Mapan iti linaonna

Mapan iti listaan dagiti linaonna

 MAADAL NGA ARTIKULO 30

Danonen ti Puso Dagiti Saan a Relihioso a Tattao

Danonen ti Puso Dagiti Saan a Relihioso a Tattao

“Inaramidko ti amin tapno matulongak ti amin a kita ti tattao, tapno iti amin a pamay-an, adda dagiti maisalakanko.”​—1 COR. 9:22.

KANTA 82 “Agraniag Koma ti Lawagyo”

ITI DAYTOY A PANAGADAL *

1. Ania a panagbalbaliw ti napasamak iti dadduma a lugar iti napalabas a tawtawen?

ITI rinibu a tawen, kaaduan a tattao iti lubong ket adda relihionna. Ngem iti napalabas a tawtawen, adda dakkel a panagbalbaliw. Umad-adun dagiti mangibilang iti bagida a saan a relihioso. Kinapudnona, kaaduan a tattao iti dadduma a pagilian ti mangibagbaga nga awan relihionda. *​—Mat. 24:12.

2. Ania ti dadduma a rason a saan a relihioso ti adu a tattao?

2 Apay nga umad-adu dagiti mangibilang iti bagida a saan a relihioso? * Mabalin a nakapokus ti dadduma iti ragragsak wenno iti problemada. (Luc. 8:14) Adda met dagiti nagbalin nga ateista. Dadduma met ti mamati iti Dios ngem ipapanda a ti relihion ket kadaanan, saan a praktikal, ken maikontra iti siensia ken lohika. Mabalin nga ibagbaga dagiti gagayyemda, mannursuroda, wenno dagiti popular a tattao iti media a timmaud ti biag babaen ti ebolusion, ket manmano a makangngegda kadagiti lohikal a rason tapno mamatida nga adda Dios. Adda met dagiti dismayado kadagiti lider ti relihion a naagum iti kuarta ken pannakabalin. Iti dadduma a lugar, limlimitaran ti gobierno dagiti narelihiosuan nga aktibidad.

3. Ania ti maitulong kadatayo daytoy nga artikulo?

3 Imbilin ni Jesus a ‘pagbalinentayo nga adalanna dagiti tattao iti amin a nasion.’ (Mat. 28:19) Kasanotayo a matulongan dagiti saan a relihioso a tattao a mangayat iti Dios ken agbalin nga adalan ni Kristo? Masapul a bigbigentayo a ti reaksion ti  maysa a tao iti mensahetayo ket mabalin a nakadepende iti lugar a dimmakkelanna. Kas pagarigan, mabalin nga agduma ti reaksion dagiti taga-Europa ken dagiti taga-Asia iti mensahetayo. Apay? Iti Europa, adu a tattao ti adda ammona iti Biblia ken pamiliarda iti ideya a pinarsua ti Dios ti amin a banag. Ngem iti Asia, kaaduan a tattao ti bassit wenno awan pay ketdi ti ammoda iti Biblia, ken mabalin a saanda a mamati iti Namarsua. Matulongannatayo daytoy nga artikulo a mangdanon iti puso ti amin a tattao a masarakantayo iti ministerio, sadinoman ti dimmakkelanda wenno aniaman ti patpatienda.

AGTALINAED A POSITIBO

4. Apay nga agtalinaedtayo latta koma a positibo?

4 Agbalin a Positibo. Kada tawen, adda dagiti saan a relihioso a tattao nga agbalbalin a Saksi ni Jehova. Adu kadakuada ti nangaton ti moral a pagalagadanda ken dismayado iti kinamanaginsisingpet dagiti relihion. Nababa ti moral a pagalagadan ti dadduma ken adu kadakuada ti dakes ti kababalin ken ugalida a masapul nga ikkatenda. Iti tulong ni Jehova, masiguradotayo a masarakantayo dagiti “addaan iti umiso a kababalin nga umawat iti agnanayon a biag.”​—Ara. 13:48; 1 Tim. 2:3, 4.

Ibagaymo ti pamay-am a mangasaba kadagiti saan a mamati iti Biblia (Kitaen ti parapo 5-6) *

5. Ania ti masansan a pakatignayan dagiti tattao a mangawat iti mensahetayo?

5 Agbalin a Nasingpet ken Nataktika. Masansan nga awaten dagiti tattao ti mensahetayo, saan a gapu iti no ania ti ibagatayo, no di ket gapu iti pamay-an a panangibagatayo iti dayta. Magustuanda no nasingpettayo, nataktikatayo, ken pudpudno nga interesadotayo kadakuada. Ditay piliten ida a dumngeg iti ibagatayo. Imbes ketdi, ikagumaantayo a tarusan no apay a saanda a relihioso. Kas pagarigan, adda dagiti dida kayat ti makisarita maipapan iti relihion kadagiti saanda nga am-ammo. Adda met dagiti mangibilang a kinaawan respeto ti panagsaludsod no ania ti makuna ti maysa a tao maipapan iti Dios. Mabain met ti dadduma a makita ida ti sabsabali nga agbasbasada iti Biblia, nangnangruna no Saksi ni Jehova ti mangipabpabasa iti dayta. Aniaman kadagita ti rason, ikagumaantayo koma a tarusan ti rikriknada.​—2 Tim. 2:24, ftn.

6. Kasano nga impakita ni apostol Pablo a mannakibagay, ken kasano a matuladtayo?

6 Ania ti aramidentayo no kasla saan a magustuan ti maysa nga indibidual nga usarentayo ti sasao a “Biblia,” “panamarsua,” “Dios,” wenno “relihion”? Tuladentayo ni apostol Pablo ket ibagaytayo ti pamay-antayo a makisarita. Idi nakisarita kadagiti Judio, inusarna ti Kasuratan. Ngem idi nakisarita kadagiti Griego a pilosopo idiay Areopago, saanna a dinakamat a naggapu iti Biblia ti ibagbagana. (Ara. 17:2, 3, 22-31) Kasanotayo a matulad ni Pablo? No adda masarakam a saan a mamati iti Biblia, baka nasaysayaat no saanmo a dakamaten a naggapu iti Biblia ti ibagbagam kenkuana. No mariknam a saan a komportable no makita ti dadduma nga ipabpabasam kenkuana ti Biblia, mabalin nga ipabasam dayta iti gadyetmo tapno saan a madlaw ti sabsabali.

7. Tapno matuladtayo ni Pablo, ania ti aramidentayo kas nadakamat iti 1 Corinto 9:20-23?

7 Agbalin a Mannakaawat ken Dumngeg. Ikagumaantayo koma a tarusan no ania dagiti nangimpluensia iti panagpampanunot dagiti tattao a makasarsaritatayo. (Prov. 20:5) Usigentayo manen ti ulidan ni Pablo. Dimmakkel a kadua dagiti Judio. Sigurado a nakibagay idi nangasaba kadagiti Gentil a bassit wenno awan pay ketdi ti ammoda maipapan ken Jehova ken iti Kasuratan. Baka kasapulantayo ti agsukimat wenno agdamag kadagiti eksperiensiado a kakabsat tapno maawatantayo ti rikrikna ken panagpampanunot dagiti tattao iti teritoriatayo.​—Basaen ti 1 Corinto 9:20-23.

8. Kasanom a mairugi ti saritaan maipapan iti Biblia?

 8 Ti panggeptayo ket biroken dagidiay “maikari.” (Mat. 10:11) Tapno maaramidtayo dayta, damagentayo ti opinion dagiti tattao ken dumngegtayo a naimbag. Salsaludsoden ti maysa a brother a taga-England ti opinion dagiti tattao no kasano ti maaddaan iti naragsak a panagasawa, no kasano ti mangpadakkel kadagiti annak, wenno no kasano a maibturan ti di kinahustisia. Kalpasan a mangngegna ti komentoda, ibagana, “Ania ti panagkunayo iti daytoy a balakad a naisurat agarup 2,000 a tawenen ti napalabas?” Kalpasanna, ipakitana iti selponna dagiti teksto a napilina ngem dina ibagbaga ti sao a “Biblia.”

DANONEN TI PUSO DAGITI TATTAO

9. Kasanotayo a matulongan dagiti tattao a gagangay a saan a mayat a makisarita maipapan iti Biblia?

9 Madanontayo ti puso dagiti tattao a gagangay a saan a mayat a makisarita maipapan iti Dios no dagiti paginteresanda ti ilawlawagtayo. Kas pagarigan, adu ti masmasdaaw kadagiti parsua a makita iti aglawlaw. Isu a mabalintayo nga ibaga: “Madmadlawyo siguro a dagiti inimbento dagiti sientista ket masansan a kinopiada kadagiti banag a makitkitada iti aglawlaw. Kas pagarigan, dagiti nangdisenio iti mikropono inadalda ti lapayag, ket dagiti nangdisenio iti kamera inadalda ti mata. Ania ti mapanunotyo no mapagsasaritaan ti bambanag iti aglawlawtayo? Timmaud kadi dagita a bukbukodda, adda ngata nangaramid, wenno adda pay sabali a rason?” Dumngegtayo a naimbag iti sungbatna, sa inayontayo: “Idi nakasursuro dagiti inheniero manipud iti disenio ti lapayag ken mata, asino a talaga ti nagsursuruanda? Makapainteres kaniak ti kuna ti maysa a mannaniw idi un-unana: ‘Saan aya a makangngeg Daydiay nangaramid iti lapayag? Saan aya a makakita Daydiay nangaramid iti mata? . . . Isu Daydiay mangmangted iti pannakaammo kadagiti tattao!’ Adda dagiti sientista nga umanamong iti dayta ket patienda nga adda Namarsua.” (Sal. 94:9, 10) Kalpasanna, mabalintayo ti agipabuya iti video manipud iti jw.org® iti “Interbiu ken Kapadasan” iti serye a “Kapanunotan Maipapan iti Nangrugian ti Biag.” (Kitaen ti PUBLIKASION > VIDEO.) Wenno mabalintayo nga ited ti broshur a Naparsua Kadi ti Biag? wenno ti broshur a The Origin of Life​—Five Questions Worth Asking.

10. Kasanotayo a mairugi ti saritaan iti maysa a tao a saan a mayat a makisarita maipapan iti Dios?

10 Kayat ti kaaduan a tattao ti maaddaan iti nasayaat a masanguanan. Ngem adu ti madanagan a madadaelto ti daga wenno saanen a mapagnaedan. Kuna ti maysa nga agdaldaliasat  a manangaywan idiay Norway a dagiti tattao a saan a mayat a makisarita maipapan iti Dios ket masansan a kayatda ti makisarita maipapan iti mapaspasamak iti lubong. Kalpasan a kablaawanna ti kasaritana, ibagana: “Panagkunayo, adda ngata nasayaat a masakbayantayo? Nakadepende kadi ti namnamatayo kadagiti politiko, sientista, wenno dadduma pay?” Dumngeg a naimbag iti sungbatna sa ibasana wenno kotarenna ti teksto a mangikarkari iti nasayaat a masanguanan. Adda dagiti naginteres iti kari ti Biblia nga agtalinaed iti agnanayon ti daga ken agbiag iti dayta dagiti nasayaat a tattao iti agnanayon.​—Sal. 37:29; Ecl. 1:4.

11. Apay nga agusartayo iti nagduduma a pamay-an ti pannakisarita, ken kasano a matuladtayo ti ulidan ni Pablo a nadakamat iti Roma 1:14-16?

11 Nasayaat no agduduma ti pamay-an ti pannakisaritayo kadagiti tattao. Apay? Gapu ta agduduma ti tunggal indibidual. Ti paginteresan ti maysa ket mabalin a saan a paginteresan ti sabali. Adda dagiti mayat a makisarita maipapan iti Dios wenno iti Biblia, ngem adda met dagiti mayat a sabali pay laeng a banag ti mapagsaritaan. Aniaman ti situasion, gundawayantayo koma ti tunggal oportunidad a makisarita iti amin a kita ti tattao. (Basaen ti Roma 1:14-16.) Siempre, laglagipentayo a ni Jehova ti mangpadakkel iti kinapudno iti puso dagiti mangay-ayat iti kinalinteg.​—1 Cor. 3:6, 7.

PANANGIPAKAAMMO ITI KINAPUDNO KADAGITI TAGA-ASIA

Adu nga agibumbunannag iti Pagarian ti mangipakpakita iti personal nga interes kadagiti naggapu iti saan a Kristiano a pagilian ket ibagbagada ti praktikal a sirib a masarakan iti Biblia (Kitaen ti parapo 12-13)

12. Ania ti aramidentayo tapno matulongantayo dagiti taga-Asia a saan pay a nangpampanunot no talaga nga adda Namarsua?

12 Adu nga agibumbunannag iti intero a lubong ti makabirok kadagiti tattao a taga-Asia, a pakairamanan dagiti naggapu iti lugar a limlimitaran ti gobierno dagiti narelihiosuan nga aktibidad. Iti dadduma a pagilian ti Asia, adu ti saan pay a nangpampanunot no talaga nga adda Namarsua. Adda dagiti aginteres ket akseptarenda a dagus ti panagadal iti Biblia, ngem adda met dagiti saan nga interesado nga agsursuro iti baro nga ideya. Kasanotayo a matulongan ida? Nakita ti dadduma nga eksperiensiado nga agibumbunannag a naballigida no saan unay a pormal ti panangirugida iti saritaan, ipakitada ti personal nga interes, ken no maitutop, iyestoriada no kasano a simmayaat ti biagda idi inyaplikarda ti maysa a prinsipio ti Biblia.

13. Ania ti makatulong kadagiti tattao nga aginteres iti Biblia? (Kitaen ti ladawan iti akkub.)

13 Adu a tattao ti aginteres iti praktikal a sirib a masarakan iti Biblia. (Ecl. 7:12) Idiay New York, imbaga ti maysa a sister a bumisbisita kadagiti Mandarin ti lengguaheda: “Ikagkagumaak ti mangipakita iti interes kadagiti tattao ken dumngeg kadakuada. No maammuak a kaak-akarda manipud iti sabali a pagilian, isaludsodko: ‘Komusta ti panag-adjust-yo? Adda kadin nabirokanyo a trabaho? Nasayaat met la kadi ti panangtrato kadakayo dagiti tattao ditoy?’” No dadduma, makatulong daytoy tapno maibagana ti isursuro ti Biblia. No maitutop, inayon ti sister: “Panagkunayo, ania ngata ti tulbek tapno nasayaat ti relasiontayo iti sabsabali? Mabalin kadi nga ibasak kadakayo ti maysa a pagsasao iti Biblia? Kunana: ‘Ti panangirugi iti riri ket kas iti panangilukat iti ruangan ti danum; sakbay a bumara dayta, pumanawkan.’ Panagkunayo, makatulong kadi daytoy a balakad tapno nasayaat ti relasiontayo iti sabsabali?” (Prov. 17:14) Makatulong ti kastoy a saritaan tapno mailasintayo no asino dagiti mayat a mabisita manen.

14. Kasano ti panangtulong ti maysa a brother iti Far East kadagiti tattao a mangibaga a saanda a mamati iti Dios?

14 Ania met ti ibagatayo kadagiti mangibaga a saanda a mamati iti Dios? Kastoy ti kuna ti maysa a brother a nabayagen a mangaskasaba kadagiti saan a relihioso iti Far East: “Ditoy, no  ibaga ti maysa a, ‘Saanak a mamati iti Dios,’ kaaduanna a ti kayatna a sawen ket saan a mamati kadagiti dios a daydayawen dagiti kalugaranna. Isu a masansan nga umanamongak a kaaduan a dios ket inaramid ti tao ken saan nga agpayso. Kalpasanna, ibasak ti Jeremias 16:20: ‘Makaaramid aya ti tao kadagiti diosna idinto ta saan met a talaga a dios dagita?’ Sa isaludsodko: ‘Kasanotayo ngata a mailasin ti pudno a dios kadagiti dios nga inaramid laeng ti tao?’ Dumngegak a naimbag, sa ibasak ti Isaias 41:23: ‘Ibagayo kadakami ti mapasamak iti masanguanan, tapno maammuanmi a dioskayo.’ Kalpasanna, ipakitak ti maysa a pagarigan no kasano nga impakpakauna ni Jehova ti mapasamak iti masanguanan.”

15. Ania ti masursurotayo iti pamay-an ti maysa a brother a taga-East Asia?

15 Us-usaren met ti maysa a brother iti East Asia ti kastoy a pamay-an ti panagsarungkar. Imbagana: “Ipakpakitak dagiti maitulong ti Biblia, dagiti natungpal a padtona, ken dagiti linteg a mangkonkontrol iti uniberso. Sa ipakitak no kasano a paneknekan amin dagitoy nga adda sibibiag ken masirib a Namarsua. No akseptaren ti kasarsaritak a posible nga adda Dios, ipakitak no ania ti ibaga ti Biblia maipapan ken Jehova.”

16. Sigun iti Hebreo 11:6, apay a masapul a maaddaan dagiti iyad-adalantayo iti pammati iti Dios ken iti Biblia, ken kasano a matulongantayo ida?

16 No iyad-adalantayo iti Biblia dagiti saan a relihioso, masapul nga itultuloytayo a pabilgen ti pammatida nga adda Dios. (Basaen ti Hebreo 11:6.) Ken masapul a tulongantayo ida a mamati iti Biblia. Mabalin nga agkasapulan dayta iti maulit-ulit a panangisurotayo iti dadduma a punto. Nalabit kasapulan nga ilawlawagtayo iti tunggal panagadal dagiti ebidensia a ti Biblia ket Sao ti Dios. Mabalin a karaman ti ababa a panangilawlawagtayo kadagiti natungpal a padto ti Biblia, ti kinaumisona no maipapan iti siensia ken historia, wenno no kasano a makatulong dayta iti inaldaw a panagbiag.

17. Ania ti mabalin nga epekto ti ayat nga ipakpakitatayo kadagiti tattao?

17 Tultulongantayo dagiti tattao nga agbalin nga adalan ni Kristo no ipakitaantayo ida iti ayat, relihiosoda man wenno saan. (1 Cor. 13:1) Ti panggeptayo a mangisuro kadakuada ket tapno maipakitatayo nga ay-ayatennatayo ti Dios ken kayatna nga ayatentayo met isuna. Kada tawen, rinibu a dati a bassit wenno awan ti interesna iti relihion ti mababautisaran gapu ta nasursuroda nga ayaten ti Dios. Isu nga agbalinka a positibo, ken ipakitam ti ayat ken personal nga interes iti amin a kita ti tattao. Dumngegka kadakuada. Ikagumaam a tarusan ida. Babaen ti ulidanmo, isurom ida nga agbalin nga adalan ni Kristo.

KANTA 76 Ania ti Mariknam?

^ par. 5 Ad-adu itan ti makasaritatayo a saan a relihioso a tattao. Ilawlawag daytoy nga artikulo no kasanotayo a maisuro kadakuada ti kinapudno a linaon ti Biblia ken no kasanotayo a matulongan ida nga agtalek iti Biblia ken mamati ken Jehova a Dios.

^ par. 1 Sigun kadagiti surbey, dadduma kadagita a pagilian ket: Albania, Australia, Austria, Azerbaijan, Canada, China, Czech Republic, Denmark, France, Germany, Hong Kong, Ireland, Israel, Japan, Netherlands, Norway, South Korea, Spain, Sweden, Switzerland, United Kingdom, ken Vietnam.

^ par. 2 KAIPAPANAN TI TERMINO: Iti daytoy nga artikulo, ti termino a saan a relihioso ket tumukoy kadagiti tattao a saan a miembro ti maysa a relihion wenno saan a mamati iti Dios.

^ par. 54 LADAWAN: Maysa a brother a mangaskasaba iti lalaki a katrabahuanna iti ospital. Idi kuan, kinita ti lalaki ti website-tayo a jw.org.