Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2016

Iwanwanwan ni Jehova Dagiti Adipenna iti Panagbiagda

Iwanwanwan ni Jehova Dagiti Adipenna iti Panagbiagda

“Daytoy ti dalan. Magnakayo iti dayta.”—ISA. 30:21.

KANTA: 65, 48

1, 2. (a) Adu a biag ti naispal ti ania a pakdaar? (Kitaen ti ladawan iti rugi ti artikulo.) (b) Ania a panangiwanwan a makaispal iti biag ti adda kadagiti adipen ti Dios?

“STOP, LOOK, LISTEN.” Adun a biag ti naisalbar dagitoy a sasao. Nasurok a 100 a tawen ti napalabasen, adda dadakkel a karatula a nakaisuratan dagitoy a sasao a naikabil kadagiti pagsabatan ti riles ken kalsada idiay North America. Ania ti makagapu? Tapno dagiti lugan saanda a bumallasiw iti riles iti di umiso a tiempo ken madungpar ida ti bumanesbes a tren. Wen, makaisalbar iti biag ti panangipangag iti dayta a pakdaar.

2 Nasaysayaat pay ti aramiden ni Jehova ngem ti panangikabil kadagita a karatula. Arigna agtakder iti sango dagiti adipenna, nga itudtudona kadakuada ti dalan nga adayo iti peggad nga agturong iti biag nga agnanayon. Kasta met, agbalin a kas iti naayat a pastor ti arbanna, nga isurona kadagiti karnero ti umiso a dalan ken pakdaaranna ida tapno maliklikanda dagiti napeggad a dalan.—Basaen ti Isaias 30:20, 21.

NABAYAGEN NGA IWANWANWAN NI JEHOVA DAGITI ADIPENNA

3. Apay a matay ti tao?

3 Iti intero a pakasaritaan, nangipaay ni Jehova kadagiti  espesipiko a bilin wenno instruksion. Kas pagarigan, idiay hardin ti Eden, nangted ni Jehova iti nalawag a bilin a mangiwanwan iti tao nga agturong iti agnanayon a biag ken kinaragsak. (Gen. 2:15-17) No nagtulnog koma da Adan ken Eva iti dayta a bilin, nailisida koma iti nakalkaldaang a biag a napno iti rigat a nagtungpal iti ipapatayda nga awanan iti namnama. Ngem imbes nga agtulnogda, dimngeg ni Eva iti balakad a kasla nagtaud iti maysa nga animal. Dimngeg met ni Adan ken Eva, a maysa laeng a tao. Tinallikudanda ti naayat a panangiwanwan ti Amada. Kas resultana, sagabaen ti tao ti ipapatay.

4. (a) Apay a kasapulan dagiti baro a pagalagadan kalpasan ti Layus? (b) Kasano a dagiti baro a kasasaad ipakitada ti kapanunotan ti Dios?

4 Bayat ti panagbiag ni Noe, nangted ti Dios iti bilin a nangispal iti biag. Kalpasan ti Layus, espesipiko nga imparit ni Jehova ti panangusar iti dara. Apay a kasapulan dayta? Ngamin adda baro a kasasaad. Ipalubosen ni Jehova a kanen dagiti tattao ti lasag ti animal. Gapuna, kasapulan dagiti baro a pagalagadan. Saanda a kanen ti lasag nga adda darana. (Gen. 9:1-4) Ti nagbalbaliw a kasasaad nalawag nga ipakitana ti kapanunotan ti Dios maipapan iti kukuana, ti biag. Kas Namarsua ken Manangted iti Biag, addaan iti kalintegan a mangipaay iti pagalagadan maipapan iti biag. Kas pagarigan, imbilinna a saan a patayen ti maysa a tao ti padana a tao. Ibilang ti Dios a sagrado ti biag ken dara, ket singirenna ti asinoman a di umiso ti panangusarna iti dayta.—Gen. 9:5, 6.

5. Ania ti usigentayo ita, ken apay?

5 Kitaentayo ti sumagmamano a pagarigan no kasano nga intultuloy ti Dios ti nangipaay iti panangiwanwan bayat ti ginasgasut a tawen. Daytoy a panangrepaso pabilgennatayo a sumurot iti panangiturong ni Jehova iti baro a lubong.

BARO A NASION, BARO A PAGALAGADAN

6. Apay a masapul nga agtulnog dagiti adipen ti Dios kadagiti linteg a naited ken Moises, ket ania koma ti rumbeng a kababalin dagiti Israelita?

6 Idi kaaldawan ni Moises, masapul dagiti nalawag a pagalagadan maipapan iti umiso a kababalin ken pamay-an ti panagdayaw. Apay? Gapu manen kadagiti nagbalbaliw a kasasaad. Iti nasurok a 200 a tawen, nagnaed dagiti annak ni Jacob idiay Egipto, ti daga nga adu ti nagdayaw kadagiti natay, nagusar kadagiti idolo, ken nagaramid kadagiti bambanag a nakababain iti Dios. Idi nawayawayaan dagiti adipen ti Dios iti panangadipen ti Egipto, kasapulan dagiti baro a panangiwanwan. Dagiti adipen ti Dios saandan a naadipen a tattao, no di ket siwayawayadan a nasion a mangannurot iti Linteg ni Jehova. Kuna ti dadduma a reperensia a ti Hebreo a sao a “linteg” ket nainaig iti sao a kaipapananna “mangiturong, mangiwanwan, mangisuro.” Nagserbi ti Mosaiko a Linteg kas mangsalaknib a pader maibusor iti nababa a moral ken di umiso a narelihiosuan nga ar-aramid ti dadduma a nasion. Idi impangag dagiti Israelita ti Dios, nabendisionan ti nasionda. Ngem idi sinukirda, nagsagabada.—Basaen ti Deuteronomio 28:1, 2, 15.

7. (a) Ilawlawagmo no apay a nangted ni Jehova iti bilin kadagiti adipenna. (b) Kasano a nagbalin ti Linteg a manangisuro para iti Israel?

7 Kasapulan dagiti baro a panangiwanwan gapu iti sabali pay a rason. Ibaga ti Linteg ti nagpateg a banag maipapan iti pagayatan ni Jehova. Dayta ti iyaay ti Mesias, ni Jesu-Kristo. Babaen iti Linteg, nalawag a makita nga imperpekto dagiti Israelita. Nakatulong met kadakuada ti Linteg tapno maawatanda a kasapulanda ti subbot, maysa a perpekto a sakripisio a naan-anay a mangabbong iti basol. (Gal. 3:19; Heb. 10:1-10) Kasta met, nakatulong ti Linteg tapno masalakniban ti linia ti pamilia nga agturong iti Mesias ken tapno mailasin inton agparang. Wen, ti  Linteg nagbalin a temporario a manangisuro a mangiturong ken Kristo.—Gal. 3:23, 24.

8. Apay a masapul nga agpaiturongtayo kadagiti prinsipio a nakaibatayan ti Mosaiko a Linteg?

8 Kas Kristiano, magunggonaantayo met kadagiti pagalagadan a naited iti Linteg ti nasion ti Israel. Kasano? Mabalin a panunotentayo dagiti prinsipio a mainaig iti Linteg. Uray no saantayo nga al-alagaden dagita a linteg, adu kadagitoy ti mapagtalkan a mangiwanwan iti inaldaw a panagbiagtayo ken panagdayawtayo iti nasantuan a Diostayo a ni Jehova. Impaisuratna dagita iti Biblia tapno makasursurotayo kadagitoy, maiwanwantayo kadagiti prinsipio, ken maapresiartayo dagiti nangato a moral a pagalagadan para kadagiti Kristiano. Ipangagtayo ti kinuna ni Jesus: “Nangngegyo a naikuna, ‘Dika makikamalala.’ Ngem kunak kadakayo a ti tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” Gapuna, masapul a liklikantayo saan laeng a ti pannakikamalala no di ket uray ti tarigagay nga agaramid iti immoralidad.—Mat. 5:27, 28.

9. Gapu iti ania a baro a kasasaad a masapul ti baro a panangiwanwan ti Dios?

9 Idi dimteng ni Jesus kas ti Mesias, kasapulan ti baro a panangiwanwan ti Dios ken ti ad-adda pay a pannakaipalgak ti panggep ni Jehova. Masapul daytoy ta adda manen baro a kasasaad. Idi 33 C.E., inturong ni Jehova ti anamongna iti kongregasion Kristiano imbes a ti kongregasion ti nagkauna nga Israel.

PANANGIWANWAN ITI BARO A NAESPIRITUAN A NASION

10. Apay a naited dagiti baro a linteg iti kongregasion Kristiano, ket kasano a naiduma dagitoy kadagidiay naited kadagiti Israelita?

10 Idi umuna a siglo, dagiti adipen ti Dios a naipasidong iti urnos dagiti Kristiano nakaawatda iti baro wenno ad-adu nga instruksion iti panagdayaw ken kababalin. Dagitoy a napasnek nga adipen ti Dios addada iti babaen ti baro a tulag. Ti Mosaiko a Linteg ket naited iti maymaysa a nasion—ti nagkauna nga Israel. Maiduma iti dayta, ti naespirituan nga Israel ket buklen ti tattao manipud iti adu a nasion ken kasasaad. Talaga a “ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Ara. 10:34, 35) Ti Mosaiko a Linteg ti nangiwanwan iti nagkauna nga Israel iti Naikari a Daga. Naikitikit dagitoy a linteg iti bato. Para iti naespirituan nga Israel, “ti linteg ti Kristo” ket naibatay kadagiti prinsipio a naisurat iti puso. “Ti linteg ti Kristo” ket agaplikar ken agpaay a pakagunggonaan dagiti Kristiano sadinoman ti pagnanaedanda.—Gal. 6:2.

11. Ania a paset iti panagbiag ti Kristiano ti apektaran “ti linteg ti Kristo”?

11 Magunggonaan unay ti naespirituan nga Israel iti panangiwanwan ti Dios babaen iti Anakna. Sakbay la unay ti pannakaipasdek ti baro a tulag, nangted ni Jesus iti dua a nagpateg a bilin. Ti maysa ket maipapan iti panangasaba. Ti sabali ket maipapan iti kababalin dagiti pasurotna ken no kasano a tratuenda dagiti kapammatianda. Dagitoy a bilin ket para iti amin a Kristiano. Gapuna, agaplikar iti amin a pudno nga agdaydayaw ita, idiay man langit wenno ditoy daga ti namnamada.

12. Ania ti baro maipapan iti trabaho a panangasaba?

12 Usigentayo ti panangikasaba iti naimbag a damag nga imbilin ni Jesus nga aramiden dagiti pasurotna. Baro ti pamay-an ken ti teritoria a pangasabaanda. Kadagiti umuna a ginasgasut a tawen, dagiti tattao kadagiti nasion naawatda iti Israel idi napanda sadiay tapno agserbida ken Jehova. (1 Ar. 8:41-43) Napasamak dayta sakbay nga imbilin ni Jesus ti mabasatayo iti Mateo 28:19, 20. (Basaen.) Naibaga kadagiti adalan ni Jesus  a mapanda iti amin a tattao. Idi aldaw ti Pentecostes 33 C.E., makitan a binaliwan ni Jehova ti pamay-an—ti panagebanghelio ket maaramiden iti intero a lubong. Tinignay ti nasantuan nga espirituna ti agarup 120 a miembro ti baro a kongregasion nga agsao iti nagduduma a lengguahe kadagiti Judio ken proselita. (Ara. 2:4-11) Sumaganad, nairaman dagiti Samaritano. Kalpasanna, idi tawen 36 C.E., nairaman dagiti Gentil. Mabalin a maikunam a limmawa ti pangasabaan manipud iti maysa a “libtong” a buklen dagiti Judio a nagbalin a maysa a “taaw” a buklen ti amin a tattao.

13, 14. (a) Ania ti karaman iti inted ni Jesus a “baro a bilin”? (b) Ania ti masursurotayo iti ulidan ni Jesus?

13 Kitaentayo ita ti pamay-an ti panangtratotayo kadagiti kapammatiantayo. Nangted ni Jesus iti “baro a bilin.” (Basaen ti Juan 13:34, 35.) Dayta a bilin ramanenna saan laeng a ti gagangay a panagayat iti maysa ken maysa iti inaldaw a panagbiag no di ket situtuloktayo koma a mangipaay iti biagtayo iti kabsattayo. Dayta ket saan a naikalikagum iti Mosaiko a Linteg.—Mat. 22:39; 1 Juan 3:16.

14 Ni Jesus ti kangrunaan nga ulidantayo. Inay-ayatna unay dagiti adalanna isu nga impaayna ti biagna para kadakuada. Ti kasta a panagayat kaipapananna a masapul a matay maigapu kadagiti adalanna, ken situtulok ni Jesus a mangaramid iti dayta. Ket namnamaenna a situtulok met nga aramiden dayta dagiti adalanna, a pakairamanantayo. Gapuna, mabalin nga agsakripisiotayo ken uray pay mataytayo para kadagiti kapammatiantayo.—1 Tes. 2:8.

PANANGIWANWAN ITI PANAWENTAYO KEN ITI MASANGUANAN

15, 16. Ania a baro a kasasaad ti pagbibiagantayon, ket kasano nga iwanwanwannatayo ti Dios?

15 Nangnangruna idi nadutokan “ti matalek ken masirib nga adipen,” nangipaay ni Jesus kadagiti adipenna iti naespirituan a taraon iti umiso a tiempo. (Mat. 24:45-47) Daytoy a taraon ramanenna dagiti nagpateg a panangiwanwan gapu iti nagbalbaliw a kasasaad.

16 Agbibiagtayon iti awagan ti Biblia a ‘maudi nga al-aldaw,’ ket asidegen a mapasamak ti rigat a saan pay a pulos a napasamak. (2 Tim. 3:1; Mar. 13:19) Kasta met, naitapuaken manipud langit ni Satanas ken dagiti demoniona ket addadan ditoy daga, isu a nakaro ti rigat dagiti tattao. (Apoc. 12:9, 12) Naited met kadatayo ti panangaramid iti kadakkelan ken saan pay idi a napasamak a panangasaba, ti panangdanon kadagiti tattao iti ad-adu pay a lengguahe!

17, 18. Ania koma ti reaksiontayo iti panangiwanwan a maipapaay ita?

17 Masapul nga usarentayo dagiti alikamen a mangasaba nga impaay ti organisasion ti Dios. Kayatmo kadi nga aramiden dayta? Sursurotem kadi ti instruksion a maipapaay kadagiti gimong no kasano nga epektibo nga usaren dagitoy nga alikamen? Ibilbilangmo kadi dagitoy nga instruksion kas panangiwanwan ti Dios?

18 Wen, tapno agtultuloy a bendisionannatayo ti Dios, masapul nga ipangagtayo ti amin nga instruksion a maipapaay iti kongregasion Kristiano. No natulnogtayo itan, makatulongto dayta kadatayo nga agtulnog kadagiti instruksion bayat ti “dakkel a rigat,” a mangpukaw iti dakes a sistema ni Satanas. (Mat. 24:21) Kalpasanna, kasapulantayo manen dagiti baro nga instruksion iti panagbiag ditoy daga iti baro a lubong nga awanen ti impluensia ni Satanas.

Iti Paraiso a daga, maukradto dagiti lukot a mangiwanwan kadatayo iti panagbiag iti baro a lubong (Kitaen ti parapo 19, 20)

19, 20. Ania dagiti lukot a maukradto, ken ania ti resulta ti pannakaukrad dayta?

19 Masapul idi ti baro a panangiwanwan iti nasion ti Israel babaen ken Moises ken kalpasanna iti kongregasion Kristiano  babaen “ti linteg ti Kristo.” Kasta met, ibaga ti Biblia kadatayo a maukradto dagiti lukot a mangiwanwan kadatayo iti panagbiag iti baro a lubong. (Basaen ti Apocalipsis 20:12.) Mabalin a naibaga kadagitoy a lukot dagiti kalikaguman ni Jehova kadagiti tattao iti dayta a tiempo. Babaen iti panangadaltayo kadagitoy, amin a tao, agraman dagiti napagungar, maammuandanto ti pagayatan ti Dios para kadakuada. Dagitoy a lukot sigurado a mangipaaydanto iti ad-adda a pannakaawattayo iti kapanunotan ni Jehova. Babaen iti panangiwanwan ti lumawlawag a pannakaawattayo iti naipaltiing a Sao ti Dios agraman dagiti maipakaammonto kadagiti baro a lukot, dagiti agnaed iti Paraiso a daga sigurado nga ayatenda, respetuenda, ken ipaayanda iti dignidad ti padada a tao. (Isa. 26:9) Panunotenyo ti programa a panangisuro a maaramidto babaen iti panangiturong ti Ari a ni Jesu-Kristo!

20 Biag nga agnanayon ti agur-uray kadagiti mangannurot kadagiti “banag a naisurat kadagiti lukot.” Dagiti agtalinaed a matalek iti Dios inton maudi a pannubok permanente nga isuratto ni Jehova dagiti naganda iti “lukot ti biag.” Mabalin a dayta ti agur-uray kadatayo! Gapuna, no AGSARDENGTAYO tapno utobentayo ti Sao ti Dios, KITAENTAYO tapno maawatantayo ti kaipapananna kadatayo, ken DUMNGEGTAYO babaen ti panagtulnogtayo iti panangiwanwan ti Dios itan, manamnamatayo a maisalakantayo iti dakkel a rigat ken matagiragsaktayo ti agnanayon a panagsursuro maipapan iti masirib ken naayat a Diostayo a ni Jehova.—Ecl. 3:11; Roma 11:33.