangsit ti pusona.” (Prov. 16:5) Apay a kagura ni Jehova dagiti natangsit? Ti maysa a rason ket tultuladen dagiti sobra ti panagayatda iti bagida ti kinatangsit ni Satanas. Agasem, pinanunot ni Satanas nga agruknoy ken agdayaw kenkuana ni Jesus​—daydiay inusar ti Dios a mangparsua iti amin a bambanag! (Mat. 4:​8, 9; Col. 1:​15, 16) Dagiti kasta a sobra ti panangipategda iti bagida ket pammaneknek a kinamaag iti Dios ti sirib ti lubong.

TI PANANGMATMAT TI BIBLIA ITI PANANGIPATEG ITI BAGI

14. Kasano a matulongannatayo ti Roma 12:3 a maaddaan iti balanse a panangmatmat iti bagitayo?

14 Tulongannatayo ti Biblia a maaddaan iti balanse a panangmatmat iti bagitayo. Bigbigenna a nasayaat ti maaddaan iti umiso a panagayat iti bagi. Ti kuna ni Jesus nga “ayatem ti kaarrubam a kas iti bagim” ipakitana a masapul nga ipaayantayo met iti umiso nga atension ti bagitayo. (Mat. 19:19) Ngem saan nga isursuro ti Biblia a panunotentayo a nangatngatotayo ngem iti sabsabali. Imbes ketdi,  kunana: “Dikay agaramid iti aniaman gapu iti riri wenno kinapangas, no di ket agpakumbabakayo, nga ibilangyo a nangatngato ti sabsabali ngem dakayo.”​—Fil. 2:3; basaen ti Roma 12:3.

15. Apay a maibagam a nainsiriban ti balakad ti Biblia maipapan iti panangipateg iti bagi?

15 Adu a tattao ita a maibilang a masirib ti manglais iti balakad ti Biblia maipapan iti panangipateg iti bagi. Ibagada a nakapuyka no ibilangmo ti sabsabali kas nangatngato ngem sika, isu a gundawayandaka. Ngem ania ti resulta ti kinamanagimbubukodan nga iparparegta ti lubong ni Satanas? Ania ti nadlawmo? Naragsak kadi dagiti managimbubukodan? Naragsak kadi ti pamiliada? Adda kadi pudno a gagayyemda? Nasingedda kadi iti Dios? Kadagiti nakitamon, ania ti mangpataud iti nasayaat a resulta​—panangsurot iti sirib ti lubong wenno iti sirib a masarakan iti Sao ti Dios?

16-17. Ania ti pagyamanantayo, ken apay?

16 Dagiti mangsursurot iti balakad dagiti ibilbilang ti lubong a masirib ket kas iti turista nga agdamag iti direksion iti padana a turista a nayaw-awan. Kuna ni Jesus maipapan kadagiti “masirib” a tattao idi tiempona: “Bulsekda a mangidaldalan. No idalan ti bulsek ti padana a bulsek, matnagdanto iti abut.” (Mat. 15:14) Talaga a ti sirib daytoy a lubong ket kinamaag iti Dios.

Maragragsakan dagiti adipen ti Dios a manglagip iti biag nga inusarda nga agserbi ken Jehova (Kitaen ti parapo 17) *

17 Ti nainsiriban a balakad ti Biblia ket kanayon a “makagunggona . . . iti panangisuro, panangtubngar, panangkorehir iti bambanag, ken panangdisiplina para iti kinalinteg.” (2 Tim. 3:​16, ftn.) Anian a yamantayo ta salsalaknibannatayo ni Jehova iti sirib daytoy a lubong babaen ti organisasionna! (Efe. 4:14) Ti naespirituan a taraon nga ipapaayna ti mangpabileg kadatayo a mangsurot kadagiti pagalagadan manipud iti Saona. Talaga a pribilehio ti agpaiwanwan iti mapagtalkan a sirib a masarakan iti Biblia!

KANTA 54 “Daytoy ti Dalan”

^ par. 5 Tulongannatayo daytoy nga artikulo tapno ad-adda a kombinsidotayo a ni Jehova laeng ti mapagtalkan a Gubuayan ti panangiwanwan. Ipakitana met a nakalkaldaang dagiti resulta ti panangsurot iti sirib ti lubong, ngem makagunggona ti panangyaplikar iti sirib manipud iti Sao ti Dios.

^ par. 9 Kas pagarigan, kitaen ti Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 1, kap. 24-26, ken Tomo 2, kap. 4-5.

^ par. 50 LADAWAN: Dadduma a pasamak iti biag dagiti agassawa a Saksi bayat ti panaglabas ti tiempo. Dagiti agassawa bayat a mangaskasabada iti maudi a paset ti 1960’s.

^ par. 52 LADAWAN: Idi 1980’s, ay-aywanan ti asawa a lalaki ti agsaksakit a baketna ket makitkita dayta ti balasitangda.

^ par. 54 LADAWAN: Iti agdama, subsublian dagiti agassawa ti naragsak a panagserbida ken Jehova. Maragragsakan met ti adulton nga anakda ken ti pamiliana.