Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2016

Agyaman Dagiti Naipakitaan iti Di Kaikarian a Kinamanangngaasi ti Dios

Agyaman Dagiti Naipakitaan iti Di Kaikarian a Kinamanangngaasi ti Dios

‘Immawattayo amin iti di kaikarian a kinamanangngaasi a mainayon iti di kaikarian a kinamanangngaasi.’—JUAN 1:16.

KANTA: 95, 13

1, 2. (a) Isalaysaymo ti ilustrasion ni Jesus maipapan iti makinkukua iti kaubasan. (b) Kasano nga ipakita ti salaysay ti kualidad a kinaparabur ken di kaikarian a kinamanangngaasi?

ITI maysa nga agsapa, napan iti plasa ti makinkua iti maysa a kaubasan tapno agbirok iti tangdananna nga agtrabaho iti kaubasanna. Dagiti nasarakanna immanamongda iti sueldo nga imbagana ket napandan nagtrabaho. Ngem kasapulan ti makinkukua iti kaubasan ti ad-adu pay a trabahador, isu a nagsublisubli iti plasa iti dayta nga aldaw tapno agbirok iti ad-adu pay a lallaki a tangdananna. Imbagana nga agpapada ti itangdanna, uray kadagiti inayabanna idi mumalemen. Idi rumabiin, inayabanna dagiti trabahador tapno suelduanna ida. Agpapada ti intedna a sueldoda, adu man wenno maysa laeng nga oras a nagtrabahoda. Idi naammuan daytoy dagiti immun-una a naayabanna, nagreklamoda. Kinuna ti makinkukua iti kaubasan: ‘Saan kadi nga immanamongkayo iti sueldo nga imbagak? Saan kadi a kalintegak nga ited kadagiti trabahadorko no ania ti kayatko? Umapalkayo kadi ta naparaburak?’—Mat. 20:1-15.

2 Ipalagip ti ilustrasion ni Jesus ti maysa kadagiti kualidad ni Jehova a masansan a madakamat iti Biblia—‘ti di kaikarian a  kinamanangngaasina.’ [1] (Basaen ti 2 Corinto 6:1.) Kasla saan a maikari nga umawat iti kompleto a tangdan dagiti nagtrabaho iti maysa laeng nga oras, ngem impakitaan ida ti makinkukua iti kaubasan iti kasta unay nga asi. Maipapan iti sao a “di kaikarian a kinamanangngaasi,” a naipatarus kas “parabur” iti adu a bersion ti Biblia, insurat ti maysa nga eskolar: “Ti kaipapanan ti sao ket awan bayadna ken di kaikarian a sagut, maysa a banag a naited iti maysa a tao nupay saanna a nagbannogan ken saanna a pakaikarian.”

TI KAPATGAN A SAGUT NI JEHOVA

3, 4. Apay ken kasano nga impakita ni Jehova ti di kaikarian a kinamanangngaasi iti amin a tao?

3 Ibaga ti Biblia ti maipapan iti “awan bayadna a sagut ti di kaikarian a kinamanangngaasi ti Dios.” (Efe. 3:7) Apay ken kasano nga ipaay ni Jehova daytoy nga “awan bayadna a sagut”? No naan-anay a matungpaltayo dagiti kalikaguman ni Jehova, maikaritayo koma iti asina. Ngem saantayo a maaramid dayta. Gapuna, insurat ni Ari Solomon: “Awan ti tao a nalinteg iti daga nga agtultuloy nga agaramid iti naimbag ket saan nga agbasol.” (Ecl. 7:20) Imbaga met ni apostol Pablo: “Amin nagbasol ken agkurang iti dayag ti Dios,” ken “dagiti isupapak ti basol isu ti ipapatay.” (Roma 3:23; 6:23a) Dayta ti maikari kadatayo.

4 Ngem inayat ni Jehova dagiti managbasol a tattao babaen iti awan kaaspingna a di kaikarian a kinamanangngaasi. Imbaonna ditoy daga ti kapatgan a sagutna, ti “bugbugtong nga Anakna,” tapno matay para kadatayo. (Juan 3:16) Gapuna, insurat ni Pablo a ni Jesus ket ‘nakoronaanen iti dayag ken dayaw gapu iti panagsagabana iti ipapatay, tapno ramananna ni patay maipaay iti tunggal tao babaen ti di kaikarian a kinamanangngaasi ti Dios.’ (Heb. 2:9) Wen, “ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”—Roma 6:23b.

5, 6. Ania ti resultana no agpaituraytayo iti (a) basol? (b) di kaikarian a kinamanangngaasi?

5 Kasano a natawid dagiti tattao ti basol ken ipapatay? Ilawlawag ti Biblia: “Babaen ti labsing ti maysa a tao [ni Adan] nagturay ti ipapatay” iti amin nga annak ni Adan. (Roma 5:12, 14, 17) Ngem makaparagsak ta mabalintayo a pilien ti saan nga agpaituray iti basol. No ipakitatayo ti pammati iti subbot a daton ni Kristo, agpapaituraytayo iti di kaikarian a kinamanangngaasi ni Jehova. Kasano? “No sadino nga immadu ti basol, immadu nga ad-adda pay ti di kaikarian a kinamanangngaasi. Iti ania a panggep? Tapno, no kasano a ti basol nagturay kas ari agraman iti ipapatay, kasta met a ti di kaikarian a kinamanangngaasi agturay koma kas ari babaen ti kinalinteg a maipaay iti agnanayon a biag baeten ken Jesu-Kristo.”—Roma 5:20, 21.

6 Managbasoltayo latta, ngem saantayo nga itulok nga iturayannatayo ti basol. No makaaramidtayo iti basol, agkiddawtayo iti pammakawan ni Jehova. Impakdaar ni Pablo kadagiti Kristiano: “Ti basol masapul a di agturay kadakayo, yantangay awankayo iti sidong ti linteg no di ket iti sidong ti di kaikarian a kinamanangngaasi.” (Roma 6:14) Gapuna, agpaituraytayo iti di kaikarian a kinamanangngaasi. Ania ti resultana? Inlawlawag ni Pablo: “Ti di kaikarian a kinamanangngaasi ti Dios . . . isursuronatayo a tallikudan ti di kinanadiosan ken nailubongan a tartarigagay ken agbiag a buyogen ti kinasimbeng ti panunot ken kinalinteg ken nadiosan a debosion iti tengnga daytoy agdama a sistema ti bambanag.”—Tito 2:11, 12.

TI DI KAIKARIAN A KINAMANANGNGAASI “NAYEBKAS ITI NADUMADUMA A PAMAY-AN”

7, 8. Ania ti kayat a sawen ti sasao a “nayebkas iti nadumaduma a pamay-an” ti di kaikarian a kinamanangngaasi ni Jehova? (Kitaen dagiti ladawan iti rugi ti artikulo.)

7 Insurat ni apostol Pedro: “Kas mairukod iti sagut nga inawat ti tunggal maysa, usarenyo  dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios a nayebkas iti nadumaduma a pamay-an.” (1 Ped. 4:10) Ania ti kaipapanan dayta? Aniaman a suot ti pakaipasanguantayo, kabaelannatayo a tulongan ni Jehova tapno maandurantayo dagita. (1 Ped. 1:6) Kanayon nga adda ebkas ti kinamanangngaasi ti Dios a katupag ti tunggal suot.

8 Wen, ti di kaikarian a kinamanangngaasi ni Jehova ket nayebkas iti nadumaduma a pamay-an. Insurat ni apostol Juan: “Immawattayo amin manipud iti kinanaan-anayna, ti mismo a di kaikarian a kinamanangngaasi a mainayon iti di kaikarian a kinamanangngaasi.” (Juan 1:16) Adu a bendision ti magun-odantayo gapu iti nadumaduma nga ebkas ti kinamanangngaasi ni Jehova. Ania dagita?

9. Ania ti magunggonatayo gapu iti di kaikarian a kinamanangngaasi ni Jehova, ken kasano a maipakitatayo nga agyamantayo iti dayta?

9 Mapakawan dagiti basoltayo. Gapu iti di kaikarian a kinamanangngaasi ni Jehova, mapakawan dagiti basoltayo no agbabawi ken itultuloytayo a labanan dagiti pagannayasantayo nga agbasol. (Basaen ti 1 Juan 1:8, 9.) Ti koma asi ti Dios ti mangtignay kadatayo nga agyaman ken mangidayaw kenkuana. Idi nagsurat ni Pablo kadagiti padana a napulotan a Kristiano, kinunana: “[Ni Jehova] inispalnatayo manipud iti autoridad ti sipnget ket inyalisnatayo iti pagarian ti Anak ti ayatna, a babaen kenkuana addaantayo ti pannakaluk-at babaen iti subbot, ti pannakapakawan dagiti basoltayo.” (Col. 1:13, 14) Gapu ta napakawanen dagiti basoltayo, magun-odantayo ti adu a sabali pay a nagsasayaat a bendision.

10. Ania ti tagtagiragsakentayo gapu iti di kaikarian a kinamanangngaasi ti Dios?

10 Maaddaantayo iti nasayaat a relasion iti Dios. Gapu ta managbasoltayo, nayanaktayo a kabusor ti Dios. Binigbig dayta ni Pablo: “Idi datayo ket kabkabusor, naikappiatayo iti Dios babaen ti ipapatay ti Anakna.” (Roma 5:10) Gapu ta naikappiatayon ken Jehova, mabalin a maaddaantayo iti nasayaat a relasion kenkuana. Innaig ni Pablo daytoy a pribilehio iti di kaikarian a kinamanangngaasi ni Jehova. Kinunana kadagiti napulotan a kakabsatna: “Ita ta naideklaratayon a nalinteg kas imbunga ti pammati, tagiragsakentayo ti pannakikappia iti Dios baeten ken Apotayo a Jesu-Kristo, a baeten kenkuana met nagun-odantayo babaen ti pammati ti iyaadanitayo iti daytoy di kaikarian a kinamanangngaasi a pagtakderantayo ita.” (Roma 5:1, 2) Talaga a bendision dayta!

Dagiti ebkas ti di kaikarian a kinamanangngaasi ti Dios: Ti pribilehio a dumngeg iti naimbag a damag (Kitaen ti parapo 11)

11. Babaen kadagiti napulotan, kasano a maibilang a nalinteg dagiti “sabsabali a karnero”?

11 Maibilangtayo a nalinteg. Amintayo ket nayanak a saan a nalinteg. Ngem impadto ni propeta Daniel nga iti tiempo ti panungpalan, “dagidiay addaan iti pannakatarus,” dagiti napulotan a natda, ‘iyegda ti adu iti kinalinteg.’ (Basaen ti Daniel 12:3.) Babaen ti panangasaba ken panangisuro a trabahoda, inyegda ti minilion a “sabsabali a karnero” iti nalinteg a takder iti imatang ni Jehova. (Juan 10:16) Ngem nagbalin laeng a posible dayta gapu iti di kaikarian a kinamanangngaasi ni Jehova. Inlawlawag ni Pablo: “Kas awan bayadna a sagut a maidekdeklarada a nalinteg babaen ti di kaikarian a kinamanangngaasina [ti Dios] baeten iti pannakaluk-at babaen ti subbot nga imbayad ni Kristo Jesus.”—Roma 3:23, 24.

Ti gundaway a panagkararag (Kitaen ti parapo 12)

12. Kasano a nainaig ti panagkararag iti di kaikarian a kinamanangngaasi ti Dios?

12 Makaadanitayo iti trono ti Dios babaen ti kararag. Gapu iti di kaikarian a kinamanangngaasi ni Jehova, mabalintayo ti umadani iti nailangitan a tronona babaen ti kararag. Kinapudnona, inawagan ni Pablo ti trono ni Jehova iti “trono ti di kaikarian a kinamanangngaasi” ken aw-awisennatayo nga umadani “buyogen ti wayawaya nga agsao.” (Heb. 4:16a) Impaay ni Jehova kadatayo daytoy a pribilehio babaen ti Anakna, a “babaen kenkuana addaantayo iti daytoy wayawaya nga  agsao ken iyaadani buyogen ti panagtalek babaen ti pammatitayo kenkuana.” (Efe. 3:12) Talaga a nagsayaat nga ebkas ti di kaikarian a kinamanangngaasi ni Jehova ti kanayon a panagkararag kenkuana.

Matulongan iti umiso a tiempo (Kitaen ti parapo 13)

13. Kasano a ti di kaikarian a kinamanangngaasi ket “tulong iti umiso a tiempo”?

13 Makasaraktayo iti tulong iti umiso a tiempo. Imparegta ni Pablo kadatayo a kanayon nga umadanitayo ken Jehova babaen ti kararag, “tapno makagun-odtayo iti asi ken makasaraktayo iti di kaikarian a kinamanangngaasi kas tulong iti umiso a tiempo.” (Heb. 4:16b) No adda panawen a makapasartayo iti rigat wenno suot, mabalintayo ti agpatulong ken Jehova a kaasiannatayo. Nupay saantayo a maikari, sungbatanna ti kiddawtayo, a masansan a babaen kadagiti kakabsattayo, tapno sikokompiansa a maibagatayo: “Ni Jehova ti katulongak; saanakto nga agbuteng. Ania ti maaramidan kaniak ti tao?”—Heb. 13:6.

14. Ania ti maipaay kadatayo ti di kaikarian a kinamanangngaasi ni Jehova?

14 Maliwliwatayo. Babaen ti di kaikarian a kinamanangngaasi ni Jehova, magun-odantayo ti nagsayaat a bendision a pannakaliwliwa ti mariribukan a pusotayo. (Sal. 51:17) Idi maidaddadanes dagiti Kristiano a taga-Tesalonica, insurat ni Pablo: “Ni Apotayo a Jesu-Kristo a mismo ken ti Dios nga Amatayo, a nagayat kadatayo ken nangted iti agnanayon a liwliwa ken naimbag a namnama babaen ti di kaikarian a kinamanangngaasi, liwliwaenda koma ti puspusoyo ken patibkerendakayo.” (2 Tes. 2:16, 17) Talaga a makaliwliwa a maammuan a siaayat nga aywanannatayo ni Jehova gapu iti aglaplapusanan a kinamanangngaasina!

15. Gapu iti di kaikarian a kinamanangngaasi ti Dios, ania ti namnamatayo?

15 Addaantayo iti namnama a biag nga agnanayon. Gapu ta managbasoltayo, awan ti namnamatayo. (Basaen ti Salmo 49:7, 8.) Ngem inikkannatayo ni Jehova iti nagsayaat a namnama. Inkari ni Jesus kadagiti pasurotna: “Daytoy ti pagayatan ni Amak, a tunggal maysa a makakita iti Anak ken mangwatwat iti pammati kenkuana maaddaan koma iti agnanayon a biag.” (Juan 6:40) Wen, ti namnama  a biag nga agnanayon ket sagut, maysa a nagsayaat nga ebkas ti di kaikarian a kinamanangngaasi ti Dios. Sigurado nga inapresiar dayta ni Pablo. Kinunana: “Ti di kaikarian a kinamanangngaasi ti Dios a mangyeg iti pannakaisalakan iti amin a kita ti tattao naiparangarangen.”—Tito 2:11.

SAANMO A PAGPAMBAR TI DI KAIKARIAN A KINAMANANGNGAASI TI DIOS

16. Kasano a pinagpambar ti dadduma a nagkauna a Kristiano ti di kaikarian a kinamanangngaasi ti Dios?

16 Nupay adu a bendision ti magun-odtayo gapu iti di kaikarian a kinamanangngaasi ni Jehova, saantayo koma a panunoten a panuynoyanna ti amin nga aramid. Adda idi dagiti nagkauna a Kristiano a ‘pagbalbalinenda ti di kaikarian a kinamanangngaasi ti Dios kas pambar maipaay iti nalulok a kababalin.’ (Jud. 4) Mabalin nga impagarup dagitoy a saan a matalek a Kristiano a mabalinda ti agaramid iti basol ket kalpasanna, pakawanen latta ida ni Jehova. Nakarkaro pay, inkagumaanda nga allukoyen dagiti kakabsatda a mangtulad kadakuada. Uray ita, asinoman a mangaramid iti kasta ‘pagpungtotenna ti espiritu ti di kaikarian a kinamanangngaasi.’—Heb. 10:29.

17. Ania a napuersa a balakad ti inted ni Pedro?

17 Ita, inyaw-awan ni Satanas ti dadduma a Kristiano a mangpanunot a kaasian latta ida ti Dios ken saanda a madusa uray no agaramidda iti basol. Ngem uray no pakawanen ni Jehova dagiti agbabbabawi a managbasol, namnamaenna a labanantayo ti pagannayasantayo nga agaramid iti basol. Pinaltiinganna ni Pedro a mangisurat: “Dakayo, ngarud, dungdungnguen, nga addaan iti daytoy naipakpakauna a pannakaammo, agaluadkayo tapno saankayo a mayadayo a maikanunong kadakuada babaen iti biddut dagiti managsalungasing-linteg a tattao ket matnagkayo manipud bukodyo a kinatibker. Saan, no di ket itultuloyyo ti rumang-ay iti di kaikarian a kinamanangngaasi ken pannakaammo iti Apo ken Manangisalakantayo a ni Jesu-Kristo.”—2 Ped. 3:17, 18.

TI DI KAIKARIAN A KINAMANANGNGAASI ADDA KAKUYKUYOGNA A RESPONSABILIDAD

18. Gapu iti di kaikarian a kinamanangngaasi ni Jehova, ania dagiti responsabilidadtayo?

18 Kas naipakitaan iti asi ni Jehova, utangtayo dayta kenkuana ken kadagiti tattao. Usarentayo ngarud dagiti saguttayo a mangidayaw iti Dios ken tumulong kadagiti padatayo a tao. Kasano? Insungbat ni Pablo: “Ngarud, yantangay addaantayo kadagiti sagut nga agduduma sigun iti di kaikarian a kinamanangngaasi a naited kadatayo . . . [no] maysa a ministerio, addatayo koma iti daytoy a ministerio; wenno ti mangisursuro, adda koma iti panangisurona; wenno ti mammagbaga, adda koma iti panamagbagana; . . . ti mangipakpakita iti asi, aramidenna koma dayta a siraragsak.” (Roma 12:6-8) Ti di kaikarian a kinamanangngaasi nga impakita ni Jehova kadatayo tignayennatayo nga agbalin nga okupado a mangasaba, mangisuro iti Biblia kadagiti tattao, mangparegta kadagiti kakabsat, ken mangpakawan iti asinoman a nangpasakit kadatayo.

19. Ania a responsabilidadtayo ti mailawlawag iti sumaruno nga artikulo?

19 Kas naipakitaan iti aglaplapusanan nga ayat ti Dios, matignaytayo koma a mangaramid iti amin a kabaelantayo a ‘naan-anay a mangsaksi iti naimbag a damag ti di kaikarian a kinamanangngaasi ti Dios.’ (Ara. 20:24) Detalyado a mailawlawag dayta a responsabilidad iti sumaruno nga artikulo.

^ [1] (parapo 2) Kitaen ti “Undeserved kindness” iti “Glossary of Bible Terms” iti rebisado a New World Translation.