Mapan iti linaonna

Mapan iti listaan dagiti linaonna

Punnuem ti Pusom Kadagiti Naespirituan a Gameng

Punnuem ti Pusom Kadagiti Naespirituan a Gameng

“No sadino ti ayan ti gamengyo, sadiayto met ti ayan ti puspusoyo.”—LUC. 12:34.

KANTA: 153, 104

1, 2. (a) Ania ti tallo a naespirituan a gameng nga inted ni Jehova kadatayo? (b) Ania ti adalentayo iti daytoy nga artikulo?

NI Jehova ti kabaknangan iti uniberso. (1 Cron. 29:11, 12) Kas naparabur nga Ama, naayat nga it-itedna dagiti naespirituan a kinabaknangna iti amin a mangipateg iti dayta. Agyamantayo unay ta inted ni Jehova kadatayo dagiti naespirituan a gameng, a pakairamanan ti (1) Pagarian ti Dios, (2) makaisalakan a ministeriotayo, ken (3) dagiti nagpateg a kinapudno iti Saona! Ngem no saantayo a naannad, mabalin a saantayon nga ipateg dagitoy, ket mapukawtayo dagita. Tapno agtalinaed kadatayo, masapul nga usarentayo a naimbag dagita ken kanayon a pabaruentayo ti panangayattayo kadagita. Kinuna ni Jesus: “No sadino ti ayan ti gamengyo, sadiayto met ti ayan ti puspusoyo.”—Luc. 12:34.

2 Adalentayo ita no kasano a maipategtayo ti Pagarian, ti ministerio, ken ti kinapudno, ken no kasano nga agtultuloy nga aramidentayo dayta. Iti panagadaltayo, panunotem no kasano nga ad-adda a maipategmo dagitoy a naespirituan a gameng.

 PAGARIAN TI DIOS—KAS ITI NAKAPATPATEG A PERLAS

3. Iti ilustrasion ni Jesus, ania ti sisasagana nga isakripisio ti komersiante tapno magatangna ti nakapatpateg a perlas? (Kitaen ti ladawan iti rugi ti artikulo.)

3 Basaen ti Mateo 13:45, 46. Dinakamat ni Jesus ti ilustrasion maipapan iti komersiante nga agsapsapul iti perlas. Gapu ta adu a tawenen nga agnegnegosio, sigurado a ginasut a perlas ti nagatang ken nailakonan. Ngem ita, adda nabirokanna a nakapimpintas a perlas ket permi ti ragsakna uray iti pannakakitana laeng iti dayta. Ngem tapno magatangna, masapul nga ilakona ti amin nga adda kenkuana. Mapanunotmo kadi no kasano kapateg kenkuana dayta a perlas?

4. No ipatpategtayo ti Pagarian ti Dios a kas iti panangipateg ti komersiante iti perlas, ania ti aramidentayo?

4 Ania ti masursurotayo? Ti kinapudno maipapan iti Pagarian ti Dios ket kas iti nakapatpateg a perlas. No ipategtayo dayta a kas iti panangipateg ti komersiante iti perlas, sisasaganatayo a mangisakripisio iti amin tapno agbalin ken agtalinaedtayo nga iturayan ti Pagarian. (Basaen ti Marcos 10:28-30.) Ammuentayo ti dua a tao a nangaramid iti dayta.

5. Kasano nga impakita ni Zaqueo nga ipatpategna ti Pagarian ti Dios?

5 Ni Zaqueo ket maysa idi a panguluen nga agsingsingir iti buis. Bimmaknang gapu ta kuarkuartaanna dagiti tattao. (Luc. 19:1-9) Ngem idi nangngeg daytoy di nalinteg a tao ti ikaskasaba ni Jesus maipapan iti Pagarian, nakitana a napateg dayta ket nagbalbaliw. Kinunana: “Adtoy! Ti kagudua dagiti sanikuak, Apo, itedko kadagiti napanglaw, ket aniaman a kinikilko iti asinoman babaen iti ulbod a pammabasol isublik iti mamimpat a kaadu.” Situtulok a binaybay-anna ti kinabaknangna ken inikkatna ti kinaagumna iti material.

6. Ania a panagbalbaliw ti inaramid ni Rose tapno agbalin nga iturayan ti Pagarian ti Dios, ken apay nga inaramidna dayta?

6 Sumagmamano a tawen sakbay a naammuan ti maysa a babai, nga awagantayo iti Rose, ti mensahe ti Pagarian, adda idi karelasionna a babai. Ni Rose idi ti presidente ti maysa nga organisasion a mangilablaban iti kalintegan dagiti homoseksual. Ngem bayat nga agad-adal iti Biblia, naammuanna a napateg ti kinapudno maipapan iti Pagarian ti Dios. Nupay kasta, nakitana a dakkel ti masapul a balbaliwanna. (1 Cor. 6:9, 10) Natignay ngarud nga agikkat iti posisionna ken makisina iti karelasionna. Nabautisaran ni Rose idi 2009, ken nagpayunir iti simmaruno a tawen. Nabilbileg ti panagayatna ken Jehova ken iti Pagarianna ngem iti tarigagayna.—Mar. 12:29, 30.

7. Tapno agtultuloy a naimpusuan nga ipategtayo ti Pagarian ti Dios, ania ti aramidentayo?

7 Sigurado nga adu met kadatayo ti nangbalbaliw iti biagna tapno maikari nga iturayan ti Pagarian ti Dios. (Roma 12:2) Ngem saan nga agpatingga dita. Masapul nga agtalinaedtayo a nasiput kadagiti banag a napigsa a mangagaw iti panagayattayo, a pakairamanan dagiti material a banag ken ti aniaman a seksual a tarigagay. (Prov. 4:23; Mat. 5:27-29) Tapno agtultuloy a naimpusuan nga ipategtayo ti Pagarian ti Dios, inted ni Jehova ti sabali pay a nakapatpateg a gameng.

TI MAKAISALAKAN A MINISTERIOTAYO

8. (a) Apay a dineskribir ni apostol Pablo ti ministeriotayo kas “gameng kadagiti damili a basehas”? (b) Kasano nga impakita ni Pablo nga ipatpategna ti ministeriona?

8 Imbilin ni Jesus nga ikasaba ken isurotayo ti naimbag a damag maipapan iti Pagarian ti Dios. (Mat. 28:19, 20) Nabigbig ni  apostol Pablo ti kinapateg ti ministerio. Dineskribirna ti ministerio ti baro a tulag kas “gameng kadagiti damili a basehas.” (2 Cor. 4:7; 1 Tim. 1:12) Nupay imperpektotayo a damili, ti mensahe nga ikaskasabatayo ket mangipaay iti biag nga agnanayon kadatayo ken kadagiti dumngeg kadatayo. Ammo dayta ni Pablo ta kinunana: “Aramidek ti amin a bambanag maipagapu iti naimbag a damag, tapno agbalinak a manangiranud iti dayta iti sabsabali.” (1 Cor. 9:23) Wen, nagaget ni Pablo a nagaramid iti adalan gapu ta ipatpategna ti ministerio. (Basaen ti Roma 1:14, 15; 2 Timoteo 4:2.) Nakatulong dayta kenkuana a mangibtur iti ibubusor. (1 Tes. 2:2) Kasano met a maipakitatayo ti panangipategtayo iti ministerio?

9. Ania ti dadduma a pamay-an a maipakitatayo nga ipatpategtayo ti ministeriotayo?

9 Ti panangbirokna iti gundaway a makisarita iti dadduma ti maysa a pamay-an nga impakita ni Pablo nga ipatpategna ti ministerio. Kas kadagiti apostol ken kadagiti Kristiano idi, mangaskasabatayo met iti di pormal, iti publiko, ken iti tunggal balay. (Ara. 5:42; 20:20) No ipalubos ti kasasaadtayo, mangkitatayo iti pamay-an a mangpalawa iti ministeriotayo, kas koma iti panag-auxiliary pioneer wenno panag-regular pioneer. Mabalin met nga agadaltayo iti sabali a lengguahe, umakartayo iti sabali a lugar, wenno uray iti sabali a pagilian.—Ara. 16:9, 10.

10. Kasano a nabendisionan ti panangikagumaan ni Irene a mangikasaba iti naimbag a damag?

10 Kitaentayo ti kapadasan ni Irene, maysa a single a kabsat idiay United States. Talaga a kayatna a kasabaan dagiti immakar sadiay nga agsasao iti Russian. Idi inrugina dayta idi 1993, adda laeng agarup 20 nga agibumbunannag iti grupo nga agsasao iti Russian idiay New York City. Iti dandani 20 a tawen, nakapaspasnek a nangasaba kadagiti agsasao iti Russian. “Saanak latta a nalaing nga agsao iti Russian,” kuna ni Irene. Ngem binendisionan ni Jehova ti kinaregtana ken ti dadduma a kas kenkuana. Adda itan innem a Russian a kongregasion idiay. Adda 15 a nabautisaran kadagiti inyadalan ni Irene. Dadduma ti nagbalin a Bethelite, payunir, ken panglakayen. Kuna ni Irene, “No panunotek dagiti sabali a mabalinko koma nga aramiden idi, awanen ti ammok a mangparagsak pay kaniak.” Talaga nga ipatpategna ti ministeriona!

Ibilbilangmo kadi ti ministeriom kas gameng, ken paneknekan kadi dayta ti linawas nga eskediulmo? (Kitaen ti parapo 11, 12)

11. Ania dagiti nasayaat a resultana no itultuloytayo ti mangasaba uray busorendatayo?

11 No ipatpategtayo ti ministeriotayo, itultuloytayo ti mangasaba uray busorendatayo, kas iti inaramid ni apostol Pablo. (Ara. 14:19-22) Bayat ti 1930’s ken iti rugrugi ti 1940’s, nakaro ti ibubusor a napadasan dagiti kakabsattayo idiay United States. Ngem kas ken Pablo, intultuloyda latta ti nangasaba. Adu a kaso ti inlaban dagiti  kakabsat tapno masalakniban ti kalintegantayo a mangaramid iti dayta. Idi 1943, kinuna ni Brother Nathan H. Knorr maipapan iti maysa a panangabak iti U.S. Supreme Court: “Dagiti panangabaktayo ket gapu iti panagtultuloyyo. No simmardeng a nangasaba ti agibumbunannag, awan koma ti kaso a nayuli iti Supreme Court; ngem gapu ta dakayo, ti agibumbunannag, ken dagiti kakabsat iti intero a lubong ket nagtultuloy ken saan a simmuko, nagsardeng ti panangidadanes. Nagteng dayta a desision gapu iti panagballigi dagiti adipen ti Apo nga agtalinaed a natibker.” Nagballigi met dagiti kakabsat iti dadduma a pagilian gapu iti kasta met laeng a kinatibker. Wen, ti panagayattayo iti ministerio maabakna ti panangidadanes.

12. Ania ti ikagumaam nga aramiden no maipapan iti ministeriom?

12 No ibilangtayo ti ministerio kas napateg a gameng a naggapu ken Jehova, saantayo a mapnek a “makaorastayo” laeng, no di ket aramidentayo ti amin tapno ‘naan-anay a masaksiantayo ti naimbag a damag.’ (Ara. 20:24; 2 Tim. 4:5) Ngem ania ti isurotayo? Kitaentayo pay ti maysa a gameng manipud iti Dios.

DAGITI NAURNONGTAYO A KINAPUDNO

13, 14. Ania ti ‘pagipempenan iti gameng’ a dinakamat ni Jesus iti Mateo 13:52, ken kasano a makargaantayo dayta?

13 Ti maikatlo a naespirituan a gameng ket dagiti naammuantayo a kinapudno. Ni Jehova ti Dios ti kinapudno. (2 Sam. 7:28; Sal. 31:5) Kas naparabur nga Ama, ipapaayna dagiti naespirituan a kinapudno kadagiti agbuteng kenkuana. Manipud idi naammuantayo ti kinapudno, mabalintayon ti agurnong kadagiti kinapudno iti Saona, ti Biblia, kadagiti publikasion, kombension, asamblea, ken gimongtayo. Iti panaglabas ti tiempo, naaddaantayon iti kinuna ni Jesus a ‘pagipempenan iti gameng’ a pagidulinan kadagiti daan ken baro a kinapudno. (Basaen ti Mateo 13:52.) Tulongannatayo ni Jehova a mangurnong kadagiti nagpateg a baro a kinapudno iti ‘pagipempenantayo iti gameng’ no birokentayo dagita a kas iti nalemmeng a gameng. (Basaen ti Proverbio 2:4-7.) Kasano nga aramidentayo dayta?

14 Masapul a maaddaantayo iti nasayaat ken regular a personal a panagadal ken agsukimattayo a naimbag iti Sao ti Dios ken kadagiti publikasiontayo. Makatulong dayta tapno maammuantayo dagiti kinapudno a mabalin a “baro” kadatayo ta saantay pay a naammuan idi dagita. (Jos. 1:8, 9; Sal. 1:2, 3) Mabasa iti umuna a ruar ti Pagwanawanan a naipablaak idi Hulio 1879: “Ti kinapudno ket kas iti bassit a sabong iti kataltalonan a napalawlawan ken dandani leppesen dagiti dadakkel a ruot ti kinaulbod. No nasarakamon, masapul a bantayam. . . . No kayatmo a maadda kenka, masapul nga agdumogka a mangala. Saanka koma a makontento iti maymaysa a sabong ti kinapudno. . . . Itultuloymo ti agala iti ad-adu pay.” Wen, magagarantayo koma a mangpunno iti pagidulinantayo kadagiti naespirituan a kinapudno.

15. Apay a mabalin nga ibilangtayo a “daan” ti dadduma a kinapudno, ken ania ti ipatpategmo unay kadagita?

15 Nabirokantayo ti dadduma pay a napateg a kinapudno idi nakikaduatayon kadagiti adipen ti Dios. Mabalin a maibilang a “daan” dagita gapu ta naammuantayo dagita idi nagbalintayo a Kristiano. Ania ti karaman kadagita? Naammuantayo a ni Jehova ti Namarsua ken Nangted iti Biag kadatayo ken adda panggepna para kadagiti tattao. Naadaltayo met a gapu iti ayatna, inted ti Dios ti subbot nga indaton ti Anakna tapno mawayawayaantayo iti basol ken ipapatay. Naammuantayo pay a ti Pagarianna  ti mangikkat iti amin a rigat, ken mabalintayto ti maaddaan iti natalna ken naragsak nga agnanayon a biag iti panangituray ti Pagarian.—Juan 3:16; Apoc. 4:11; 21:3, 4.

16. Ania ti masapul nga aramidentayo no adda nabalbaliwan a pannakaawattayo iti kinapudno?

16 No dadduma, mabalbaliwan ti pannakaawattayo iti maysa a padto ti Biblia wenno iti dadduma a paset ti Kasuratan. No adda dagiti baro a pannakaawat, iwayaantayo koma nga adalen a naimbag ken utoben dagita. (Ara. 17:11; 1 Tim. 4:15) Ikagumaantayo a tarusan a naimbag saan laeng a dagiti dakkel a panagbalbaliw no di ket uray dagiti babassit a nagdumaan ti baro ken dati a pannakaawattayo. Iti kasta, masiguradotayo a natalged ti baro a kinapudno iti pagidulinantayo. Apay a napateg nga aramidentayo dayta?

17, 18. Kasano a matulongannatayo ti nasantuan nga espiritu?

17 Insuro ni Jesus nga ipalagip ti espiritu ti Dios dagiti nasursurotayo. (Juan 14:25, 26) Kasano a makatulong daytoy iti ministeriotayo? Kitaentayo ti kapadasan ti kabsat a ni Peter. Idi 1970, nabiit pay nga agserserbi iti Bethel idiay Britain ken agtawen idi iti 19. Bayat ti panagbalaybalayna, nakasabaanna ti maysa a lumakayen ken barbasan a lalaki. Dinamag ni Peter no kayatna a maammuan ti isursuro ti Biblia. Medio nasdaaw ti lalaki. Imbagana a ti balay nga ayanna ket paggigianan dagiti Judio a rabbi. Sinubok ti rabbi ni Peter ket insaludsodna: “Ala man, barok, sungbatam man. Ania a lengguahe ti nakaisuratan ti libro a Daniel?” Kuna ni Peter, “Dadduma a pasetna ket naisurat iti Aramaiko.” Malagip pay ni Peter: “Nasdaaw ti rabbi ta ammok ti sungbatna, ngem mas nasdaawak! Apay nga ammok ti sungbat? Idi nagawidak ken kinitak dagiti magasin a Pagwanawanan ken Agriingkayo! kadagiti napalabas a bulan, adda nakitak nga artikulo a nangilawlawag a naisurat ti libro a Daniel iti Aramaiko.” (Dan. 2:4) Wen, ipalagip ti nasantuan nga espiritu dagiti nabasa ken naipempen iti pagidulinantayo.—Luc. 12:11, 12; 21:13-15.

18 No ipategtayo ti sirib a naggapu ken Jehova, matignaytayo a mangikabil kadagiti daan ken baro a kinapudno iti pagidulinantayo. Bayat nga umun-uneg ti panangipateg ken panangapresiartayo iti sirib ni Jehova, ad-adda a lumaingtayo a mangisuro.

SALAKNIBAM DAGITI GAMENGMO

19. Apay a masapul a salaknibantayo dagiti naespirituan a kinabaknangtayo?

19 Kanayon a mangbirbirok ni Satanas ken ti lubongna iti pamay-an tapno saantayon nga ipateg dagiti naespirituan a gameng a naadaltayo iti daytoy nga artikulo. Apektadotayo amin iti daytoy. Mabalin a nalakatayo laeng a maallukoy iti nasayaat a trabaho, nakanamnam-ay a biag, wenno kinabaknang. Palpalagipannatayo ni apostol Juan nga aglabas daytoy a lubong ken ti tarigagayna. (1 Juan 2:15-17) Gapuna, masapul a pagreggetantayo a salakniban dagiti banag nga ipatpategtayo ken pagtalinaedentayo ti panangipategtayo kadagiti naespirituan a kinabaknang.

20. Ania ti ikagumaam nga aramiden tapno masalaknibam dagiti naespirituan a kinabaknangmo?

20 Sisasaganaka koma a mangisakripisio iti aniaman a mangagaw iti pudpudno a panangipategmo iti Pagarian ti Dios. Itultuloymo ti naregta a panangasabam, ken kanayon nga ipategmo ti makaisalakan a ministeriotayo. Itultuloymo ti napasnek a panagbirokmo kadagiti naespirituan a kinapudno. Bayat nga ar-aramidem daytoy, makaurnongka iti ‘gameng iti langlangit, a sadiay ti mannanakaw di makaasideg ket ti sanga saan met a mangibus. Ta no sadino ti ayan ti gamengmo, sadiayto met ti ayan ti pusom.’—Luc. 12:33, 34.