Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2017

Panangipaay iti Dayaw iti Daydiay Maikari iti Dayta

Panangipaay iti Dayaw iti Daydiay Maikari iti Dayta

“Iti Daydiay situtugaw iti trono ken iti Kordero maadda koma ti bendision ken ti dayaw ken ti dayag ken ti pannakabalin iti agnanayon ken awan inggana.”—APOC. 5:13.

KANTA: 9, 108

1. Apay a maikari ti dadduma a maipaayan iti dayaw? Ania ti usigentayo ita?

TI PANANGIPAAY iti dayaw iti maysa kaipapananna ti panangipakita iti espesial nga atension ken panagraem. Maikunatayo a maikari ti maysa a tao iti kasta nga atension ken panagraem no adda naaramidna a maikari a maipaayan iti dayaw wenno no adda espesial nga akemna. Nagsayaat ngarud nga isaludsodtayo, Siasino ti maikari nga ipaayantayo iti dayaw, ken apay a maikari iti dayta?

2, 3. (a) Apay a maikari unay ni Jehova a maipaayan iti dayaw? (Kitaen ti ladawan iti rugi ti artikulo.) (b) Iti Apocalipsis 5:13, siasino ti Kordero, ken apay a maikari a maipaayan iti dayaw?

2 Ipakita ti Apocalipsis 5:13 a sigurado a maikari iti dayaw ‘Daydiay situtugaw iti trono ken ti Kordero.’ Mabasatayo iti kapitulo 4 dayta a libro ti Biblia ti maysa a rason no apay a maikari ni Jehova iti dayaw. Dagiti anghel padpadayawanda ni Jehova, “Daydiay sibibiag iti agnanayon ken awan inggana.” Ibagbagada: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin  a bambanag, ket gapu iti pagayatam napaaddada ken naparsuada.”—Apoc. 4:9-11.

3 Ni Jesu-Kristo ti Kordero, “ti Kordero ti Dios a mangikkat iti basol ti lubong!” (Juan 1:29) Ibaga ti Biblia kadatayo nga isu ket adayo a natantan-ok ngem iti amin nga agturturay nga ari wenno nagbalin nga ari ditoy daga. Mabasatayo: “Isu ti Ari dagidiay agturay kas ar-ari ken Apo dagidiay agturay kas ap-appo, daydiay kakaisuna nga agik-ikut iti imortalidad, nga agnanaed iti di maasitgan a lawag, nga awan maysa kadagiti tattao ti nakakita wenno mabalin a makakita kenkuana.” (1 Tim. 6:14-16) Adda kadi sabali nga ari a situtulok a mangisakripisio iti biagna kas subbot kadagiti basoltayo? Saanka kadi a matignay a makiraman iti adu nga anghel a mangibaga: “Ti Kordero a napapatay ket maikari nga umawat iti pannakabalin ken kinabaknang ken sirib ken bileg ken dayaw ken dayag ken bendision”?—Apoc. 5:12.

4. Apay a rumbeng a maipaayan ni Jehova ken ni Kristo iti dayaw?

4 Rumbeng nga ipaayantayo iti dayaw ni Jehova ken ni Kristo. Nakadepende iti dayta ti biagtayo nga agnanayon. Makatulong ti imbaga ni Jesus iti Juan 5:22, 23 tapno maawatantayo dayta: “Awan a pulos ukomen ti Ama, no di ket ti isuamin a panangukom impabiangna iti Anak, tapno ti isuamin padayawanda ti Anak a kas iti panangpadayawda iti Ama. Ti di mangpadayaw iti Anak saanna a padayawan ti Ama a nangibaon kenkuana.”—Basaen ti Salmo 2:11, 12.

5. Apay a masapul nga ipakitatayo ti maitutop a dayaw ken panagraem kadagiti tattao?

5 Naparsua ti tao iti “ladawan ti Dios.” (Gen. 1:27) Isu a kaaduan a tattao ti mangipakpakita kadagiti kualidad ti Dios nupay adda bassit pagdudumaanda, kas iti panangipakita iti ayat, kinamanangngaasi, ken pannakipagrikna. Naparsua met dagiti tattao nga addaan iti konsiensia—nupay di umiso wenno tiritir dayta no dadduma. Ti konsiensia ti mangibaga no ania ti naimbag wenno dakes, nasayaat wenno saan a nasayaat, umiso wenno di umiso. (Roma 2:14, 15) Magustuan ti kaaduan dagiti nadalus ken napintas a banag. Gagangay a kayatda a nasayaat ti relasionda iti dadduma. Ammoda man dayta wenno saan, maipakpakitada dagiti kualidad ni Jehova isu a maikarida a maipakitaan iti maitutop a dayaw ken panagraem.—Sal. 8:5.

BALANSE A PANANGIPAKITA ITI DAYAW ITI SABSABALI

6, 7. Ania ti nakaidumaan dagiti Saksi ni Jehova no maipapan iti panangipakita iti dayaw?

6 Masapul a balansetayo no ania a kita ti dayaw ti ipakitatayo ken kasano a padayawantayo dagiti tattao. Nakaro ti impluensia ti lubong ni Satanas iti kaaduan nga imperpekto a tattao. Gapuna, idoluenda ti dadduma imbes nga ipakitaanda laeng iti maitutop a dayaw ken respeto. Nalabes ti panangpadayawda kadagiti lider ti relihion, politiko, atleta, artista, ken dadduma pay a nalatak a tattao. Masansan nga ibilangda pay idan a nangatngato ngem iti tao. Gapuna, tultuladen dagiti ubbing ken natataengan ti estilo, panagbadbado, wenno kababalinda.

7 Liklikan dagiti pudno a Kristiano ti kasta a tiritir a kapanunotan maipapan iti panangpadayaw kadagiti tattao. Awanen ti sabali a perpekto a tao a nagbiag a pagtuladantayo no di laeng ni Kristo. (1 Ped. 2:21) Saan a maragsakan ti Dios no nalabes ti panangpadayawtayo kadagiti tattao. Masapul a laglagipentayo daytoy nagpateg a kinapudno: “Amin nagbasol ken agkurang iti dayag ti Dios.” (Roma 3:23) Awan a talaga ti tao a maikari iti dayaw a nalablabes ngem ti maikari kenkuana.

8, 9. (a) Ania ti panangmatmat dagiti Saksi ni Jehova kadagiti opisial ti gobierno? (b) Agingga a kaano a maitutop nga agtulnogtayo kadagiti opisial ti gobierno?

 8 Adda posision ken autoridad ti dadduma a tattao. Ipatungpal dagiti opisial ti gobierno ti linteg ken urnos, ken ipaayda ti kasapulan dagiti umili. Pagsayaatan dayta ti amin. Dayta ti gapuna nga imbalakad ni apostol Pablo kadagiti Kristiano nga ibilangda dagiti agtuturay iti gobierno kas “nangatngato nga autoridad” a masapul a pagpasakupan dagiti Kristiano. Imbilinna kadakuada: “Ipaayyo kadagiti amin dagiti karbenganda, kenkuana a mangalikagum iti buis, ti buis; . . . kenkuana a mangalikagum iti dayaw, ti kasta a dayaw.”—Roma 13:1, 7.

9 Umiso laeng ngarud nga ipakita dagiti Saksi ni Jehova ti kasta a dayaw kadagiti opisial ti gobierno, mainanama man wenno kaugalian dayta iti maysa a lugar. Makitinnulongtayo kadakuada iti panangaramidda kadagiti responsabilidadda. Ngem siempre, adda limitasion ti dayaw ken suportatayo kadakuada kas ibaga ti Biblia. Saan a mabalin nga agsukirtayo iti Dios wenno ikompromiso ti neutral a takdertayo kas Kristiano.—Basaen ti 1 Pedro 2:13-17.

10. Ania ti matuladtayo kadagiti nagkauna nga adipen ni Jehova?

10 Makasursurotayo no kasano a nagtulnog dagiti nagkauna nga adipen ni Jehova iti gobierno ken kadagiti opisial. Idi imbilin ti Imperio ti Roma nga agparehistro dagiti umilina, nagtulnog da Jose ken Maria. Napanda idiay Betlehem uray dandani idin aganak ni Maria. (Luc. 2:1-5) Kasta met, idi naakusaran ni Pablo nga agar-aramid iti dakes, siraraem nga indepensana ti bagina ken nangipakita iti maitutop a dayaw kada Ari Herodes Agripa ken Festo, a gobernador ti Judea a probinsia ti Roma.—Ara. 25:1-12; 26:1-3.

11, 12. (a) Apay a naiduma ti ipakitatayo a dayaw kadagiti opisial ti gobierno ken kadagiti lider ti relihion? (b) Ania ti nasayaat a resultana idi nangipakita ti Saksi a taga-Austria iti dayaw iti maysa a politiko?

11 Nupay kasta, dagiti Saksi ni Jehova saanda nga ipakitaan dagiti lider ti relihion iti espesial a dayaw uray no namnamaenda dayta. Saan nga umiso ti isursuro dagiti palso a relihion maipapan iti Dios ken iti Saona, isu nga ipakitatayo kadakuada ti dayaw a kas iti gagangay nga ipakpakitatayo kadagiti tattao. Saantay ida nga ipakitaan iti espesial a dayaw. Inakusaran idi ni Jesus dagiti kasta a tattao kas managinsisingpet ken bulsek a mangidaldalan. (Mat. 23:23, 24) Ngem no dadduma, mabalin nga adda nasayaat a resulta ti panangipakitatayo iti maitutop a dayaw kadagiti opisial ti gobierno.

12 Maysa a naregta a Saksi ni Leopold Engleitner a taga-Austria. Inaresto dagiti Nazi ket inluganda iti tren nga agturong iti pagbaludan idiay Buchenwald. Nakalugan met iti dayta a tren ti maysa a balud a ni Dr. Heinrich Gleissner, a politiko idi idiay Austria a kagurgura dagiti Nazi. Iti panagbiaheda, nadayaw nga inlawlawag ni Brother Engleitner dagiti patpatienna ket dimngeg a naimbag ni Dr. Gleissner. Kalpasan ti Gubat Sangalubongan II, maulit-ulit nga inusar ni Dr. Gleissner ti impluensiana a tumulong kadagiti Saksi idiay Austria. Mabalin nga adda dagiti malagipmo a nagsayaat a resulta ti panangipakita dagiti Saksi iti maitutop a dayaw kadagiti opisial ti gobierno kas ibagbaga ti Biblia nga ipakita dagiti Kristiano.

DADDUMA A MAIKARI ITI DAYAW

13. Siasino dagiti nangnangruna a maikari iti respeto ken dayaw, ken apay?

13 Maikari met iti dayaw ken panagraem dagiti kakabsattayo, nangruna dagiti panglakayen a mangidadaulo kadatayo. (Basaen  ti 1 Timoteo 5:17.) Ipakitatayo ti dayaw kadagitoy a kakabsat aniaman ti puli, edukasion, takderda iti komunidad, wenno kasasaad ti panagbiagda. Awagan ida ti Biblia kas “sagut a tattao,” ken napateg ti pasetda iti urnos ti Dios tapno maipaay ti kasapulan dagiti adipenna. (Efe. 4:8) Panunotem dagiti panglakayen iti kongregasion, dagiti manangaywan iti sirkito, dagiti miembro ti Komite ti Sangay (Branch Committee), ken dagiti miembro ti Bagi a Manarawidwid. Dakkel ti respeto dagiti kakabsat idi umuna a siglo kadagiti nadutokan a mangidaulo, ket kasta met laeng kadatayo ita. Saantayo nga idoluen dagiti nalatak a kakabsat iti kongregasion wenno agtignaytayo a kasla ibilangtayo ida nga anghel. Ngem ipakitatayo latta ti panagraem ken dayaw gapu iti kinagaget ken kinapakumbabada.—Basaen ti 2 Corinto 1:24; Apocalipsis 19:10.

14, 15. Ania ti pagdumaan dagiti pudno a Kristiano a pastor ken dagiti agkunkuna laeng a Kristiano a pastor?

14 Dagitoy a panglakayen ket napakumbaba a naespirituan a pastor. Makita dayta iti panagkedkedda a matrato a kas kadagiti nalatak a tattao. Naidumada kadagiti adu a lider ti relihion ita ken idi umuna a siglo. Kinuna ni Jesus maipapan kadakuada: “Kaykayatda ti katan-okan a puesto kadagiti pangrabii ken dagiti makinsango a pagtugawan kadagiti sinagoga.”—Mat. 23:6, 7.

15 Napakumbaba dagiti pudno a Kristiano a pastor ken agtultulnogda iti imbaga ni Jesus: “Saankayo a maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Saankayo met a maawagan iti ‘papanguluen,’ ta ti Panguluenyo ket maymaysa, ni Kristo. Ngem daydiay kadakkelan kadakayo masapul nga agserbi kadakayo. Siasinoman a mangitan-ok iti bagina maipababanto, ket siasinoman a mangipababa iti bagina maitan-okto.” (Mat. 23:8-12) Dayta ti gapuna a dagiti kakabsat kadagiti kongregasion iti intero a lubong, ipatpateg, raraemen, ken ipaayanda iti dayaw dagiti panglakayen.

Gapu iti napakumbaba a panagserbi dagiti panglakayen, ipateg, raemen, ken ipaayan ida iti dayaw dagiti kakabsat (Kitaen ti parapo 13-15)

16. Apay nga itultuloymo koma nga ikagumaan a tarusan ken iyaplikar ti balakad ti Biblia maipapan iti panangipakita iti dayaw?

16 Wen, mabalin a narigat ti agbalin a balanse no kasano ken no siasino dagiti ipakitaantayo iti dayaw. Narigatan met idi dagiti nagkauna a Kristiano iti dayta. (Ara. 10:22-26; 3 Juan 9, 10) Ngem sigurado nga adda pagimbagan ti panagtulnogtayo iti balakad ti Biblia maipapan iti panangipakita iti  dayaw. Adu ti magunggonatayo no balanse ti panangipakitatayo iti dayaw.

DAGITI PAGIMBAGAN TI PANANGIPAKITA ITI MAITUTOP A DAYAW

17. Ania ti dadduma a pagimbagan ti panangipakita iti dayaw kadagiti addaan iti autoridad iti gobierno?

17 No respetuen ken ipakitaantayo iti dayaw dagiti addaan iti autoridad iti gobierno, nalabit ad-adda nga idepensada ti kalintegantayo a mangasaba. Kas resultana, masansan a nasayaat ti opinion dagiti tattao iti trabahotayo. Sumagmamano a tawen ti napalabasen, immatender ni Birgit, a payunir idiay Germany, iti panaggraduar ti balasangna iti eskuelaan. Imbaga dagiti mannursuro a maragragsakanda kadagiti Saksi nga estudianteda. Kunada pay a makapadismaya no awan ti Saksi nga estudianteda. Inlawlawag ni Birgit, “Naisuro kadagiti annakmi nga ipakitada dagiti kababalin a kayat ti Dios, a pakairamanan ti panangipakita iti respeto ken dayaw kadagiti mannursuroda.” Imbaga ti maysa a mannursuro a no ti amin nga ubbing ket kas kadagiti annak dagiti Saksi, naglaka ti mangisuro. Idi agangay kalpasan ti sumagmamano a lawas, maysa kadagiti mannursuro ti nakikombension idiay Leipzig.

18, 19. Apay a napateg a maitutop ti dayaw nga ipakitatayo kadagiti panglakayen?

18 Siempre, makatulong dagiti perpekto ken nainsiriban a prinsipio iti Sao ti Dios iti panangipakita iti maitutop a dayaw kadagiti panglakayen iti kongregasion. (Basaen ti Hebreo 13:7, 17.) Komendarantayo koma ida gapu iti panagreggetda ken ikagumaantayo ti agtulnog kadagiti instruksion nga ipaayda, ket kabaelantayo nga aramiden dayta. Makatulong dayta tapno naragsakda a mangitultuloy a mangitungpal kadagiti responsabilidadda. Ngem dina kayat a sawen a tuladentayo ti eksakto a panagbadbado ken panaglanglanga, panagpalpalawag, wenno panagsasao ti maysa a “prominente” a panglakayen. Mabalin ngamin a saan a nasayaat ti resulta dayta. Laglagipentayo nga imperpekto met dayta a panglakayen. Ni Kristo ti pagtuladan ken surotentayo.

19 Tultulongantayo dagiti panglakayen no maitutop ti dayaw ken panagraem nga ipaaytayo kadakuada ken no saantayo ida a tratuen a kas kadagiti nalatak a tattao. Iti kasta, saanda nga agbalin a napannakkel ken saanda a marikna a nangatngato wenno nakalinlintegda.

20. Kasano a makatulong kadatayo ti panangipakita iti dayaw iti sabsabali?

20 Ti panangipakita iti dayaw kadagiti maikari iti dayta ket makatulong tapno saan laeng a ti bagitayo ti pampanunotentayo ken maliklikantayo ti agpannakkel no mapadayawantayo. Makatulong met dayta tapno maitunostayo ti biagtayo iti organisasion ni Jehova, a saan a mangipakita iti nalabes wenno di umiso a dayaw iti uray asino—Saksi man wenno saan. Kasta met, makatulong dayta tapno saantayo a maitibkol no adda dagiti resrespetuentayo a makaaramid iti di umiso.

21. Ania ti kangrunaan a pagsayaatan iti panangipaay iti dayaw kadagiti maikari iti dayta?

21 Kangrunaanna, maparagsaktayo ti Dios no ipaaytayo ti maitutop a dayaw kadagiti maikari iti dayta. Makapagtignaytayo a kas iti kayatna nga aramidentayo ket makapagtalinaedtayo nga awan ti pakababalawanna. Iti kasta, makaipaaytayo iti sungbat iti asinoman a mangrurrurod kenkuana. (Prov. 27:11) Adu a tattao iti lubong ti di umiso ti panangipakitada iti dayaw. Talaga nga agyamyamantayo ta ammotayo no kasano nga ipakitatayo ti dayaw iti pamay-an a kayat ni Jehova.