Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2016

Kasanoka nga Agdesision?

Kasanoka nga Agdesision?

“Itultuloyyo a lasinen no ania ti pagayatan ni Jehova.”—EFE. 5:17.

KANTA: 69, 57

1. Ania ti dadduma a bilin a linaon ti Biblia, ken kasano a magunggonaantayo no tungpalentayo dagita?

BABAEN ti naisurat a Saona, nangted ni Jehova iti adu nga espesipiko a bilin. Kas pagarigan, iparitna ti seksual nga immoralidad, idolatria, panagtakaw, ken panagbartek. (1 Cor. 6:9, 10) Kasta met, imbilin ni Jesu-Kristo nga Anak ti Dios kadagiti adalanna daytoy narigat ngem makaparagsak a trabaho: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:19, 20) Talaga a mangsalaknib dagiti linteg ken bilin ti Dios! Gapu iti panangtungpaltayo kadagitoy, ad-adda nga agtalektayo iti bagitayo, nasalsalun-attayo, ken naragragsak ti pamiliatayo. Maysa pay, no agtulnogtayo kadagiti bilin ni Jehova, agraman ti bilin a panangasaba, magun-odantayo ti anamong ken bendisionna.

2, 3. (a) Apay a saan a nangipaay ti Biblia kadatayo kadagiti paglintegan iti tunggal kasasaad iti biag? (b) Ania dagiti saludsod a mausig iti daytoy nga artikulo? (Kitaen ti ladawan iti rugi ti artikulo.)

2 Nupay kasta, adu dagiti kasasaad nga awan ti espesipiko a bilin  nga ibaga ti Biblia. Kas pagarigan, saan a naglaon ti Biblia kadagiti detalyado a paglintegan no ania ti maitutop a pagkawes dagiti Kristiano. Kasano nga ipakita dayta ti sirib ni Jehova? Agduduma ti estilo ken kaugalian iti panagkawes iti nagduduma a paset ti lubong, kasta met nga agbaliwbaliw dagita bayat ti panaglabas ti tawen. No koma nangipaay ti Biblia iti listaan dagiti maipalubos nga estilo ti panagkawkawes ken panaglanglanga, mabalin a saan koma nga agaplikar dayta itan. Kasta met, saan a nangipaay ti naipaltiing a Sao ti Dios iti adu a paglintegan no ania ti pilien dagiti Kristiano a trabaho, panangaywan iti salun-at, ken paglinglingayan. Nawaya ngarud ti tunggal indibidual ken ulo ti pamilia nga agdesision kadagitoy a banag.

3 Kayat kadi a sawen daytoy a saan a napateg ken Jehova ti pilientayo nga aramiden no maipasangotayo kadagiti napateg a panagdesision, a ti dadduma ket mabalin a dakkel ti epektona iti biagtayo? Anamongan kadi ti nailangitan nga Amatayo ti aniaman a desision awan la ketdi ti masalungasing a linteg iti Biblia? No awan ti espesipiko a linteg iti Biblia, kasano a maammuantayo a makaay-ayo ken Jehova dagiti desisiontayo?

NAPATEG KADI DAGITI PERSONAL A DESISION?

4, 5. Kasano a dagiti desisiontayo apektarannatayo ken ti sabsabali?

4 Dadduma ti agkuna nga aniaman ti aramidentayo, awan aniamanna dayta. Nupay kasta, tapno makaaramidtayo kadagiti umiso a desision a makaay-ayo ken Jehova, masapul nga ikabilangantayo dagiti linteg ken prinsipio a mabasa iti Saona ken tungpalentayo dagita. Kas pagarigan, tapno anamongannatayo ti Dios, masapul a tungpalentayo ti lintegna mainaig iti dara. (Gen. 9:4; Ara. 15:28, 29) Makatulong ti kararag tapno makapagdesisiontayo maitunos kadagiti prinsipio ken linteg iti Kasuratan.

5 Dagiti napateg a desision nga aramidentayo ket mabalin a dakkel ti epektona iti naespirituan a salun-at ken pagimbagantayo. Tunggal desision nga aramidentayo ket mabalin nga adda dakes wenno naimbag nga epektona iti relasiontayo ken Jehova. No umiso ti desisiontayo, bumileg ti relasiontayo iti Dios, ngem madadael dayta no saan nga umiso ti desisiontayo. Kasta met, ti di umiso a desision mabalin a dangranna ti espiritualidad ti dadduma a pakaigapuan ti pannakaburibor, wenno pannakaitibkolda pay ketdi, wenno mangdadael iti panagkaykaysa ti kongregasion. Gapuna, nakapatpateg dagiti personal a desisiontayo.—Basaen ti Roma 14:19; Galacia 6:7.

6. Ania koma ti pakaibatayan dagiti desisiontayo?

6 Ania ti aramidentayo kadagiti kasasaad nga awan ti direkta a bilin ti Biblia? Kadagita a situasion, responsabilidadtayo nga usigen dagiti detalye ket agdesisiontayo saan a maigapu iti pagayatantayo no di ket no ania ti pagayatan ken bendisionan ni Jehova.—Basaen ti Salmo 37:5.

LASINEM TI PAGAYATAN NI JEHOVA

7. No awan ti direkta a linteg iti Biblia, kasano a maammuantayo no ania ti kayat ni Jehova nga aramidentayo iti maysa a situasion?

7 Mabalin a panunotem, ‘Kasano a maammuantayo no ania ti anamongan ni Jehova no awan ti espesipiko nga ibaga ti Saona mainaig iti maysa a banag?’ Kuna ti Efeso 5:17: “Itultuloyyo a lasinen no ania ti pagayatan ni Jehova.” No awan ti direkta a linteg iti Biblia, kasano a mailasintayo ti pagayatan ti Dios? Babaen ti panagkararag kenkuana ken panagpaiwanwan iti nasantuan nga espiritu.

8. Kasano a nailasin ni Jesus no ania ti kayat ni Jehova nga aramidenna? Mangted iti pagarigan.

8 Usigentayo no kasano a nailasin ni Jesus no ania ti kayat ni Amana nga aramidenna. Iti dua a gundaway, nagkararag nga umuna  ni Jesus, ket kalpasanna, babaen iti milagro, nangipaay iti taraon kadagiti tattao. (Mat. 14:17-20; 15:34-37) Ngem saanna a pinagbalin a tinapay dagiti bato idi mabisin ken sinulisog ti Diablo idiay let-ang. (Basaen ti Mateo 4:2-4.) Gapu ta ammona ti panagpampanunot ni Amana, ammo ni Jesus a saan a rumbeng a pagbalinenna a tinapay dagiti bato. Wen, binigbig ni Jesus a saan a pagayatan ti Dios nga usarenna ti pannakabalinna iti bukodna a pagimbagan. Gapu iti dayta, impakitana nga agpampannuray iti panangiwanwan ken tulong ni Jehova.

9, 10. Ania ti makatulong kadatayo a mangaramid kadagiti umiso a desision? Mangted iti pagarigan.

9 Tapno makaaramidtayo kadagiti umiso a desision, a kas ken Jesus, masapul nga agpannuraytayo iti panangiwanwan ni Jehova. Masapul nga agtignaytayo maitunos iti daytoy a balakad: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam. Dika agmasirib kadagiti bukodmo a mata. Agbutengka ken Jehova ket umadayoka iti dakes.” (Prov. 3:5-7) Ti panangammo iti pampanunot ni Jehova babaen ti panagadal iti Biblia tulongannatayo a mangilasin no ania ti kayat ti Dios nga aramidentayo iti maysa a situasion. No ad-adda a pamiliartayo iti panagpampanunot ni Jehova, ad-adda nga agbalin a sensitibo ti pusotayo iti panangiwanwanna.—Ezeq. 11:19.

10 Kas panangyilustrar: Panunotem ti maysa nga asawa a babai nga adda iti paggatangan. Adda nagustuanna a sapatos ngem nakanginngina. Isu nga insaludsodna iti bagina, ‘Ania ngata ti makuna ni lakayko no gatangek daytoy?’ Nalabit ammonan ti sungbat uray no saanna a kadua ni lakayna. Apay? Gapu ta nabayagdan nga agassawa, ammonan ti panagpampanunot ni lakayna maipapan iti limitado a badyetda. Gapuna, maawatanna no ania ti panunoten ni lakayna no gatangenna dayta. Kasta met, bayat nga in-inut a maammuantayo ti pampanunot ken daldalan ni Jehova, ad-adda a mailasintayo no ania ti kayat ti nailangitan nga Amatayo nga aramidentayo iti nagduduma a kasasaad.

KASANO A MAAMMUAM TI PANAGPAMPANUNOT NI JEHOVA?

11. Ania dagiti isaludsodtayo no agbasa wenno agadaltayo iti Biblia? (Kitaen ti kahon a “ No Ad-adalem ti Sao ti Dios, Isaludsodmo iti Bagim.”)

11 Tapno maammuantayo ti panagpampanunot ni Jehova, masapul nga ipangpangrunatayo ti personal a panagadal. No basbasaen wenno ad-adalentayo ti Sao ti Dios, mabalin nga isaludsodtayo, ‘Ania ti ibaga daytoy maipapan ken Jehova, maipapan kadagiti nalinteg a daldalanna, ken maipapan iti panagpampanunotna?’ Masapul a tuladentayo ti kababalin ni salmista a David a nangikanta: “Ipakaammom kaniak dagiti bukodmo a dalan, O Jehova; isurom kaniak dagiti bukodmo a dana. Papagnaennak iti kinapudnom ket isuronak, ta sika ti Dios ti pannakaisalakanko. Kenka nanginanamaak iti intero nga agmalem.” (Sal. 25:4, 5) Bayat nga ut-utobem ti maysa a paset ti Biblia, mabalin nga usigem dagitoy a saludsod: ‘Kasano a mayaplikarko daytoy nga impormasion iti pamiliak? Sadino ti pangyaplikarak iti daytoy? Iti pagtaengan? Iti pagtrabahuan? Iti eskuelaan? Iti ministerio?’ No ammotayo no sadino ti pangyaplikarantayo iti nabasatayo, mabalin a nalaklaka a mailasintayo no kasano a mayaplikartayo dayta.

12. Kasano a makatulong dagiti publikasion ken gimongtayo tapno maammuantayo ti kapanunotan ni Jehova iti nagduduma a banag?

12 Kasta met, ad-adda pay a maammuantayo ti panagpampanunot ni Jehova no nasiputtayo kadagiti naibatay iti Biblia  a panangiwanwan ti organisasionna. Kas pagarigan, napataud ti Watch Tower Publications Index ken ti Giya iti Panagsukimat Para Kadagiti Saksi ni Jehova tapno matulongantayo a mangammo iti kapanunotan ni Jehova maipapan iti adu a kasasaad a masapul a datayo ti agdesision. Dakkel met ti magunggonatayo no agimdengtayo a naimbag ken makiramantayo kadagiti Nakristianuan a gimong. No mennamennaentayo dagiti maisursuro kadatayo, ad-adda a maammuantayo ti pampanunot ni Jehova ken matuladtayo dayta. No aprobetsarentayo amin a naespirituan a taraon nga ipapaay ni Jehova, in-inut a maammuantayo ti daldalanna. Iti kasta, ad-adda a makaaramidtayo kadagiti desision a bendisionan ti naayat a Diostayo.

IPALUBOSMO A TI PANAGPAMPANUNOT NI JEHOVA TI MANGIWANWAN KADAGITI DESISIONMO

13. Mangted iti pagarigan a mangipakita no kasano a makaaramidtayo iti umiso a desision no ammotayo ti pampanunot ni Jehova.

13 Usigentayo ti maysa a pagarigan a mangipakita no kasano a makatulong ti pannakaammotayo iti panagpampanunot ni Jehova tapno makaaramidtayo kadagiti umiso a desision. Kas agibumbunannag iti Pagarian, mabalin a kayattayo ti agbalin a regular pioneer. Tapno maaramidtayo dayta, pasimplientayo ti biagtayo. Ngem mabalin a madanagantayo no pudno nga agbalintayo a naragsak no makissayan dagiti material a banag nga adda kadatayo. Siempre, awan ti ibaga ti Biblia nga agpayunirtayo ta mabalintayo met ti agtultuloy nga agserbi ken Jehova kas matalek nga agibumbunannag. Nupay kasta, impasigurado ni Jesus kadatayo nga umawat iti adu a bendision dagiti agsakripisio para iti Pagarian. (Basaen ti Lucas 18:29, 30.) Kasta met, ipakita ti Kasuratan a maragsakan ni Jehova no mangipaaytayo kenkuana kadagiti boluntario a daton ti panagdayaw ken siraragsak nga aramidentayo ti amin a kabaelantayo a mangitandudo iti pudno a panagdayaw. (Sal. 119:108; 2 Cor. 9:7) Maitunos kadagitoy a balakad ti Biblia, agraman ti panagkiddaw iti panangiwanwan babaen ti kararag, mailasintayo ti panagpampanunot ni Jehova. No utobentayo dagitoy, makaaramidtayo iti praktikal a desision a bendisionan ti nailangitan nga Amatayo.

14. Kasanom a mailasin no makaay-ayo ken Jehova ti maysa nga estilo ti panagbadbado?

14 Usigentayo ti sabali pay a pagarigan: No ngay magusgustuam ti maysa nga estilo ti bado a mabalin a pagduaduaan ti dadduma iti kongregasion. Ngem awan met ti ammom nga espesipiko a linteg iti Biblia a mangiparit iti dayta. Ania ti kapanunotan ni Jehova iti dayta? Kastoy ti naipaltiing a balakad ni apostol Pablo: “Dagiti babbai arkosanda ti bagbagida iti naimbag-pannakaurnosna a kawes, buyogen  ti kinaemma ken kinasimbeng ti panunot, saan a kadagiti estilo a panangsallapid iti buok ken balitok wenno kadagiti perlas wenno nangina unay a lupot, no di ket iti wagas a maitutop kadagiti babbai nga agkunkuna nga agraemda unay iti Dios, awan sabali, babaen iti naimbag nga ar-aramid.” (1 Tim. 2:9, 10) Agaplikar met ti prinsipio daytoy a balakad kadagiti Kristiano a lallaki. Kas matalek nga ad-adipen ni Jehova, saan laeng a ti magustuantayo ti pakaseknantayo no di ket uray ti epekto iti sabsabali ti panagbadbado ken panaglanglangatayo. Ti ayat ken kinapakumbaba ti mangtignay kadatayo a mangikabilangan iti opinion dagiti kapammatiantayo tapno saantayo ida a masair wenno maitibkol. (1 Cor. 10:23, 24; Fil. 3:17) No laglagipentayo ti ibaga ti Kasuratan, makatulong dayta kadatayo a mangilasin iti panagpampanunot ni Jehova iti daytoy a banag ken mangiwanwan kadatayo nga agaramid kadagiti desision a mangparagsak kenkuana.

15, 16. (a) Ania ti marikna ni Jehova no kanayon a pampanunotentayo dagiti immoral a bambanag? (b) No agpilitayo iti paglinglingayan, kasano a maammuantayo ti makaay-ayo ken Jehova? (c) Kasano a makaaramidtayo kadagiti napateg a desision?

15 Ibaga ti Biblia a maladingitan ni Jehova no agaramid dagiti tattao iti dakes ken no panunotenda dagiti dakes a bambanag. (Basaen ti Genesis 6:5, 6.) Maitunos iti dayta, maawatantayo a di umiso ti seksual a panagar-arapaap ta mabalin a mangituggod dayta iti nadagsen a basol nga iparit ti Kasuratan ken maibusor dayta iti panagpampanunot ni Jehova. Insurat ni adalan a Santiago: “Ti sirib manipud ngato umuna iti amin nadalus, kalpasanna natalna, nainkalintegan, sisasagana nga agtulnog, napno iti asi ken naimbag a bungbunga, saan a mangpataud kadagiti panangidumduma, saan a managinsisingpet.” (Sant. 3:17) Gapuna, liklikantayo dagiti paglinglingayan a mangrubrob iti narugit a panagpampanunot ken tarigagay. Saanen a kasapulan a damagen ti maysa a Kristiano nga addaan iti panangilasin no maawat ti maysa a libro, pabuya, wenno ay-ayam a mangitampok iti kagura ni Jehova. Nalawag a makita iti Saona ti kapanunotanna maipapan kadagitoy a banag.

16 No agdesisiontayo, masansan nga adu ti pagpiliantayo a mabalin a maragsakan latta ni Jehova. Ngem no maipapan kadagiti napateg a desision, nasayaat no agpabalakadtayo kadagiti panglakayen wenno kadagiti adun ti kapadasanda a Kristiano. (Tito 2:3-5; Sant. 5:13-15) Siempre, saan nga umiso nga idesisionandatayo ti sabsabali. Masapul a sursuruen ken sanayen dagiti Kristiano ti pannakabaelda a mangilasin. (Heb. 5:14) Agtignaytayo koma amin maitunos iti sasao ni Pablo: “Tunggal maysa awitennanto ti bukodna nga awit.”—Gal. 6:5.

17. Kasano a magunggonaantayo no makaay-ayo ken Jehova dagiti desision nga aramidentayo?

17 No ibataytayo dagiti desisiontayo iti panagpampanunot ni Jehova, sumingedtayo kenkuana. (Sant. 4:8) Magun-odtayo ti anamongna ken bendisionannatayo. Daytoy met ti mangpabileg iti pammatitayo iti nailangitan nga Amatayo. Ngarud, agpaiwanwantayo kadagiti linteg ken prinsipio ti Biblia gapu ta ipalgakda dagiti kapanunotan ti Dios kadagiti bambanag. Siempre, adu pay ti maammuantayo maipapan ken Jehova. (Job 26:14) Ngem no agreggettayo, ita pay laeng magun-odantayon ti sirib, pannakaammo, ken pannakatarus a kasapulan tapno makaaramidtayo kadagiti umiso a desision. (Prov. 2:1-5) Apagbiit laeng a lumabas dagiti kapanunotan ken plano ti imperpekto a tao, ngem ipalagip kadatayo ti salmista: “Agingga iti tiempo a di nakedngan agtalinaedto ti mismo a pammatigmaan ni Jehova; ti pampanunot ti pusona ket agingga iti maysa a kaputotan kalpasan ti sabali pay a kaputotan.” (Sal. 33:11) Nalawag a makaaramidtayo kadagiti kasayaatan a personal a desision no dagiti pampanunot ken tigtignaytayo ket maitunos iti pampanunot ti kasisiriban a Dios a ni Jehova.