Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2016

Makiramanka a Mangpabileg iti Panagkaykaysatayo kas Kristiano—Kasano?

Makiramanka a Mangpabileg iti Panagkaykaysatayo kas Kristiano—Kasano?

‘Manipud kenkuana ti intero a bagi natunos ti pannakasangalna ken naaramid nga agtitinnulong.’—EFE. 4:16.

KANTA: 53, 107

1. Manipud rugi, ania ti makita kadagiti ar-aramid ti Dios?

MANIPUD rugi ti panamarsua, nalawag a makita ti panagkaykaysa ti panggep. Kas ti kasayaatan a mangiladawan iti sirib, kinuna ti damo a pinarsua ti Dios: “Addaak idi iti sibay [ni Jehova] kas nasigo a managobra, ket siak daydiay pakaay-ayatanna unay iti inaldaw.” (Prov. 8:30) Nagtinnulong ti Ama ken Anak, ket nakapataudda iti nagduduma a kita ti biag kas makitatayo ita. Nagtultuloy a makita ti panagtutunos kadagiti ar-aramid ti Dios. Makitatayo daytoy a kababalin idi naaramid ti daong idi kaaldawan ni Noe; ti pannakaaramid, pannakarakrak, ken pannakayakar ti tabernakulo bayat ti panagdaliasat dagiti adipen ti Dios iti let-ang; ken uray ti pannakatokar ti musika ken ti panagtutunos dagiti timek a mangidayaw ken Jehova iti templona. Amin dagita nga aramid ket agdepende iti panagkaykaysa.—Gen. 6:14-16, 22; Num. 4:4-32; 1 Cron. 25:1-8.

2. (a) Ania ti makitatayo iti nagkauna a kongregasion Kristiano? (b) Ania dagiti saludsod nga usigentayo?

2 Makita met daytoy a panagtitinnulong iti nagkauna a kongregasion Kristiano iti panangidaulo ni Jesu-Kristo. Inlawlawag ni apostol Pablo nga uray no addaan iti “nagduduma a sagut” ken  nakiraman iti “nagduduma a ministerio” ken nagduduma nga ar-aramid dagiti napulotan a Kristiano, aminda ket paset ti ‘maymaysa a bagi.’ (Basaen ti 1 Corinto 12:4-6, 12.) Ngem datayo ngay ita? Kasano a makapagtalinaedtayo nga agtutunos iti panangikasabatayo iti naimbag a damag? Ken kasano a makapagtutunostayo iti kongregasion ken kasta met iti pamilia?

MAKITUNOS ITI PANANGASABA

3. Ania a sirmata ti nakita ni apostol Juan?

3 Idi dandanin agngudo ti umuna a siglo C.E., nasirmata ni apostol Juan ti pito nga anghel a nangpuyot iti trumpeta. Idi pinuyotan ti maikalima nga anghel ti trumpetana, nakita ni Juan ti “maysa a bituen” a natnag ditoy daga manipud langit. Addaan ti “bituen” iti tulbek nga inusarna a nanglukat iti nakaun-uneg nga abut. Nagpangato ti napuskol nga asuk, ket rimmuar dagiti dudon. Imbes a dadaelenda dagiti mula, dagiti simboliko a dudon inarakda dagiti “tattao nga awanan iti selio ti Dios kadagiti mugingda.” (Apoc. 9:1-4) Ammo ni Juan a kasta unay ti panangdadael ti adu a dudon. Saan kadi a dinadael dagiti dudon ti nagkauna nga Egipto idi kaaldawan ni Moises? (Ex. 10:12-15) Dagiti piguratibo a dudon a nakita ni Juan iladawanda dagiti napulotan a Kristiano a mangipakpakaammo iti nadagsen a mensahe ti panangukom ni Jehova. Kaduada itan dagiti minilion nga addaan iti namnama nga agbiag ditoy daga. Saan ngarud a pakasdaawan a gapu iti nagkaykaysa a panangasabatayo saan nga agballigi ti panangituray ni Satanas iti imperio ti palso a relihion iti intero a lubong!

4. Ania a trabaho ti masapul nga aramiden dagiti adipen ti Dios, ken kasano laeng a maaramidda daytoy?

4 Adda nagdakkel a trabaho dagiti adipen ni Jehova a mangikasaba iti “naimbag a damag” iti intero a lubong sakbay ti panungpalan daytoy a sistema. (Mat. 24:14; 28:19, 20) Ramanen daytoy ti panangawis iti “asinoman a mawaw” nga uminum iti “danum ti biag nga awan bayadna.” (Apoc. 22:17) Kas miembro ti kongregasion Kristiano, kasano nga agballigitayo a mangaramid iti daytoy? Babaen laeng ti panagtutunos ken panagtitinnulongtayo.—Efe. 4:16.

5, 6. Kasano a nagkaykaysatayo bayat nga ikaskasabatayo ti naimbag a damag?

5 Tapno maidanon ti mensahe ti naimbag a damag ti Pagarian iti adu a tattao, masapul nga organisado ti panangasabatayo. Ngarud, adda dagiti instruksion a maaw-awattayo. Dagiti instruksion a maipapaay kadagiti kongregasion iti intero a lubong ti mangisagana kadatayo para iti nagkaykaysa a panangasaba. Kalpasan ti taripnong sakbay ti panangasaba, idanontayo ti mensahe ti Pagarian kadagiti tattao. Babaen ti panangasabatayo ken babaen kadagiti minilion a publikasion a naibatay iti Biblia, isaksaknaptayo ti mensahe. Ikagkagumaam kadi a suroten dagiti instruksion tapno makiraman kadagiti espesial a kampania ti panangasaba? No aramidem dayta, makituntunoska kadagiti minilion a mangipakpakaammo iti mensahe ti “anghel nga agtaytayab iti nagtangatangan” a dinakamat ti Apocalipsis 14:6.

6 Talaga a makaparagsak a mabasa iti Tinawen a Libro dagiti napagtitipon a resulta ti nagapuanantayo! Panunotenyo met ti panagkaykaysatayo bayat ti panagiwarastayo kadagiti imbitasion para iti rehional, espesial, ken internasional a kombension. Kadagitoy a panagtataripnong, makangngegtayo kadagiti makaparegta a naibatay iti Biblia a palawag ken makabuyatayo kadagiti drama ken demostrasion. Dagitoy a paset masansan nga ipaganetgetda ti naayat a kiddaw ti Dios nga agserbitayo kenkuana iti amin a  kabaelantayo. Agkaykaysatayo met bayat ti pananglaglagip iti ipapatay ni Jesus. Gapu iti panagyamantayo iti naayat a kinamanangngaasi ti Dios ken iti panagtulnogtayo iti bilin ni Jesus, tinawen nga agtataripnongtayo para iti dayta nga okasion kalpasan ti ilelennek ti init iti Nisan 14. (1 Cor. 11:23-26) Saan laeng a dagiti nabautisaran a Saksi ti agatender. Sumagmamano a lawas sakbay ti Memorial, wanasentayo ti teritoriatayo tapno awisen ti dadduma a makikadua kadatayo a mangrambak iti dayta a nagpateg nga okasion.

7. Ania ti maaramidantayo no agtitinnulongtayo?

7 Ti agmaymaysa a dudon bassit ti madadaelna. Kasta met, no agmaymaysatayo kasla awan ti magapuanantayo. Ngem no agtitinnulongtayo, mabalin a maiturongtayo dagiti minilion a tattao iti daydiay maikari iti amin a dayaw, ni Jehova! Nupay kasta, saan laeng nga iti daytoy a pamay-an a ti panagtutunostayo ket makaipaay iti panagkaykaysa dagiti agserserbi iti Dios.

MAKITUNOS ITI KONGREGASION

8, 9. (a) Ania nga ilustrasion ti inusar ni Pablo a mangisuro nga agkaykaysa dagiti Kristiano? (b) Kasano a maipakitatayo a makituntunostayo iti kongregasion?

8 Iti suratna kadagiti taga-Efeso, dinakamat ni Pablo ti pannakaorganisar ti kongregasion ken ti kinapateg ti panagbalin a nataengan iti amin a banag. (Basaen ti Efeso 4:15, 16.) Ania ti makatulong kadatayo kas indibidual tapno agmataengantayo? Inusar ni Pablo ti bagi a pagarigan, inlawlawagna ti panagkaykaysa babaen iti panangidaulo ti ulo ti kongregasion, ni Jesu-Kristo. Dinakamat ti apostol ti panagtutunos “ti tunggal nagsuopan a mangipaay iti kasapulan.” Ubingtayo man wenno nataengan, napigsa wenno nakapuy, kasanotayo a makatulong iti panagkaykaysa ken iti nasayaat nga espiritualidad ti kongregasion?

9 Nagpateg nga agpasakup ken raementayo dagiti panglakayen a dinutokan ni Jesus a mangiwanwan iti kongregasion. (Heb. 13:7, 17) Mabalin a narigat nga aramiden dayta no dadduma. Ngem kabaelantayo nga aramiden no agpatulongtayo iti Dios. Makatulong ti nasantuan nga espirituna tapno naimpusuan a masuportarantayo dagiti urnos ti kongregasion. Gapuna, no marigatantayo no dadduma a sumurot kadagiti urnos, panunotentayo a no sipapakumbaba a makitunostayo, adda panagkaykaysa iti kongregasion. Makatulong met kadatayo dayta nga ad-adda a mangipakita iti ayat iti maysa ken maysa.

10. Kasano a tumultulong dagiti ministerial nga adipen tapno agkaykaysa ti kongregasion? (Kitaen ti ladawan iti rugi ti artikulo.)

10 Maapresiar met ti pannakitinnulong dagiti ministerial nga adipen tapno agkaykaysa ti kongregasion. Aniaman ti edad dagitoy a kakabsat, agsaksakripisioda para iti pagimbagan ti amin. Kas pagarigan, tultulonganda dagiti panglakayen tapno masigurado nga umdas dagiti publikasion a mausar iti ministerio. Kasta met, kanayon nga asikasuenda ti regular a pannakadalus ken pannakamantener ti Kingdom Hall, ken abrasaenda dagiti bisita nga umay makigimong. No makitunostayo kadagitoy a kakabsat, tumultulongtayo tapno naannayas ti panagandar ti kongregasion.—Idilig ti Aramid 6:3-6.

11. Ania ti maaramidan dagiti ubbing pay a kakabsat tapno agkaykaysa ti kongregasionda?

11 Adu a nataengan a kakabsat a lallaki ti nangibaklay kadagiti annongen iti kongregasion iti adun a tawen. Ngem gapu iti panaglakay, mabalin a limitadon ti maaramidanda isu a kasapulan ti panagbalbaliw. Dakkel ti maitulong dagiti ubbing pay a kakabsat a lallaki. Nupay masapul a maaddaanda iti ad-adu pay a kapadasan,  makatulong ti panangsanay tapno maipabaklay kadakuada ti ad-adu nga annongen. Nagsayaat no ragpaten dagiti ministerial nga adipen ti agbalin a panglakayen! (1 Tim. 3:1, 10) Dadduma nga ubbing pay a panglakayen ti rimmang-ay ket nagbalinda a manangaywan iti sirkito ken agserserbida kadagiti kakabsat iti adu a kongregasion. Saantayo kadi nga agyaman iti tulong dagitoy a kakabsat?—Basaen ti Salmo 110:3; Eclesiastes 12:1.

MAKITUNOS ITI PAMILIA

12, 13. Ania ti makatulong iti pamilia tapno agtutunosda?

12 Kitaentayo met no kasano a maipakitatayo ti pannakitunos iti pamiliatayo. Napaneknekan ti adu a makatulong ti linawas a Panagdaydayaw ti Pamilia tapno agbalin a nasingsinged dagiti agtutubo ken nataengan. Bayat daytoy naragsak a panagadal, maipamaysatayo dagiti naespirituan a bambanag a makatulong tapno agkaykaysa ti pamilia. Makatulong iti pamilia ti panagensayo iti panangasaba tapno ad-adda nga agbalinda nga epektibo iti ministerio. Makaparagsak met a makita a nasingsinged ti pamilia no agkomento ti tunggal maysa maipapan iti Sao ti Dios. Maymaysa a Dios ti ay-ayatenda ken pagragsakanda nga aramiden ti pagayatanna.

Ti panagdaydayaw ti pamilia ti mamagsinged kadagiti ubbing ken nataengan a miembro ti pamilia (Kitaen ti parapo 12, 15)

13 Ania ti maaramidan ti agassawa tapno agtunosda a mangidayaw ken Jehova? No ti agassawa ket agpada a matalek nga adipen ni Jehova, matagiragsakda ti panagkaykaysa a resulta dayta. Da Abraham ken Sara, Isaac ken Rebecca, Elcana ken Anna—inyebkasda ti panagayatda iti assawada. Kasta met koma ti aramidentayo. (Gen. 26:8; 1 Sam. 1:5, 8; 1 Ped. 3:5, 6) Dayta ti mamagkaykaysa kadagiti agassawa ken mamagbalin kadakuada a nasingsinged iti nailangitan nga Amatayo.—Basaen ti Eclesiastes 4:12.

14. No saan nga agserserbi ken Jehova ti asawam, ania ti mabalinmo nga aramiden tapno agtalinaed a nabileg ti panagasawayo?

14 Masapul a saan a makiasawa dagiti Kristiano iti saanda a kapammatian. (2 Cor. 6:14) Ngem kasanon no ti maysa a kabsat ket saanna a kapammatian ti dadduma a kapamiliana? Dadduma nga agserserbi iti Dios ita ket naasawaandan idi naammuanda ti kinapudno, ket saan a Saksi ti assawada. Nupay kasta, makatulong ti panangyaplikar kadagiti prinsipio ti Biblia tapno agkaykaysa ti pamilia. Ramanen dayta ti pannakitunos agingga a mabalin ngem saan nga agkompromiso. Mabalin a narigat dayta, ngem panunotem ti pagimbagan dayta. Mabalin a narigat met nga iyaplikar dagiti prinsipio ti Biblia no ti maysa nga asawa panawanna ti kongregasion. Napasamak dayta iti maysa a kabsat nga agnagan iti Mary. Agserserbida idi ken lakayna a David ken Jehova. Idi agangay, saanen a nakigimong ni lakayna. Kanayon latta a nakigimong ken nakikombension ni Mary ken inkagumaanna nga iyaplikar dagiti prinsipio ti Biblia iti pagtaenganda ken insurona met dagiti innem nga annakda. Idi adulton dagiti annakda ken awandan iti pagtaenganda, narikna ni Mary nga isu ket agmaymaysa. Idi kuan, rinugian a basaen ni David dagiti magasin nga ibatbati ni baketna. Idi agangay, nakigimong manen iti Kingdom Hall ket katugawna ti innem ti tawenna nga apokona nga agiresreserba iti pagtugawanna. No saan a makigimong ni David, ibaga ti apona, “Birbirokenka itay idiay gimong Lolo.” Kalpasan ti 25 a tawen, nagserbi manen ni David ken Jehova, ket maragragsakanda nga agassawa ta agkaduadan nga agserserbi ken Jehova.

15. Kasano a matulongan dagiti nabayagen nga agassawa dagiti ubbing pay nga agassawa?

15 Gapu iti panangdadael ita ni Satanas iti pamilia, nagpateg a taginayonen ti amin nga  adipen ti Dios ti panagtunos ti agassawa. Kasano man kabayag ti panagasawayo, panunotem no ania ti mabalinmo nga ibaga wenno aramiden tapno lumagda ti relasionyo. Matulongan met dagiti nataengan dagiti ubbing pay a miembro ti kongregasion iti daytoy a banag. Sagpaminsan nga awisem dagiti ubbing pay nga agassawa iti pagtaenganyo tapno makiraman iti panagdaydayaw ti pamiliayo. No kaduadakayo, makitada a napateg ti ayat ken panagtunos uray nabayagen nga agassawa ti maysa a pagassawaan.—Tito 2:3-7.

“SUMANG-ATTAYO ITI BANTAY NI JEHOVA”

16, 17. Ania ti segseggaan dagiti nagkaykaysa nga adipen ti Dios?

16 Iladawanmo dagiti Israelita a mangidaydayaw ken Jehova bayat ti piesta iti templo idiay Jerusalem. Mabalin a nagsaganada para iti panagdaliasatda, impaayda ti kasapulan ti tunggal maysa iti dalan, ken nagkaykaysada a nagdayaw idiay templo. Masapul ti panagtutunos iti daytoy. (Luc. 2:41-44) Bayat nga agturturongtayo iti baro a lubong, masapul met nga agtutunos ken agkaykaysatayo. Kalikaguman dayta ti kanayon ken napasnek a panagregget. Adda kadi masapul a parang-ayem iti daytoy?

17 Panunotem dagiti bendision a sagrapentayo iti masanguanan! Saantayon a nasinasina ken nagulo a kas iti mapaspasamak iti agdama a sistema ti bambanag. Makitkitatayon ti kaitungpalan ti impakpakauna da Isaias ken Mikias a sangsangkamaysa a sumangsang-at dagiti adipen ti Dios iti “bantay ni Jehova.” (Isa. 2:2-4; basaen ti Mikias 4:2-4.) Kinapudnona, nakatantan-ok ti porma ti panagdayawtayo iti “kamaudianan a paset dagiti aldaw.” Ngem naragragsaktayto pay inton agtutunos ken agkaykaysa ti amin a tao!