Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2016

Salsaludsod Dagiti Agbasbasa

Salsaludsod Dagiti Agbasbasa

Ania ti kaipapanan ti panagtipon ti dua a baston a nadakamat iti Ezequiel kapitulo 37?

Nangted ni Jehova iti mensahe ken Ezequiel maipapan iti inkarina a panagkaykaysa ti nasion ti Israel idi nagsublida iti Naikari a Daga. Dayta a mensahe ipakpakaunana met ti panagkaykaysa ti ili ti Dios a nangrugi a mapasamak bayat ti maudi nga al-aldaw.

Imbaga ni Jehova ken propeta Ezequiel a suratanna ti dua a baston. Isuratna iti maysa a baston, “Maipaay ken Juda ken maipaay iti annak ti Israel a kakaduana,” ket iti sabali a baston, “Maipaay ken Jose, ti baston ni Efraim, ken ti intero a balay ti Israel a kakaduana.” Ti dua a baston ket agbalinto a “maymaysa” a baston iti ima ni Ezequiel.—Ezeq. 37:15-17.

 Ania ti irepresentar ti sao nga “Efraim”? Ti umuna nga ari iti makin-amianan a sangapulo a tribu a pagarian, ni Jeroboam, ket manipud iti tribu ni Efraim, a nagbalin a kangrunaan a tribu. (Deut. 33:13, 17; 1 Ar. 11:26) Naggapu daytoy a tribu iti anak ni Jose a ni Efraim. (Num. 1:32, 33) Naawat ni Jose ti naisangsangayan a bendision manipud iti amana a ni Jacob. Gapuna, maitutop a maawagan iti “baston ni Efraim” ti baston a mangirepresentar iti sangapulo a tribu. Idi insurat ni Ezequiel ti padto maipapan iti dua a baston, ti makin-amianan a pagarian ti Israel ket nabayagen a kinautibo dagiti Asirio idi 740 B.C.E. (2 Ar. 17:6) Gapuna, iti dayta a tiempo, kaaduan kadagiti Israelita ti agnanaed iti nagduduma a paset ti Imperio ti Babilonia, a nangsukat iti Imperio ti Asiria.

Idi 607 B.C.E., nakautibo idiay Babilonia dagiti umili iti makin-abagatan a dua a tribu a pagarian ken mabalin a ti dadduma a nabati iti makin-amianan a pagarian. Dagiti ari iti linia ni Juda ti nagturay kadagitoy dua a tribu, ken kaduada dagiti papadi a nagserbi iti templo idiay Jerusalem. (2 Cron. 11:13, 14; 34:30) Maitutop ngarud nga irepresentar ti baston “maipaay ken Juda” ti dua a tribu a pagarian.

Kaano a nagtipon dagitoy dua a simboliko a baston? Idi nagsubli dagiti Israelita idiay Jerusalem tapno bangonenda manen ti templo idi 537 B.C.E. Nagsubli manipud pannakakautibo dagiti pannakabagi ti dua a tribu a pagarian ken ti sangapulo a tribu a pagarian. Saan idin a nabingaybingay dagiti annak ni Israel. (Ezeq. 37:21, 22) Nagkaykaysa manen dagiti Israelita a nagdayaw ken Jehova. Daytoy a panagkakappia ket impadto met idi da propeta Isaias ken Jeremias.—Isa. 11:12, 13; Jer. 31:1, 6, 31.

Ania a nagpateg a kinapudno maipapan iti nadalus a panagdayaw ti naitampok iti daytoy a padto? Isu daytoy: Pagkaykaysaen ni Jehova dagiti agdaydayaw kenkuana. (Ezeq. 37:18, 19) Matungtungpal kadi dayta a kari a panagkaykaysa iti panawentayo? Wen. Nangrugi a matungpal dayta idi 1919 idi in-inut a naorganisar ken nagkaykaysa manen ti ili ti Dios. Saan a nagballigi ti panggep ni Satanas a naan-anay a mangbingaybingay kadakuada.

Iti dayta a tiempo, kaaduan kadagiti nagkaykaysa manen ket addaan iti namnama nga agbalin nga ar-ari ken papadi a kadua ni Jesus idiay langit. (Apoc. 20:6) Iti simboliko a pamay-an, nayarigda iti baston a maipaay ken Juda. Ngem bayat ti panaglabas ti panawen, nangrugi a makikadua kadagitoy a naespirituan a Judio dagiti umad-adu nga addaan iti namnama nga agbiag ditoy daga. (Zac. 8:23) Kaslada iti baston maipaay ken Jose, ken saandanto a makipagturay a kadua ni Kristo.

Agserserbi dagitoy dua a grupo kas ili ni Jehova iti panangituray ti maymaysa nga Ari, ni Jesu-Kristo, a natukoy iti padto kas “adipenko a David.” (Ezeq. 37:24, 25) Inkararag ni Jesus nga amin a pasurotna ‘maymaysada koma amin, a kas iti Amana a naikaykaysa kenkuana ket isu naikaykaysa iti Amana.’ * (Juan 17:20, 21) Impadto met ni Jesus a ti bassit nga ipastoran, dagiti napulotan a pasurotna, ken ti “sabsabali a karnero” ket “agbalindanto a maymaysa nga arban” nga iwanwan ti “maymaysa a pastor.” (Juan 10:16) Nagsayaat ti panangiladawan ni Jesus iti naespirituan a panagkaykaysa ti ili ni Jehova ita aniaman ti namnamada iti masanguanan!

^ par. 6 Makapainteres ti inusar ni Jesus a panagsasaganad idi imbagana dagiti ilustrasion a nagbalin a paset ti pagilasinan ti kaaddana. Umuna, dinakamatna ti maipapan iti “matalek ken masirib nga adipen,” ti bassit a grupo dagiti napulotan a kakabsat a lallaki a mangidaulo iti ili ti Dios. (Mat. 24:45-47) Kalpasanna, nangted kadagiti ilustrasion nga agaplikar a nangnangruna iti amin nga addaan iti nailangitan a namnama. (Mat. 25:1-30) Kamaudiananna, dinakamatna dagiti addaan iti namnama nga agbiag ditoy daga a tumulong kadagiti kakabsat ni Kristo. (Mat. 25:31-46) Kasta met, ti moderno a kaitungpalan ti padto ni Ezequiel umuna nga ipakitana ti mapasamak kadagiti addaan iti nailangitan a namnama. Nupay saan a kanayon nga iladawan ti sangapulo a tribu a pagarian dagiti addaan iti naindagaan a namnama, ti panagkaykaysa a nadakamat iti daytoy a padto ipalagipna kadatayo ti panagkaykaysa dagiti addaan iti namnama nga agbiag ditoy daga ken dagiti addaan iti namnama nga agbiag idiay langit.