Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan—Pagadalan nga Edision  |  Mayo 2016

Agtultuloy Pay Laeng Kadi a Balbaliwan ti Biblia ti Biagmo?

Agtultuloy Pay Laeng Kadi a Balbaliwan ti Biblia ti Biagmo?

“Agbalbaliwkayo babaen ti panangpabaroyo iti panunotyo.”—ROMA 12:2.

KANTA: 61, 52

1-3. (a) Ania dagiti mabalin a narigat a balbaliwantayo kalpasan ti bautismotayo? (b) No narigrigat ti mangaramid iti panagbalbaliw ngem iti namnamaentayo, ania dagiti mabalin nga isaludsodtayo? (Kitaen ti ladawan iti rugi ti artikulo.)

IDI naammuan ni Kevin [1] ti kinapudno, ti makisinninged ken Jehova ti nagbalin a kapatgan kenkuana. Ngem adu a tawen sakbayna, nailumlom iti panagsugal, panagsigarilio, panagbartek, ken panagdroga. Tapno magun-odna ti anamong ti Dios, masapul nga isardeng ni Kevin dagitoy a dakes a bisio. Naaramidna dayta iti tulong ni Jehova ken iti mamagbalbaliw a pannakabalin ti Sao ti Dios.—Heb. 4:12.

2 Kalpasan ti bautismona, insardeng kadin ni Kevin ti mangaramid iti panagbalbaliw iti biagna? Saan, ta masapul nga ikagumaanna pay a patanoren ken pasayaaten dagiti kababalinna kas Kristiano. (Efe. 4:31, 32) Kas pagarigan, nasdaaw ta narigrigatna gayam a kontrolen ti panagpungtotna. Inamin ni Kevin, “Narigrigat gayam a kontrolen ti panagpungtotko ngem iti panangikkatko kadagiti dati a bisiok!” Ngem nakapagbalbaliw ni Kevin gapu iti  napasnek a panagkararag ken panagadalna iti Biblia.

3 Kas ken Kevin, adu kadatayo ti nangaramid iti dakkel a panagbalbaliw sakbay a nagpabautisartayo tapno maitunos ti biagtayo kadagiti kalikaguman ti Biblia. Kalpasan a nagpabautisartayo, nakitatayo a masapul nga agtultuloy a mangaramidtayo iti babassit a panagbalbaliw tapno ad-adda a matuladtayo ti Dios ken ni Kristo. (Efe. 5:1, 2; 1 Ped. 2:21) Kas pagarigan, mabalin a madlawtayo a datayo ket manangbabalaw, managbuteng iti tao, managtsismis, wenno addaantayo iti dadduma pay a pagkapuyan. Mas marigatantayo kadi a mangaramid iti panagbalbaliw kadagitoy ngem iti namnamaentayo? No wen, mabalin a maisaludsodmo, ‘Dakkel a panagbalbaliw ti naaramidkon, ngem apay a marigatanak a mangaramid kadagiti babbabassit a panagbalbaliw? Ania pay ti mabalin nga aramidek tapno agtultuloy a balbaliwan ti Biblia ti biagko?’

AGBALIN A REALISTIKO

4. Apay a saantayo a maparagsak ni Jehova iti amin nga ar-aramidentayo?

4 Gapu ta am-ammo ken ay-ayatentayo ni Jehova, kayattayo nga aramiden ti makaay-ayo kenkuana. Ngem kasanoman kapasnek dayta a tarigagay, saantayo a kanayon a maparagsak ti Dios gapu iti kinaimperpektotayo. Ti kasasaadtayo ket kas ken apostol Pablo. Insuratna: “Adda kaniak ti pannakabael nga agtarigagay, ngem awan ti pannakabael nga agaramid iti nasayaat.”—Roma 7:18; Sant. 3:2.

5. Ania dagiti panagbalbaliw nga inaramidtayo sakbay a nagpabautisartayo, ngem ania dagiti pagkapuyan a mabalin a lablabanantayo pay laeng?

5 Insardengtayon dagiti di umiso nga ar-aramid tapno agbalintayo a paset ti kongregasion Kristiano. (1 Cor. 6:9, 10) Ngem imperpektotayo latta. (Col. 3:9, 10) Saan ngarud a realistiko a panunoten a kalpasan ti bautismotayo, wenno uray adu a tawen nga addatayon iti kinapudno, saantayon a makaaramid kadagiti kamali, agsubli kadagiti dati nga aramidtayo, wenno makapanunot kadagiti dakes a motibo ken tarigagay. Mabalin nga adda dagiti pagkapuyan a masapul a labanan iti adu a tawen.

6, 7. (a) Ania ti mamagbalin kadatayo a gayyem ni Jehova uray no imperpektotayo? (b) Apay a saantayo koma nga agkedked a dumawat iti pammakawan ken Jehova?

6 Saan koma a ti natawidtayo a kinaimperpekto ti manglapped kadatayo a mangtagiragsak iti pannakigayyem ken Jehova wenno agtultuloy nga agserbi kenkuana. Usigentayo daytoy: Idi inawisnatayo ni Jehova tapno maaddaantayo iti relasion kenkuana, ammona a makaaramidtayo latta iti kamali. (Juan 6:44) Gapu ta ammo ti Dios dagiti kababalintayo ken ti linaon ti pusotayo, sigurado nga ammona no aniada a pagkapuyan ti nangnangruna a mangsubok kadatayo. Ammona met nga agbasoltayo sagpaminsan. Ngem kayatna latta nga agbalintayo a gayyemna.

7 Gapu iti ayat, inted ti Dios kadatayo ti nagpateg a sagut—ti subbot a daton ti dungdungnguenna nga Anak. (Juan 3:16) Babaen iti daytoy a nagpateg a probision, masiguradotayo nga agtultuloy a gayyemnatayo ni Jehova no agbabawi ken dawatentayo ti pammakawanna no agbasoltayo. (Roma 7:24, 25; 1 Juan 2:1, 2) Masapul kadi a pagkedkedantayo dagiti pagimbagan ti subbot gapu ta mariknatayo a saantayo a nadalus wenno managbasoltayo? Siempre saan! Kayarigan dayta ti saan a panangusar iti danum a mangbuggo iti narugit nga imatayo. Kinapudnona, naipaay ti subbot kadagiti agbabbabawi a managbasol. Gapu iti subbot, mabalin nga agbalintayo a gayyem ni Jehova uray no imperpektotayo.—Basaen ti 1 Timoteo 1:15.

8. Apay a masapul a saantayo a baybay-an lattan dagiti pagkapuyantayo?

8 Siempre, saantayo a basta baybay-an lattan dagiti pagkapuyantayo. Ti pannakigayyem ken Jehova ramanenna ti panagregget a  mangtulad a sisisinged iti Dios ken ni Kristo ken agbalin a kita ti tao a kayatda a pagbalinantayo. (Sal. 15:1-5) Ramanenna met ti panangikagumaan a mangkontrol kadagiti pagannayasantayo, wenno ikkaten pay ketdi dagita no mabalbalin. Kababautisartayo man wenno nabayagtayon iti kinapudno, masapul nga ‘itultuloytayo ti maatur.’—2 Cor. 13:11.

9. Apay nga ammotayo a maitultuloytayo nga ikawes ti baro a personalidad?

9 Kasapulan ti agtultuloy a panagregget tapno “maatur” ken maipakitatayo “ti baro a personalidad.” Impalagip ni Pablo kadagiti kapammatianna: “Ikkatenyo koma ti daan a personalidad a mayannurot iti sigud a dana ti kababalinyo ken agruprupsa maitunos kadagiti makaallilaw a derrepna; no di ket mapabarokayo koma iti puersa a mangtigtignay iti panunotyo, ket ikawesyo koma ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” (Efe. 4:22-24) Kaipapanan daytoy a ti panangikawes iti baro a personalidad ket agtultuloy a proseso. Makaparegta daytoy ta ipasiguradona kadatayo a kasanoman kabayag nga agserserbitayon ken Jehova, mabalintayo latta ti rumang-ay iti panangpatanor ken panangpasayaat kadagiti kababalintayo kas Kristiano a mangbukel iti baro a personalidad. Wen, mabalin nga agtultuloy a balbaliwan ti Biblia ti biagtayo.

APAY A NAKARIGRIGAT?

10. Ania ti masapul nga aramidentayo tapno agtultuloy a makaaramidtayo iti panagbalbaliw iti tulong ti Biblia, ken ania dagiti mabalin nga isaludsodtayo?

10 Masapul nga agreggettayo tapno agtultuloy a balbaliwannatayo ti Sao ti Dios. Ngem apay a masapul nga agreggettayo? No bembendisionan ni Jehova ti panangikagumaantayo, saan kadi a nalaklaka koma a rumang-aytayo iti naespirituan? Saan kadi a mabalin nga ikkaten lattan ni Jehova dagiti di umiso a pagannayasantayo tapno nalaklaka a maipakitatayo dagiti nadiosan a kualidad?

11-13. Apay a namnamaen ni Jehova nga ikagumaantayo a parmeken dagiti pagkapuyantayo?

11 No panunotentayo ti uniberso, mabigbigtayo a nakabilbileg ni Jehova. Kas pagarigan, iti kada segundo, lima a milion a tonelada a materia (matter) ti init ti agbalbalin nga enerhia. Nupay bassit laeng ti dumanon iti atmospera ti globotayo, umdas daytan tapno mangipaay iti bara ken lawag a mangsustiner iti biag ditoy daga. (Sal. 74:16; Isa. 40:26) Maragsakan ni Jehova a mangipaay iti umdas a pannakabalin wenno pigsa kadagiti adipenna no kasapulan. (Isa. 40:29) Wen, mabalin pay ketdi a pabilgennatayo ti Dios tapno mapagballigiantayo amin a pagkapuyantayo uray saantayo nga agregget wenno makasursuro kadagiti nagkamaliantayo. Ngem apay a saanna nga aramiden dayta?

12 Inikkannatayo ni Jehova iti awan kaaspingna a sagut—ti wayawaya nga agpili. No pilien ken ikagumaantayo nga aramiden ti pagayatan ti Dios, maipakitatayo a talaga nga ay-ayatentayo ni Jehova ken kayattayo a paragsaken. Maipakitatayo met a supsuportarantayo ti kinasoberanona. Kinarit ni Satanas ti karbengan ni Jehova a mangituray. Gapuna, no agregget ken situtuloktayo a mangitandudo iti kinasoberanona, sigurado nga ipateg dayta ti naasi ken manangapresiar nga Amatayo. (Job 2:3-5; Prov. 27:11) Ngem no pagbalinen ni Jehova a nalaka para kadatayo a parmeken dagiti pagkapuyantayo a saanen a masapul nga agreggettayo tapno maparagsaktayo, saantayo a mapaneknekan ti kinamatalektayo ken panangsuportatayo iti kinasoberanona.

13 Dayta ti makagapu nga ibagbaga ni Jehova a masapul ti “napasnek a panagregget” tapno mapatanortayo dagiti nadiosan a kababalin. (Basaen ti 2 Pedro 1:5-7; Col. 3:12) Namnamaenna nga agreggettayo a mangkontrol iti panunot ken rikriknatayo. (Roma 8:5; 12:9) No ikagumaantayo nga aramiden dayta, maragsakantayo ta makitatayo nga  agtultuloy pay laeng a balbaliwan ti Biblia ti biagtayo.

BAY-AM NGA AGTULTULOY A BALBALIWANNAKA TI SAO TI DIOS

14, 15. Ania ti mabalin nga aramidentayo tapno mapatanortayo dagiti kababalin a makaay-ayo ken Jehova? (Kitaen ti kahon a “ Binalbaliwan ti Biblia ken Kararag ti Biagda.”)

14 Ania ti aramidentayo tapno mapatanortayo dagiti nadiosan a kababalin ken maparagsaktayo ni Jehova? Imbes a no ania lattan ti ikeddengtayo a balbaliwan, masapul a bay-antayo nga iwanwannatayo ti Dios. Kuna ti Roma 12:2: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” Babaen ti Saona ken ti nasantuan nga espirituna, tultulongannatayo ni Jehova a mangtarus iti pagayatanna, mangaramid iti dayta, ken mangaramid iti kasapulan a panagbalbaliw tapno maaramidtayo dagiti kalikagumanna. Karaman kadagiti masapul nga aramidentayo ket ti inaldaw a panagbasa iti Biblia, panangutob iti Kasuratan, ken panangikararag iti nasantuan nga espiritu. (Luc. 11:13; Gal. 5:22, 23) No agpaiwanwantayo iti nasantuan nga espiritu ti Dios ken itunostayo ti pampanunottayo iti panangmatmat ni Jehova a mabasa iti Saona, ad-adda nga agbalin a nadiosan ti panagpampanunot, panagsasao, ken panagtigtignaytayo. Nupay kasta, masapul nga agreggettayo latta a manglaban kadagiti pagkapuyantayo.—Prov. 4:23.

Mabalin a makatulong kenka no urnongem ken repasuem dagiti teksto ken artikulo a mainaig kadagiti pagkapuyam (Kitaen ti parapo 15)

15 Malaksid iti inaldaw a panagbasa iti Biblia, masapul nga adalentayo ti Sao ti Dios babaen iti tulong dagiti publikasiontayo tapno matuladtayo dagiti nagsasayaat a kualidad ni Jehova. Nakita ti dadduma a nagsayaat nga urnongen ken sagpaminsan a repasuen ti dadduma a teksto ken dagiti artikulo iti Pagwanawanan wenno Agriingkayo! a makatulong tapno mapatanor dagiti Nakristianuan a kababalin wenno tapno mapagballigian dagiti pagkapuyan.

16. Apay a saantayo koma a maupay no nabuntog ti panagbalbaliwtayo?

16 No kasla nabuntog ti panagrang-aymo iti naespirituan, laglagipem nga agkasapulan dayta iti panawen. Ti panangpatanor kadagiti naespirituan a kababalin ket agtultuloy a proseso. Masapul a naanustayo no ipalubostayo nga agtultuloy a balbaliwan ti Biblia ti biagtayo. No damdamo, mabalin a masapul a disiplinaentayo ti bagitayo tapno maaramidtayo ti umiso sigun iti Kasuratan. Ngem inton agangay, bayat nga in-inut nga ituntunostayo ti tigtignay ken pampanunottayo iti pampanunot ni Jehova, nalaklakanton ken agbalin laengen a normal kadatayo ti agpanunot ken agtignay a maitunos iti nadiosan a pamay-an.—Sal. 37:31; Prov. 23:12; Gal. 5:16, 17.

 PANUNOTEM TI NAGSAYAAT A NAMNAMATAYO

17. No matalektayo ken Jehova, ania a nagsayaat a masanguanan ti manamnamatayo?

17 Maaddaanto dagiti matalek nga adipen ni Jehova iti pribilehio nga agbalin a perpekto ken agnanayon nga agserbi kenkuana. Iti dayta a tiempo, saanton a narigat nga iparangarang dagiti nadiosan a kababalin, no di ket kanayon a nagsayaat nga aramiden dayta. Kabayatanna, agyamantayo iti subbot ta mabalintayo ti agdayaw iti naayat a Diostayo. Maaramidtayo dayta no ipalubostayo a balbaliwannatayo ti Saona uray no imperpektotayo pay laeng ita.

18, 19. Kasano a masiguradotayo a kabaelan ti Biblia nga agtultuloy a balbaliwan ti biagtayo?

18 Ni Kevin, a nadakamat iti rugi, inkagumaanna a kontrolen ti panagpungtotna. Inutob ken inyaplikarna dagiti prinsipio ti Biblia, ken inawatna ti tulong ken balakad dagiti padana a Kristiano. Kalpasan ti sumagmamano a tawen, nagdakkel ti nagbalbaliwan ni Kevin. Idi agangay, nakualipikar nga agbalin a ministerial nga adipen, ket iti napalabas a 20 a tawen, agserserbi kas panglakayen iti kongregasion. Nupay kasta, ammona a masapul nga agannad tapno saan nga agsubli ti dati a pagkapuyanna.

19 Ipakita ti kapadasan ni Kevin a makatulong ti Biblia kadagiti adipen ti Dios a mangbalbaliw iti biagda. Ngarud, agtultuloy koma nga ipalubostayo ti Sao ti Dios a mangbalbaliw kadatayo ken ad-adda a mangpasinged kadatayo ken Jehova. (Sal. 25:14) No makitatayo a bembendisionan ni Jehova ti panagreggettayo, ad-adda nga agtalektayo nga agtultuloy a balbaliwan ti Biblia ti biagtayo.—Sal. 34:8.

^ [1] (parapo 1) Nabaliwan ti nagan.