Mapan iti linaonna

Mapan iti listaan dagiti linaonna

No Apay nga ‘Agtultuloytayo a Mangpataud iti Adu a Bunga’

No Apay nga ‘Agtultuloytayo a Mangpataud iti Adu a Bunga’

“Ni Amak maipadayag iti daytoy, nga agtultuloykayo a mangpataud iti adu a bunga ken paneknekanyo ti bagbagiyo nga ad-adalak.”​—JUAN 15:8.

KANTA: 53, 60

1, 2. (a) Sakbay ti ipapatay ni Jesus, ania ti imbagana kadagiti adalanna? (Kitaen ti ladawan iti rugi ti artikulo.) (b) Apay a napateg a sipapanunottayo no apay a mangasabatayo? (c) Ania ti usigentayo?

ITI maudi a rabii sakbay ti ipapatay ni Jesus, napaut ti pannakisaritana kadagiti apostolna ket impatalgedna kadakuada ti nauneg a panagayatna. Insalaysayna met ti ilustrasion maipapan iti puon ti ubas, nga inusigtayo iti immuna nga artikulo. Babaen iti dayta nga ilustrasion, pinaregta ni Jesus dagiti adalanna nga ‘agtultuloyda a mangpataud iti adu a bunga,’ kayatna a sawen, itultuloyda nga ikasaba ti mensahe ti Pagarian.​—Juan 15:8.

2 Imbaga ni Jesus kadagiti adalanna no ania ti masapul nga aramidenda ken no apay a masapul nga aramidenda dayta. Nangted kadagiti rason no apay a mangasabada. Apay a napateg nga usigentayo dagita? No sipapanunottayo no apay a masapul nga agtultuloytayo a mangasaba, maparegtatayo nga agtultuloy a ‘mangsaksi iti amin a nasion.’ (Mat. 24:13, 14) Usigentayo ngarud ti uppat a Nainkasuratan a rason a mangasabatayo. Pagsasaritaantayo met ti uppat a sagut ni Jehova a makatulong tapno agtultuloytayo nga agbunga.

 MAIPADAYAGTAYO NI JEHOVA

3. (a) Ania ti ibaga ti Juan 15:8 a rason a mangasabatayo? (b) Ania ti irepresentar dagiti bunga ti ubas iti ilustrasion ni Jesus, ken apay a mayanatup dayta?

3 Ti kangrunaan a rason a mangasabatayo ket tapno maipadayagtayo ni Jehova ken masantipikartayo ti naganna kadagiti tattao. (Basaen ti Juan 15:1, 8.) Inyarig ni Jesus ti Amana a ni Jehova iti maysa nga agtaltalon, wenno agmulmula, iti ubas. Inyarig ni Jesus ti bagina iti puon ti ubas ken dagiti pasurotna iti sangsanga. (Juan 15:5) Mayanatup ngarud a dagiti bunga ti ubas irepresentarna ti bunga ti Pagarian a patauden dagiti pasurot ni Kristo. Imbaga ni Jesus kadagiti apostolna: “Ni Amak maipadayag iti daytoy, nga agtultuloykayo a mangpataud iti adu a bunga.” Maidaydayaw ti agmulmula no mangpataud dagiti puon ti ubas iti nasayaat a bunga. Gapuna, maidaydayaw wenno maipadayag met ni Jehova no ikagumaantayo nga ipakaammo ti mensahe ti Pagarian.​—Mat. 25:20-23.

4. (a) Kasano a masantipikartayo ti nagan ti Dios? (b) Ania ti mariknam iti pribilehiom a mangsantipikar iti nagan ti Dios?

4 Kasano a masantipikar ti nagan ti Dios no mangasabatayo? Ditay mapagbalin nga ad-adda a sagrado ti nagan ti Dios. Naan-anayen a sagrado wenno nasantuan dayta. Ngem kastoy ti kinuna ni propeta Isaias: “Ni Jehova ti buybuyot​—isu Daydiay rebbeng a tratuenyo kas nasantuan.” (Isa. 8:13) Masantipikartayo ti nagan ti Dios no idumatayo dayta iti amin a nagan ken no tulongantayo ti sabsabali a mangtrato iti dayta kas nasantuan. (Mat. 6:9) Kas pagarigan, no ipakaammotayo ti kinapudno maipapan iti nagsasayaat a kualidad ni Jehova ken ti di agbaliw a panggepna iti sangatauan, idepdepensatayo ti nagan ti Dios iti kinaulbod ken pammadakes ni Satanas. (Gen. 3:1-5) Masantipikartayo met ti nagan ti Dios no ikagumaantayo a tulongan dagiti tattao iti teritoriatayo a mangbigbig a maikari ni Jehova nga “umawat iti dayag ken iti dayaw ken iti pannakabalin.” (Apoc. 4:11) Kuna ni Rune, a 16 a tawenen a payunir: “Agyamanak ta naikkanak iti gundaway nga agbalin a saksi ti Namarsua iti uniberso. Dayta ti mangtigtignay kaniak nga agtultuloy a mangasaba.”

AY-AYATENTAYO NI JEHOVA KEN TI ANAKNA

5. (a) Ania ti dinakamat ti Juan 15:9, 10 a rason a mangasabatayo? (b) Kasano nga impaganetget ni Jesus a kasapulan ti panagibtur?

5 Basaen ti Juan 15:9, 10. Ti naimpusuan nga ayattayo ken Jehova ken ni Jesus ket napateg a rason nga ikasabatayo ti mensahe ti Pagarian. (Mar. 12:30; Juan 14:15) Imbaga ni Jesus a saan laeng koma nga adda dagiti adalanna iti ayatna no di ket ‘agtalinaedda [pay] iti ayatna.’ Apay? Gapu ta ti panagbiag kas pudno nga adalan ni Kristo iti adu a tawen ket agkasapulan iti panagibtur. Impaganetget dayta ni Jesus iti maulit-ulit a panangusarna iti sao nga “agtalinaed” iti ababa a salaysay iti Juan 15:4-10.

6. Kasano a maipakitatayo a kayattayo ti agtalinaed iti ayat ni Kristo?

6 Kasano a maipakitatayo a kayattayo ti agtalinaed iti ayat ken anamong ni Kristo? No tungpalentayo dagiti bilin ni Jesus. Kasla ibagbagana kadatayo, ‘Agtulnogka kaniak.’ Ngem kidkiddawenna laeng ti mismo nga inaramidna, ta kinunana: “Kas iti panangtungpalko kadagiti bilin ti Ama ken panagtalinaedko iti ayatna.” Impakita ni Jesus ti ulidan.​—Juan 13:15.

7. Ania ti koneksion ti panagtulnog ken ti ayat?

7 Adda koneksion ti panagtulnog ken ti ayat, ta immuna nga imbaga ni Jesus kadagiti apostolna: “Ti addaan kadagiti bilinko ket tungpalenna ida, isu dayta ti agayat kaniak.”  (Juan 14:21) No itungpaltayo ti bilin ni Jesus a mangasaba, ipakpakitatayo met ti ayattayo iti Dios ta dagiti bilin ni Jesus iyanninawda ti pampanunot ni Amana. (Mat. 17:5; Juan 8:28) Kas subad iti ayattayo, agtultuloy ti panangayat kadatayo ni Jehova ken ni Jesus.

PAKPAKDAARANTAYO DAGITI TATTAO

8, 9. (a) Ania pay ti rason a mangasabatayo? (b) Apay a ti sasao ni Jehova iti Ezequiel 3:18, 19 ken 18:23 tignayennatayo nga agtultuloy a mangasaba?

8 Adda pay maysa a rason nga itultuloytayo ti mangasaba: Tapno mangpakdaartayo. Iti Biblia, nailadawan ni Noe kas “manangaskasaba.” (Basaen ti 2 Pedro 2:5.) Ti panangasabana sakbay ti Layus nalawag a ramanenna ti pakdaar maipapan iti asideg idin a pannakadadael. Apay a kasta ti konklusiontayo? Paliiwentayo ti kuna ni Jesus: “Ta kas kadakuada kadagidi nga aldaw kasakbayan ti layus, a mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket inyanudna amin ida, kastanto ti kaadda ti Anak ti tao.” (Mat. 24:38, 39) Uray saan a dimngeg dagiti tattao, simamatalek nga impakaammo ni Noe ti pakdaar a naited kenkuana.

9 Ita, ikaskasabatayo ti mensahe ti Pagarian tapno maikkan dagiti tattao iti gundaway a makaammo iti pagayatan ti Dios iti sangatauan. Kas ken Jehova, kayattayo nga ipangag dagiti tattao dayta a mensahe tapno ‘agtultuloyda nga agbiag.’ (Ezeq. 18:23) No mangaskasabatayo iti binalaybalay ken iti publiko a lugar, ikagkagumaantayo a pakdaaran ti amin a pagpatinggaento ti Pagarian ti Dios daytoy di nadiosan a lubong.​—Ezeq. 3:18, 19; Dan. 2:44; Apoc. 14:6, 7.

AY-AYATENTAYO TI PADATAYO A TAO

10. (a) Ania ti nadakamat iti Mateo 22:39 a rason a mangasabatayo? (b) Isalaysaymo no kasano a tinulongan da Pablo ken Silas ti maysa a guardia idiay Filipos.

10 Daytoy ti sabali pay a rason nga itultuloytayo ti mangasaba: Ay-ayatentayo ti padatayo a tao. (Mat. 22:39) Ti kasta nga ayat tignayennatayo nga agtultuloy a mangasaba, ta ammotayo a mabalin nga agbalbaliw dagiti tattao no agbaliw ti kasasaadda. Usigentayo ti kapadasan ni apostol Pablo ken ti kaduana a ni Silas. Iti siudad ti Filipos, imbalud ida dagiti bumusbusor. Sa iti tengnga ti rabii, bigla a nagginggined ket naluktan dagiti ridaw ti pagbaludan. Nagbuteng ti guardia amangan no nakalibasen dagiti balud isu nga agpakamatay koman. Ngem impukkaw ni Pablo: “Dika saktan ta bagim, ta addakami amin ditoy!” Dinamag ti madandanagan a guardia: “Ania ti masapul nga aramidek tapno maisalakanak?” Insungbatda: “Mamatika ken Apo Jesus ket maisalakankanto.”​—Ara. 16:25-34.

Matignaytayo a mangasaba gapu iti ayattayo ken Jehova, Jesus, ken iti padatayo a tao (Kitaen ti parapo 5, 10)

11, 12. (a) Iti salaysay maipapan iti guardia, ania ti masursurotayo maipapan iti ministeriotayo? (b) Ania koma ti sisasagana nga aramidentayo?

11 Iti salaysay maipapan iti guardia, ania ti masursurotayo maipapan iti panangasabatayo? Nagbalbaliw ti guardia ken nagpatulong kalpasan a nagginggined. Kasta met ita,  adda dagiti indibidual a saan idi a dimngeg iti mensahe ti Biblia ngem nagbalbaliw ken nagpatulongda idi arigna nadayyeg ti biagda gapu iti nakas-ang a pasamak. Kas pagarigan, mabalin a di ninamnama ti dadduma a mapukawda ti nabayagen a trabahoda ket permi ti pannakaupayda. Mabalin nga adda dagiti nadismaya gapu iti pannakarakrak ti panagasawada. Mabalin nga adda met dagidiay naladingitan gapu ta natakuatan nga adda nakaro a sakitda, wenno natay ti maysa nga ipatpategda. No mapasamak dagita, mabalin nga isaludsod ti dadduma a marirriribukan no ania ti panggep ti biag a dati a saanda a paginteresan. Nalabit maisaludsodda met, ‘Ania ti masapul nga aramidek tapno maisalakanak?’ No masarakantayo ida, mabalin a kayatdan ti dumngeg iti ibagatayo a namnama.

12 Gapuna, no simamatalek nga itultuloytayo ti mangasaba, sigsiguraduentayo a maliwliwatayo dagiti tattao iti tiempo a nakasaganadan a dumngeg. (Isa. 61:1) Kuna ni Charlotte, a 38 a tawenen iti amin-tiempo a panagserbi: “Nayaw-awan dagiti tattao ita. Kasapulan a mangngegda ti naimbag a damag.” Imbaga ni Ejvor, a 34 a tawenen a payunir: “Nakakarkaro itan ti kinaliday dagiti tattao. Kayatko ida a tulongan. Dayta ti pakatignayak a mangasaba.” Wen, ti panagayat iti pada a tao ket nagpateg a rason nga itultuloytayo ti ministeriotayo!

DAGITI SAGUT A MAKATULONG ITI PANAGIBTURTAYO

13, 14. (a) Ania a sagut ti nadakamat iti Juan 15:11? (b) Kasano a mariknatayo ti rag-o ni Jesus? (c) Kasano a makatulong ti rag-o iti ministeriotayo?

13 Iti maudi a rabii sakbay ti ipapatay ni Jesus, imbagana met kadagiti apostol dagiti sagut a makatulong tapno agtultuloyda nga agbunga. Ania dagitoy a sagut, ken kasano a magunggonaantayo kadagita?

14 Ti sagut a rag-o. Makapadagsen kadi ti panagtulnog iti bilin ni Jesus a mangasaba? Saan. Kalpasan nga insalaysay ni Jesus ti ilustrasion maipapan iti puon ti ubas, imbagana a makariknatayo iti rag-o iti panangikasabatayo iti Pagarian. (Basaen ti Juan 15:11.) Kinapudnona, impanamnamana a mariknatayo met ti rag-ona. Kasano? Kas nadakamat itay, inyarig ni Jesus ti bagina iti puon ti ubas ket dagiti adalanna ti sangsanga. Ti puon ti mangsuporta kadagiti sanga. Umawat iti danum ken sustansia dagiti sanga no la ket ta naisilpoda iti puon. Kasta met, no agtalinaedtayo a naikaykaysa ken Kristo babaen ti panangsurottayo a naimbag iti addangna, mariknatayo met ti rag-o a nariknana iti panangaramidna iti pagayatan ni Amana. (Juan 4:34; 17:13; 1 Ped. 2:21) Kuna ni Hanne, a nasurok nga 40 a tawenen a payunir, “Ti rag-o a marikriknak kalpasan ti ministerio ti pakatignayak nga agtultuloy nga agserbi ken Jehova.” Wen, ti pudpudno a rag-o ti mangpabileg kadatayo a mangasaba uray kadagiti narigat a teritoria.​—Mat. 5:10-12.

15. (a) Ania a sagut ti nadakamat iti Juan 14:27? (b) Apay a makatulong ti talna tapno agtultuloytayo nga agbunga?

15 Ti sagut a talna. (Basaen ti Juan 14:27.) Iti dayta a maudi a rabii ni Jesus, imbagana kadagiti apostolna: “Itedko kadakayo ti talnak.” Kasano a matulongannatayo nga agbunga dayta a sagut​—ti talnana? Bayat nga agib-ibturtayo, marikna ti pusotayo ti manayon a talna a resulta ti pannakaammotayo a maparparagsaktayo ni Jehova ken ni Jesus. (Sal. 149:4; Roma 5:3, 4; Col. 3:15) Kuna ni Ulf, nga 45 a tawenen iti amin-tiempo a panagserbi, “Mabannogak a mangasaba, ngem mariknak ti agpayso a ragsak ken adda pudpudno a panggep ti biagko.” Anian a yamantayo ta mabembendisionantayo iti manayon ken pudpudno a talna!

16. (a) Ania a sagut ti nadakamat iti Juan 15:15? (b) Kasano a makapagtalinaed dagiti apostol kas gayyem ni Jesus?

 16 Ti sagut a pannakigayyem. Kalpasan nga imbaga ni Jesus ti tarigagayna a “maan-anay koma” ti rag-o dagiti apostolna, inlawlawagna kadakuada a napateg nga ipakitada ti managsakripisio nga ayat. (Juan 15:11-13) Imbagana pay: “Inawagankay iti gagayyem.” Anian a nagsayaat a sagut ti pannakigayyem ken Jesus! Ania ti masapul nga aramiden dagiti apostol tapno agtalinaedda kas gayyemna? Masapul a ‘mapanda ken agtultuloyda a mangpataud iti bunga.’ (Basaen ti Juan 15:14-16.) Agarup dua a tawen sakbayna, imbilin ni Jesus kadagiti apostolna: “Bayat a mapankayo, mangasabakayo, a kunkunayo, ‘Ti pagarian ti langlangit asidegen.’” (Mat. 10:7) Isu nga iti dayta a maudi a rabii, pinaregtana nga agibturda iti trabaho nga inrugida. (Mat. 24:13; Mar. 3:14) Saan a nalaka nga itungpal ti bilin ni Jesus, ngem makapagballigida ket agtalinaedda kas gayyemna. Kasano? Babaen ti tulong ti sabali pay a sagut.

17, 18. (a) Ania a sagut ti nadakamat iti Juan 15:16? (b) Kasano a makatulong kadagiti adalan ni Jesus dayta a sagut? (c) Ania dagiti sagut a mangpabpabileg ita kadatayo?

17 Ti sagut a pannakasungbat dagiti kararag. Imbaga ni Jesus: “Uray no ania ti dawatenyo iti Ama iti naganko itedna . . . dayta kadakayo.” (Juan 15:16) Naparegta la ketdi dagiti apostol iti daytoy a kari! * Nupay saanda a naan-anay a naawatan dayta, asideg idin nga agpatingga ditoy daga ti biag ti Liderda, ngem saanda a mabaybay-an. Nakasagana ni Jehova a mangsungbat iti panangikararagda iti aniaman a tulong a kasapulanda tapno maitungpalda ti bilin a panangikasaba iti mensahe ti Pagarian. Di nagbayag, talaga a narikna ken nakitada a sinungbatan ni Jehova dagiti kararagda.—Ara. 4:29, 31.

Masiguradotayo a sungbatan ni Jehova ti panangikararagtayo iti tulongna (Kitaen ti parapo 18)

18 Pudno met dayta ita. Bayat nga itultuloytayo ti agbunga, gayyemnatayo ni Jesus. Masiguradotayo met a nakasagana ni Jehova a mangsungbat iti panangikararagtayo iti tulongna tapno mapagballigiantayo dagiti lapped iti panangikasabatayo iti naimbag a damag ti Pagarian. (Fil. 4:13) Anian a yamantayo ta masungsungbatan dagiti kararagtayo ken gayyemnatayo ni Jesus! Dagitoy a sagut ni Jehova ti mangpabileg kadatayo nga agtultuloy nga agbunga.​—Sant. 1:17.

19. (a) Apay nga itultuloytayo ti mangasaba? (b) Ania ti makatulong iti panangileppastayo iti trabaho ti Dios?

19 Kas nausig iti daytoy nga artikulo, itultuloytayo ti mangasaba tapno maipadayagtayo ni Jehova ken masantipikartayo ti naganna, tapno maipakitatayo ti ayattayo ken Jehova ken ni Jesus, tapno mangpakdaartayo, ken tapno maipakitatayo ti ayattayo iti padatayo a tao. Kanayonanna, ti sagut a rag-o, talna, pannakigayyem, ken pannakasungbat ti kararag pabilgendatayo a mangileppas iti trabaho ti Dios. Maragsakan la ketdi ni Jehova a makakita iti amin-kararua a panagreggettayo nga ‘agtultuloy a mangpataud iti adu a bunga’!

^ par. 17 Bayat ti pannakisarita ni Jesus kadagiti apostol, maulit-ulit nga impanamnamana a masungbatan dagiti kararagda.​—Juan 14:13; 15:7, 16; 16:23.