Mapan iti linaonna

Mapan iti listaan dagiti linaonna

Salsaludsod Dagiti Agbasbasa

Salsaludsod Dagiti Agbasbasa

Maitutop kadi a maaddaan ti maysa a Kristiano iti paltog tapno protektaranna ti bagina iti panangdangran ti sabali a tao?

Nupay mabalin a mangaramid dagiti Kristiano iti pamay-an a mangsalaknib iti bagida, masapul a maitunos dayta kadagiti prinsipio ti Biblia. Dagita a prinsipio ti tumulong kadatayo a mangtarus a di umiso ti agusar iti armas, kas iti paltog, a pangprotektar iti bagi iti panangdangran ti sabali a tao. Usigentayo dagiti sumaganad:

Para ken Jehova, sagrado ti biagnangnangruna ti biag ti tao. Ammo ti salmista a ni David a ni Jehova ti “ubbog ti biag.” (Sal. 36:9) No ngarud pilien ti maysa a Kristiano ti agaramid kadagiti maipalubos a pamay-an tapno protektaranna ti bagina wenno dagiti sanikuana, aramidenna ti amin tapno saan a makapatay iti tao ken makabasol mainaig iti dara.—Deut. 22:8; Sal. 51:14.

Nupay mabalin a makabasol ti maysa mainaig iti dara babaen iti aniaman a banag, nalaklaka a maaramidna dayta babaen ti paltog—aksidente man wenno inggagarana. * Kanayonanna, no makita ti mangdangran—a mabalin a matartarantan—nga adda paltog ti tao a dangranna, dakkel ti posibilidadna a kumaro ti situasion ket mabalin nga adda matay kadakuada.

Iti maudi a rabii ni Jesus ditoy daga, imbagana kadagiti pasurotna nga agitugotda kadagiti kampilan, ngem saan a tapno pangprotektar. (Luc. 22:36, 38) Nagpaitugot ni Jesus iti espada ta kayatna nga isuro a saanda a  lumaban uray no maipasangoda kadagiti armado a tattao. (Luc. 22:52) Kalpasan nga inasut ni Pedro ti maysa kadagiti espada ken piningasanna ti adipen ti nangato a padi, imbilin ni Jesus kenkuana: “Ipulangmo ta kampilanmo iti lugarna.” Kalpasanna, imbaga ni Jesus ti maysa a nagpateg a prinsipio a mangiwanwan kadagiti pasurotna agingga ita: “Amin dagidiay mangaramat iti kampilan mataydanto iti kampilan.”—Mat. 26:51, 52.

Maitunos iti kuna ti Mikias 4:3, “pitpiten [dagiti adipen ti Dios] dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng.” Maitunos dayta a pakabigbigan dagiti Kristiano iti pammagbaga ni apostol Pablo: “Dikay subadan ti dakes iti dakes iti asinoman. . . . No mabalin, agingga a makapagpannuray kadakayo, makikappiakayo iti amin a tattao.” (Roma 12:17, 18) Nakapasar ni Pablo iti adu a peligro, kas iti “peggad kadagiti tulisan,” ngem sinurotna latta dagiti insuratna babaen ti panangipangpangrunana kadagiti prinsipio ti Kasuratan imbes a ti kinatalgedna. (2 Cor. 11:26) Nagtalek ni Pablo iti Dios ken iti sirib nga adda iti Saona—sirib a “nasaysayaat ngem iti ramramit a pakirupak.”—Ecl. 9:18.

Para kadagiti Kristiano, napatpateg ti biag ngem ti material. “Ti biag [ti maysa a tao] saan nga agtaud iti bambanag nga ik-ikutanna.” (Luc. 12:15) No ngarud saan a maala iti nasayaat a sao ti maysa a mannanakaw, tungpalen dagiti masirib a Kristiano ti imbaga ni Jesus: “Dikay busoren daydiay nadangkes.” Mabalin pay ketdi nga arigna itedtayon uray ti makin-uneg wenno ti makinruar a kawestayo. (Mat. 5:39, 40; Luc. 6:29) * Siempre, ti kasayaatan ket ti panangaramid iti pamay-an tapno maliklikan dayta. No liklikantayo nga ‘iparammag dagiti sanikuatayo’ ken am-ammodatayo a managayat iti talna kas Saksi ni Jehova, mabalin a saan a datayo ti dangran dagiti kriminal.—1 Juan 2:16; Prov. 18:10.

Raemen dagiti Kristiano ti konsiensia ti dadduma. (Roma 14:21) No maammuan dagiti kakabsat nga adda paltog ti maysa a kabsat, mabalin a makigtot wenno maitibkolda pay ketdi. Tignayennatayo ti ayat a mangyun-una iti pagimbagan ti dadduma uray no kasapulan nga isakripisiotayo ti karbengantayo.—1 Cor. 10:32, 33; 13:4, 5.

Ikagumaan dagiti Kristiano ti agbalin a nasayaat nga ulidan. (2 Cor. 4:2; 1 Ped. 5:2, 3) Saan a mapagulidanan ti maysa a Kristiano no adda latta paltogna a pangprotektarna iti bagina iti panangdangran ti sabali a tao uray no nabalakadanen. Gapuna, saan a mabalin a maikkan kadagiti annongen wenno responsabilidad iti kongregasion. Agaplikar met dayta kadagiti Kristiano nga adda trabahona nga agkasapulan iti panagawit iti paltog. Nasaysayaat laengen no agsapul iti sabali a trabaho. *

Siempre, personal a desision ti maysa a Kristiano no kasano a salaknibanna ti bagina, ti pamiliana, wenno dagiti sanikuana, kasta met no maipapan iti pilienna a trabaho. Ngem ipakita dagiti prinsipio ti Biblia ti sirib ti Dios ken ti ayatna kadatayo. Kas panangsurot kadagita, pilien ti nataengan iti naespirituan a Kristiano ti saan a maaddaan iti paltog tapno protektaranna ti bagina iti panangdangran ti sabali a tao. Ammona a maaddaan iti pudpudno ken agnanayon a kinatalged dagidiay agtaltalek iti Dios babaen ti panagbiagda maitunos kadagiti prinsipio ti Biblia.—Sal. 97:10; Prov. 1:33; 2:6, 7.

Bayat ti dakkel a rigat, agpannurayto ken Jehova dagiti Kristiano ken saanda a padasen nga idepensa ti bagbagida

^ par. 3 Mabalin a pilien ti maysa a Kristiano ti maaddaan iti paltog (rifle wenno shotgun) a paganup iti kanenna wenno pangprotektarna iti bagina iti panangdangran dagiti atap nga animal. Ngem no saan a mausar dayta, nasayaat no maikkat dagiti balana, nalabit makalas pay ketdi, ken maidulin a naimbag. Kadagiti lugar nga illegal, maiparit, wenno adda dagiti linteg maipapan iti panagtagikua iti paltog, kasapulan nga agtulnog dagiti Kristiano iti linteg.—Roma 13:1.

^ par. 2 Maipapan iti panangsalaknib iti bagi iti panangrames, kitaen ti artikulo a “No Kasano a Lapdan ti Panangrames” iti Marso 8, 1993 a ruar ti Agriingkayo!

^ par. 4 Para iti kanayonan nga impormasion no awaten ti maysa a Kristiano ti trabaho nga agkasapulan iti panagawit iti paltog, kitaen ti Nobiembre 1, 2005 a ruar ti Pagwanawanan, p. 31; ken ti Hulio 15, 1983, p. 25-26.