Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Enero 2017

“Agtalekka ken Jehova ket Aramidem ti Naimbag”

“Agtalekka ken Jehova ket Aramidem ti Naimbag”

“Agtalekka ken Jehova ket aramidem ti naimbag . . . ket makilangenka buyogen ti kinamatalek.”—SAL. 37:3.

KANTA: 133, 63

1. Idi pinarsua ni Jehova ti tao, ania dagiti naisangsangayan nga abilidad nga intedna?

PINARSUA ni Jehova dagiti tattao nga addaan kadagiti naisangsangayan nga abilidad. Inikkannatayo iti abilidad a mangsolbar kadagiti problema ken agplano para iti masanguanan. (Prov. 2:11) Inikkannatayo met iti pannakabalin a mangitungpal kadagiti plano ken kalattayo. (Fil. 2:13) Pinarsuanatayo met nga addaan iti konsiensia—ti abilidad a mangilasin iti naimbag ken dakes—tapno maliklikantayo ti agaramid iti dakes ken mailintegtayo dagiti kamalitayo.—Roma 2:15.

2. Ania ti namnamaen ni Jehova a pangusarantayo kadagiti abilidadtayo?

2 Namnamaen ni Jehova nga usarentayo dagiti abilidadtayo iti umiso a pamay-an. Apay? Gapu ta ay-ayatennatayo, ken ammona nga agbalintayo a naragsak no usarentayo dagita a sagut. Babaen ti Saona, maulit-ulit a palagipannatayo ni Jehova nga usarentayo dagiti abilidadtayo iti naimbag. Kas pagarigan, mabasatayo iti Hebreo a Kasuratan: “Dagiti gakat [wenno, plano] daydiay nasaet  sigurado a mangipaay iti pagsayaatan”; ken “isuamin a masarakan ta imam nga aramiden, aramidem buyogen ti mismo a bilegmo.” (Prov. 21:5; Ecl. 9:10) Iti Griego a Kasuratan, naibalakad kadatayo: “Bayat nga addaantayo iti mainugot a tiempo a maipaay iti dayta, aramidentayo koma ti naimbag kadagiti amin”; ken “kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa.” (Gal. 6:10; 1 Ped. 4:10) Nalawag a kayat ni Jehova nga aramidentayo ti amin a kabaelantayo tapno magunggonaantayo ken ti dadduma.

3. Ania dagiti saan a kabaelan nga aramiden ti tao?

3 Nupay kasta, ammo met ni Jehova nga adda dagiti limitasion ti tao. Saantayo a kabaelan nga ikkaten ti kinaimperpekto, basol, ken ipapatay, ken saantayo met a kabaelan a kontrolen ti sabali a tao ta addaantayo amin iti wayawaya nga agpili. (1 Ar. 8:46) Ken uray adu ti ammo wenno kapadasantayo, kaslatayo latta ubbing no maidilig ken Jehova.—Isa. 55:9.

No adda dagiti problemam, “agtalekka ken Jehova ket aramidem ti naimbag”

4. Ania ti adalentayo iti daytoy nga artikulo?

4 Masapul a kanayon nga agpaiwanwantayo ken Jehova, nga agtalektayo a tulongannatayo ken aramidenna dagiti saantayo a kabaelan nga aramiden. Ngem masapul nga aramidentayo met ti kabaelantayo, nga aramidentayo ti umiso tapno masolbar dagiti parikut ken tapno tumulong iti sabsabali. (Basaen ti Salmo 37:3.) Iti ababa a pannao, masapul nga ‘agtalektayo ken Jehova ken aramidentayo ti naimbag’; masapul a ‘makilangentayo [wenno, agtignaytayo] buyogen ti kinamatalek.’ Maitunos iti daytoy, adalentayo ti ulidan da Noe, David, ken ti dadduma pay a matalek nga adipen ti Dios a nagpannuray ken Jehova ken nagaramid iti umiso. Kas maadaltayo, karaman iti dayta ti panangammo iti nagdumaan ti saanda a kabaelan nga aramiden ken ti kabaelanda nga aramiden ken agtignay maitunos iti dayta.

NO NAPALAWLAWANTAYO ITI KINADAKES

5. Iladawanmo ti nakaipasanguan ni Noe.

5 Nagbiag ni Noe iti lubong a “napno iti kinaranggas” ken immoralidad. (Gen. 6:4, 9-13) Ammona a pagpatinggaen ni Jehova ti kinadakes idi. Ngem nariribukan latta ni Noe gapu iti dakes a mapaspasamak. Iti dayta a situasion, naawatanna nga adda dagiti saanna a kabaelan nga aramiden ken adda met dagiti kabaelanna nga aramiden.

Ibubusor iti panangasabatayo (Kitaen ti parapo 6-9)

6, 7. (a) Ania idi ti saan a kabaelan nga aramiden ni Noe? (b) Ania ti pagpadaan ti kasasaadtayo iti kasasaad idi ni Noe?

 6 Ti saan a kabaelan nga aramiden ni Noe: Nupay simamatalek nga impakaammo ni Noe ti pakdaar ni Jehova, saanna a mapilit nga awaten dagiti managdakdakes dayta a mensahe, ken saanna met a mapapardas ti iyaay ti Layus. Masapul nga agtalek ni Noe a tungpalen ni Jehova ti karina a mangpukaw iti kinadakes, ken patienna nga aramiden ti Dios dayta iti umiso a tiempo.—Gen. 6:17.

7 Agbibiagtayo met iti lubong a napno iti kinadakes, ket ammotayo nga inkari ni Jehova a dadaelenna dayta. (1 Juan 2:17) Saantayo ita a mapilit dagiti tattao a mangawat iti ‘naimbag a damag ti Pagarian.’ Ken saantayo a mapapardas ti iyaay ti “dakkel a rigat.” (Mat. 24:14, 21) Kas ken Noe, masapul a natibker ti pammatitayo, nga agtalektayo a dandanin bumallaet ti Dios. (Sal. 37:10, 11) Kombinsidotayo a saan nga ipalubos ni Jehova a lumbes daytoy dakes a lubong iti uray maysa laeng nga aldaw iti inkeddengna a tiempo a panangdadael iti dayta.—Hab. 2:3.

8. Kasano a nagpokus ni Noe iti kabaelanna nga aramiden? (Kitaen ti ladawan iti rugi ti artikulo.)

8 Ti kabaelan nga aramiden ni Noe: Imbes a maupay iti saanna a maaramid, nagpokus ni Noe iti kabaelanna nga aramiden. Kas “manangaskasaba iti kinalinteg,” simamatalek nga impakdaar ni Noe ti mensahe nga inawatna. (2 Ped. 2:5) Sigurado a nakatulong dayta tapno bumileg ti pammatina. Malaksid iti panangasaba, inusarna met ti pigsa ken panunotna a mangtungpal iti bilin ti Dios kenkuana nga agaramid iti daong.—Basaen ti Hebreo 11:7.

9. Kasano a matuladtayo ni Noe?

9 Kas ken Noe, ikagumaantayo a kanayon nga ‘aduantayo iti aramiden iti trabaho ti Apo.’ (1 Cor. 15:58) Ramanen dayta ti panagibangon ken panangmantener kadagiti lugar a pagdaydayawan, panagboluntario kadagiti asamblea ken kombension, wenno panagserbi iti sanga nga opisina wenno iti remote translation office. Kangrunaanna, kanayon nga okupadotayo a mangasaba ta ammotayo a dayta ti mangpabileg iti namnamatayo iti masanguanan. Kinuna ti maysa a matalek a kabsat a babai: “No isarsaritam dagiti bendision ti Pagarian ti Dios iti sabsabali, madlawmo a talaga nga awan ti namnama a pampanunoten dagiti dumdumngeg kenka ta ibilangda  a permanenten dagiti problemada.” Wen, no mangasabatayo, rumaniag ti panangmatmattayo iti masanguanan ken ad-adda a determinadotayo nga agtultuloy iti lumba ti biag.—1 Cor. 9:24.

NO AGKAMALITAYO

10. Iladawanmo ti nakaipasanguan ni David.

10 Inladawan ni Jehova ni Ari David kas “lalaki a naanamongan iti puso[na].” (Ara. 13:22) Makuna a nagbalin a matalek ni David iti intero a panagbiagna. Ngem adda dagiti gundaway a nakaaramid iti nadagsen a basol. Nakikamalala ken Bat-seba. Nakarkaro pay, pinadasna nga ilimed ti basolna babaen ti panangyurnosna a mapapatay iti paggugubatan ti asawa ni Bat-seba a ni Urias. Impaw-it pay ketdi ni David ken ni Urias ti surat a naglaon iti pamay-an ti pannakapapatayna! (2 Sam. 11:1-21) Ngem naibutaktak met laeng dagiti basol ni David. (Mar. 4:22) Idi napasamak dayta, ania ti inaramidna?

Basol iti napalabas (Kitaen ti parapo 11-14)

11, 12. (a) Kalpasan a nagbasol ni David, ania idi ti saanna a kabaelan nga aramiden? (b) No agbabawitayo kalpasan a nakaaramidtayo iti nadagsen a basol, ania ti namnamaentayo nga aramiden ni Jehova?

11 Ti saan a kabaelan nga aramiden ni David: Saanen a maisubli ni David ti napasamak. Saanna met a maliklikan ti resulta dagiti basolna. Kinapudnona, sinagaba ni David iti intero a panagbiagna ti dadduma a bunga ti basolna. (2 Sam. 12:10-12, 14) Kasapulanna ngarud ti pammati. Masapul idi nga agtalek a gapu ta talaga a nagbabawin, pakawanen ken tulongan ni Jehova a mangsango kadagiti naaramidanna.

12 Gapu ta imperpektotayo, agbasoltayo amin. Saan nga agpapada ti kadagsen dagiti basol. No dadduma, saantayon a maisubli ti napasamak. Mabalin a masapul a sanguentayo lattan dagiti resultana. (Gal. 6:7) Ngem agtalektayo iti kari ni Jehova a no agbabawitayo, tulongannatayo no marigatantayo—uray no datayo met laeng ti makagapu iti pakarigatantayo.—Basaen ti Isaias 1:18, 19; Aramid 3:19.

13. Kasano a nakaungar ni David iti naespirituan?

13 Ti kabaelan nga aramiden ni David: Impalubos ni David nga isu ket tulongan ni Jehova a makaungar iti naespirituan. Kas pagarigan, inawatna ti pannubngar ti maysa a pannakabagi ni Jehova a ni propeta Natan. (2 Sam. 12:13) Nagkararag met ni David ken Jehova, ket impudnona dagiti basolna ken sipapasnek nga impakaasina ken Jehova a maisubli koma ti anamongna kenkuana. (Sal. 51:1-17) Imbes a makonkonsiensia lattan, nakasursuro ni David kadagiti kamalina. Talaga a saannan nga inulit dagiti nadagsen a basolna. Adu a tawen kalpasanna, natay ni David a matalek. Saanto a pulos lipaten ni Jehova ti nagsayaat ken matalek a naaramidanna.—Heb. 11:32-34.

14. Ania ti maadaltayo ken David?

14 Ania ti maadaltayo ken David? No makaaramidtayo iti nadagsen a basol, masapul a sipapasnek nga agbabawitayo ken ipakaasitayo a pakawanennatayo ni Jehova. Masapul nga ipudnotayo dagiti basoltayo kenkuana. (1 Juan 1:9) Masapul met nga umasidegtayo kadagiti panglakayen ta matulongandatayo iti naespirituan. (Basaen ti Santiago 5:14-16.) No surotentayo dayta nga urnos ni Jehova, maipakitatayo nga agtaltalektayo iti karina a paimbagen ken pakawanennatayo. Gapuna, makasursurotayo koma kadagiti kamalitayo, itultuloytayo ti agserbi ken Jehova, ken sikokompiansa a kumitatayo iti masanguanan.—Heb. 12:12, 13.

NO MAIPASANGOTAYO ITI DADDUMA A SITUASION

Problema iti salun-at (Kitaen ti parapo 15)

15. Ania ti masursurotayo ken Anna?

15 Mabalin a mapanunotmo ti dadduma pay a matalek nga adipen idi un-unana a nagtalek ken Jehova ken nagaramid iti umiso.  Kas pagarigan, awanen ti maaramidan ni Anna iti kinalupesna. Ngem nagtalek a liwliwaen ni Jehova, isu a nagtultuloy a nagdaydayaw ken nagkarkararag idiay tabernakulo. (1 Sam. 1:9-11) Saan kadi a nagsayaat a tuladen dayta? No adda problematayo iti salun-at wenno adda pakarigatantayo a saantayo a masolbar, ipabiangtayo ken Jehova dagita, nga agtalektayo a tulongannatayo. (1 Ped. 5:6, 7) Ken agpokustayo iti kabaelantayo nga aramiden tapno magunggonaantayo kadagiti gimong ken iti dadduma pay a naespirituan a sagana.—Heb. 10:24, 25.

Annak a timmallikud ken Jehova (Kitaen ti parapo 16)

16. Ania ti masursuro dagiti nagannak iti lakayen a ni Samuel?

16 Komusta met ngay dagiti matalek a nagannak nga addaan iti annak a timmallikud ken Jehova? Saan a napilit ti lakayen a ni Samuel dagiti adulton nga annakna nga agtalinaed a natulnog kadagiti pagalagadan ti Dios. (1 Sam. 8:1-3) Masapul idi nga ipabiang dayta ni Samuel ken Jehova. Ngem kabaelanna a pagtalinaeden ti kinatarnawna ken paragsaken ti nailangitan nga Amana a ni Jehova. (Prov. 27:11) Kasta met ti kasasaad ti adu a Kristiano a nagannak ita. Agtalekda a kas iti ama iti pangngarig ni Jesus maipapan iti barayuboy nga anak, kanayon a sisasagana ni Jehova a mangawat kadagiti agbabbabawi. (Luc. 15:20) Ikagkagumaan met dagitoy a nagannak ti agtalinaed a nasungdo ken Jehova, a mangnamnamada a babaen iti ulidanda, matignay dagiti annakda nga agsubli ken Jehova.

Pinansial a parikut (Kitaen ti parapo 17)

17. Apay a makapabileg ti ulidan ti napanglaw a balo?

17 Panunotenyo met ti napanglaw a balo idi panawen ni Jesus. (Basaen ti Lucas 21:1-4.) Awan pulos ti maaramidanna iti dakes a bambanag a maar-aramid iti templo. (Mat. 21:12, 13) Ken kasla imposible a sumayaat pay ti panagbiagna. Ngem boluntario a nagidonar iti “dua a babassit a sinsilio,” nupay dayta ti kakaisuna a “pagbiag nga adda kenkuana.” Impakita daytoy matalek a babai ti pudno a panagtalek ken Jehova, nga ammona a no iyun-unana dagiti naespirituan a banag, ipaay ni Jehova dagiti material a kasapulanna. Gapu iti panagtalek ti balo, sinuportaranna dagiti urnos mainaig iti pudno a panagdayaw. Kasta met, agtalektayo a no iyun-unatayo ti Pagarian, siguraduen ni Jehova nga adda kadatayo dagiti kasapulantayo.—Mat. 6:33.

18. Kasano nga impakita ti maysa a kabsat ti kinapositibo?

18 Adu met a kapammatiantayo ita ti nangipakita nga agtaltalekda ken Jehova ken nagaramid iti umiso. Usigentayo ti kapadasan ni Malcolm, a nagtalinaed a matalek agingga iti ipapatayna idi 2015. Bayat ti adu a dekada a panagserbida nga agassawa, adu a problema ti napasaranda. Kinunana: “Adda dagiti gundaway a ditay maibaga ti mapasamak iti biag, ditay masigurado, ken marigatantay pay a mangsango iti dayta. Ngem bendisionan ni Jehova dagidiay agpannuray kenkuana.” Ti balakad ni Malcolm? “Ikararagmo nga agbalinka a nabunga ken aktibo iti panagserbim ken Jehova. Ipamaysam nga aramiden no ania ti kabaelam, saan a ti dimo kabaelan.” *

19. (a) Apay a maikanatad unay ti tekstotayo iti tawen 2017? (b) Kasano a mayaplikarmo ti teksto iti tawen 2017?

19 Dumakes a dumakes daytoy sistema ti bambanag, isu a namnamaentayo met a rumigat a rumigat dagiti pakaipasanguantayo. (2 Tim. 3:1, 13) Gapuna, nakapatpateg a saantayo a pulos ipalubos a dagiti pakarigatan ti mangpasardeng kadatayo. Imbes ketdi, masapul a patibkerentayo ti panagtalektayo ken Jehova bayat nga agpokustayo iti umiso a banag a kabaelantayo nga aramiden. Talaga a maikanatad unay ti tekstotayo iti tawen 2017: “Agtalekka ken Jehova ket aramidem ti naimbag”!—Sal. 37:3.

Tekstotayo iti tawen 2017: “Agtalekka ken Jehova ket aramidem ti naimbag.”—Salmo 37:3