Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2016

Gunggonaan ni Jehova Dagiti Napasnek a Mangsapsapul Kenkuana

Gunggonaan ni Jehova Dagiti Napasnek a Mangsapsapul Kenkuana

“Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”—HEB. 11:6.

KANTA: 85, 134

1, 2. (a) Ania ti pakainaigan ti ayat iti pammati? (b) Ania dagiti saludsod nga usigentayo?

AY-AYATENTAYO ni Jehova “agsipud ta isu ti immuna a nagayat kadatayo.” (1 Juan 4:19) Kas maysa nga ebkas ti nadungngo a panagayatna, ni Jehova ti immuna a nagtignay tapno bendisionanna dagiti matalek nga adipenna. No naun-uneg ti panagayattayo iti Diostayo, natibtibker met ti pammatitayo, saan laeng nga iti kaaddana, no di ket mamatitayo met a sigurado a gunggonaanna dagiti ipatpategna.—Basaen ti Hebreo 11:6.

2 Ti maysa kadagiti kangrunaan a galad ni Jehova ket ti panagbalinna a mananggunggona. Saan a makuna a naan-anay ti pammatitayo no saantayo a kombinsido a gunggonaan ti Dios dagiti napasnek a mangsapsapul kenkuana, ta “ti pammati isu ti sigurado a panangsegsegga iti bambanag nga in-inanamaen.” (Heb. 11:1) Wen, ramanen ti pammati ti sigurado a panangsegsegga kadagiti bendision nga inkari ti Dios. Ngem kasano a magunggonaantayo iti dayta? Kasano a ginunggonaan ni Jehova dagiti adipenna idi ken ita? Kitaentayo.

 IKARKARI NI JEHOVA A BENDISIONANNA DAGITI ADIPENNA

3. Ania a kari ti mabasatayo iti Malakias 3:10?

3 Inkeddeng ni Apo Jehova a gunggonaanna dagiti matalek nga adipenna, isu nga aw-awisennatayo a gun-odentayo dagiti bendisionna. Mabasatayo: “‘Subokendak, pangngaasiyo, . . . ’ kinuna ni Jehova ti buybuyot, ‘no saankonto a luktan kadakayo dagiti aribengbeng ti langlangit ket pudno a mangibukbokakto kadakayo iti bendision agingga nga awanen panagkasapulan.’” (Mal. 3:10) Maipakitatayo a talaga nga agyamyaman ken ap-apresiarentayo dayta no awatentayo ti sipaparabur nga ituktukon ni Jehova.

4. Apay a makapagtalektayo iti imbaga ni Jesus iti Mateo 6:33?

4 Impasigurado ni Jesus kadagiti adalanna a no iyun-unada ti Pagarian, tulongan ida ti Dios. (Basaen ti Mateo 6:33.) Inkari dayta ni Jesus ta ammona a kanayon a mapagtalkan ni Jehova. Ammo ni Jesus a kanayon a matungpal dagiti kari ti Dios. (Isa. 55:11) Masiguradotayo met a no natibker ti pammatitayo ken Jehova, tungpalenna ti karina a: “Saankanto a pulos panawan ket saankanto a pulos baybay-an.” (Heb. 13:5) Gapu iti dayta, ad-adda a makapagtalektayo iti imbaga ni Jesus maipapan iti panangyun-una iti Pagarian ken iti kinalinteg ti Dios.

Imbaga ni Jesus kadagiti adalanna a magunggonaanto dagiti panagsakripisioda (Kitaen ti parapo 5)

5. Apay a makapabileg iti pammati ti insungbat ni Jesus ken Pedro?

5 Naminsan, insaludsod ni apostol Pedro ken Jesus: “Pinanawanmi ti amin a bambanag ket sinurotdaka; ania nga agpayso ti addanto a maipaay kadakami?” (Mat. 19:27) Imbes nga ungtanna ni Pedro iti dayta a saludsod, imbaga ni Jesus kadagiti adalanna a magunggonaanto dagiti panagsakripisioda. Makipagturayto kenkuana idiay langit dagiti  matalek nga apostol ken ti dadduma. Ngem adda dagiti gunggona uray ita. Kinuna ni Jesus: “Tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.” (Mat. 19:29) Adayo nga ad-adu ti bendision a maawat dagiti adalanna ngem iti aniaman nga isakripisioda. Saan kadi a napatpateg dagiti naespirituan nga amma, inna, kakabsat, ken annak ngem iti aniaman a pinanawan wenno insakripisiotayo para iti Pagarian?

ANGKLA MAIPAAY ITI KARARUA

6. Apay nga inkari ni Jehova a gunggonaanna dagiti agdaydayaw kenkuana?

6 Inkari ni Jehova a gunggonaanna dagiti agdaydayaw kenkuana, isu a tulonganna ida no masubok ti kinatarnawda. Malaksid kadagiti nagadu a naespirituan a bendision ita, padpadaanan met dagiti matalek nga adipen ni Jehova ti ad-adu pay a bendision iti masanguanan. (1 Tim. 4:8) Wen, no talaga a kombinsidotayo a ni Jehova “agbalin a mananggunggona kadagidiay sipapasnek a mangsapsapul kenkuana,” itultuloytayo a pagtalinaeden a natibker ti pammatitayo.—Heb. 11:6.

7. Kasano nga agserbi kas angkla ti namnamatayo?

7 Iti Sermon iti Bantay, imbaga ni Jesus: “Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta iti kasta a pamay-an indadanesda dagiti mammadto nga immun-una ngem dakayo.” (Mat. 5:12) Malaksid iti nailangitan a gunggona, ti namnama a biag nga agnanayon iti paraiso a daga ket maysa pay a panggapuantayo nga ‘agrag-o ken aglagto.’ (Sal. 37:11; Luc. 18:30) Idiay man langit wenno ditoy daga ti namnamatayo, agserbi dayta kas “sinipete [wenno, angkla] maipaay iti kararua, agpadpada a sigurado ken natibker.” (Heb. 6:17-20) No kasano a makatulong ti angkla tapno saan a mayallo-allon wenno mayanud ti barko bayat ti bagyo, makatulong met ti natibker a panangnamnama iti gunggonatayo tapno saan a mayallo-allon ti emosion, panunot, ken espiritualidadtayo. Makatulong dayta tapno maibturantayo dagiti pakarigatan.

8. Kasano a ti namnamatayo makissayanna dagiti pakadanagantayo?

8 Kabaelan ti naibatay iti Biblia a namnamatayo a kissayan dagiti pakadanagantayo. Dagiti kari ti Dios ket kasla sapsapo a mangbang-ar iti maburburiboran a pusotayo. Sigurado a malag-anantayo no ‘ipalladawtayo ti dadagsentayo ken Jehova,’ ta ammotayo a ‘saranayennatayo’! (Sal. 55:22) Makapagtalektayo a kabaelan ti Dios nga ipaay ti ‘nawadwadwad unay a manglab-aw iti amin a bambanag a dawaten wenno panunotentayo.’ (Efe. 3:20) Panunotem dayta—saan la a nawadwad wenno nawadwadwad no di ket “nawadwadwad unay”!

9. Kasanotayo kasigurado iti pamendision ni Jehova?

9 Tapno maawattayo ti gunggona, masapul a naan-anay ti pammatitayo ken Jehova ken agtulnogtayo kenkuana. Kinuna ni Moises iti nasion ti Israel: “Di bumurong a bendisionannakanto ni Jehova iti daga nga ited kenka ni Jehova a Diosmo kas tawid tapno tagikuaem, no la ket umimdengkanto a di bumurong iti timek ni Jehova a Diosmo tapno annadam nga aramiden amin daytoy a bilin nga ibilbilinko kenka ita nga aldaw. Ta pudno a bendisionannakanto ni Jehova a Diosmo kas inkarina kenka.” (Deut. 15:4-6) Talaga kadi nga agtalekka a bendisionannaka ni Jehova no agtultuloy a matalekka nga agserbi kenkuana? Adu ti panggapuam nga agtalek.

NI JEHOVA TI NANGGUNGGONA KADAKUADA

10, 11. Kasano a ginunggonaan ni Jehova ni Jose?

10 Naisurat ti Biblia para iti pagsayaatantayo. Naglaon dayta iti adu a pagarigan no kasano  a ginunggonaan ti Dios dagiti matalek nga adipenna. (Roma 15:4) Ni Jose ti maysa kadakuada. Gapu iti panagkukumplot dagiti kakabsatna ken ti panangallilaw ti asawa ti amona, naibalud idiay Egipto. Binaybay-an kadin ti Diosna? Saan a pulos! “Ni Jehova nagtultuloy nga adda ken Jose ket nangipapaay kenkuana iti naayat a kinamanangngaasi . . . Ni Jehova adda ken Jose ken no ania idi ti ar-aramidenna pinagbalin ni Jehova a naballigi.” (Gen. 39:21-23) Iti laksid ti narigat a kasasaadna, inan-anusan ni Jose nga inuray ti tulong ti Diosna.

11 Kalpasan ti mano a tawen, winayawayaan ni Faraon ni Jose ken pinagbalinna daytoy napakumbaba nga adipen kas maikadua a kangatuan nga agturay iti Egipto. (Gen. 41:1, 37-43) Idi naganak ti asawa ni Jose, “pinanagananna ti inauna iti Manases, agsipud ta, kas panangadaw kenkuana, ‘Ti Dios pinalipatna kaniak ti isuamin a riribukko ken ti intero a balay ni amak.’ Ket pinanagananna ti maikadua iti Efraim, agsipud ta, kas panangadaw kenkuana, ‘Ti Dios pinagbalinnak a nabunga iti daga ti kinapimpimanko.’” (Gen. 41:51, 52) Gapu ta nagtalinaed ni Jose a nasungdo iti Dios, nabendisionan ket naispal dagiti Israelita ken dagiti Egipcio. Makitatayo a binigbig ni Jose a ni Jehova ti nanggunggona ken nangbendision kenkuana.—Gen. 45:5-9.

12. Kasano a nagtalinaed a matalek ni Jesus iti laksid dagiti pakarigatan?

12 Kasta met, nagtalinaed ni Jesu-Kristo a natulnog iti Dios iti laksid dagiti nakasubokan ti pammatina, ket nagunggonaan. Ania ti nakatulong kenkuana? Kuna ti Sao ti Dios: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain.” (Heb. 12:2) Sigurado a naragsakan ni Jesus a nangidaydayaw iti nagan ti Dios. Kanayonanna, nagun-odna ti anamong ni Amana ken naikkan iti adu a nagsasayaat a pribilehio. Kuna ti Biblia a “nagtugaw iti makannawan ti trono ti Dios.” Ken mabasatayo pay: “Intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.”—Fil. 2:9.

SAAN A LIPATEN NI JEHOVA DAGITI ARAMIDTAYO

13, 14. Ania ti marikna ni Jehova kadagiti ar-aramidentayo para kenkuana?

13 Masiguradotayo nga ipatpateg ni Jehova ti amin a panangikagumaantayo nga agserbi kenkuana. Maawatanna ti limitasiontayo wenno ti panagduaduatayo iti kabaelantayo nga aramiden. Maawatanna no limitado ti maaramidantayo gapu iti problema iti pinansial, salun-at, wenno emosion. Ken makapagtalektayo nga apresiaren la unay ni Jehova ti panagregget dagiti adipenna nga agtalinaed a matalek kenkuana.—Basaen ti Hebreo 6:10, 11.

14 Laglagipentayo met a mabalintayo ti umasideg iti “Managdengngeg iti kararag” ken agtalektayo a tulongannatayo kadagiti problematayo. (Sal. 65:2) “Ti Ama dagiti nadungngo nga asi ken ti Dios ti amin a liwliwa” ikkannatayo iti agliplippias nga emosional ken naespirituan a tulong a kasapulantayo. Mabalin nga ipaayna dayta babaen kadagiti kapammatiantayo. (2 Cor. 1:3) Maragsakan ti puso ni Jehova no tulongantayo ti dadduma. “Daydiay mangipakpakita ti pabor iti daydiay nanumo agpapautang ken Jehova, ket ti panangtratona Isu supapakannanto kenkuana.” (Prov. 19:17; Mat. 6:3, 4) Gapuna, no siaayat a tulongantayo dagiti marigrigatan, ibilang ni Jehova dagita a kasla nagpautangtayo kenkuana. Ket ikarkarina nga isu a mismo ti manggunggona iti nasayaat nga inaramidtayo.

DAGITI GUNGGONA ITA KEN ITI AGNANAYON

15. Ania dagiti gunggona a padpadaanam? (Kitaen ti ladawan iti rugi ti artikulo.)

15 Adda namnama dagiti Kristiano a napulotan iti espiritu nga umawat iti “korona ti  kinalinteg, nga itdento . . . ti Apo, ti nalinteg nga ukom, kas maysa a gunggona iti dayta nga aldaw.” (2 Tim. 4:7, 8) Ngem dina kayat a sawen a lugika no sabali a namnama ti ited ti Dios kenka. Minilion a “sabsabali a karnero” ni Jesus ti mangpadpadaan iti gunggona a biag nga agnanayon iti paraiso a daga. Sadiay, “pudno a maragsakandanto iti napalalo iti kinaruay ti talna.”—Juan 10:16; Sal. 37:11.

16. Ania ti makaliwliwa a linaon ti 1 Juan 3:19, 20?

16 No dadduma, mabalin a mariknatayo a nagbassit ti maar-aramidantayo, wenno no maragsakan met laeng ni Jehova kadagiti panagreggettayo. Mabalin a pagduaduaantayo pay ketdi no maikaritayo a magunggonaan. Ngem ditay koma liplipatan a “ti Dios dakdakkel ngem kadagiti pusotayo ket ammona ti amin a bambanag.” (Basaen ti 1 Juan 3:19, 20.) Subadanna ti amin a naimpusuan a panagserbi kenkuana a gapu iti pammati ken ayat, kasanoman kabassit dayta iti panangmatmattayo.—Mar. 12:41-44.

17. Ania ti dadduma a gunggona a tagtagiragsakentayo ita?

17 Uray iti daytoy nakadakdakes a maudi nga al-aldaw ti lubong ni Satanas, bembendisionan ni Jehova dagiti adipenna. Sigsiguraduenna a rumang-ay ti naespirituan a kasasaad dagiti agdaydayaw kenkuana, ket naisangsangayan dayta a panagrang-ay. (Isa. 54:13) Kas inkari ni Jesus, ipapaay ni Jehova kadatayo ti gunggona ita babaen ti panangipalubosna nga agbalintayo a paset ti naayat a naespirituan a panagkakabsat, maysa a sangalubongan a pamilia. (Mar. 10:29, 30) Kanayonanna, naisangsangayan ti talna ti panunot, kinakontento, ken ragsak dagiti napasnek a mangsapsapul iti Dios.—Fil. 4:4-7.

18, 19. Ania ti makuna dagiti adipen ni Jehova iti gunggona a maaw-awatda?

18 Mapaneknekan dayta dagiti adipen ni Jehova iti intero a lubong. Kas pagarigan, kuna ni Bianca a taga-Germany: “Diak masubadan ti panangtultulong ni Jehova kaniak kadagiti problemak ken ti inaldaw a panangsaranayna kaniak. Nakadakdakes ken nakagulgulo ti lubong. Ngem no ar-aramidek ti pagayatan ni Jehova, natalged ti riknak. Kada adda isakripisiok para kenkuana, maminsangagasut nga ad-adu ti isubadna.”

19 Kitaentayo met ti kapadasan ti kabsat a ni Paula a taga-Canada nga agtawen iti 70. Marigrigatan gapu iti sakitna iti duri a maawagan iti spina bifida. “Saan a gapu ta diak unayen makakuti, saanak metten a makapangasaba,” kunana. “Gunggundawayak ti nadumaduma a pamay-an ti panangasaba, kas iti panangasaba babaen iti telepono ken di pormal a panangasaba. Tapno maparegtaak, kanayon nga itugtugotko ti notebook-ko a naglaon kadagiti teksto ken sasao a nagustuak kadagiti publikasiontayo. Inawagak dayta iti ‘Ti Notebook a Mangbibiag Kaniak.’ Temporario laeng dagiti pakaupayan no agpokustayo kadagiti kari ni Jehova. Kanayon nga adda ni Jehova a tumulong kadatayo, aniaman ti situasiontayo.” Mabalin a naiduma ti situasionmo kada Bianca ken Paula. Ngem mabalin nga adda dagiti malagipmo a pasamak no kasano a binendisionannaka ni Jehova ken uray ti dadduma. Nagsayaat la ketdi no utobem no kasano a bembendisionannaka ni Jehova ita ken no kasano a bendisionannaka iti masanguanan!

20. Ania ti manamnamatayo no itultuloytayo ti matalek ken amin-kararua a panagserbitayo ken Jehova?

20 Saanmo koma a liplipatan a “dakkel a gunggona” ti maawatmo gapu kadagiti naimpusuan ken napasnek a kararagmo iti Dios. Masiguradom a no ‘naaramidmon ti pagayatan ti Dios, awatemto ti kaitungpalan ti kari.’ (Heb. 10:35, 36) Itultuloytayo koma ngarud a patibkeren ti pammatitayo ken amin-kararua nga agserbitayo ken Jehova. Kabaelantayo dayta, ta ammotayo nga awatentayto ken Jehova ti maitutop a gunggona.—Basaen ti Colosas 3:23, 24.