Mapan iti linaonna

Mapan iti listaan dagiti linaonna

“Makipagsangitkayo Kadagiti Tattao nga Agsangit”

“Makipagsangitkayo Kadagiti Tattao nga Agsangit”

“Itultuloyyo a liwliwaen ti maysa ken maysa ken pabilgen ti maysa ken maysa.”—1 TES. 5:11.

KANTA: 121, 75

1, 2. Apay a kasapulan a pagsasaritaantayo no kasano a maliwliwatayo dagiti agladladingit? (Kitaen ti ladawan iti rugi ti artikulo.)

“ITI uneg ti dandani makatawen kalpasan a natay ti anakmi a lalaki, nagkaro ti ut-ot ken saem a nariknami,” kuna ni Susi. Kinuna met ti maysa pay a kabsat nga idi bigla a natay ni baketna, nakapasar iti “di mailadawan a pisikal a sakit.” Makapaliday ta adu ti makapaspasar iti kasta a rigat. Adu a Kristiano ti mabalin a saan a nangnamnama a mapukawanda iti ipatpateg iti biag sakbay ti Armagedon. No sika wenno adda am-ammom a napukawan iti ipatpateg iti biag, mabalin a mapanunotmo, ‘Kasano a maliwliwa dagiti agladladingit?’

2 Nalabit nangnangngegmon ti ibagbagada nga agmawmaw ti ladingit bayat nga aglabas ti tiempo. Ngem talaga kadi a tiempo laeng ti makatulong tapno maliwliwa ti agladladingit? Napaliiw ti maysa a balo, “Nadlawko a nasaysayaat a kunaen a ti pangusaran ti maysa iti panawenna ti makatulong a mangliwliwa kenkuana.” Wen, kas iti literal a sugat, in-inut nga umimbag ti emosional a sugat no siaayat a maasikaso dayta bayat ti panaglabas ti  tiempo. Ania ti makatulong kadagiti agladladingit tapno mailiwliwagda ti saem a marikriknada?

NI JEHOVA—“TI DIOS TI AMIN A LIWLIWA”

3, 4. Apay a masiguradotayo nga ammo ni Jehova a kasapulan a maliwliwa ti agladladingit?

3 Awan duadua a ni Jehova, ti naasi a nailangitan nga Amatayo, ti kangrunaan a gubuayan ti liwliwa. (Basaen ti 2 Corinto 1:3, 4.) Ni Jehova ti kangrunaan nga ulidan ti pannakipagrikna. Impasiguradona kadagiti adipenna: “Siak Daydiay mangliwliwa kadakayo.”—Isa. 51:12; Sal. 119:50, 52, 76.

4 Napadasan a mismo ti nadungngo ken naasi nga Amatayo ti mapukawan iti ipatpateg iti biag, a kas kada Abraham, Isaac, Jacob, Moises, ken Ari David. (Num. 12:6-8; Mat. 22:31, 32; Ara. 13:22) Patalgedan kadatayo ti Sao ti Dios nga il-iliwen, wenno magagaran nga ur-urayen, ni Jehova ti tiempo inton pagungarenna ida. (Job 14:14, 15) Naragsak ken nakasalsalun-atdanto. Panunotem met a naparigat agingga iti ipapatay ti dungdungnguen ti Dios nga Anakna—“daydiay pakaay-ayatanna unay iti inaldaw.” (Prov. 8:22, 30) Saantayo a pulos mailadawan ti saem a narikna ni Jehova.—Juan 5:20; 10:17.

5, 6. Kasano a liwliwaennatayo ni Jehova?

5 Makapagtalektayo a tulongannatayo ni Jehova. Ditay koma ngarud bumdeng a mangipeksa kenkuana iti ladingit a marikriknatayo babaen ti kararag. Makapabang-ar a maammuan a maawatan ni Jehova dagiti marikriknatayo ken ipaayna ti liwliwa a kasapulantayo! Ngem kasano?

6 Ti “panangliwliwa ti nasantuan nga espiritu” ti maysa a pamay-an a tulongannatayo ti Dios. (Ara. 9:31) Ti nasantuan nga espiritu ti Dios ket nagdakkel a pagtaudan iti liwliwa. Inkari ni Jesus a magagaran a mangted ti Amana idiay langit iti “nasantuan nga espiritu kadagidiay agdawdawat kenkuana.” (Luc. 11:13) Kuna ni Susi, a nadakamat itay: “Namin-adu a nagparparintumengkami a nagpakpakaasi ken Jehova a liwliwaennakami. Kadagidi a tiempo, talaga a nasalakniban ti puso ken panunotmi gapu iti talna ti Dios.”—Basaen ti Filipos 4:6, 7.

NI JESUS—MANNAKIPAGRIKNA A NANGATO A PADI

7, 8. Apay a makapagtalektayo a liwliwaennatayo ni Jesus?

7 Idi adda ditoy daga ti naasi nga Anak ti Dios a ni Jesus, impakitana iti sao ken aramid ti nadungngo a pannakipagrikna ni Jehova. (Juan 5:19) Naibaon ditoy daga ni Jesus tapno liwliwaenna dagiti “nasnaayan ti pusona” ken ti “amin nga agledleddaang.” (Isa. 61:1, 2; Luc. 4:17-21) Gapuna, makuna nga addaan ni Jesus iti pudpudno a pannakipagrikna—ti panangrikna iti rigat a sagsagabaen dagiti tattao ken ti naimpusuan a panagtarigagay a tumulong kadakuada.—Heb. 2:17.

8 Idi agtutubo pay ni Jesus, awan duadua a napadasanna ti matayan iti kapamilia ken gagayyem. Nalabit nasurok la idi wenno awan pay 20 ti tawen ni Jesus idi natay ti agsiuman kenkuana a ni Jose. * Panunotem laengen no kasano nga inliwliwagna ti ladingitna ken ti riknana idi makitkitana nga agladladingit ni nanangna ken dagiti kakabsatna.

9. Idi natay ni Lazaro, kasano a makita a mannakipagrikna ni Jesus?

9 Idi inrugin ni Jesus ti ministeriona,  impakitana ti naidumduma a pannakaawat ken pannakipagrikna. Alaentayo a pagarigan ti napasamak idi natay ti gayyemna a ni Lazaro. Ammo ni Jesus a pagungarenna met laeng ni Lazaro, ngem nariknana latta ti ladingit a nanglapunos kada Maria ken Marta. Nasaktan ni Jesus nga uray la nagarubos dagiti luana gapu ta nariknana ti marikriknada.—Juan 11:33-36.

10. Apay a makapagtalektayo a maawatan ni Jesus dagiti marikriknatayo ita?

10 Kasano a makatulong kadatayo ita ti impakita ni Jesus a pannakipagrikna ken panangliwliwa? Kuna ti Kasuratan a “ni Jesu-Kristo isu met laeng idi kalman ken ita, ken iti agnanayon.” (Heb. 13:8) Ammo a mismo ti “Kangrunaan nga Ahente ti biag” ti rikna ti agladladingit isu a “kabaelanna ti bumadang [wenno, tumulong] kadagidiay masubsubok.” (Ara. 3:15; Heb. 2:10, 18) Makapagtalektayo ngarud nga uray ita, marikrikna ni Kristo ti ladingit ti dadduma, maawatanna ti saem a marikriknada, ken liwliwaenna ida iti “umiso a tiempo.”—Basaen ti Hebreo 4:15, 16.

“LIWLIWA MANIPUD ITI KASURATAN”

11. Ania a teksto ti makaliwliwa kenka?

11 Ti salaysay maipapan iti nakaro a liday ni Jesus idi natay ni Lazaro ket maysa laeng kadagiti di mabilang a makaliwliwa a paset ti Biblia. Di pakasdaawan dayta ta “amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) No agladladingitka, maliwliwaka met kadagitoy a teksto:

  • “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”—Sal. 34:18, 19.

  • “Idi a ti mangrirriribuk a pampanunotko immaduda iti unegko, dagiti bukodmo a pangliwliwa [Jehova] rinugianda a sappuyoten ti kararuak.”—Sal. 94:19.

  • “Ni Apotayo a Jesu-Kristo a mismo ken ti Dios nga Amatayo, a nagayat kadatayo ken nangted iti agnanayon a liwliwa ken naimbag a namnama babaen ti di kaikarian a kinamanangngaasi, liwliwaenda koma ti puspusoyo ken patibkerendakayo.”—2 Tes. 2:16, 17. *

TI KONGREGASION—DAKKEL A PAGTAUDAN TI LIWLIWA

12. Ania ti maysa a napateg a pamay-an a maliwliwatayo ti dadduma?

12 Ti kongregasion Kristiano ti maysa pay a makaipaay iti liwliwa kadagiti agladladingit. (Basaen ti 1 Tesalonica 5:11.) Kasanom a mapabileg ken maliwliwa dagiti agledleddaang? (Prov. 17:22) Laglagipentayo nga adda “tiempo ti panagulimek ken tiempo ti panagsao.” (Ecl. 3:7) Kuna ti nabalo a ni Dalene: “Kasapulan nga iyebkas dagiti natayan iti ipatpateg ti pampanunoten ken marikriknada. No kasta, ti panangdengngegmo ken ti panangipalubosmo kadakuada a mangileppas iti ibagbagada ti kasayaatan a maitulongmo.” Kinuna met ni Junia, nga addaan iti nagpakamatay a kabsat: “Nupay saanmo a naan-anay a maawatan ti ladingitda, ti napateg ket kayatmo a tarusan ti marikriknada.”

13. Ania ti kasapulan a laglagipentayo maipapan iti ladingit?

13 Laglagipem met nga agduduma ti ladingit a marikrikna ti tunggal maysa ken ti panangyebkasda iti dayta. Adda dagiti gundaway a di pulos maawatan ti agladladingit ti saem a marikriknana isu a mabalin a marigatan  a mangipeksa iti dayta. Kuna ti Sao ti Dios: “Ti puso ammona ti kinapait ti kararua ti maysa, ket iti panagrag-ona awanto ti ganggannaet a makibiang.” (Prov. 14:10) Uray pay no iyebkas ti maysa ti marikriknana, saan a kanayon a nalaka a maawatan ti dadduma ti kayatna nga ibaga.

14. Kasano a maliwliwatayo babaen iti sasao dagiti natayan iti ay-ayaten?

14 Ngarud, maawatantayo no apay a mabalin a marigatantayo a mangpanunot no ania ti ibagatayo iti maysa a nakaro ti ladingitna. Ngem kuna ti Biblia a ti “dila dagidiay masirib ket makapaimbag.” (Prov. 12:18) Nadlaw ti dadduma a nasayaat a pangliwliwa dagiti linaon ti broshur a No Adda Matay nga Ay-ayatenyo. * Ngem kaaduanna a ti kasayaatan a maaramidam ket ti ‘pannakipagsangit kadagiti agsangit.’ (Roma 12:15) Kuna ti sister a ni Gaby, a natayan iti asawa: “Isangsangitko lattan dagiti marikriknak, isu a maliwliwaak no makipagsangit kaniak dagiti gagayyemko. Mariknak no kua a saanak nga agmaymaysa iti panagladingitko.”

15. Kasanotayo a mangliwliwa no marigatantayo a makisao iti agladladingit? (Kitaen met ti kahon a “ Dagiti Makaliwliwa a Sasao.”)

15 No marigatanka a makisao iti agladladingit, mabalin a nalaklaka para kenka ti mangliwliwa babaen ti kard, e-mail, teks, wenno surat. Mabalin nga uray mangikabilka laeng iti maysa a makaliwliwa a teksto, ibagam dagiti malagipmo a magusgustuam nga ugali ti pimmusay, wenno ti malagipmo a naragsak a panagkadkaduayo. “Diak ninamnama a nagdakkel gayam a tulong kaniak ti ababa ngem makaparegta a surat a naawatko wenno ti panangawis kaniak dagiti kakabsat,” kuna ni Junia. “Gapu  kadagita, nariknak nga ay-ayaten ken ipatpategdak.”

16. Ania ti nagsayaat a pamay-an a maliwliwatayo ti dadduma?

16 Dimo tagtagibassiten ti maaramidan dagiti kararagmo, personal man dayta wenno kaduam ti kapammatiam a natayan iti ay-ayaten. Mabalin a marigatanka a mangyebkas iti riknam iti kararag gapu iti naliday a kasasaad. Ngem ti naimpusuan a panangikararagmo kenkuana, uray no makasangit wenno agpigerger ti bosesmo, ket mabalin a dakkel a tulong a mangep-ep iti ladingit. Malagip ni Dalene: “No umaydak idi liwliwaen dagiti kakabsat, kiddawek no mabalindak nga ikararagan. Masansan a marigatanda nga agsao iti rugi ti kararag, ngem intono kuan, nalawag a mayebkasdan ti kasayaatan ken nagtaud iti puso a kararag. Ti nabileg a pammatida, ti ayatda, ken ti pannakaseknanda ti mangpatpatibker iti pammatik.”

DIKA SUMARDENG A MANGLIWLIWA

17-19. Apay a kasapulan nga agtultuloy a mangliwliwatayo?

17 Agduduma ti kapaut ti panangiliwliwag. Nakasaganaka koma ngarud a mangliwliwa saan la a kadagiti umuna nga al-aldaw nga adu dagiti gagayyem ken kakabagian a mangliwliwa, no di ket uray kadagiti sumarsaruno a bulan kalpasan ti pumpon. “Ti pudno a kadua agayat iti isuamin a tiempo, ken ti kabsat a mayanak no adda rigat.” (Prov. 17:17) Dakkel ti maitulong dagiti kakabsat a mangliwliwa iti agladladingit agingga a mailiwliwagnan ti ladingitna.—Basaen ti 1 Tesalonica 3:7.

18 Laglagipenyo a mabalin a makapaladingit kadagiti natayan iti ipatpateg no madanon ti aldaw ti anibersarioda, adda musika, retrato, aktibidad, wenno uray angot, uni, wenno tiempo iti tawen a mangipalagip kadakuada iti natay nga ay-ayatenda. Mabalin nga adu ti narigat nga aramiden nga agmaymaysa dagiti nabalo, kas iti panagatender iti asamblea wenno Memorial. “Ninamnamak idin ti umuna a nakaladladingit nga anibersario ti kasarmi,” kuna ti maysa a kabsat a lalaki, “ken talaga a nagrigat dayta. Ngem nagaramid iti pamay-an dagiti kakabsat tapno makaduak dagiti kasisingedan a gagayyemko, ket iti kasta, saanak nga agmaymaysa.”

19 Ngem laglagipentayo a saan la a kadagiti espesial nga okasion a kasapulan dagiti agladladingit ti pammaregta. “Masansan a makatulong unay ti pammaregta ken pannakikadua uray awan ti espesial nga anibersario,” kuna ni Junia. “Makaliwliwa ken nakapatpateg dagita a gundaway.” Agpayso a ditay mapunas ti amin a ladingit wenno mapunnuan ti kaawan ti pimmusay, ngem maliwliwatayo dagiti agladladingit babaen ti panangtulongtayo kadakuada. (1 Juan 3:18) Malagip ni Gaby: “Agyamanak unay ken Jehova gapu kadagiti naayat a panglakayen a timmulong kaniak iti amin a narigat a napasarak. Talaga nga impariknada a kasla ar-arakupennak ni Jehova.”

20. Apay a makaliwliwa unay dagiti kari ni Jehova?

20 Makaliwliwa a maammuan a ni Jehova, ti Dios ti amin a liwliwa, punasennanto ti amin a ladingit ken mangipaayto iti permanente a liwliwa inton “amin dagidiay adda kadagiti pakalaglagipan a tanem mangngegdanto ti timek [ni Kristo] ket rummuarda.” (Juan 5:28, 29) Ikarkari ti Dios a pukawennanto wenno “alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” (Isa. 25:8) Kalpasanna, imbes a “makipagsangitto” ti amin a tattao ditoy daga kadagiti agsangit, “makipagrag-odanto” kadagiti agrag-o.—Roma 12:15.

^ par. 8 Agtawen laeng ni Jesus iti 12 idi maudi a nadakamat ni Jose iti Biblia. Idi inaramid ni Jesus ti umuna a milagrona babaen ti panamagbalinna iti danum nga arak, awanen ti nadakamat maipapan ken Jose. Idi nailansa ni Jesus iti kayo a pagtutuokan, imbilinna nga aywanan ni apostol Juan ni Maria, a mabalin a saanna koma nga ibilin kenkuana no sibibiag pay idi ni Jose.—Juan 19:26, 27.

^ par. 14 Kitaen met ti artikulo a “Liwliwaem Dagiti Natayan, kas iti Inaramid ni Jesus” iti Nobiembre 1, 2010 a ruar ti Pagwanawanan.