Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ENERO 2016

Ti Espiritu Mangsaksi iti Espiritutayo

Ti Espiritu Mangsaksi iti Espiritutayo

“Ti mismo nga espiritu mangsaksi a buyogen ti espiritutayo a datayo ket annak ti Dios.”—ROMA 8:16.

KANTA: 109, 108

1-3. Ania dagiti pasamak a mangipakita nga espesial nga aldaw ti Pentecostes, ken kasano a kaitungpalan dayta dagiti naipadto iti Kasuratan? (Kitaen ti ladawan iti rugi ti artikulo.)

AGSAPA iti Domingo idi, agarup alas nuebe iti bigat. Espesial dayta nga aldaw kadagiti adda idiay Jerusalem. Aldaw idi ti piesta ken aldaw pay ti sabbath. Iti dayta nga agsapa, naidatonen dagiti sakripisio idiay templo. Magagaran ti amin bayat a ti nangato a padi isagsaganana nga idatag ti daton a mailili a dua a nalebaduraan a tinapay ti baro a bukbukel. (Lev. 23:15-20) Dayta a daton ti pagilasinan a mangrugin ti panagani iti trigo. Tawen 33 C.E. idi ken aldaw idi ti Pentecostes.

2 Bayat a maar-aramid dagitoy idiay templo, adda napatpateg pay a dandanin mapasamak. Maaramid dayta, saan nga idiay templo no di ket iti maysa a makinngato a siled iti siudad. Naguummong ti agarup 120 a Kristiano a ‘nagtultuloy a nagkarkararag.’ (Ara. 1:13-15) Ti dandanin mapasamak kadakuada ket adda pakainaiganna iti ar-aramiden ti nangato a padi iti tunggal Pentecostes ken kaitungpalan met dayta ti impadto ni propeta Joel agarup 800 a tawen sakbay dayta nga aldaw. (Joel 2:28-32; Ara. 2: 16-21) Ania ngata ti nakapatpateg a napasamak?

3 Basaen ti Aramid 2:2-4. Naiparukpok ti nasantuan nga espiritu ti Dios iti dayta a grupo dagiti Kristiano a naguummong iti makinngato a siled. (Ara. 1:8) Nangrugida nga agipadto wenno mangsaksi maipapan kadagiti nakaskasdaaw a bambanag a nakita ken nangngegda. Inlawlawag ni apostol Pedro ti pateg dayta a napasamak iti bunggoy a naguummong kalpasan dayta. Kinunana kadakuada: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti awan bayadna a sagut ti nasantuan nga espiritu.” Iti dayta nga aldaw, agarup 3,000 ti nabautisaran ken immawat iti nasantuan nga espiritu.—Ara. 2:37, 38, 41.

4. (a) Apay a paginteresantayo ti napasamak idi Pentecostes? (b) Ania ti sabali pay a nagpateg a pasamak a mabalin a napasamak iti isu met laeng nga aldaw adu a tawen sakbayna? (Kitaen ti endnote.)

4 Apay a nakapatpateg kadatayo ti Pentecostes 33 C.E.? Sigurado a saan a gapu iti napasamak idiay templo iti Jerusalem. Imbes ketdi, gapu ta ni Jesu-Kristo, kas natantan-ok a Nangato a Padi, tinungpalna dayta a naimpadtuan a pagtuladan. [1] Iti dayta nga aldaw, nangidaton ti nangato a padi ken Jehova iti dua a simboliko a tinapay. Ti naidaton idiay templo a nalebaduraan a tinapay iladawanna dagiti napulotan nga adalan a naggapu iti managbasol a sangatauan tapno agbalinda kas naampon nga annak ti Dios. Gapuna, naluktan ti gundaway para iti dadduma nga “umuna a bungbunga” manipud iti sangatauan a mapanto idiay langit ken mairaman iti Pagarian a mangipaay iti adu a bendision kadagiti natulnog a tattao. (Sant. 1:18; 1 Ped. 2:9) Aniaman ti namnamatayo, mapantayo man idiay langit a kadua ni Jesus wenno agbiag nga agnanayon iti paraiso a daga, dakkel ti epektona iti biagtayo dagiti pasamak iti dayta nga aldaw!

NO KASANO NGA AGBALIN A NAPULOTAN TI MAYSA

5. Kasano nga ammotayo a saan nga agpapada ti pannakapulot dagiti napulotan?

5 No maysaka idi kadagiti adalan nga addaan iti kasla dila nga apuy a nagdisso iti ulom, saanmo a pulos malipatan dayta nga aldaw. Saanka a pulos nga agduadua a napulotanka iti nasantuan nga espiritu, nangruna no inawatmo met ti sagut a panagsao iti nagduduma a lengguahe babaen iti milagro. (Ara. 2:6-12) Ngem amin kadi a napulotan iti nasantuan nga espiritu inawatda dayta iti nakaskasdaaw a pamay-an a kas iti napasamak kadagiti agarup 120 nga adalan? Saan. Dadduma nga adda idi idiay Jerusalem iti dayta nga aldaw ket napulotan iti nasantuan nga espiritu idi nabautisaranda. (Ara. 2:38) Awan ti dila a kasla iti apuy kadagiti uloda. Kasta met, saan nga amin a napulotan a Kristiano ket napulotanda idi nabautisaranda. Napulotan dagiti Samaritano iti nasantuan nga espiritu sumagmamano a tiempo kalpasan a nabautisaranda. (Ara. 8:14-17) Iti naidumduma a pamay-an, napulotan iti nasantuan nga espiritu ni Cornelio ken ti sangakabbalayanna sakbay pay a nabautisaranda.—Ara. 10:44-48.

6. Ania ti awaten ti amin a napulotan, ket ania ti epektona dayta kadakuada?

6 Saan ngarud nga agpapada ti pamay-an ti pannakapulot dagiti napulotan. Mabalin a dagus a nabigbig ti dadduma ti pannakaayabda, in-inut met a nabigbig ti dadduma. Nupay kasta, aniaman a pamay-an ti pannakapulotda, addaan ti tunggal maysa iti kas iti dineskribir ni apostol Pablo: “Kalpasan a namatikayo, naselioankayo iti naikari a nasantuan nga espiritu, a maysa a tanda a pakpakauna iti tawidtayo.” (Efe. 1:13, 14) Daytoy a naisangsangayan a panagtignay ti nasantuan nga espiritu ket agbalin a pakauna a bayad, maysa a garantia (wenno, maysa a kari) ti banag a dumteng. Masigurado ti maysa a Kristiano  nga isu ket napulotan gapu iti daytoy a tanda a naawatna.—Basaen ti 2 Corinto 1:21, 22; 5:5.

7. Ania ti masapul nga aramiden ti tunggal napulotan a Kristiano tapno maawatna ti gunggonana idiay langit?

7 Ti kadi maysa a Kristiano nga immawat iti daytoy a tanda siguradon a mapan idiay langit? Saan. Masiguradona laeng ti pannakaayabna. Awatenna laeng ti gunggonana idiay langit no agtalinaed a matalek ken Jehova. Kastoy ti panangilawlawag ni Pedro: ‘Iti daytoy a rason, kakabsat, ad-adda pay nga aramidenyo ti amin a kabaelanyo tapno pagbalinenyo a sigurado ti pannakaayab ken pannakapiliyo; ta no itultuloyyo nga aramiden dagitoy a banag saankayto a pulos mapaay. Iti kinapudnona, no kasta sibabaknang a maipaayto kadakayo ti iseserrek iti agnanayon a pagarian ti Apo ken Manangisalakantayo a ni Jesu-Kristo.’ (2 Ped. 1:10, 11) Gapuna, masapul a tunggal napulotan a Kristiano ikagumaanna ti agtalinaed a matalek. No saan nga agmatalek, awanto ti pateg ti pannakaayabna wenno pannakapilina a mapan idiay langit.—Heb. 3:1; Apoc. 2:10.

KASANO A MAAMMUAN TI MAYSA NGA ISU KET NAPULOTAN?

8, 9. (a) Apay a marigatan ti adu a tattao a mangtarus no ania ti mapasamak no mapulotan ti maysa? (b) Kasano a maammuan ti maysa no isu ket naawis a mapan idiay langit?

8 Adu kadagiti adipen ti Dios ita ti marigatan a mangtarus iti pamay-an ti pannakapulot. Normal laeng dayta ta saanda a napadasan. Pinanggep ti Dios nga agbiag nga agnanayon ditoy daga dagiti tattao. (Gen. 1:28; Sal. 37:29) Ti pannakapili ti dadduma a mapan idiay langit tapno agturay kas ar-ari ken papadi ket saan a gagangay. Naidumduma dayta nga urnos. Daytoy a pannakaayab ket mangyeg iti dakkel a panagbalbaliw iti panagpampanunot, kababalin, ken namnama ti maysa a napulotan.—Basaen ti Efeso 1:18.

9 Ngem kasano a maammuan ti maysa nga isu ket napulotan wenno inawatna ti naisangsangayan a tanda? Nalawag a makita ti sungbat kadagiti sasao ni Pablo kadagiti napulotan a kakabsat idiay Roma a “naayaban tapno agbalin a sasanto.” Kinunana kadakuada: “Saanyo nga inawat ti espiritu ti pannakaadipen a mamataud manen iti buteng, no di ket inawatyo ti espiritu ti pannakaampon kas annak, a babaen iti dayta nga espiritu ipukkawtayo: ‘Abba, Ama!’ Ti mismo nga espiritu mangsaksi a buyogen ti espiritutayo a datayo ket annak ti Dios.” (Roma 1:7; 8:15, 16) Ngarud, babaen ti nasantuan nga espiritu, pagbalinen ti Dios a nalawag iti dayta a tao nga isu ket naawis a makipagtawid iti Pagarian.—1 Tes. 2:12.

10. Ania ti kayat a sawen ti 1 Juan 2:27 a saan a kasapulan ti maysa a napulotan a Kristiano nga adda mangisuro kenkuana?

10 Dagidiay immawat iti daytoy nga espesial nga awis manipud iti Dios saandan a kasapulan ti sabali a mangpaneknek. Saanda a kasapulan ti sabali a mangpatalged a napulotanda. Ipasigurado ni Jehova dayta kadakuada. Kastoy ti imbaga ni apostol Juan kadagiti napulotan a Kristiano: “Addaankayo iti pannakapulot manipud iti daydiay nasantuan; addaankayo amin iti pannakaammo.” Kinunana pay: “No maipapan kadakayo, ti pannakapulot nga inawatyo kenkuana agtalinaed kadakayo, ket saanyo a kasapulan ti asinoman a mangisuro kadakayo; ngem, no kasano a ti pannakapulotyo manipud kenkuana isursuronakayo maipapan iti amin a bambanag, ket pudno ken saan nga ulbod, ket kas iti insurona kadakayo, agtalinaedkayo a naikaykaysa kenkuana.” (1 Juan 2:20, 27) Kasapulan met dagiti napulotan a Kristiano ti naespirituan a panangiwanwan a kas iti amin a Kristiano. Ngem saanda a kasapulan ti asinoman a mangpatalged iti pannakapulotda. Ti kabilgan a puersa iti uniberso ti mangipasigurado iti dayta kadakuada!

 ‘MAYANAKDA MANEN’

11, 12. Ania ti mabalin nga isaludsod ti maysa a napulotan a Kristiano, ngem ania ti saanna a pulos pagduaduaan?

11 No mapulotan iti nasantuan nga espiritu ti maysa a Kristiano, adu a panagbalbaliw ti mapasaranna. Inawagan dayta ni Jesus kas ‘pannakayanak manen’ wenno pannakayanak manipud ngato. [2] (Juan 3:3, 5) Kinunana pay: “Dika agsiddaaw gapu ta imbagak kenka, Masapul a mayanakkayo manen. Ti angin agpuyupoy iti sadinoman a kayatna, ket mangngegmo ti awerna, ngem saanmo nga ammo no sadino ti paggapuanna ken no sadino ti papananna. Kasta met ti tunggal maysa a nayanak manipud iti espiritu.” (Juan 3:7, 8) Nalawag a saan a naan-anay a mailawlawag daytoy a pannakaayab kadagidiay saan a nakapadas iti dayta.

12 Mabalin nga isaludsod dagiti napulotan: ‘Apay a siak ti napili ket saan a ti sabali?’ Mabalin a pagduaduaanda pay ketdi no maikarida. Ngem saanda a pagduaduaan a naawisda. Maragragsakanda ken naimpusuan nga agyamanda. Mariknada ti kas iti narikna ni Pedro idi kinunana: “Bendito koma ti Dios ken Ama ni Apotayo a Jesu-Kristo, ta maitunos iti naindaklan nga asina impaayannatayo iti baro a pannakayanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo.” (1 Ped. 1:3, 4) No mabasa dagiti napulotan dayta, masiguradoda a personal a makisarsarita kadakuada ti nailangitan nga Amada.

13. Kasano nga agbalbaliw ti panagpampanunot ti maysa no mapulotan iti nasantuan nga espiritu, ken ania ti makagapu iti dayta a panagbalbaliw?

13 Sakbay nga inawat dagiti napulotan a Kristiano daytoy a pammaneknek manipud iti espiritu ti Dios, ipatpategda idi ti namnama nga agbiag ditoy daga. Segseggaanda ti tiempo a dalusan ni Jehova ti daga, ket kayatda a karamanda iti dayta a nagsayaat a masanguanan. Mabalin nga inladawanda pay ketdi nga ab-abrasaenda dagiti napagungar nga ipatpategda. Namnamaenda pay ti agnaed iti imbangonda a balay ken mangan iti bunga dagiti mulada. (Isa. 65:21-23) Apay a nagbaliw ti panunotda? Saan a gapu ta saandan a kayat ti agbiag ditoy daga. Saan a nagbaliw ti kapanunotanda gapu iti emosional a problema. Saanda a nauma ditoy daga a kasla makasikor wenno makabannog ti agbiag nga agnanayon ditoy daga wenno gapu laeng ta kayatda nga ammuen ti kasasaad ti biag idiay langit. Imbes ketdi, nagbaliwda gapu iti panagtignay ti espiritu ti Dios a saan laeng a nangayab wenno nangawis kadakuada no di ket binalbaliwanna met ti panagpampanunot ken namnamada.

14. Ania ti panagrikna dagiti napulotan iti biagda ditoy daga?

14 Maikunatayo kadi ngarud a kayat dagiti napulotan ti matay? Kuna ni Pablo: ‘Iti kinapudnona, dakami nga adda itoy a tolda umasugkami, a madagdagsenan; agsipud ta saanmi a kayat nga uksoben dayta, no di ket ikawes ti sabali, tapno daydiay mortal alimonen koma ti biag.’ (2 Cor. 5:4) Saan a naawan ti interesda nga agbiag a kasla kayatdan ti matay. Imbes ketdi, magusgustuanda nga usaren ti biagda iti tunggal aldaw nga agserbi ken Jehova a kadua dagiti gagayyem ken kabagianda. Ngem aniaman ti ar-aramidenda, silalagipda iti nangayed a namnamada iti masanguanan.—1 Cor. 15:53; 2 Ped. 1:4; 1 Juan 3:2, 3; Apoc. 20:6.

NAAYABANKA KADI?

15. Ania dagiti banag a saan a mangpaneknek a napulotan iti nasantuan nga espiritu ti maysa?

15 Nalabit pampanunotem no maysaka kadagiti naawis. No ipagarupmo a kasta, usigem dagitoy a napateg a saludsod: Mariknam  kadi a nakaregregtaka iti ministerio? Naanepka kadi a mangad-adal iti Sao ti Dios ken pagay-ayatmo nga ammuen “ti nauneg a bambanag ti Dios”? (1 Cor. 2:10) Mariknam kadi a talaga a bembendisionan ni Jehova ti ministeriom? Magusgustuam kadi nga aramiden ti pagayatan ni Jehova? Mariknam kadi a responsabilidadmo a tulongan iti naespirituan ti sabsabali? Napadasam kadin a personal a tinulongannaka ni Jehova? No wen ti sungbatmo kadagitoy a saludsod, kayatna kadi a sawen a naawiska a mapan idiay langit? Saan. Apay? Gapu ta saan laeng a dagiti napulotan ti makarikna kadagita. Agpapada ti panagtignay ti espiritu ni Jehova kadagiti amin nga adipenna, aniaman ti namnamada. Kinapudnona, no agduaduaka no inawatmo met laeng ti nailangitan a namnama, dayta a mismo ti mangipakita a saanmo nga inawat dayta. Saan a pagduaduaan dagiti inawis ni Jehova no naawisda wenno saan! Ammoda dayta!

16. Kasano nga ammotayo a saan nga amin nga immawat iti espiritu ti Dios ket naawis a mapan idiay langit?

16 Mabasatayo iti Kasuratan nga adu dagiti matalek nga adipen ti Dios a tinignay ti nasantuan nga espiritu ngem awan ti namnamada nga agbiag idiay langit. Maysa kadakuada ni Juan a Mammautisar. Pinadayawan pay ketdi ni Jesus ngem imbagana a saan a karaman ni Juan iti Pagarian idiay langit. (Mat. 11:10, 11) Tinignay met ti nasantuan nga espiritu ni David. (1 Sam. 16:13) Ti nasantuan nga espiritu ti timmulong kenkuana tapno maawatanna dagiti nauneg a bambanag maipapan ken Jehova ken nangiwanwan kenkuana a mangisurat iti dadduma a paset ti Biblia. (Mar. 12:36) Ngem idi Pentecostes, kinuna ni Pedro a ni David “saan nga immuli iti langlangit.” (Ara. 2:34) Nakaskasdaaw ti panagtignay ti nasantuan nga espiritu kadakuada, ngem saan a nangted kadakuada iti naisangsangayan a pammaneknek a napilida nga agbiag idiay langit. Saan a kaipapanan dayta a saanda a maikari wenno saanda a naan-anay a matalek. Kayatna laeng a sawen a pagungarento ida ni Jehova iti paraiso a daga.—Juan 5:28, 29; Ara. 24:15.

17, 18. (a) Ania a gunggona ti segseggaan ti kaaduan nga adipen ti Dios ita? (b) Ania dagiti saludsod a mausig iti sumaruno nga artikulo?

17 Kaaduan kadagiti adipen ti Dios ita ket saan a naayaban a mapan idiay langit. Addaanda iti namnama a kas kada David, Juan a Mammautisar, ken ti dadduma pay a matalek nga adipen ti Dios idi un-unana. Kas ken Abraham, magagaranda nga agbalin nga iturayan ti Pagarian. (Heb. 11:10) Iti daytoy a tiempo ti panungpalan, bassit laengen ti nabati ditoy daga a kameng dagiti napili nga agbiag idiay langit. (Apoc. 12:17) Kaipapanan dayta a natayen ti kaaduan a kameng ti 144,000 ken addadan idiay langit.

18 Gapuna, kasano a matmatan dagiti addaan iti namnama nga agbiag ditoy daga ti maysa nga agkuna nga addaan iti namnama nga agbiag idiay langit? No adda kakongregasionmo a mangrugi a makiraman iti emblema ti Memorial, kasano ti panangtratom kenkuana? Maseknanka kadi iti iyaadu ti bilang dagidiay agkunkuna a naayaban a mapan idiay langit? Masungbatan dagitoy a saludsod iti sumaruno nga artikulo.

^ [1] (parapo 4) Posible a ti Pentecostes ti kaibatogan ti tiempo a naited ti Linteg idiay Sinai. (Ex. 19:1) Ngarud, no kasano a nausar ni Moises a mangipasidong iti Israel iti Linteg ti tulag iti dayta nga aldaw, kasta met nga iti isu met laeng nga aldaw, impasidong ni Jesu-Kristo ti baro a nasion wenno ti naespirituan nga Israel iti baro a tulag.

^ [2] (parapo 11) Para iti kanayonan a pannakailawlawag ti kaipapanan ti pannakayanak manen, kitaen ti Pagwanawanan, Abril 1, 2009, p. 3-11.