Mapan iti linaonna

Mapan iti listaan dagiti linaonna

No Apay nga ‘Idaydayawtayo ni Jah’

No Apay nga ‘Idaydayawtayo ni Jah’

“Idaydayawyo ni Jah, . . . ta makaay-ayo dayta—mayanatup ti panangidaydayaw.”—SAL. 147:1.

KANTA: 104, 152

1-3. (a) Kaano a mabalin a naisurat ti Salmo 147? (b) Ania ti masursurotayo iti panangadaltayo iti Salmo 147?

MAIKARI iti pammadayaw ti maysa a tao no naaramidna a nasayaat ti naipatrabaho kenkuana wenno no adda nakasaysayaat a kababalin nga impakitana. No padpadayawantayo dagiti tattao, ad-adda pay koma ngarud a padayawantayo ni Jehova a Diostayo! Idaydayawtayo ni Jehova gapu iti nakabilbileg a pannakabalinna, kas makita kadagiti nakaskasdaaw a pinarsuana, wenno gapu iti panagayatna kadagiti tattao, kas paneknekan ti panangtedna iti mismo nga Anakna kas daton a subbot.

2 Natignay ti nangisurat iti maika-147 a Salmo a mangidaydayaw ken Jehova. Pinaregtana pay ti dadduma a makikadua kenkuana a mangidaydayaw iti Dios.—Basaen ti Salmo 147:1, 7, 12.

3 Saantayo nga ammo ti nangisurat iti daytoy a kanta, ngem mabalin a nagbiag ti salmista iti tiempo nga insubli ni Jehova dagiti Israelita idiay Jerusalem manipud pannakaadipenda idiay Babilonia. (Sal. 147:2) Natignay la ketdi ti salmista a mangidaydayaw ken Jehova gapu iti pannakaisubli ti ili ti Dios iti lugar ti pudno a panagdaydayaw. Ngem adda pay dagiti imbagana a sabali a rason. Ania dagita? Apay nga  ipukkawmo ti “Hallelujah,” wenno “Idaydayawyo ni Jah”?—Sal. 147:1.

PAIMBAGEN NI JEHOVA TI AGSENSENNAAY A PUSO

4. Idi winayawayaan ni Ari Ciro dagiti Israelita, ania ti nariknada, ken apay?

4 Panunotem ti narikna dagiti naadipen nga Israelita idi naipanda idiay Babilonia. Ikankantiaw dagiti nangadipen kadakuada: “Kantaandakami iti maysa kadagiti kanta ti Sion.” Nadadael idin ti Jerusalem, ti kangrunaan a rason no apay nga idaydayawda idi ni Jehova. (Sal. 137:1-3, 6) Awan gaganaygayanda nga agkanta. Agsensennaay ti pusoda isu a kasapulanda ti liwliwa. Ngem natungpal ti impakpakauna ti Dios a pannakaisalakanda babaen ken Ari Ciro ti Persia. Inabakna ti Babilonia ken impakaammona: “Ni Jehova . . . pinarebbengannak nga ibangonak iti balay idiay Jerusalem . . . Siasinoman nga adda kadakayo manipud intero nga ilina, adda koma kenkuana ni Jehova a Diosna. Gapuna sumang-at koma.” (2 Cron. 36:23) Naliwliwa la ketdi iti dayta dagiti Israelita nga adda idi idiay Babilonia!

5. Ania ti nadlaw ti salmista iti pannakabalin ni Jehova a mangpaimbag?

5 Saan laeng a ti Israel kas nasion ti liniwliwa ni Jehova no di ket uray ti tunggal maysa kadakuada. Kasta met laeng ita. Insurat ti salmista maipapan iti Dios: “Paimbagenna dagidiay nasnaayan ti pusona, ket bedbedanna dagiti naut-ot a pasetda.” (Sal. 147:3) Wen, kayat a tulongan ni Jehova dagiti adda problemana—pisikal man wenno emosional. Magagaran ni Jehova a mangliwliwa kadatayo ken mangep-ep kadagiti emosional a sugattayo. (Sal. 34:18; Isa. 57:15) Isuro ken pabilgennatayo tapno kabaelantayo a sanguen ti aniaman a pakarigatantayo.—Sant. 1:5.

6. Ania ti masursurotayo iti kasla bigla a panagbaliw iti topiko iti Salmo 147:4? (Kitaen ti ladawan iti rugi ti artikulo.)

6 Kimmita ti salmista iti langit, ket kunana a “bilangen [ni Jehova] ti dagup dagiti bituen” ken “awaganna babaen kadagiti naganda.” (Sal. 147:4) Apay a kasla bigla a napan kadagiti bituen ti topiko? Panunotenyo daytoy: Makita ti salmista dagiti bituen, ngem dina ammo no kasano ti kaaduda. Iti panaglabas ti tawen, nagdakkel ti immaduan ti bilang dagiti bituen a makitatayo. Adda dagiti mangibagbaga nga iti laeng Milky Way galaxy, binilionen a bituen ti linaonna. Ket mabalin nga adu a trilion a galaksi ti adda iti intero nga uniberso! Talaga a saantayo a mabilang ti kaadu dagiti bituen! Ngem mainaganan amin dagita ti Namarsua. Kayatna a sawen nga ammo ni Jehova ti tunggal bituen ken ti nagdudumaanda. (1 Cor. 15:41) Dagiti ngay tattao a pinarsuana ditoy daga? Ti Dios a makaammo no sadino ti mismo nga ayan ti tunggal bituen iti eksakto nga oras, am-ammonaka met kas maysa nga indibidual—ti eksakto nga ayanmo, ti talaga a marikriknam, ken ti espesipiko a kasapulam iti aniaman nga oras!

7, 8. (a) No tulongan ni Jehova dagiti adipenna iti pakasubokanda, ania dagiti ikabilanganna? (b) Mangted iti pagarigan a mangipakita a naasi ni Jehova a tumulong kadagiti imperpekto a tao.

7 Saan la nga interesado kenka ni Jehova, kabaelanna pay nga ammuen dagiti problemam ken tulongannaka kadagita. (Basaen ti Salmo 147:5.) Mabalin a mariknam a nagrigat ti kasasaadmo ken dimo kabaelan nga awiten ti kadagsen ti problemam. Ammo ti Dios ti limitasionmo, ta ‘laglagipenna a tapokka.’ (Sal. 103:14) Gapu iti kinaimperpektotayo, maaramidtayo latta dagiti kamali a naaramidtayo idin. Pagbabbabawyantayo no maigalis ti dilatayo,  no tunggal maaramidtayo dagiti pagkapuyantayo, wenno no umapaltayo iti dadduma. Saan a napadasan ni Jehova dagita. Nupay kasta, naan-anay a maawatannatayo!—Isa. 40:28.

8 Nalabit napadasamon a mismo a tinulongannaka ni Jehova a mangsango kadagiti pannubok. (Isa. 41:10, 13) Alaentayo a pagarigan ti payunir a ni Kyoko. Naupay a permi idi naibaon nga agserbi iti sabali a lugar. Kasano nga impakita ni Jehova a maawatanna ti problema ni Kyoko? Iti baro nga ayanna, nariknana nga adu a kakabsat ti makaawat iti marikriknana. Kunana a kasla ibagbaga kenkuana ni Jehova: “Ay-ayatenka, saan la a gapu ta payunirka no di ket gapu ta anakka ken impaaymo ti biagmo para kaniak. Kayatko nga agbalinka a naragsak kas maysa a Saksik!” Kasano met nga impakita kenka ti Mannakabalin-amin a talaga a di matukod ti pannakaawatna?

IPAAY NI JEHOVA DAGITI KASAPULANTAYO

9, 10. Ania a tulong ti umuna nga ipaay ni Jehova? Mangted iti pagarigan.

9 Mabalin a material a tulong ti kasapulam no dadduma. Kas pagarigan, nalabit madanaganka ta mabalin nga awanton ti kanem. Ngem dinisenio ni Jehova ti daga a mangpataud iti makan para kadatayo, ken uray kadagiti urbon a wak! (Basaen ti Salmo 147:8, 9.) No agtultuloy a pakanen ni Jehova dagiti wak, makapagtalekka met nga itedna dagiti kasapulam.—Sal. 37:25.

10 Ited met ni Jehova ti kapatgan a kasapulantayo, ti naespirituan a taraon. Ipapaayna ti “talna ti Dios a mangringbaw iti isuamin a panunot.” (Fil. 4:6, 7) Kas pagarigan, idi nagtsunami idiay Japan idi 2011, narikna ni Mutsuo ken ni baketna ti tulong ni Jehova. Nalasatanda ti tsunami gapu ta immulida iti atep ti balayda. Dandani napukaw ti amin a sanikuada iti dayta nga aldaw. Nagpatnag a nagyanda iti nasipnget ken nalamiis a kuarto iti maikadua a kadsaaran ti nadadael a balayda. Kabigatanna, nagbirokda iti mabalin a pakaparegtaanda. Ti laeng 2006 Tinawen a Libro Dagiti Saksi ni Jehova ti nakitada. Nakita ni Mutsuo ti tema a “Ti Kadawelan Pay Laeng a Tsunami.” Maipapan dayta iti ginggined idiay Sumatra idi 2004 a nakaigapuan ti tsunami a kaaduan ti dinadaelna iti intero a historia. Nagsangsangitda nga agassawa bayat a basbasaenda dagiti kapadasan. Nariknada ti nabara ken nadungngo a panangaywan ti Dios kadakuada gapu iti panangipaayna iti eksakto a pammaregta iti tiempo a kasapulanda dayta. Inted met ni Jehova ti material a kasapulanda. Nangted dagiti kakabsat iti makan ken pagbadoda. Ngem ti ibibisita dagiti kakabsat nga imbaon ti organisasion kadagiti kongregasion ti kangrunaan a nangpabileg kadakuada. Kuna ni Mutsuo: “Nariknak a kasla adda laeng ni Jehova iti abaymi ken ay-aywanannakami. Naliwliwakami unay!” Ipaay nga umuna ti Dios ti naespirituan a kasapulantayo, sa kalpasanna, dagiti material a kasapulantayo.

GUNDAWAYAM DAGITI TULONG TI DIOS

11. Ania ti masapul nga aramiden dagidiay mangnamnama iti tulong ti Dios?

11 Kanayon a sisasagana ni Jehova a tumulong ken ‘mangbang-ar kadagidiay naemma.’ (Sal. 147:6a) Ngem kasano a maawattayo ti tulongna? Masapul a maaddaantayo iti nasayaat a relasion kenkuana. Tapno mapasamak dayta, masapul nga agbalintayo a naemma. (Sof. 2:3) Dagiti naemma urayenda ti tiempo nga ilinteg ti Dios ti dakes ken ikkatenna dagiti rigat a napasaranda. Maragsakan ni Jehova kadagiti naemma.

12, 13. (a) Tapno tulongannatayo ti Dios, ania ti masapul a liklikantayo? (b) Siasino dagiti pakaragsakan ni Jehova?

 12 Iti sabali a bangir, ‘ipababa ti Dios dagidiay nadangkes agingga iti daga.’ (Sal. 147:6b) Nagpuersa dagita a sasao! Tapno mariknatayo ti nasungdo nga ayat ni Jehova ken saan a makapungtot kadatayo, masapul a guraentayo ti kagurana. (Sal. 97:10) Kas pagarigan, masapul a kaguratayo ti seksual nga immoralidad. Kaipapanan dayta a masapul a liklikantayo ti aniaman a mangiturong kadatayo a mangaramid iti dayta, agraman ti pornograpia. (Sal. 119:37; Mat. 5:28) Mabalin a narigat dayta, ngem saan a sayang ti panangikagumaantayo ta masiguradotayo ti bendision ni Jehova.

13 Tapno agballigitayo, masapul nga agpannuraytayo ken Jehova, saan nga iti bagitayo. Maragsakan ngata no padasentayo ti agpannuray iti “kinabileg ti kabalio,” a pagpatpatulongan ti tao? Saan! Saantayo met nga agpannuray iti “luppo ti tao,” a kasla ket kabaelantayo a parmeken dagiti pagkapuyantayo a bukbukodtayo. (Sal. 147:10) Dawatentayo ketdi ti tulong ni Jehova babaen iti kararag. Saan a kas kadagiti mamalbalakad a tao, saan a mauma ti Dios a dumngeg kadagiti pakaasitayo, uray no maulit-ulit nga agpatulongtayo kenkuana. “Ni Jehova makasarak iti ragsak kadagidiay agbuteng kenkuana, kadagidiay agur-uray iti naayat a kinamanangngaasina.” (Sal. 147:11) Makapagtalektayo a gapu iti nasungdo nga ayatna, dinatay baybay-an ken tulongannatayo a manglaban kadagiti di umiso a tarigagaytayo.

14. Apay a napabileg ti salmista?

14 Nangted ni Jehova iti pangibatayan tapno makombinsirtayo a tulongannatayo no kasapulantayo ti tulong. Idi pinampanunot ti salmista ti pannakaibangon manen ti Jerusalem, inkantana maipapan ken Jehova: “Pinalagdana dagiti balunet ti ruruanganmo; binendisionanna ti annakmo iti tengngam. Mangikabil iti talna iti teritoriam.” (Sal. 147:13, 14) Napabileg ti salmista idi naammuanna a patibkeren ti Dios dagiti pader ti siudad ken protektaranna dagiti agdaydayaw kenkuana.

Kasano a makatulong ti Sao ti Dios no madagdagsenantayo gapu kadagiti problema? (Kitaen ti parapo 15-17)

15-17. (a) Ania ti mabalin a mariknatayo no dadduma kadagiti rigattayo, ngem kasano nga us-usaren ni Jehova ti Saona a tumulong kadatayo? (b) Mangted iti pagarigan no kasano a ‘napardas nga agtaray ti sao ti Dios.’

15 Mabalin a maipasangoka kadagiti pakarigatan a mangpadanag kenka. Isuronaka ni Jehova no ania ti aramidem tapno mapagballigiam dayta. Imbaga ti salmista nga “ibaon [ti Dios] ti sasaona iti daga; buyogen ti kinapardas agtaray ti saona.” Imbagana pay a ‘mangipaay [ni Jehova] iti niebe, ti nagbalay a linnaaw iwarawarana, ken ipalladawna ti yelona.’ Kalpasanna, insaludsod ti salmista: “Iti sanguanan ti lam-ekna siasino ti makabalin nga agtakder?” Kunana pay a ni Jehova “ibaonna ti saona ket tunawenna ida.” (Sal. 147:15-18) Ti kasisiriban ken kabibilgan a Diostayo, daydiay mangkonkontrol iti yelo ken niebe, kabaelannaka a tulongan iti aniaman a pakaipasanguam.

16 Iwanwanwannatayo ita ni Jehova babaen ti Saona, ti Biblia. ‘Napardas nga agtaray ti saona,’ ta ipapaayannatayo a dagus iti naespirituan a panangiwanwan no kasapulantayo dayta. Panunotem dagiti pagsayaatan ti panagbasam iti Biblia, ti panangadalmo kadagiti publikasion nga ipapaay ti “matalek ken masirib nga adipen,” ti panagbuyam iti JW Broadcasting, ti pananglukatmo iti jw.org, ti pannakisaritam kadagiti panglakayen, ken ti pannakikaduam kadagiti kakabsat. (Mat. 24:45) Nadlawmo kadi nga alisto ni Jehova a mangiwanwan kenka?

17 Narikna ni Simone ti tulong ti Sao ti  Dios. Nagbaba idi ti panagkitana iti bagina, nga uray la agduadua no maragsakan ti Dios kenkuana. Ngem kadagidi tiempo a maup-upay, nagkarkararag tapno agpatulong ken Jehova. Impasnekna met nga inadal ti Biblia. Kunana, “Awan ti tiempo a diak narikna ti pammabileg ken panangiwanwan ni Jehova.” Nakatulong dayta kenkuana nga agtalinaed a positibo.

18. Apay a makunam nga espesialka iti Dios, ken ania dagiti rason nga ipukkawmo ti “Idaydayawyo ni Jah”?

18 Ammo ti salmista nga espesial ti panangtrato ti Dios iti nagkauna nga ilina. Isuda laeng ti nakaitedan ti ‘sao’ ti Dios ken kadagiti “alagadenna ken dagiti hudisial a pangngeddengna.” (Basaen ti Salmo 147:19, 20.) Espesialtayo met ita ta datayo laeng ti naawagan iti nagan ti Dios ditoy daga. Gapu ta naam-ammotayo ni Jehova ken iyap-aplikartayo iti biagtayo ti Saona, addaantayo iti nasayaat a relasion kenkuana. Kas iti nangisurat iti Salmo 147, saan kadi nga adu ti rasontayo a mangipukkaw iti “Idaydayawyo ni Jah” ken paregtaentayo met ti dadduma a mangipukkaw iti dayta?