Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2016

Sapulenyo ti Pagarian, Saan a Dagiti Bambanag

Sapulenyo ti Pagarian, Saan a Dagiti Bambanag

“Agtultuloy a sapulenyo ti pagarian [ti Dios], ket dagitoy a banag mainayonto kadakayo.”—LUC. 12:31.

KANTA: 40, 98

1. Ania ti nagdumaan ti kasapulantayo ken ti kayattayo?

NAIKUNA a bassit ti kasapulan ti tao ngem awan patinggana dagiti kayatna. Agparang nga adu ti saan a makaammo iti nagdumaan ti kasapulan ken kayat. Ania kadi ti nagdumaanda? Ti “kasapulan” ket banag a masapulmo tapno agbiagka, kas iti taraon, bado, ken pagtaengan. Ti “kayat” ket banag a kayatmo a maadda kenka, ngem saan a kasapulan iti inaldaw a panagbiag.

2. Ania ti dadduma a banag a kayat dagiti tattao?

2 Agduduma ti kayat dagiti tattao, depende iti lugar a pagnanaedanda. Kadagiti napanglaw a pagilian, naragsaken ti adu no adda igatangda iti selpon, motor, wenno bassit a lote. Kadagiti nabaknang a pagilian, adu ti mayat a maaddaan iti nangingina a bado, dakdakkel a balay, wenno nangingina a lugan. Ngem aniaman ti kasasaadtayo, daytoy ti peggad—mabalin a masiluantayo iti materialismo, ti panagtarigagay iti ad-adu pay a banag, kasapulantay man dagita wenno saan ken magatangtayo man dagita wenno saan.

 AGANNAD ITI SILO TI MATERIALISMO

3. Ania ti materialismo?

3 Ania ti materialismo? Dayta ti panangipamaysa kadagiti material a banag imbes a kadagiti naespirituan a banag. Nairamut dayta kadagiti tarigagay, prioridad, ken iti ipampamaysa ti maysa a tao iti biagna. Gapu iti dayta, kayattayo ti maaddaan iti adu a material a sanikua. Ti materialistiko a tao ket saan a masapul nga adu ti kuartana wenno nangina dagiti gatangenna. Uray dagiti napanglaw mabalin a matnagda iti materialismo ken mabaybay-anda nga iyun-una ti Pagarian.—Heb. 13:5.

4. Kasano nga usaren ni Satanas ti makaay-ayo ‘kadagiti mata’?

4 Us-usaren ni Satanas ti lubong tapno patientayo a naragragsak ti biagtayo no adu dagiti material a sanikuatayo uray saantayo met a talaga a kasapulan. Ammona no ania ti makaay-ayo ‘kadagiti mata.’ (1 Juan 2:15-17; Gen. 3:6; Prov. 27:20) Itukon ti lubong ti amin a kita ti material a banag, manipud napateg agingga iti awan patpategna, a dadduma ket talaga a makaay-ayo. Adda kadi ginatangmon a saanmo met a kasapulan ngem naay-ayoka ta nakitam iti adbertismen wenno naidispley iti paggatangan? Nabigbigmo kadi idi agangay nga agbiagka met gayam uray awan dayta? Dagitoy a saan a kasapulan a bambanag ti mamagbalin a komplikado ken mangparigat iti biagtayo. Mabalin a dagitoy ti mangsilo ken mangsinga iti naespirituan a rutinatayo a panagadal iti Biblia, panagsagana ken panagatender kadagiti gimong, ken regular a panangasaba. Laglagipentayo ti impakdaar ni apostol Juan: “Ti lubong aglabas ken kasta met ti tarigagayna.”

5. Ania ti mapasamak kadagiti mangipamaysa a manggun-od kadagiti material a banag?

5 Kayat ni Satanas nga agpaadipentayo iti Kinabaknang imbes a ken Jehova. (Mat. 6:24) Dagiti mangipamaysa a manggun-od kadagiti material a banag talaga a saanda a naragsak ta ti laeng bagida ti pagpagustuanda. Nakarkaro pay, nakakaasi ti naespirituan a kasasaadda ken nalapunosda iti liday ken pannakapaay. (1 Tim. 6:9, 10; Apoc. 3:17) Dayta ket kas iti inladawan ni Jesus iti ilustrasionna maipapan iti agmulmula. No ti mensahe ti Pagarian “naimula iti nagbabaetan dagiti sisiitan . . . , dagiti panagtarigagay iti sabsabali pay a bambanag sumrekda ket leppesenda ti sao, ket agbalin a di nabunga.”—Mar. 4:14, 18, 19.

6. Ania a leksion ti maadaltayo ken Baruc?

6 Alaentayo a pagarigan ti sekretario ni propeta Jeremias a ni Baruc. Idi dandanin ti naipadto a pannakadadael ti Jerusalem, rinugian ni Baruc nga ‘isapulan ti bagina iti naindaklan a bambanag’—bambanag nga awan ti manayon a pategna. Ti koma pinampanunotna ket ti inkari kenkuana ni Jehova nga awatenna: “Itedkonto kenka ta kararuam [wenno, biagmo] kas maysa a samsam.” (Jer. 45:1-5) Sigurado nga awan ti ibati ti Dios a sanikua ti maysa a tao iti siudad a naikeddeng a madadael. (Jer. 20:5) Gapu ta umas-asidegtayo iti panungpalan daytoy a sistema ti bambanag, saan nga ita ti panawen tapno agurnongtayo iti ad-adu pay a material a bambanag. Saantay a namnamaen a mailasattayo iti dakkel a rigat ti aniaman a sanikuatayo, kasanoman kapateg wenno kangina dayta.—Prov. 11:4; Mat. 24:21, 22; Luc. 12:15.

7. Ania ti usigentayo, ken apay?

7 Nangipaay ni Jesus iti kasayaatan a balakad maipapan iti pananggun-od kadagiti kasapulantayo a saantayo a masinga, agbalin a materialistiko, wenno nalabes a madanagan. Inramanna dayta a balakad iti Sermon iti Bantay. (Mat. 6:19-21) Basaen ken usigentayo ti paset a nairekord iti Mateo 6:25-34. Daytoy ti mangtignay kadatayo a ‘mangitultuloy  a mangsapul iti pagarian,’ saan a ti bambanag.Luc. 12:31.

IPAAY NI JEHOVA DAGITI MATERIAL A KASAPULANTAYO

8, 9. (a) Apay a saantayo koma a madanagan unay maipapan kadagiti kasapulantayo? (b) Ania ti ammo ni Jesus maipapan kadagiti tattao ken kadagiti kasapulanda?

8 Basaen ti Mateo 6:25. Idi imbaga ni Jesus kadagiti dumdumngeg kenkuana nga ‘isardengda ti maringgoran maipapan kadagiti kararuada [wenno, biagda],’ kasla ibagbagana kadakuada a “saanda a madanagan.” Madanaganda kadagiti bambanag a saanda met koma a pakadanagan. Adda nasayaat a rason no apay nga imbaga ni Jesus dayta. Ti nalabes a panagdanag, uray para kadagiti banag a talaga a kasapulan, ket mabalin a mangbingay iti atension wenno mangsinga iti maysa ket mabalin a malipatanna dagiti napatpateg a naespirituan a bambanag. Maseknan unay ni Jesus kadagiti adalanna isu a namimpat a pinakdaaranna ida iti sermonna maipapan iti daytoy a peggad.—Mat. 6:27, 28, 31, 34.

9 Apay nga imbaga ni Jesus a saantayo a pakadanagan no ania ti kanen, inumen, wenno pagbadotayo? Saan kadi a talaga a kasapulantayo dagitoy? Wen, talaga a kasapulantayo! No saantayo a kabaelan ti maaddaan kadagitoy, saan aya a normal nga agdanagtayo? Siempre madanagantayo, ket ammo ni Jesus dayta. Ammona ti inaldaw a kasapulan dagiti tattao. Ammona met dagiti narigat a kasasaad a pakaipasanguan dagiti adalanna nga agbiagto bayat ti ‘maudi nga al-aldaw,’ a nadeskribir kas “napeggad a tiempo a narigat a pakilangenan.” (2 Tim. 3:1) Karaman kadagita a kasasaad ti kinaawan trabaho, nangina dagiti magatang, kurang a taraon, ken nakaro a kinarigat. Ngem ammo met ni Jesus a ‘napatpateg ti kararua [wenno, biag] ngem iti taraon ken ti bagi ngem iti pagan-anay.’

10. Idi insuro ni Jesus kadagiti pasurotna no kasano ti agkararag, ania ti imbagana nga agbalin koma a kapatgan iti biagda?

10 Iti rugi ti sermon ni Jesus, insurona kadagiti dumdumngeg kenkuana nga ikararagda iti nailangitan nga Amada dagiti material a kasapulanda. Imbagana a mabalinda nga ikararag: “Itedmo kadakami ita nga aldaw ti tinapaymi nga agpaay itoy nga aldaw.” (Mat. 6:11) Iti sabali a gundaway, imbagana: “Itedmo kadakami ti tinapaymi maipaay iti daytoy nga aldaw sigun ti kasapulan iti daytoy [nga] aldaw.” (Luc. 11:3) Ngem saan a kaipapanan dayta a dagiti laengen material a kasapulantayo ti kanayon a panunotentayo. Iti dayta met laeng a modelo a kararag, imbaga ni Jesus nga ipangpangrunatayo nga ikararag ti iyaay ti Pagarian ti Dios. (Mat. 6:10; Luc. 11:2) Tapno saan nga agdanag dagiti dumdumngeg kenkuana, insaruno ni Jesus a dinakamat ti panagbalin ni Jehova nga awan kapadana a Manangipaay.

11, 12. Ania ti masursurotayo iti panangaywan ni Jehova kadagiti billit? (Kitaen ti ladawan iti rugi ti artikulo.)

11 Basaen ti Mateo 6:26. Masapul a ‘paliiwentayo a sipapasnek dagiti tumatayab iti langit.’ Uray babassit dagitoy a parsua, manganda iti adu a prutas, bukbukel, insekto, wenno igges. No ti maysa a billit ket kas kadakkel koma ti tao, ad-adu ti makanna ngem iti tao. Ngem saanda nga agmula iti kanenda. Ipapaay ni Jehova ti amin a kasapulanda. (Sal. 147:9) Siempre, saanna nga isubo ti kanenda iti sippitda! Masapul nga agbirokda iti kanenda, ngem adu ti masarakanda.

12 Para ken Jesus, imposible a taraonan ti nailangitan nga Amana dagiti billit ngem saanna nga ipaay ti kasapulan dagiti tattao. [1] (1 Ped. 5:6, 7) Saanna nga isubo ti taraon iti ngiwattayo, ngem mabalin a bendisionanna ti panagreggettayo nga agmula wenno agsapul iti igatangtayo iti inaldaw a kanentayo. No talaga nga agkasapulantayo, mabalin a tignayenna ti dadduma a mangiranud iti  adda kadakuada. Nupay saan a dinakamat ni Jesus ti maipapan iti pagnaedan dagiti billit, inikkan ida ni Jehova iti nainkasigudan a panunot, abilidad, ken bambanag nga usarenda nga agaramid iti umokda. Kabaelannatayo met a tulongan ni Jehova a makabirok iti maitutop a pagnaedan para iti pamiliatayo.

13. Ania ti mangipakita a napatpategtayo ngem kadagiti billit?

13 Insaludsod ni Jesus kadagiti dumdumngeg kenkuana: “Saan kadi a napatpategkayo ngem [kadagiti tumatayab iti langit]?” Sigurado a pampanunoten ni Jesus a dandaninan ipaay ti biagna para iti amin a tao. (Idilig ti Lucas 12:6, 7.) Ti subbot a daton ni Kristo ket saan a naipaay para iti sabali a parsua. Saan a natay ni Jesus maipaay kadagiti billit, no di ket natay maipaay kadatayo tapno posible a maaddaantayo iti biag nga agnanayon.—Mat. 20:28.

14. Ania ti saan a pulos maaramidan ti tao a maringgoran?

14 Basaen ti Mateo 6:27. Apay ngarud nga imbaga ni Jesus a ti tao a maringgoran saanna a manayonan uray maysa a kasiko ti kaatiddog ti biagna? Gapu ta saan a makatulong ti nalabes a panagdanag kadagiti inaldaw a kasapulantayo tapno umatiddog ti biagtayo. Imbes ketdi, mabalin nga umababa pay ti biagtayo no sobra ti panagdanagtayo.

15, 16. (a) Ania ti masursurotayo iti panangaywan ni Jehova kadagiti lirio iti talon? (Kitaen ti ladawan iti rugi ti artikulo.) (b) Ania dagiti masapul nga isaludsodtayo iti bagitayo, ken apay?

15 Basaen ti Mateo 6:28-30. Asino ti saan a mangayat iti napintas a bado, nangruna no usarentayo tapno mangasaba, makigimong, ken agatender kadagiti asamblea? Ngem masapul kadi a madanagantayo “maipapan iti  pagan-anay”? Ipalagip manen ni Jesus kadatayo dagiti parsua ni Jehova. Adu ti masursurotayo iti kinapintas dagiti “lirio iti talon.” Mabalin a pampanunoten idi ni Jesus dagiti kasla lirio a sabsabong kas iti gladiolus, hyacinth, iris, ken tulip a nagduduma ti kinapintasda. Saanda nga agdait, agabel, ken agaramid iti pagbadoda. Ngem nagpintas a buyaen dagiti sabongda! “Uray ni Solomon iti isuamin a dayagna saan a nakawesan a kas iti maysa kadagitoy.”

16 Matarusantayo koma ti ibagbaga ni Jesus: “No . . . ti Dios kawesanna a kasta ti mulmula iti talon . . . , saan kadi nga ad-adda pay a kawesannakayto, dakayo a bassitan pammati?” Sigurado nga aramidenna dayta! Ngem agparang a nakurang ti pammati dagiti adalan ni Jesus. (Mat. 8:26; 14:31; 16:8; 17:20) Kasapulanda ti nabilbileg a pammati ken panagtalek ken Jehova. Datayo ngay? Kasano kabileg ti pammatitayo a kayat ken kabaelan ni Jehova nga ipaay ti kasapulantayo?

17. Ania ti mabalin a mangdadael iti relasiontayo ken Jehova?

17 Basaen ti Mateo 6:31, 32. Saantayo koma a tuladen dagiti tattao iti ‘nasnasion,’ a saan a mamati iti maysa a naayat a nailangitan nga Ama a maseknan kadagiti mangyun-una iti Pagarian. No ikagumaantayo a gun-oden ti amin a “bambanag a sigagagar a sapsapulen dagiti nasion,” madadael ti relasiontayo ken Jehova. Ngem no aramidentayo ti masapul nga aramidentayo—ti panangyun-una kadagiti naespirituan a bambanag—agtalektayo nga awan ti aniaman a naimbag nga ipaidam ni Jehova. Ti “nadiosan a debosion” ti mangtignay kadatayo nga agbalin a kontento no adda “pagtaraon ken pagkawestayo.”—1 Tim. 6:6-8.

 IYUN-UNAM KADI TI PAGARIAN TI DIOS ITI BIAGMO?

18. Ania ti ammo ni Jehova maipapan iti tunggal maysa kadatayo, ket ania ti aramidenna para kadatayo?

18 Basaen ti Mateo 6:33. Masapul a kanayon nga iyun-una dagiti adalan ni Kristo ti Pagarian. No aramidentayo dayta, kas iti kinuna ni Jesus, “amin dagitoy sabali pay a bambanag mainayonto” kadatayo. Apay a maibagana dayta? Inlawlawagna iti immuna a bersikulo: “Ammo ti nailangitan nga Amayo nga amin dagitoy a banag ket kasapulanyo,” kayatna a sawen, dagiti kasapulan iti biag. Ammo ni Jehova dagiti personal a kasapulantayo mainaig iti taraon, pagbado, ken pagnaedan, uray saantayo pay a napanunot dagita. (Fil. 4:19) Ammona no ania a badotayo ti sumaruno a dumaan. Ammona dagiti masapul a kanentayo ken ti maitutop a pagnaedantayo depende iti kadakkel ti pamiliatayo. Siguraduen ni Jehova a maadda kadatayo dagiti talaga a kasapulantayo.

19. Apay a saantayo koma a madanagan iti mabalin a mapasamak iti masanguanan?

19 Basaen ti Mateo 6:34. Paliiwentayo nga iti maikadua a daras, kinuna ni Jesus: “Dikay pulos maringgoran.” Kayatna a panunotentayo laeng ti kasapulantayo iti maysa nga aldaw, nga agtalektayo a tulongannatayo ni Jehova. No madanagan unay ti maysa iti mabalin a mapasamak iti masanguanan, mabalin a mangrugin nga agtalek iti bagina imbes nga iti Dios, ket dayta ti mangdadael iti relasionna ken Jehova.—Prov. 3:5, 6; Fil. 4:6, 7.

SAPULENYO NGA UMUNA TI PAGARIAN, KET INAYON NI JEHOVA TI SABALI PAY A BAMBANAG

Mapasimplem kadi ti biagmo tapno ad-adda a maipamaysam ti Pagarian? (Kitaen ti parapo 20)

20. (a) Ania ti kalatmo iti panagserbim ken Jehova? (b) Ania ti mabalinmo nga aramiden tapno mapasimplem ti biagmo?

20 Awan serserbina no saantayo nga iyun-una ti Pagarian gapu ta ikagkagumaantayo a gun-oden dagiti material a bambanag. Imbes ketdi, masapul nga iyun-unatayo dagiti naespirituan a kalat. Kas pagarigan, mabalinmo kadi ti umakar iti kongregasion nga agkasapulan iti ad-adu nga agibumbunannag iti Pagarian? Kabaelam kadi ti agpayunir? No payunirkan, pinanunotmo kadin ti agaplay iti School for Kingdom Evangelizers? Mabalinmo kadi ti tumulong iti Bethel wenno iti remote translation office kas part-time commuter? Mabalinmo kadi ti part-time nga agboluntario iti Local Design/Construction tapno tumulong nga agibangon kadagiti Kingdom Hall? Panunotem no kasano a mapasimplem ti biagmo tapno ad-adda a makiramanka kadagiti trabaho mainaig iti Pagarian. Ikararagmo ken usigem ti kahon a “ No Kasano a Mapasimplem ti Biagmo,” ket agtignayka tapno maragpatmo ti kalatmo.

21. Ania ti makatulong kenka nga agbalin a nasingsinged ken Jehova?

21 Adda nasayaat a rason no apay nga insuro ni Jesus a sapulentayo ti Pagarian, saan a dagiti bambanag. No aramidentayo dayta, saantayo a pakadanagan dagiti material a kasapulantayo. Ad-adda a sumingedtayo ken Jehova no agtalektayo kenkuana ken saantayo a pagustuan ti amin a tarigagaytayo wenno gatangen ti tunggal banag nga ituktukon ti lubong, uray no kabaelantayo a gatangen dayta. No pasimplientayo ti biagtayo itan, ‘mapetpetantayo a sititibker ti pudpudno a biag’ iti masanguanan.—1 Tim. 6:19.

^ [1] (parapo 12) Tapno maawatantayo no apay nga ipalubos ni Jehova a mabisinan ti maysa a Kristiano no dadduma, kitaen ti “Salsaludsod Dagiti Agbasbasa” iti Pagwanawanan a Septiembre 15, 2014, p. 22.