Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Disiembre 2016

 PAKASARITAAN TI BIAG

Panagbalin nga “Amin a Bambanag iti Amin a Kita ti Tattao”

Panagbalin nga “Amin a Bambanag iti Amin a Kita ti Tattao”

“No agpabautisarka, panawankayo!” Kasta ti impangta ni tatangko ken ni Nanang idi 1941. Ngem nagpabautisar latta ni Nanang kas simbolo ti dedikasionna ken Apo Jehova. Pimmanaw ngarud ni Tatang, ket walo laeng ti tawenko idi.

SAKBAY dayta, interesadoak idin iti kinapudno iti Biblia. Adda dagiti naibatay iti Biblia a publikasion a naawat ni Nanang, ket magusgustuak dagiti linaonda, nangruna dagiti ladawan. Saan idi a kayat ni Tatang nga isuro kaniak ni Nanang dagiti maad-adalna. Nupay kasta, adu dagiti saludsodko isu nga iyadalannak idi ni Nanang no awan ni Tatang. Idi agangay, inkeddengko metten nga idedikar ti biagko ken Jehova. Nabautisaranak idiay Blackpool, England idi 1943. Agtawenak idi iti sangapulo.

PANANGRUGI ITI PANAGSERBI KEN JEHOVA

Manipud idin, kanayonkamin nga agkadua ken Nanang a mangasaba. Agusarkami iti ponograpo a mangidanon iti mensahe ti Biblia. Napadiwakal daytoy ken agdagsen iti 4.5 a kilo. Panunotenyo laengen ti maysa a bassit nga ubing a kas kaniak a mangbagbagkat iti dayta!

Kayatkon ti agpayunir idi 14 ti tawenko. Kuna ni Nanang a kasaritak nga umuna ti servant to the brethren (maawagan itan iti manangaywan iti sirkito). Insingasingna nga agsursuroak iti dadduma a  trabaho tapno masuportarak ti panagpayunirko. Kasta ngarud ti inaramidko. Kalpasan ti dua a tawen a panagtrabahok, nakisaritaak iti sabali a manangaywan iti sirkito maipapan iti panagpayunir. Kinunana: “Wen, mayat dayta!”

Isu nga idi Abril 1949, inlakomi ken Nanang dagiti alikamenmi iti pagab-abanganmi sa immakarkami idiay Middleton, nga asideg iti Manchester, ket nagpayunirkami sadiay. Kalpasan ti uppat a bulan, nangpiliak iti kaduak nga agpayunir. Insingasing ti sanga nga opisina nga umakarkami iti kabbaro a kongregasion idiay Irlam. Nagpayunir met ni nanangko iti sabali a kongregasion a kaduana ti maysa a kabsat a babai.

Uray no 17 laeng ti tawenko idi, mangidadauloakon ken ti kaduak kadagiti gimong ta manmano ti kualipikado a kakabsat iti kabbaro a kongregasion nga ayanmi. Idi agangay, naawisak nga umakar iti Buxton Congregation, ta manmano ti agibumbunannag ken agkasapulan iti tulong. Kanayon nga imbilangko a pannakasanay dagidi a kapadasak para kadagiti responsabilidad iti masanguanan.

Ipakpakaammomi ti palawag publiko idiay Rochester, New York, idi 1953

Idi 1951, impasak ti aplikasionko para iti Watchtower Bible School of Gilead. Ngem idi Disiembre 1952, naayabanak nga agsoldado. Nakisaritaak a saandak koma nga iraman gapu ta maysaak a ministro, ngem saan a pinatgan ti korte ket nasentensiaanak a maibalud iti innem a bulan. Idi addaak iti  pagbaludan, naawatko ti imbitasion para iti maika-22 a klase ti Gilead. Isu nga idi Hulio 1953, nagbiaheak nga agpa-New York babaen ti barko a Georgic.

Apagsangpetko, naatenderak ti 1953 a New World Society Assembly. Kalpasanna, nagluganak iti tren a mapan idiay South Lansing, New York, nga ayan ti eskuelaan. Awan idi ti makukuartak ta karuruarko iti pagbaludan. Idi nakadissaagakon, nagluganak iti bus nga agpa-South Lansing, ket dimmawatak iti padak a pasahero iti 25 cents a pagpletek.

PANNAKAIBAON ITI SABALI A PAGILIAN

Dakkel ti naitulong ti Gilead School tapno ‘agbalinak nga amin a bambanag iti amin a kita ti tattao’ iti panagmisionerok. (1 Cor. 9:22) Tallokami—ni Paul Bruun, Raymond Leach, ken siak—a naibaon iti Pilipinas. Adu a bulan nga inuraymi ti visa-mi. Kalpasanna, naglugankami iti barko a limmabas idiay Rotterdam, Mediterranean Sea, Suez Canal, Indian Ocean, Malaysia, ken Hong Kong—47 nga aldaw nga addakami iti taaw! Nakasangpetkami met laeng iti Manila idi Nobiembre 19, 1954.

Kaduak ti padak a misionero a ni Raymond Leach a nagbiahe iti barko iti 47 nga aldaw a mapan iti Pilipinas

Masapul a makibagaykamin kadagiti tattao ken lugar, ken sursuruenmi pay ti lengguahe. Nupay kasta, damo a naibaonkami iti maysa a kongregasion iti Quezon City, nga adu kadagiti residente ti agsasao iti Ingles. Isu a kalpasan ti innem a bulan, bassit laeng ti nasursuromi a Tagalog. Ti simmaruno a nakaibaonanmi ti nagbalin a solusion dayta a problema.

Maysa nga aldaw idi Mayo 1955, idi kagapgapumi iti pangasabaan, nasangpetanmi ken Brother Leach dagiti naisobre a surat iti kuartomi. Naammuanmi a maibaonkami kas manangaywan iti sirkito. Agtawenak laeng idi iti 22, ngem daytoy nga annongen ti nangted kaniak iti gundaway nga ‘agbalin nga amin a bambanag iti amin a kita ti tattao.’

Panagpalawag iti maysa nga asamblea sirkito iti lengguahe a Bicol

Kas pagarigan, imparangko ti umuna a palawagko iti publiko kas manangaywan iti sirkito iti sango ti maysa a tiendaan iti maysa a purok. Idi agangay, naammuak a kaugalian gayam idi iti Pilipinas a maiparang ti palawag publiko iti publiko a lugar! No bisitaek idi dagiti kongregasion iti sirkito, agpalawagak kadagiti dap-ayan, palengke, sango ti munisipio, pagbasketbolan, parke, ken kaaduanna, kadagiti kalsada. Naminsan, iti siudad ti San Pablo, diak nakapagpalawag iti sango ti palengke ta nagtudo iti napigsa isu nga insingasingko kadagiti mangidadaulo a kakabsat nga idiay lattan Kingdom Hall ti pagpalawagak. Idi nalpasen, dinamagda no maireport dayta kas palawag publiko ta saan met a naangay iti publiko a lugar!

Kanayon idi nga iti balay dagiti kakabsat ti pagdagusak. Nanumo laeng ti balayda ngem kanayon a nadalus. Masansan nga iti datar a naaplagan iti ikamen ti pagturogak. Awan ti rikep dagiti banyo isu a nasursurok ti nanakman nga agdigus iti ruar. Jeep ken bus ti paglugluganak, ken no dadduma, agbarko wenno agbangkaak a mapan iti dadduma nga isla. Iti amin a tawen a panagserbik, diak pulos naaddaan iti lugan.

Nakatulong ti panangasaba ken panangbisitak kadagiti kongregasion tapno masursurok ti ag-Tagalog. Awan ti pormal a klase a nagsursuruak, ngem nakasursuroak babaen ti panangdengngegko kadagiti kakabsat iti panangasaba ken gimong. Kayatdak a tulongan dagiti kakabsat, ket maap-apresiarko ti panangisuroda ken ti kinaanusda.

Bayat ti panaglabas ti panawen, masapul manen nga agaramidak iti ad-adu pay a panagbalbaliw gapu kadagiti baro nga annongen. Idi 1956, bimmisita ni Brother Nathan Knorr, ket nadutokanak a mangipagna  iti pammalubos ti gobierno para iti nasional a kombension. Awan pay idi ti kapadasak isu nga adda dagiti naayat a timmulong kaniak. Kalpasan ti nakurang a makatawen, adda manen nayurnos a nasional a kombension ket bimmisita ni Brother Frederick Franz, a naggapu iti sangalubongan a hedkuarter. Iti panagserbik kas manangaywan iti kombension, nakitak a mannakibagay ni Brother Franz kadagiti tattao. Naragsakan dagiti kakabsat idi nakitada a naka-barong Tagalog ni Brother Franz bayat nga agpalpalawag.

Kasapulak manen ti makibagay idi nadutokanak kas manangaywan iti distrito. Iti daydi a tiempo, masansan nga ipabuyami ti The Happiness of the New World Society iti publiko a lugar. No dadduma, umarak dagiti insekto ta magustuanda ti silaw ti projector ket maurnongda iti unegna. Marigatankamton a mangdalus! Saan a nalaka ti mangyurnos iti panagpabuya, ngem makaparagsak a makita ti nagsayaat a reaksion dagiti tattao bayat a maam-ammuanda ti trabaho ti organisasion ni Jehova iti intero a lubong.

Sinugsogan dagiti padi a Katoliko dagiti lokal nga opisial tapno saandakami a palubosan nga agasamblea. No dadduma, batingtingenda ti kampana ti simbaan no asideg iti simbaan ti pagasambleaan. Ngem rimmang-ay latta ti trabaho, ket adu a tattao kadagita a lugar ti agdaydayaw itan ken Jehova.

 ANNONGEN NGA AGKASAPULAN ITI AD-ADU PAY A PANAGBALBALIW

Idi 1959, nakaawatak iti surat a mangibagbaga a nadutokanak nga agserbi iti sanga nga opisina. Adu manen ti masapul a sursuruek. Idi agangay, naibaonak a bumisita iti dadduma a pagilian (maaw-awagan idi iti zone visit). Iti maysa kadagita a panagbisita, naam-ammok ni Janet Dumond, a misionera idiay Thailand. Nagsinsinnuratkami iti sumagmamano a tiempo ket nagkasarkami idi agangay. Nasurok a 51 a tawenen a naragsak nga agserserbikami kas agassawa.

Kaduak ni Janet iti maysa kadagiti adu nga isla iti Pilipinas

Naaddaanak iti pribilehio a mangbisita kadagiti adipen ni Jehova iti 33 a pagilian. Agyamyamanak ta nakatulong dagiti immun-una a pribilehiok a mangisagana kaniak a makibagay iti nagduduma a karit iti pannakilangen iti agduduma a kita ti tattao! Nakatulong dagitoy a panagbisita tapno ad-adda pay a lumawa ti pannakaawatko ken tapno makitak no kasano ti panangipateg ni Jehova iti amin a kita ti tattao.—Ara. 10:34, 35.

Sigsiguraduenmi a regular a makapangasabakami

PANANGARAMID ITI PANAGBALBALIW AGINGGA ITA

Nakaragragsak ti makipagserbi kadagiti kakabsat iti Pilipinas! Dandani maminsangapulo nga ad-adun ti agibumbunannag ita ngem idi simmangpetak ditoy. Agserserbikami pay laeng ken Janet iti sanga nga opisina ti Pilipinas ditoy Quezon City. Uray no nasurok nga 60 a tawenkon ditoy, masapul a nakasaganaak latta a mangaramid iti panagbalbaliw aniaman ti kiddawen ni Jehova. Gapu kadagiti nabiit pay a panagbalbaliw iti organisasion, masapul nga agtalinaedkami a nalaka a makibagay kadagiti kakabsat ken bayat nga agserserbikami iti Dios.

Maragragsakankami iti iyaadu dagiti Saksi

Inkagumaanmi nga awaten ti aniaman a nakitami a pagayatan ni Jehova, ket dayta pay laeng ti karagsakan a panagbiag. Pinagreggetanmi met nga aramiden dagiti kasapulan a panagbalbaliw ken pagserbian dagiti kakabsat. No la ket ta pagayatan ni Jehova, determinadokami nga agbalin nga “amin a bambanag iti amin a kita ti tattao.”

Agserserbikami pay laeng iti sanga nga opisina ditoy Quezon City