Mapan iti linaonna

Mapan iti listaan dagiti linaonna

 PAKASARITAAN TI BIAG

Dinak Pulos Binaybay-an ni Jehova!

Dinak Pulos Binaybay-an ni Jehova!

Maysaak kadagiti uppat a balasitang a napili a mangited iti sabong ken Adolf Hitler kalpasan ti maysa a panagbitlana. Apay a napiliak? Nakaak-aktibo ni Tatang kadagiti aktibidad ti Nazi ken drayber ti lider ti maysa a lokal a sangay dayta a partido. Napeklan a Katoliko ni Nanang ken kayatnak nga agbalin a madre. Uray nabileg ti impluensiada, diak nagbalin a Nazi wenno madre. Bay-andak a mangyestoria no apay.

DIMMAKKELAK iti Graz, Austria. Idi agtawenak iti pito, pinagadaldak iti eskuelaan ti relihion. Ngem nakitak ti immoral nga ar-aramiden dagiti padi ken madre. Isu nga awan pay makatawen, pinalubosannak ni Nanang a pumanaw iti dayta nga eskuelaan.

Idi agangay, nagadalak iti eskuelaan nga addaan iti dormitorio. Maysa a rabii, sinukonnak ni Tatang ken impanawnak iti Graz ta nagkaro ti pannakabomba dayta a lugar. Nagkamangkami iti ili ti Schladming. Apaman a nakadanon ken nakaballasiwkami iti maysa a rangtay, nabomba dayta. Iti sabali a gundaway, adda dagiti nababa ti tayabna nga eroplano a nangpaltopaltog kadakami ken lolak iti arubayanmi. Idi nalpasen ti gubat, panagriknami, binaybay-andakami ti simbaan ken ti gobierno.

NAAMMUAK TI MAPANGNAMNAMAAN A TULONG

Idi 1950, adda Saksi ni Jehova a nangasaba ken Nanang. Dumdumngegak idi kadagiti saritaanda ken kadkaduaek pay ni Nanang a makigimong no dadduma. Gapu ta kombinsido ni Nanang a kinapudno ti isursuro dagiti Saksi ni Jehova, nagpabautisar idi 1952.

Idi a tiempo, kasla asosasion ti babbaket ti kongregasion iti lugarmi. Ngem idi agangay, nakigimongkami iti kongregasion nga adu ti agtutubona, saan la a puro babbaket! Idi nagawidak idiay Graz, rinugiakon nga atenderan ti amin a gimong. Di nagbayag, nakombinsirak met a kinapudno ti maad-adalko. Naam-ammok met ni Jehova kas Dios a kanayon a tumulong kadagiti adipenna. Aramidenna dayta uray no panagriknatayo ket agmaymaysatayo a mangsango kadagiti problema a kasla awanen ti solusionna.​—Sal. 3:5, 6.

Kayatko idi nga iranud ti kinapudno. Dagiti kakabsatko ti immuna a nangiranudak iti dayta. Nagduduma idin a lugar ti paggigianan ti uppat a manangko ta agtrabtrabahoda kas  maestra. Ngem bisbisitaek ken parparegtaek ida nga agadal iti Biblia. Idi agangay, nagbalin a Saksi ni Jehova ti amin a kakabsatko.

Iti maikadua a lawas a panangasabak iti binalaybalay, adda nakasaritak a babai nga agtawen iti nasurok a 30 ket nayadalak iti Biblia. Rimmang-ay agingga a nabautisaran, kasta met ni lakayna ken ti dua nga annakda idi agangay. Nagdakkel ti epektona iti espiritualidadko dayta a panangyadalko. Apay? Awan ngamin ti pormal a nangyadal kaniak iti Biblia. Masapul nga agsaganaak a naimbag iti tunggal panagadalmi. Arigna umuna a suruak ti bagik tapno maisurok ti iyad-adalak! Dayta ti nangpauneg iti panangipategko iti kinapudno. Idi Abril 1954, nagpabautisarak kas simbolo ti dedikasionko ken Jehova.

‘NAIDADANES, NGEM SAAN A NABAYBAY-AN’

Idi 1955, inatenderak dagiti internasional a kombension idiay Germany, France, ken England. Idi addaak idiay London, naam-ammok ni Albert Schroeder, a maysa nga instruktor iti Bible School of Gilead, ken nagserbi idi agangay kas miembro ti Bagi a Manarawidwid. Bayat ti panagpasiarmi iti British Museum, intudo ni Brother Schroeder ti dadduma a manuskrito ti Biblia. Naisurat kadagita ti nagan ti Dios iti Hebreo a letra, ken inlawlawagna ti kinapateg dagita a manuskrito. Gapu iti dayta, immuneg ti panagayatko ken Jehova ken iti kinapudno, ket ad-adda manen a determinadoak a mangikasaba iti kinapudno iti Sao ti Dios.

Nagpayunirak idi Enero 1, 1956. Kalpasan ti uppat a bulan, naawisak nga ag-special pioneer idiay Austria. Awan idi ti Saksi idiay Mistelbach, ti ili a nakaidestinuak. Ngem adda pay problema. Agdumakami unay iti partnerko. Agtawenak iti dandani 19 ken dimmakkelak iti siudad; agtawen met isuna iti 25 ken naggapu iti away. Maladawak a maturog ken agriing idinto ta nasapa a maturog ken agriing ti partnerko. Ngem napagballigianmi dagita ken natagiragsakmi ti panagpartnermi kas payunir gapu iti panangyaplikarmi iti balakad ti Biblia.

Kinapudnona, adda pay dagiti narigrigat a nakaipasanguanmi. Naidadaneskami pay ngem ‘saankami a nabaybay-an.’ (2 Cor. 4:7-9) Naminsan, bayat a mangaskasabakami iti partnerko iti maysa a barrio, imbulos dagiti lumugar dagiti asoda. Idi kuan, napalawlawankamin iti dadakkel nga aso nga agtataul ken ngumerngernger. Naginniggemkami, ken uray la inkararagko, “Apo Jehova, mataykami koma lattan a dagus no kagatendakami!” Idi nakaas-asidegdan, nagsardengda, inkalawikiwda ti ipusda, sa pimmanawdan. Nariknami a sinalaknibannakami ni Jehova. Kalpasan dayta, winanasmi a kinasabaan dayta a barrio, ket napalalo ti ragsakmi ta dimngeg a naimbag dagiti tattao. Mabalin a nasdaawda ta didakami inan-ano dagiti aso wenno gapu ta nagtultuloykami latta kalpasan dayta a nakabutbuteng a kapadasanmi. Dadduma kadakuada ti nagbalin a Saksi idi agangay.

Adda pay nakabutbuteng a napadasanmi. Naminsan, nabartek a nagawid ti makinkukua iti kaserami ket impangtana a patayennakami ta rirriribukenmi kano ti lugarda. Pinadas a pagkalmaen ni baketna ngem dina napasardeng. Nangngegmi amin dagita iti kuartomi  iti ngato. Dagus nga inkabilmi dagiti tugaw a pangserra iti ridaw sa nagempakekamin. Idi luktanmi ti ridaw, nakaulin iti agdan ti lalaki ket nakaiggem iti dakkel a kutsilio. Isu a nagtaraykami iti makinlikud a ruangan sa immulogkami iti garden nga awit-awitmi dagiti maletami ket saankamin a pulos nagsubsubli.

Napankami iti maysa a hotel. Nagyankami sadiay iti dandani makatawen ket nakatulong unay dayta iti ministeriomi. Kasano? Ti hotel ket adda iti sentro ti ili, ken kayat ti dadduma nga iyad-adalanmi ti agadal sadiay. Di nagbayag, ang-angayenmin iti kuartomi ti panagadal iti libro ken ti linawas a Panagadal iti Pagwanawanan ket adda agarup 15 nga umat-atender.

Nasurok a makatawen a nagyankami idiay Mistelbach. Kalpasanna, nayakarak idiay Feldbach, nga adda iti abagatan a daya ti Graz. Sabali idin a payunir ti partnerko. Awan met laeng ti kongregasion sadiay. Nagyankami iti bassit a kuarto iti maikadua a kadsaaran ti balay a naaramid kadagiti troso. Sumrek ti sumagawisiw nga angin iti nagbabaetan dagiti troso, isu a sinullatanmi dagita iti diario. Masapul met nga agsakdokami iti danum iti bubon. Ngem saan a sayang ti bannogmi. Kalpasan laeng ti mano a bulan, addan nabukel a grupo. Idi agangay, nagbalin a Saksi ti agarup 30 a miembro ti maysa a pamilia nga inyadalanmi!

Pinauneg dagita a kapadasan ti apresasionko iti agtultuloy a panangtulong ni Jehova kadagidiay mangyun-una kadagiti interes ti Pagarian. Uray awan ti tao a mabalin a tumulong kadatayo, kanayon a nakasagana ni Jehova a tumulong.​—Sal. 121:1-3.

TINULONGANNAK TI ‘MAKANNAWAN NGA IMA TI KINALINTEG’ TI DIOS

Idi 1958, adda maangay nga internasional a kombension idiay New York City, iti Yankee Stadium ken Polo Grounds. Nagaplayak nga umatender, ket dinamag ti sangay iti Austria no kayatko ti ageskuela iti maika-32 a klase ti Gilead School. Apay koma a pagkedkedak dayta a pribilehio? Dagus nga insungbatko, “Wen!”

Iti uneg ti klase, kaabayko ni Martin Poetzinger. Nagrigat ken nakabutbuteng ti inibturanna iti kampo konsentrasion dagiti Nazi. Nagserbi met a miembro ti Bagi a  Manarawidwid idi agangay. Bayat ti klase, iyarasaas no dadduma ni Martin, “Erika, ania ti kaipapananna dayta iti German?”

Idi nakaguduakamin iti klase, impakaammo ni Nathan Knorr ti pakaidestinuanmi. Idiay Paraguay ti nakaibaonak. Gapu ta ubingak pay idi, masapul a dumawatak iti pammalubos ni Tatang a mapan iti dayta a pagilian. Pinalubosannak isu a napanak idiay Paraguay idi Marso 1959. Nagyanak iti pagtaengan dagiti misionero idiay Asunción, ket sabali manen ti partnerko.

Di nagbayag, naam-ammok ni Walter Bright, maysa a misionero a naggraduar iti maika-30 a klase ti Gilead. Idi agangay, nagkasarkami ken nagkaduakami a nangsango kadagiti pakarigatan iti biag. Tunggal adda narigat a problemami, basaenmi ti kari ni Jehova iti Isaias 41:10: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto.” Impasigurado dayta a dinakami pulos baybay-an ti Dios no la ket ta agtalinaedkami a matalek kenkuana ken iyun-unami ti Pagarianna.

Idi agangay, naidestinokami iti lugar nga asideg iti Brazil. Sinugsogan dagiti klero dagiti agtutubo nga uborenda ti pagtaenganmi a medio saanen a nasayaat ti kondisionna. Idi kuan, nakipagadal iti Biblia ken Walter ti hepe ti polisia. Siniguradona nga addada polis nga agbantay iti makalawas iti asideg ti balaymi isu a didakamin inan-ano dagiti bumusbusor. Di nagbayag, nayakarkami iti nasaysayaat a pagtaengan iti Brazil iti lugar nga asideg ti Paraguay. Nagdakkel ti nagimbagan dayta ta mabalinmi ti mangangay kadagiti gimong iti Paraguay ken iti Brazil. Sakbay a pimmanawkami, adda nabukel a dua a babassit a kongregasion sadiay.

NAGTULTULOY A TINULONGANNAK NI JEHOVA

Imbaga dagiti doktorko a diak mabalin ti aganak, isu nga idi 1962, nasdaawkami a nakaammo a masikogak! Idi agangay, nagnaedkamin iti Hollywood, Florida, iti asideg ti pamilia ni Walter. Adu a tawen a saankami a nakapagpayunir ken Walter ta masapul nga asikasuenmi ti pamiliami. Ngem inyun-unami latta dagiti interes ti Pagarian.​—Mat. 6:33.

Idi simmangpetkami iti Florida idi Nobiembre 1962, nasdaawkami a nakaammo a gapu iti panangmatmat dagiti lumugar, agsina ti paggimongan ken pangasabaan dagiti nangisit ken puraw a kakabsat. Ngem awan ti idumduma ni Jehova a puli isu a di nagbayag, nagkakakongregasion met laeng dagiti kakabsat a nagduduma ti pulina. Nalawag a ni Jehova ti makingapuanan iti dayta ta pinullo itan ti kongregasion iti dayta a lugar.

Makapaladingit ta natay ni Walter idi 2015 gapu iti kanser iti utek. Iti uneg ti 55 a tawen a panagasawami, nakaim-imbag nga asawa ni Walter. Ay-ayatenna ni Jehova ken adu a kakabsat ti natulonganna. Il-iliwek a makita manen ni Walter a nakasalsalun-aten inton mapagungar.​—Ara. 24:15.

Agyamyamanak ta nakapagserbiak iti amin-tiempo iti nasurok nga 40 a tawen ket adu a bendision ken gunggona ti naawatko. Kas pagarigan, nakitami ken Walter ti bautismo ti 136 kadagiti iyad-adalanmi iti Biblia. Siempre, adda dagiti pakarigatan. Ngem saanmi a pinagbalin a rason dagita tapno isardengmi ti matalek a panagserbimi iti Dios. Imbes ketdi, ad-adda nga immasidegkami kenkuana ket nagtalekkami a solbarenna dagita iti bukodna a tiempo ken pamay-an. Ket kasta ti inaramidna!​—2 Tim. 4:16, 17.

Kailiwko unay ni Walter, ngem nakatulong ti panagpayunirko tapno maep-ep dayta. Nakitak a nagimbagak ti panangisuro iti sabsabali, nangnangruna ti panangiranudko iti namnama a panagungar. Kinapudnona, nagadu dagiti malagipko a gundaway a dinak pulos binaybay-an ni Jehova. Kas iti inkarina, kanayon a tinulongannak, pinatibkernak, ken iniggamannak ti ‘makannawan nga imana ti kinalinteg.’​—Isa. 41:10.