Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2016

Iti moderno a kaitungpalanna, ti lalaki nga addaan iti tintero ti sekretario irepresentarna ni Jesu-Kristo, daydiay mangmarka kadagiti maisalakan

Salsaludsod Dagiti Agbasbasa

Salsaludsod Dagiti Agbasbasa

Asino ti isimsimbolo ti lalaki nga addaan iti tintero ti sekretario ken ti innem a lallaki nga addaan iti igam a pangburak a nadeskribir iti sirmata ni Ezequiel?

Iladawanda dagiti anghel a nakiraman a nangdadael iti Jerusalem ken karamandanto met a mangdadael iti dakes a sistema ni Satanas inton Armagedon. Apay a nainkalintegan daytoy a panagbalbaliw iti pannakaawat?

Idi nakita ni Ezequiel ti dakes a bambanag a maar-aramid iti apostata a Jerusalem sakbay ti pannakadadaelna idi 607 B.C.E., nasirmatana dagiti pasamak nga agtungpal iti dayta a pannakadadael. Nakitana ti innem a lallaki nga addaan iti igam a pangburak. Nakitana met ti lalaki a kaduada a “sikakawes iti lienso” ken addaan iti “tintero ti sekretario.” (Ezeq. 8:6-12; 9:2, 3) Naibaga iti daytoy a lalaki: “Lumasatka iti tengnga ti siudad, . . . ket masapul a mangikabilka iti marka kadagiti muging dagiti tattao nga agsensennaay ken umas-asug gapu iti amin a nakarimrimon a bambanag a maar-aramid iti tengngana.” Kalpasanna, naibilin kadagiti lallaki nga addaan iti igam a pangburak a papatayenda ti amin nga awanan iti marka nga adda iti siudad. (Ezeq. 9:4-7) Ania ti isuro kadatayo daytoy a sirmata, ken asino ti lalaki nga addaan iti tintero ti sekretario?

Naited daytoy a sirmata idi 612 B.C.E. Ti umuna a kaitungpalanna ket idi dinadael ti armada ti Babilonia ti Jerusalem—a mapasamak lima a tawen laeng kalpasanna. Nupay naipalubos a dagiti pagano a taga-Babilonia ti mangyeg iti dayta a panangdadael, inusar ida ni Jehova kas manangtalipupos. (Jer. 25:9, 15-18) Inusar ida ni Jehova a mangdusa iti apostata nga ilina. Ngem saan nga amin ket nadadael. Saan a nadadael dagiti nalinteg a kadua dagiti nadangkes. Siaayat a nangaramid ni Jehova iti pamay-an tapno maispal dagiti Judio a saan nga umanamong kadagiti dakes a mapaspasamak iti siudad.

Saan a nakiraman ni Ezequiel iti panangmarka ken panangdadael. Imbes ketdi, dagiti anghel ti mangitungpal iti panangukom. Gapuna, babaen iti daytoy a padto, arigna makitkitatayo dagiti pasamak idiay langit. Binilin ni Jehova dagiti anghelna nga organisarenda ti panangdadael kadagiti nadangkes ken ilasinda dagiti nalinteg tapno maispalda. *

Iti napalabas, nailawlawag a ti kaitungpalan daytoy a sirmata iti kaaldawantayo, ti lalaki nga addaan iti tintero ti sekretario isimbolona dagiti napulotan nga adda pay laeng ditoy daga. Naipagarup a namarkaan a maisalakan dagiti umawat iti mensahe a maikaskasaba. Ngem iti nabiit pay a tawtawen, nalawag a masapul a mabaliwan daytoy a pannakaawat. Sigun iti Mateo 25:31-33, ni Jesus ti mangukom kadagiti tattao. Maaramid ti maudi a panangukomna inton dakkel a rigat. Ilasinnanto dagiti maisalakan nga arig karnero a tattao manipud kadagiti arig kalding a tattao a madadael.

Gapuna, maitunos iti daytoy nabaliwan a pannakaawat, ania ti maadaltayo iti sirmata ni Ezequiel? Adda lima a masursurotayo.

  1. Sakbay ti pannakadadael ti Jerusalem, nagserbi da Ezequiel ken Jeremias kas managbantay iti mapasamak, a kas iti inaramid idi ni Isaias. Ita, us-usaren ni Jehova ti bassit a grupo dagiti napulotan a mangpakan kadagiti adipenna ken mangpakdaar iti sabsabali sakbay a mangrugi ti dakkel a rigat. Makipaspaset ti amin a katulongan ni Kristo iti panangiwaragawag iti pakdaar.—Mat. 24:45-47.

  2. Saan idi a karaman ni Ezequiel iti panangmarka kadagiti maisalakan. Kasta met, saan a karaman dagiti adipen ti Dios ita iti panagmarka. Ipakpakaammoda laeng ti mensahe ni Jehova,  a paset ti trabahoda a panangasaba, nga iwanwanwan dagiti anghel.—Apoc. 14:6.

  3. Idi kaaldawan ni Ezequiel, awan ti literal a namarkaan iti mugingna. Kasta met laeng ita. Ania ti masapul nga aramiden dagiti tattao tapno simboliko a mamarkaanda para iti pannakaisalakan? Masapul nga awatenda ti mensahe a maikaskasaba, ipakitada ti personalidad ti maysa a Kristiano, agdedikarda ken Jehova, ken simamatalek a suportaranda dagiti kakabsat ni Kristo. (Mat. 25:35-40) Dagiti mangaramid kadagitoy mamarkaanda tapno maisalakanda inton dakkel a rigat.

  4. Iti moderno a kaitungpalanna, ti lalaki nga addaan iti tintero ti sekretario irepresentarna ni Jesu-Kristo, daydiay mangmarka kadagiti maisalakan. Mamarkaanto ti dakkel a bunggoy inton maukomda kas karnero bayat ti dakkel a rigat. Gapuna, maaddaandanto iti gundaway nga agbiag nga agnanayon ditoy daga.—Mat. 25:34, 46. *

  5. Iti moderno a kaitungpalanna, ti innem a lallaki nga addaan iti igam a pangburak irepresentarda ti nailangitan a buyot ni Jesus, ket ni Jesus ti mangidaulo kadakuada. Asidegen a dadaelenda dagiti nasion ken amin a nadangkes.—Ezeq. 9:2, 6, 7; Apoc. 19:11-21.

Gapu kadagitoy a nagsasayaat a leksion, makapagtalektayo a saan nga iraman ni Jehova a dadaelen dagiti nalinteg inton dadaelenna dagiti nadangkes. (2 Ped. 2:9; 3:9) Maipalagip met kadatayo ti kinapateg ti trabahotayo a panangasaba ita. Masapul a mangngeg ti amin ti pakdaar sakbay nga umay ti panungpalan!—Mat. 24:14.

^ par. 6 Nupay awan ti makita a marka iti mugingda, naispal dagiti tattao a kas kada Baruc (sekretario ni Jeremias), Ebed-melec nga Etiope, ken dagiti Recabita. (Jer. 35:1-19; 39:15-18; 45:1-5) Naawatda ti simboliko a marka tapno maispalda.

^ par. 12 Saan a masapul a mamarkaan dagiti matalek a napulotan tapno maisalakanda. Imbes ketdi, awatenda ti maudi a pannakaselioda sakbay la unay ti ipapatayda wenno sakbay a mangrugi ti dakkel a rigat.—Apoc. 7:1, 3.