Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2016

Nawayawayaankayo Babaen ti Di Kaikarian a Kinamanangngaasi

Nawayawayaankayo Babaen ti Di Kaikarian a Kinamanangngaasi

“Ti basol masapul a di agturay kadakayo, yantangay [addakayo] . . . iti sidong ti di kaikarian a kinamanangngaasi.”—ROMA 6:14.

KANTA: 2, 61

1, 2. Apay a napateg kadagiti Saksi ni Jehova ti Roma 5:12?

IPAPANMO a kayatmo nga ilista dagiti teksto a pagaammo ken masansan nga us-usaren dagiti Saksi ni Jehova. Karaman kadi ti Roma 5:12 kadagiti umuna a mapanunotmo? Panunotem no namin-anon nga inusarmo ti sentensia a: “No kasano a babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”

2 Maulit-ulit a nausar dayta a teksto iti libro nga Ania a Talaga ti Isursuro ti Biblia? Bayat nga iyad-adalmo daytoy kadagiti annakmo wenno iti dadduma, mabalin nga ibasbasam kadakuada ti Roma 5:12 no ilawlawagmo ti panggep ti Dios iti daga, ti subbot, ken ti kasasaad dagiti natay—kapitulo 3, 5, ken 6. Ngem kasano kasansan a pampanunotem ti Roma 5:12 no maipapan iti relasionmo ken Jehova, iti ar-aramidmo, ken iti namnamam iti masanguanan?

3. Ania a kinapudno maipapan iti basol ti masapul nga akseptarentayo?

3 Siempre, masapul nga akseptarentayo a managbasoltayo amin. Inaldaw nga agkamalitayo. Ngem masiguradotayo nga  ammo ti Dios a naaramidtayo iti tapok, ken sisasagana a mangipakita iti asi kadatayo. (Sal. 103:13, 14) Inraman ni Jesus daytoy a kiddawna iti Dios iti modelo a kararag: “Pakawanennakami iti basbasolmi.” (Luc. 11:2-4) Gapuna, saantay koman a sangkapanunot dagiti basol a pinakawanen ti Dios. Ngem magunggonaantayo no panunotentayo no kasano a mabalinnatayo a pakawanen ken no kasano a pinakawannatayo.

NAPAKAWAN BABAEN TI DI KAIKARIAN A KINAMANANGNGAASI

4, 5. (a) Ania ti makatulong tapno ad-adda a maawatantayo ti Roma 5:12? (b) Ania ti matuktukoy a “di kaikarian a kinamanangngaasi” iti Roma 3:24?

4 Adda dagiti napateg a maammuantayo kadagiti kapitulo a masarakan iti asideg iti imbaga ni apostol Pablo iti Roma 5:12, nangruna iti kapitulo 6. Makatulong dayta tapno maawatantayo no kasano a mapakawannatayo ni Jehova. Mabasatayo iti kapitulo 3: “Amin nagbasol . . . , ket kas awan bayadna a sagut a maidekdeklarada a nalinteg babaen ti di kaikarian a kinamanangngaasina baeten iti pannakaluk-at babaen ti subbot nga imbayad ni Kristo Jesus.” (Roma 3:23, 24) Ania ti kayat a sawen ni Pablo idi imbagana ti ‘di kaikarian a kinamanangngaasi’? Inusarna ti Griego a sao, a sigun iti maysa a reperensia, adda kaipapananna a “maysa a pabor a sibubulos a naaramid, a saanna a kalikaguman wenno inanamaen ti subad.” Ditay mateggedan ken pakaikarian dayta.

5 Kinuna ti eskolar a ni John Parkhurst: “No madakamat dayta [ti Griego a sao] mainaig iti Dios wenno iti Kristo, masansan a tumukoy iti awan bayadna ken di kaikarian a pabor wenno kinamanangngaasida iti pannakasubbot ken pannakaisalakan ti tao.” Gapuna, maitutop ti nausar iti Baro a Lubong a Patarus a “di kaikarian a kinamanangngaasi.” Ngem kasano nga impakita ti Dios dayta a di kaikarian a kinamanangngaasi? Ken ania ti pakainaigan dayta iti namnamam ken iti relasionmo kenkuana? Kitaentayo.

6. Ania ti kangrunaan a magunggona dagiti tattao gapu iti di kaikarian a kinamanangngaasi ti Dios?

6 Ni Adan ti matuktukoy a “maysa a tao” a makagapu no apay a ‘simrek iti lubong’ ti basol ken ipapatay. Isu a “babaen ti labsing ti maysa a tao nagturay ti ipapatay kas ari.” Imbaga pay ni Pablo a ti “kinaruay ti di kaikarian a kinamanangngaasi” ti Dios ket naipaay “babaen ti maysa a persona, ni Jesu-Kristo.” (Roma 5:12, 15, 17) Nagsayaatan ti amin a tao dayta a di kaikarian a kinamanangngaasi. “Babaen ti panagtulnog ti maysa a persona [ni Jesus] adu ti maibilangto a nalinteg.” Kinapudnona, ti di kaikarian a kinamanangngaasi ti Dios ket agresulta iti “agnanayon a biag baeten ken Jesu-Kristo.”—Roma 5:19, 21.

7. Apay a makuna a kinamanangngaasi ken saantayo a pakaikarian ti impaay ti Dios a subbot?

7 Saan nga obligado ni Jehova a mangibaon iti Anakna ditoy daga tapno ipaayna ti subbot. Maysa pay, kas imperpekto ken managbasol a tattao, saantayo a maikari iti subbot nga impaay ti Dios ken ti Anakna a ni Jesus tapno mapakawantayo. Gapuna, ti pannakapakawantayo ken ti namnamatayo nga agbiag nga agnanayon ket talaga a kinamanangngaasi a saantayo a pakaikarian. Ipategtayo koma ngarud ti sagut ti Dios a di kaikarian a kinamanangngaasi ken inaldaw nga agbiagtayo maitunos iti dayta.

PANAGYAMAN ITI DI KAIKARIAN A KINAMANANGNGAASI TI DIOS

8. Ania ti di umiso a pampanunoten ti dadduma maipapan kadagiti basolda?

8 Gapu ta imperpektotayo ken annaknatayo ni Adan, agkamali, makaaramidtayo iti dakes, ken agbasoltayo. Ngem dakkel a kamali no abusuentayo ti di kaikarian a kinamanangngaasi ti Dios. Kasano? No pampanunotentayo ti kastoy: ‘Uray no agbasolak iti Dios, okey laeng. Pakawanennak  met ni Jehova.’ Makapaladingit ta kasta ti panagrasrason ti dadduma a Kristiano, uray idi sibibiag pay ti dadduma nga apostol. (Basaen ti Judas 4.) Mabalin a saantayo met ketdi a maibaga dayta, ngem mabalin a naimulan ti kasta a kapanunotan kadatayo wenno mabalin a maimula dayta ket dumakkel.

9, 10. Kasano a nawayawayaan ni Pablo ken ti dadduma iti basol ken ipapatay?

9 Impaganetget ni Pablo a masapul a parutentayo daytoy a kapanunotan: ‘Maawatannak ti Dios. Palabsenna dagiti kamalik.’ Apay? Gapu ta, kas iti insurat ni Pablo, dagiti Kristiano ket ‘natay no maipapan iti basol.’ (Basaen ti Roma 6:1, 2.) Kasano a maibaga a ‘natayda no maipapan iti basol’ no sibibiagda pay met ditoy daga?

10 Babaen ti subbot, pinakawan ti Dios ni Pablo ken ti dadduma idi kaaldawanna. Imparukpokna met kadakuada ti nasantuan nga espiritu ken pinilina ida nga agbalin a naespirituan nga annakna ket naaddaanda iti namnama nga agbiag idiay langit. No agtalinaedda a matalek, agbiagda idiay langit ken makipagturayda ken Kristo. Ngem dinakamat ni Pablo a ‘natayda no maipapan iti basol’ nupay sibibiagda ken agserserbida pay laeng idi ditoy daga. Inyarigna dayta iti napasamak ken Jesus, a natay kas tao ngem nagungar kas immortal nga espiritu idiay langit. Saanen a naiturayan ni patay ni Jesus. Kasta met kadagiti napulotan a Kristiano. Makuna a ‘natayda no mainaig iti basol ngem sibibiag no mainaig iti Dios babaen ken Kristo Jesus.’ (Roma 6:9, 11) Saanen a kas iti dati ti panagbiagda. Saandan nga agpapaituray kadagiti dakes a tarigagayda. Nataydan iti dati a kabibiagda.

11. Kasano a datayo nga addaan iti namnama nga agbiag iti Paraiso ket maibaga a “natay no maipapan iti basol”?

11 Datayo ngay? Sakbay a nagbalintayo a Kristiano, masansan nga agbasoltayo, a mabalin a ditay pampanunoten ti kadakes wenno kakaro dagiti ar-aramidentayo iti imatang ti Dios. Kaslatayo “ad-adipen iti kinarugit ken kinakillo.” Maibaga nga ‘ad-adipennatayo ti basol.’ (Roma 6:19, 20) Kalpasanna, naammuantayo ti kinapudno, nagbalbaliwtayo, nagdedikartayo iti Dios, ken nagpabautisartayo. Manipud idin, kayattayon ti agbalin a “natulnog manipud iti puso” kadagiti pannursuro ken pagannurotan ti Dios. ‘Nawayawayaantayo iti basol’ ken ‘nagbalintayo nga ad-adipen iti kinalinteg.’ (Roma 6:17, 18) Gapuna, maibaga met a ‘nataytayo no maipapan iti basol.’

12. Ania dagiti pagpilian ti tunggal maysa kadatayo?

12 Panunotem no kasano nga agaplikar kenka daytoy imbaga ni Pablo: “Dikay palubosan ti basol nga agtultuloy nga agturay kas ari iti mortal a bagbagiyo tapno agtulnogkayo koma kadagiti derrepda.” (Roma 6:12) Mabalin nga ‘ipalpalubostayo ti basol nga agtultuloy nga agturay’ no aramidentayo ti aniaman nga idiktar ti imperpekto a bagitayo. Gapu ta mabalin a ‘maipalubostayo’ wenno mabalin a malapdantayo nga agturay ti basol, isu nga ania a talaga ti kayattayo nga aramiden? Isaludsodmo iti bagim: ‘Ipalpalubosko kadi no dadduma nga iturongnak ti imperpekto a bagi wenno panunotko iti di umiso a dalan ket surotek dayta? Wenno natayakon no mainaig iti basol? Sibibiagak kadi no mainaig iti Dios babaen ken Kristo Jesus?’ Makita dayta no talaga nga agyamyamantayo iti di kaikarian a kinamanangngaasi nga impakita ti Dios babaen ti panangpakawanna kadatayo.

KABAELAM TI MANGABAK

13. Ania ti mangipakita a kabaelantayo a tallikudan ti basol?

13 Tinallikudan dagiti adipen ni Jehova ti ‘bunga nga adda idi kadakuada’ sakbay a naam-ammo, inayat, ken nagserbida iti Dios. Mabalin a karaman iti dati a panagbiagda dagiti  ‘bambanag nga ibainda itan’ ken mabalin koma a maikari a pakatayanda. (Roma 6:21) Ngem nagbalbaliwda. Kasta idi ti adu a taga-Corinto a dinakamat ni Pablo. Dadduma idi kadakuada ti managrukbab iti idolo, mannakikamalala, homoseksual, mannanakaw, mammartek, ken dadduma pay. Ngem ‘naugasan’ ken ‘nasantipikarda.’ (1 Cor. 6:9-11) Kasta met idi ti dadduma iti kongregasion ti Roma. Imbaga ni Pablo kadakuada: “Dikay met itultuloy nga iparang dagiti kamengyo iti basol kas ig-igam ti kinakillo, no di ket iparangyo ti bagbagiyo iti Dios a kas dagidiay sibibiag manipud kadagiti natay, kasta met dagiti kamengyo iti Dios kas ig-igam ti kinalinteg.” (Roma 6:13) Masigurado ni Pablo a kabaelanda ti agtalinaed a nadalus iti naespirituan ket agtultuloy a magunggonaanda iti di kaikarian a kinamanangngaasi ti Dios.

14, 15. Ania ti isaludsodtayo iti bagitayo maipapan iti ‘panagtulnog manipud iti puso’?

14 Kasta met ita. Mabalin a dadduma a kakabsat ti kas idi kadagiti taga-Corinto. Ngem nagbalbaliwda met. Tinallikudanda ti dakes a panagbiagda ket ‘naugasanda.’ No kasta man wenno nakarkaro pay ti biagmo idi, komusta itan ti relasionmo iti Dios? Gapu ta magun-odmon ti di kaikarian a kinamanangngaasi ken pammakawan ti Dios, determinadoka kadi a saanen nga agpaadipen iti basol? Wenno ‘iparangmon ti bagim iti Dios kas sibibiag manipud kadagiti natay’?

15 Tapno maaramidtayo dayta, masapul a saantayo nga aramiden dagiti nadagsen a basol nga inaramid ti dadduma a taga-Corinto. Masapul nga aramidentayo dayta no ibagatayo nga inawattayon ti di kaikarian a kinamanangngaasi ti Dios ken ‘saantayon nga agpapaituray iti basol.’ Ngem naimpusuan met kadi nga agtultulnogtayo babaen ti panangaramidtayo iti amin a kabaelantayo a mangliklik iti basol nga ipapan ti dadduma a saan unay a serioso?—Roma 6:14, 17.

16. Apay a maibagatayo a saan laeng a ti panangaramid kadagiti serioso a basol ti masapul a liklikantayo kas Kristiano?

16 Usigentayo ti maipapan ken apostol Pablo. Masiguradotayo a saan a nagaramid iti serioso a basol a nadakamat iti 1 Corinto 6:9-11. Ngem inaminna a makaar-aramid latta iti kamali. Insuratna: “Nainlasaganak, a nailako iti sidong ti basol. Ta saanko nga ammo ti ar-aramidek. Ta no ania ti kayatko, daytoy ket saanko nga an-annuroten; no di ket ti kagurak isu ti aramidek.” (Roma 7:14, 15) Ipakita dayta nga adda dadduma pay nga ibilang ni Pablo a basol, ket lablabananna met dagita. (Basaen ti Roma 7:21-23.) Aramidentayo koma met dayta bayat nga ikagkagumaantayo ti ‘agtulnog manipud iti puso.’

17. Apay a kayatmo ti agbalin a napudno?

17 Kas pagarigan, usigentayo ti panagbalin a napudno. Masapul nga agbalin a napudno dagiti Kristiano. (Basaen ti Proverbio 14:5; Efeso 4:25.) Ni Satanas ti “ama ti kinaulbod.” Natay ni Ananias ken ni baketna gapu ta nagulbodda. Ditay ida kayat a tuladen isu a liklikantayo ti agulbod. (Juan 8:44; Ara. 5:1-11) Ngem dayta laeng kadi ti ramanen ti panagbalin a napudno? Kinapudnona, ti panagbalintayo a napudno ipakitana no talaga nga agyamyamantayo iti di kaikarian a kinamanangngaasi ti Dios.

18, 19. Apay a ti panagbalin a napudno ket saan laeng a basta saan a panagulbod?

18 Ti panagulbod ket ti saan a panangibaga iti pudno. Ngem kayat ni Jehova a saan laeng a ti agdadata a panagulbod ti liklikan dagiti adipenna. Imparegtana idi kadagiti Israelita: “Rebbeng nga agbalinkayo a nasantuan, agsipud ta siak ni Jehova a Diosyo nasantuanak.” Kalpasanna, imbagana ti dadduma a pamay-an no kasano ti agbalin a nasantuan: “Dikay agtakaw, ket dikay mangallilaw, ket dikay makilangen a siuulbod [iti] asinoman.” (Lev. 19:2, 11) Uray no saan  a direkta nga agulbod ti maysa, mabalin latta nga agul-ulbod no allilawenna ti dadduma babaen ti saanna a panangibaga iti pudno.

Likliklikantayo kadi a talaga ti agulbod ken mangallilaw? (Kitaen ti parapo 19)

19 Kas pagarigan, imbaga ti maysa nga empleado iti amona wenno iti katrabahuanna a saan nga agtrabaho iti sumaruno nga aldaw wenno agawid a masapa ta adda “medical” appointment-na. Ngem dumagas met la gayam iti botika wenno mapan agbayad iti doktor. Ti talaga a rason no apay a saan a simrek ket tapno masapa a makalugan wenno tapno makapanda a sangapamiliaan iti baybay. Mabalin met a talaga nga adda “medical” appointment-na, ngem maibagam kadi a talaga nga imbagana ti agpayso? Wenno mangal-allilaw? Mabalin nga adda ammom a kasta met laeng nga inggagara a panangallilaw. Nalabit tapno saanda a madusa wenno tapno magunggonaanda uray no sabali ti nagbannog. Uray no saan a direkta a nagulbod, saan kadi a kuna ti Dios: “Dikay mangallilaw”? Panunotem met ti kuna ti Roma 6:19: “Iparangyo dagiti kamengyo kas ad-adipen ti kinalinteg a maipaay iti kinasanto.”

20, 21. No ap-apresiarentayo ti di kaikarian a kinamanangngaasi ti Dios, ania ti aramidentayo?

20 Kinapudnona, no apresiarentayo ti di kaikarian a kinamanangngaasi ti Dios, saantayo laeng a basta liklikan ti pannakikamalala, panagbartek, wenno dadduma pay a basol nga inaramid ti dadduma a taga-Corinto. No awatentayo ti di kaikarian a kinamanangngaasi ti Dios, saantayo laeng a liklikan ti seksual nga imoralidad no di ket labanantayo met ti panagtarigagay kadagiti naalas a paglinglingayan. No adipennatayo ti kinalinteg, saantayo laeng a liklikan ti panagbartek no di ket liklikantayo met ti nalabes a panaginum uray no saantayo a mabartek. Mabalin a marigatantayo a manglaban kadagita; ngem kabaelantayo ti mangabak.

21 Determinadotayo a mangliklik saan laeng a kadagiti nadagsen a basol no di ket uray kadagiti kamali a saan met unay a nakaro. Saantayo a naan-anay a maaramid dayta. Ngem ikagumaantayo koma nga aramiden, kas iti inaramid ni Pablo. Imparegtana kadagiti kakabsatna: “Dikay palubosan ti basol nga agtultuloy nga agturay kas ari iti mortal a bagbagiyo tapno agtulnogkayo koma kadagiti derrepda.” (Roma 6:12; 7:18-20) No labanantayo ti amin a kita ti basol, talaga nga ap-apresiarentayo ti di kaikarian a kinamanangngaasi ti Dios babaen ken Kristo.

22. Anianto ti maipaay kadagiti talaga a mangap-apresiar iti di kaikarian a kinamanangngaasi ti Dios?

22 Babaen iti di kaikarian a kinamanangngaasi ti Dios, napakawan ken agtultuloy a mapakawan dagiti basoltayo. Kas panagyamantayo, labanantayo koma ti tendensia a mangaramid iti ibilang ti dadduma a nalag-an a basol. Impaganetget ni Pablo ti gunggona a maipaayto kadatayo: “Ita, agsipud ta nawayawayaankayon iti basol ngem nagbalinkayo nga ad-adipen ti Dios, aw-awatenyon ti bungayo no maipapan iti kinasanto, ket ti panungpalanna agnanayon a biag.”—Roma 6:22.