Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2017

Ipappapusom Kadi Dagiti Bambanag a Naisurat?

Ipappapusom Kadi Dagiti Bambanag a Naisurat?

“Dagitoy a banag . . . ket naisuratda a pammakdaar kadatayo a nadatngan dagiti panungpalan dagiti sistema ti bambanag.”—1 COR. 10:11.

KANTA: 11, 61

1, 2. Apay nga adalentayo ti kapadasan ti uppat nga ari ti Juda?

NO ADDA nakitam a naikaglis iti maysa a pagnaan, saan kadi nga agannadka no magnaka iti dayta? No maammuantayo dagiti nagkamalian ti dadduma, makatulong dayta tapno maliklikantayo ti kamalida. Kasta met laeng iti espiritualidadtayo. Adu ti napapateg a maadaltayo iti kamali ti dadduma, agraman dagiti nairekord iti Biblia.

2 Nagserbi ken Jehova nga addaan iti naan-anay a puso ti uppat nga ari ti Juda nga inadaltayo iti napalabas nga artikulo. Ngem nakaaramidda latta kadagiti serioso a kamali. Ania ti masursurotayo kadakuada, ken kasano a maliklikantayo dagiti kamalida? Makatulong ti panangutob kadagiti kapadasanda tapno magunggonaantayo kadagiti bambanag a naisurat a nasaksakbay a pakasursuruantayo.—Basaen ti Roma 15:4.

DAKES TI PAGBANAGAN TI PANAGPANNURAY ITI SIRIB TI TAO

3-5. (a) Uray no naan-anay ti puso ni Asa ken Jehova, ania ti nagkamalianna ken ania ti resultana? (b) Ania dagiti mabalin a rason a nagpannuray ni Asa iti tao idi rumaut ni Baasa iti Juda?

3 Pagsasaritaantayo nga umuna ni Asa ken kitaentayo no kasano a makatulong ti Sao ti Dios iti biagtayo. Nagpannuray ni Asa  ken Jehova idi rimmaut iti Juda ti maysa a milion nga Etiope. Ngem saan a kasta ti inaramidna idi pinapigsa ni Baasa nga ari ti Israel ti siudad ti Rama nga asideg iti masakupan ni Asa. (2 Cron. 16:1-3) Nagpannuray ni Asa iti bukodna a sirib ket pinasuksokanna ti ari ti Siria a ni Ben-hadad tapno rautenna ni Baasa. Nagballigi kadi ni Asa? Kuna ti Biblia nga idi “nangngegan dayta ni Baasa, dagus nga insardengna a binangon ti Rama ket insardengna ti trabahona.” (2 Cron. 16:5) Agparang a kasla nagballigi ni Asa.

4 Ngem ania ti narikna ni Jehova iti inaramid ni Asa? Imbaon ti Dios ti pannakabagina a ni Hanani tapno tubngarenna ni Asa gapu iti saanna a panagpannuray ken Jehova. (Basaen ti 2 Cronicas 16:7-9.) Kuna ni Hanani: “Manipuden ita addanto gubgubat a maibusor kenka.” Agpayso nga immatras ni Baasa, ngem namin-adu a nagubat ni Asa ken dagiti kailianna bayat ti panagturayna.

5 Kas nakitatayo iti napalabas nga artikulo, sinukimat ti Dios ti puso ni Asa ket nakitana a naan-anay dayta Kenkuana. (1 Ar. 15:14) Para iti Dios, makuna a pudpudno ti ayat ni Asa ken naaramidna ti namnamaen ti Dios kenkuana. Ngem sinagabana latta dagiti resulta ti dakes nga inaramidna. Idi sinangona ni Baasa, apay a nagpannuray ni Asa iti tao—ni Ben-hadad ken iti bagina—imbes a ken Jehova? Impagarupna ngata a nasaysayaat ti resultana no idalanna dayta iti diplomasia wenno gubat imbes nga agpatulong iti Dios? Inaramidna ngata dayta gapu iti saan a nasayaat a naibalakad kenkuana?

6. Ania ti masursurotayo iti kamali ni Asa? Mangted iti pagarigan.

6 Matignaytayo kadi iti kapadasan ni Asa a mangusig iti bagitayo? No adda problematayo a kasla saantayo a kabaelan a sanguen, mabalin a nalakatay la a makita a kasapulan nga agpatulongtayo ken Jehova. Ngem dagiti ngay babassit a problema iti inaldaw? Agpampannuraytayo kadi iti sirib ti tao babaen iti panangsolbartayo kadagita a bukbukodtayo? Wenno ammuentayo dagiti prinsipio ti Biblia ket iyaplikartayo dagita, a mangipakita nga agtaltalektayo iti pamay-an ni Jehova a mangsolbar kadagiti problema? Kas pagarigan, mabalin a no dadduma, paritandaka dagiti kapamiliam a makigimong wenno makiasamblea. Ikararagmo ken Jehova nga iwanwan ken tulongannaka tapno ammom no ania ti kasayaatan nga aramidem. Kasano ngay no maawananka iti trabaho ket marigatanka nga agsapul iti sabali? No mainterbiuka iti nagaplayam, ibagam kadi latta nga adda gimongmo iti kada tengnga ti lawas? Aniaman ti problema a pakaipasanguantayo, nasayaat no ipapusotayo ti imbaga ti salmista: “Iyadanim ken Jehova ti dalanmo, ket agkammatalekka kenkuana, ket isu agtignayto.”—Sal. 37:5.

ANIA TI EPEKTO KENKA DAGITI SAAN A NASAYAAT A KAKADUA?

7, 8. Ania dagiti kamali ni Jehosafat, ket ania dagiti resultana? (Kitaen ti ladawan iti rugi ti artikulo.)

7 Pagsasaritaantayo met ti anak ni Asa a ni Jehosafat. Adu ti nagsasayaat nga ugalina. Gapu ta nagpannuray ni Jehosafat iti Dios, adu ti nasayaat a naaramidanna. Ngem adda met dagiti saan a nasayaat a desisionna. Kas pagarigan, nakialiansa iti dakes nga ari ti makin-amianan a pagarian babaen ti panangyasawana iti anakna iti balasang ni Ari Acab. Ken uray no pinakdaaran ni propeta Mikaias, nakikadua latta ni Jehosafat ken ni Acab a nakigubat iti Siria. Dandani natay ni Jehosafat iti paglalabanan. (2 Cron. 18:1-32) Idi nagsubli iti Jerusalem, dinamag kenkuana ni propeta Jehu: “Iti aya nadangkes ti pakaitedan ti tulong, ket kadagidiay aya manggurgura ken Jehova a rebbeng  a maaddaanka iti ayat?”—Basaen ti 2 Cronicas 19:1-3.

8 Nagnakem kadi ni Jehosafat? Nupay nagtultuloy latta ti regtana a mangparagsak iti Dios, agparang a saan a nakasursuro iti kapadasanna ken Acab ken iti impakdaar ni Jehu. Adda manen sabali a nakialiansaan ni Jehosafat—iti anak ni Acab a ni Ari Ocozias, maysa a dakes nga ari ken kabusor ti Dios. Nagaramid da Jehosafat ken Ocozias kadagiti barko, a nadadael laeng idi agangay, ket saan a nausar iti nakairantaanda.—2 Cron. 20:35-37.

9. Ania ti epektona kadatayo dagiti saan a nasayaat a kakadua?

9 Matignaynatayo ti pakasaritaan ni Jehosafat a mangusig iti biagtayo. Kasano? Makuna met ketdi a nasayaat nga ari ni Jehosafat. Inaramidna ti umiso ken ‘binirokna ni Jehova iti isuamin a pusona.’ (2 Cron. 22:9) Ngem dina latta naliklikan ti epekto ti saan a nasayaat a kakadua. Lagipem daytoy a pagsasao: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Prov. 13:20) Mabalin nga adda dagiti interesado a tultulongantayo a mangammo iti kinapudno. Ngem gapu iti saan nga umiso a pannakikadkadua ni Jehosafat ken ni Acab, dandani napukawna ti biagna. Kasta met, napeggad ti saan a maiparbeng a pannakikadua kadagiti saan nga agdaydayaw ken Jehova.

10. (a) Ania ti maadaltayo ken Jehosafat maipapan iti panagasawa? (b) Ania ti masapul a laglagipentayo no maipasangotayo kadagiti saan a nasayaat a kakadua?

10 Ania ti maadaltayo iti kapadasan ni Jehosafat? Posible a matnag ti rikna ti maysa a Kristiano iti saan a mangay-ayat ken Jehova ta ipapanna nga awan ti kapammatianna a maitutop kenkuana. Wenno mabalin met a maipasango ti maysa a Kristiano iti panangpilit dagiti saan a Saksi a kabagianna a makiasawa ‘sakbay a maladawen ti amin.’ Maysa pay, mabalin a marikna ti dadduma ti kas iti kuna ti maysa a kabsat a babai: “Nayanaktayo a kayattayo ti agayat ken maaddaan iti kadua.” Ania ngarud ti aramiden ti maysa a Kristiano? Makatulong ti panangutob iti napasamak ken Jehosafat. Agpapaiwanwan idi iti Dios. (2 Cron. 18:4-6) Ngem ania ti  napasamak idi nakikadua ni Jehosafat ken Acab, a saan a mangay-ayat ken Jehova? Pinanunot koma ni Jehosafat a sipsiputan ni Jehova dagiti naan-anay ti pusona Kenkuana. Kasta met laeng ita, “agsublisubli dagiti mata [ti Dios] iti intero a daga,” ken nakasagana a ‘mangipakita iti pigsana’ para iti pagimbagantayo. (2 Cron. 16:9) Maawatanna ti situasiontayo ken ay-ayatennatayo. Agtalekka kadi a penken ti Dios ti panagkasapulam iti ayat ken kadua iti biag? Masiguradom nga aramidennanto dayta!

Panunotem ti peggad ti pannakiasawa iti saan nga agdaydayaw ken Jehova (Kitaen ti parapo 10)

DIMO IPALUBOS NGA AGPANNAKKEL TI PUSOM

11, 12. (a) Kasano a naipalgak ti adda iti puso ni Ezekias? (b) Apay a nailisi ni Ezekias iti pungtot ti Dios?

11 Adda pakainaigan ti puso iti masursurotayo ken Ezekias. Naminsan, impalgak ti Manangsukimat iti puso ti adda iti puso ni Ezekias. (Basaen ti 2 Cronicas 32:31.) Idi nagsakit ni Ezekias iti nakaro, inikkan ti Dios iti pagilasinan nga umimbagto—agsansanud nga anniniwan. Agparang a nangibaon dagiti prinsipe ti Babilonia iti pannakabagida tapno maammuanda ti pagilasinan. (2 Ar. 20:8-13; 2 Cron. 32:24) Idi “binaybay-an” ti Dios nga agmaymaysa ni Ezekias, naipalgak ti adda iti pusona. Impakita ni Ezekias kadagiti taga-Babilonia ti “intero a balay ti gamengna.” Dayta a minamaag nga aramid ti nangipakita iti “isuamin nga adda iti pusona.”

12 Awan ti ibaga ti Biblia no apay a nagpannakkel, wenno timmangsit, ti puso ni Ezekias. Mabalin ngata a gapu iti panagballigina idi nakigubat iti Asiria wenno ti panangpaimbag kenkuana ti Dios babaen iti milagro? Wenno gapu ngata iti adu a ‘kinabaknang ken dayagna’? Aniaman ti rason, gapu iti kinatangsitna, “saan a nagsubad ni Ezekias” iti ‘kinaimbag a naipaay kenkuana.’ Makapaladingit! Nupay mabalin nga ibagana iti Dios a naan-anay ti pusona a nagserbi Kenkuana, nakaaramid latta iti banag a nangpaladingit ken Jehova. Ngem idi agangay, “impakumbaba ni Ezekias ti bagina.” Dayta ti makagapu a nailisi iti pungtot ti Dios ni Ezekias ken dagiti kailianna.—2 Cron. 32:25-27; Sal. 138:6.

13, 14. (a) Kaano a mabalin a palubosan wenno ‘bay-annatayo [ni Jehova] tapno subokennatayo’? (b) Ania ti aramidentayo no mapadayawantayo iti naaramidantayo?

13 Ania ti masursurotayo iti panangbasa ken panangutob iti maipapan ken Ezekias? Laglagipem a nagbalin a napannakkel ni Ezekias idi inabak ni Jehova ni Senaquerib ken idi pinaimbagna iti makapapatay a sakit ni Ezekias. No adda dagiti nasayaat a naaramidantayo, posible ngata a palubosan wenno ‘bay-annatayo [ni Jehova] tapno subokennatayo’ tapno maipalgak ti linaon ti pusotayo? Kas pagarigan, mabalin a nagsagana a naimbag ti maysa a kabsat para iti palawagna iti dakkel a panagtataripnong. Adu ti nangkomendar kenkuana. Ania ti aramidenna?

14 No padayawandatayo, nasayaat no iyaplikartayo ti kuna ni Jesus: “Inton naaramidyon ti amin a bambanag a naituding kadakayo, kunaenyo, ‘Awan kaes-eskanmi nga ad-adipen. Ti naaramidanmi isu ti rebbeng nga aramidenmi.’” (Luc. 17:10) Adda manen maadaltayo ken Ezekias. Nagbalin a napannakkel ta “saan a nagsubad ni Ezekias” iti “pagimbagan a naipaay kenkuana.” Makatulong ti panangutobtayo no kasano kaadun ti inaramid ti Dios para kadatayo tapno maliklikantayo dagiti kababalin a kagura ni Jehova. Mabalin nga iyebkastayo ken Apo Jehova ti panagyamantayo kenkuana. Impaayna ti Nasantuan a Kasuratan ken ti nasantuan nga espirituna a tumulong kadagiti adipenna.

 AGANNADKA NO AGDESISIONKA

15, 16. Apay a napukaw ni Josias ti proteksion ti Dios ken ti biagna?

15 Ania met ngay ti maadaltayo iti naimbag nga ari a ni Josias? Kitaentayo ti rason iti pannakaabak ken ipapatayna. (Basaen ti 2 Cronicas 35:20-22) Nakigubat ni Josias ken Ari Neco ti Egipto uray no imbaga dayta nga ari nga awan ti planona a manggubat kenkuana. Mabasa iti Biblia a ti imbaga ni Neco ket “manipud iti ngiwat ti Dios.” Apay ngarud a napan latta nakigubat ni Josias? Awan ti rason nga ibaga ti Biblia.

16 Ngem kasano koma a maammuan ni Josias a naggapu ken Jehova dagiti imbaga ni Neco? Mabalin koma a nagsaludsod iti matalek a propeta a ni Jeremias. (2 Cron. 35:23, 25) Ngem awan ti mabasatayo nga inaramidna dayta. Maysa pay, mapan idi ni Neco idiay Carquemis tapno gubatenna ti “sabali a balay,” saan ket a ti Jerusalem. Kasta met, saan met a nairaman ti nagan ti Dios ta saan a tagtagibassiten ni Neco ni Apo Jehova wenno ti ilina. Isu a kamali ti desision ni Josias a manggubat ken Neco. Ania ti masursurotayo iti daytoy? No adda problematayo, nasayaat no ammuentayo no ania ti pagayatan ni Jehova.

17. No adda tumaud a problema, kasano a maliklikantayo ti kamali ni Josias?

17 No adda tumaud a problema, masapul nga ammuentayo dagiti prinsipio ti Biblia ken iyaplikartayo dagita iti balanse a pamay-an. No dadduma, nasayaat met no agpatulongtayo kadagiti panglakayen. Mabalin a pinagpanunotantayon ti problema, ken mabalin a nagsukimattayo payen kadagiti publikasiontayo. Ngem mabalin nga adda pay dagiti maikabilangan a prinsipio ti Biblia. Mabalin a matulongannatayo ti maysa a panglakayen a mangutob kadagita. Kas pagarigan, ammo ti maysa a sister a responsabilidadna nga ikasaba ti naimbag a damag. (Ara. 4:20) Ipapantayo a maysa nga aldaw, planona ti mangasaba ngem kayat ti saan a Saksi nga asawana a saan a pumanaw. Kuna ni lakayna a saanda unay a nakapagkadua kadagiti napalpalabas nga aldaw, ket kayatna koma nga agkaduada iti dayta nga aldaw ta adda napateg nga asikasuenda. Mabalin a mapanunotna ti dadduma a teksto iti Biblia, kas iti panagtulnog iti Dios ken ti bilin a panagaramid iti adalan. (Mat. 28:19, 20; Ara. 5:29) Ngem masapul met a panunotenna ti panagpasakupna ken lakayna ken ti panagbalin a nainkalintegan. (Efe. 5:22-24; Fil. 4:5) Talaga kadi a parparitan ni lakayna a mangasaba, wenno adda laeng ipakpakaasina para iti dayta nga aldaw? Masapul a balansetayo no ar-aramidentayo ti pagayatan ti Dios ken ikagkagumaantayo ti maaddaan iti nadalus a konsiensia.

PAGTALINAEDEM A NAAN-ANAY TI PUSOM KEN AGRAG-OKA

18. Kasano a magunggonaanka iti panangadalmo kadagiti salaysay maipapan iti uppat nga ari?

18 Gapu ta imperpektotayo, mabalin a maaramidtayo met no dadduma ti maysa kadagiti nagkamalian ti uppat nga ari nga inadaltayo. Mabalin a (1) saantayo a mapupuotan nga agpampannuraytayo iti sirib ti tao, (2) makikadkaduatayo kadagiti saan a nasayaat a kakadua, (3) agbalintayo a natangsit wenno napannakkel, wenno (4) agdesisiontayo a saantayo nga ammuen nga umuna ti pagayatan ti Dios. Imbag laengen ta kitkitaen ni Apo Jehova ti naimbag kadatayo, a kas iti inaramidna kadagiti uppat nga ari! Kitkitaen met ni Jehova no kasano kauneg ti panagayattayo kenkuana ken ti determinasiontayo nga agserbi kenkuana iti amin a kabaelantayo. Dayta ti makagapu a nangipaay kadagiti pagarigan tapno maliklikantayo dagiti serioso a kamali. Utobentayo koma dagitoy a salaysay iti Biblia ken agyamantayo ken Jehova iti panangipaayna kadagita!