Mapan iti linaonna

Mapan iti listaan dagiti linaonna

 MANIPUD ITI ARCHIVES

“Ad-adda a Rimmegta ken Bimmara ti Ayat iti Pusomi”

“Ad-adda a Rimmegta ken Bimmara ti Ayat iti Pusomi”

ITI agsapa ti Biernes idi Septiembre 1922, mangrugin a pumudot bayat a sumsumrek ti 8,000 a tattao iti uneg ti auditorium. Imbaga ti tserman a nawaya a rummuar ti uray asino bayat ti programa, ngem saandan a mapalubosan a sumrek.

Adda dagiti kanta a nakanta bayat ti panglukat a programa a maawagan iti “Praise Service.” Kalpasan dayta, napanen iti podium ni Joseph F. Rutherford. Magagaranen ti kaaduan nga immay. Din makatalna ken makaanus ti dadduma gapu iti pudot. Nagpakaasi ti ispiker nga agtugaw ken dumngegda. Idi nangrugin ti palawag, adda ngata nakadlaw iti dakkel a tela a nakarolio iti ngato?

Inlawlawag ni Brother Rutherford ti tema a, “Ti pagarian ti langlangit asidegen.” Dandani maysa ket kagudua nga oras a gumgumluong ti timekna a nangilawlawag no kasano nga awanan buteng nga impakaammo dagiti nagkauna a propeta ti maipapan iti iyaay ti Pagarian. Idi dandanin malpas ti palawagna, insaludsodna, “Patienyo kadi nga agturturayen ti nadayag nga Ari?” Impukkaw dagiti dumdumngeg: “Wen!”

“Agsublikayo ngarud iti pangasabaan, dakayo nga annak ti kangatuan a Dios!” impukkaw ni Brother Rutherford. “Adtoy, agturturayen ti Ari! Dakayo dagiti para-waragawagna. Ngarud iwaragawagyo, iwaragawagyo, iwaragawagyo.”

Idi kuan, naukrad ti tela nga adda iti ngato a nakaisuratan ti: “Iwaragawagyo ti Ari ken ti Pagarian.”

“Permi ti ragsak dagiti immatender,” malagip ni Ray Bopp. Kuna met ni Anna Gardner a “kurangna la a marban ti atep gapu iti palakpak.” “Timmakder amin a tao,” kuna ni Fred Twarosh. Kuna pay ni Evangelos Scouffas, “Kasla adda nabileg a puersa a nangpatakder kadakami, ket timmakderkami a makasangsangit.”

Adu kadagiti nakikombension ti mangikaskasaba idin iti naimbag a damag maipapan iti Pagarian. Ngem ad-adda a naparegtada itan, nga addaanda iti baro a panggep. Kuna ni Ethel Bennecoff nga ‘ad-adda a rimmegta ken bimmara ti ayat iti puso’ dagiti Estudiante ti Biblia. Kalpasan ti kombension, determinado met ni Odessa Tuck, 18 ti tawenna idi, a mangawat iti awis a “Siasinonto ti mapan?” Kinunana: “Diak ammo idi no sadino, kasano, wenno ania ti aramidek. Ngem ti masiguradok ket kayatko a tuladen ni Isaias, a nangibaga, ‘Adtoyak! Ibaonnak.’” (Isa. 6:8) “Dayta a nakaragragsak nga aldaw,” kuna ni Ralph Leffler, “ti talaga a nangrugian ti kampania a panangiwaragawag iti Pagarian, a dimmanon itan iti intero a lubong.”

Di ngarud pakasdaawan a ti kombension idi 1922 idiay Cedar Point, Ohio ket nakapatpateg a paset ti pakasaritaan ti organisasion ti Dios. Kinuna ni George Gangas, “Dayta a kombension ti nangimula  iti pusok nga awan koma ti kombension a saanko a maatenderan.” Ket kas malagipna, awan pay a pulos ti saanna a naatenderan. Kastoy met ti insurat ni Julia Wilcox: “Saanko a mailadawan ti ragsak a mariknak kada madakamat iti publikasiontayo ti napasamak iti Cedar Point idi 1922. Kanayon a kayatko nga ibaga, ‘Agyamanak Apo Jehova ta pinalubosannak a makapan sadiay!’”

Mabalin nga adu met kadatayo ita ti addaan kadagiti di malipatan a pasamak iti kombension a nangparagsak iti pusotayo ken nangrubrob iti regtatayo ken iti ayattayo iti naindaklan a Diostayo ken iti dinutokanna nga Ari. No pampanunotentayo dagita a pasamak, maibagatayo met, “Agyamanak Apo Jehova ta pinalubosannak a makapan sadiay!”