Mapan iti linaonna

Mapan iti listaan dagiti linaonna

Uksoben ti Daan a Personalidad ken Saanen nga Isuot Dayta

Uksoben ti Daan a Personalidad ken Saanen nga Isuot Dayta

“Uksobenyo ti daan a personalidad agraman dagiti aramidna.”​—COL. 3:9.

KANTA: 83, 129

1, 2. Ania dagiti kapaliiwan maipapan kadagiti Saksi ni Jehova?

ADU a tattao ti nagkomento maipapan kadagiti nagsasayaat a galad dagiti adipen ni Jehova. Kas pagarigan, insurat ti autor a ni Anton Gill maipapan kadagiti kakabsattayo iti Nazi Germany: “Dagiti Saksi ni Jehova ti kangrunaan nga indadanes dagiti Nazi. . . . Idi 1939, innem a ribu kadakuada ti adda [kadagiti kampo konsentrasion].” Intuloy ti autor a nupay nakaro ti pannakaidadanesda, nagibtur dagiti Saksi ken impakitada a “matalek ken kalmadoda” ken “natarnaw ken nagkaykaysada.”

2 Iti nabiit pay, kasta met ti napaliiw ti dadduma idiay South Africa kadagiti adipen ti Dios. Iti dayta a pagilian, adda idi panawen a saan nga aglalangen dagiti Saksi nga agduduma ti kolor ti kudilda. Ngem idi Domingo, Disiembre 18, 2011, nakapimpintas a buyaen ti nasurok a 78,000 a kakabsat a nagduduma ti pulida manipud South Africa ken dadduma pay a pagilian a nagtataripnong iti kadakkelan nga istadium iti siudad ti Johannesburg tapno tagiragsakenda dagiti naespirituan a programa. Inkomento ti maysa kadagiti agimanmanehar iti istadium: “Daytoy ti kasisingpetan a grupo a nakitak iti daytoy nga istadium. Nagpipintas dagiti badoda. Ken dinalusanyo a naimbag ti  istadium. Ngem kangrunaanna, agduduma ti puliyo.”

3. Apay a naidumduma ti panagkakabsattayo?

3 Ipakita dagitoy a komento dagiti saan a Saksi a talaga a nagpaiduma ti panagkakabsattayo. (1 Ped. 5:9) Ngem apay a naidumdumatayo iti dadduma nga organisasion? Babaen ti tulong ti Sao ti Dios ken ti nasantuan nga espirituna, ikagkagumaantayo nga ‘uksoben ti daan a personalidad,’ ket suktantayo dayta iti “baro a personalidad.”​—Col. 3:​9, 10.

4. Ania ti usigentayo iti daytoy nga artikulo, ken apay?

4 Agduma ti panangikkat iti daan a personalidad ken ti saanen a panangisuot iti dayta. Iti daytoy nga artikulo, adalentayo no kasano nga uksobentayo ti daan a personalidad, no apay a masapul nga ikkaten dayta itan, ken no apay a posible a makapagbalbaliw ti maysa uray nairamuten kenkuana dagiti dakes nga aramid. Usigentayo met no kasano a nabaelan dagiti nabayagen iti kinapudno a saanen nga isuot pay ti daan a personalidad. Apay a kasapulan dagitoy a palagip? Adda ngamin dagiti agserserbi idi ken Jehova a nagsubli iti saan a nasayaat nga ar-aramidda. Seriosuentayo koma ngarud daytoy a pakdaar: “Ti mangipagarup nga isu sitatakder agannad koma a saan a maikulbo.”​—1 Cor. 10:12.

“PAPATAYENYO” TI AMIN A TARIGAGAY MAIPAPAN ITI SEKSUAL NGA IMMORALIDAD

5. (a) Iyilustrar no apay a masapul nga ikkaten a dagus ti daan a personalidad. (Kitaen ti ladawan iti rugi ti artikulo.) (b) Sigun iti Colosas 3:​5-9, ania nga ar-aramid ti karaman iti daan a personalidad?

5 Ania ti aramidem no narugiten ti badom, a nalabit adda pay ketdin angotna? Uksobem a dagus dayta. Kasta met, dagus nga agtignaytayo nga agtungpal iti bilin a mangikkat kadagiti ugali a maikontra iti personalidad ti Dios. Kayattayo a suroten ti nalawag a bilin ni Pablo kadagiti Kristiano idi kaaldawanna: “Iwaksiyo amin dagita manipud kadakayo.” Usigentayo ti dua a dakes nga aramid a dinakamat ni Pablo​—pannakiabig, wenno seksual nga immoralidad, ken kinarugit.​—Basaen ti Colosas 3:​5-9.

6, 7. (a) Kasano nga ipakita ti sasao ni Pablo a kasapulan ti panagregget tapno mauksob ti daan a personalidad? (b) Ania idi ti kabibiag ni Sakura, ket ania ti nakatulong kenkuana a mangikkat iti dayta?

6 Seksual nga immoralidad. Ti orihinal a sasao iti Biblia a naipatarus kas “pannakiabig” ramanenna ti seksual a relasion ti dua a saan a legal nga agassawa ken ti homoseksualidad. Imbaga ni Pablo kadagiti padana a Kristiano a ‘papatayenda’ dagiti ‘kameng ti bagida’​—kayatna a sawen, ikkatenda ti amin a tarigagay​—“no maipapan iti pannakiabig.” Dagiti mangiladawan a sasao ni Pablo ipakitana a kasapulan ti panagporsegi tapno naan-anay a maikkat dagita a dakes a tarigagay. Ket posible ti agballigi iti dayta a laban.

Kitaentayo ti napasamak ken Sakura * a taga-Japan. Manipud kinaubingna, lablabanannan ti nakaro a lidayna. Manipud pay idi agtawen iti 15, nakidennan iti nagduduma a lallaki tapno laeng maikkat ti lidayna. Impudnona: “Kas resulta dayta, namitlo a nagparegregak.” Inlawlawagna: “Idi damo, kasla natalged ti riknak no adda karelasionko ta ipagarupko a napategak ken maay-ayatak. Ngem no adda manen sabali a makadennak, ad-adda a mariknak nga awan patpategko.” Kasta ti biag ni Sakura agingga idi agtawen iti 23. Kalpasanna, nakipagadal iti Biblia kadagiti Saksi ni Jehova. Nagustuan ni Sakura ti naadalna, ket babaen ti tulong ni Jehova, nalabananna ti nakaro a pannakakonsiensia  ken bain, ken inuksobna ti immoral nga aramidna. Payunir itan ni Sakura ken naragsaken ti biagna. Naikunana: “Nakaragragsakak ta inaldaw a marikriknak ti ayat ni Jehova.”

PANANGPARMEK KADAGITI NARUGIT NGA ARAMID

8. Ania dagiti aramid ti mabalin a mangrugit kadatayo iti panangmatmat ti Dios?

Kinarugit. Nalawa ti kaipapanan ti orihinal a sao a naipatarus kas “kinarugit.” Saan la a dagiti basol a nainaig iti seksual nga aramid ti ramanen dayta. Tumukoy pay dayta kadagiti makadangran nga ugali kas iti panagsigarilio ken naalas a panagang-angaw. (2 Cor. 7:1; Efe. 5:​3, 4) Agaplikar met dayta kadagiti aramid nga aramiden ti maysa iti pribado, kas iti panagbasa iti makaparasuk a libro wenno panagbuya iti pornograpia a mabalin a mangiturong iti narugit nga aramid a masturbasion.​—Col. 3:5. *

9. Ania dagiti resultana no taraknentayo dagiti di makontrol a “panaggartem iti sekso”?

9 Dagiti tattao nga ugalidan ti agbuya iti pornograpia tartaraknenda ti di makontrol a “panaggartem iti sekso,” a mabalin nga agresulta iti pannakaadikto iti dayta. Sigun iti research, dagiti seniales ti pannakaadikto a makita kadagiti adikto iti alkohol ken droga ket makita met laeng kadagiti indibidual nga adikto iti pornograpia. Di pakasdaawan nga adda makadangran nga epekto ti panagbuya iti pornograpia​—kas iti pannakarikna iti bain, kinasadut iti pagtrabahuan, saan a naragsak a pamilia, diborsio, ken panagpakamatay. Insurat ti maysa a dati nga adikto iti pornograpia kalpasan ti makatawen a naisardengnan dayta: “Nagsubli ti kinadalus ti panunotko nga awan idi kaniak.”

10. Kasano a naikkat ni Ribeiro ti pannakaadiktona iti pornograpia?

10 Adu ti marigatan a mangisardeng iti panagbuya iti pornograpia. Ngem sigun iti kapadasan ni Ribeiro a taga-Brazil, mabalin a mapagballigian dayta. Tin-edyer pay laeng ni Ribeiro idi pimmanaw iti balayda. Nagtrabaho iti planta nga agires-recycle iti papel, ket kanayon a makakitkita kadagiti pornograpiko a ladawan sadiay. Kinunana: “In-inut a naadiktoak. Nakaro ti pannakaadiktok ta uray la pampanunotek a pumanaw koman ti babai a kabkabbalayko tapno makabuyaak iti pornograpia.” Maysa nga aldaw, iti pagtrabahuan, kinita ni Ribeiro ti nabunton a libro a mai-recycle ket nakitana ti libro a Ti Sekreto ti Kinaragsak iti Pamilia. Pinidutna ket binasana. Gapu iti nabasana, nakipagadal kadagiti Saksi ni Jehova, ngem nabayag pay sakbay a naikkatna ti dakes a bisiona. Ania ti nakatulong kenkuana? Inlawlawagna: “Babaen ti kararag, panagadal iti Biblia, ken panangutob iti maad-adalko, mas naapresiarko dagiti galad ti Dios agingga a nabilbilegen ti panagayatko ken Jehova ngem ti panaggustok iti pornograpia.” Gapu iti tulong ti Sao ti Dios ken ti nasantuan nga espirituna, naikkat ni Ribeiro ti daan a personalidadna. Nagpabautisar, ket maysa itan a panglakayen.

11. Ania ti kasapulan nga aramiden ti maysa tapno maadaywanna ti pornograpia?

11 Tapno agballigi ni Ribeiro, saan la a basta nagadal iti Biblia ti inaramidna. Nangiwaya iti tiempo tapno maipasagepsep iti pusona ti mensahe ti Biblia. Nakatulong ti kararag ken panagutob tapno maipangpangrunana ti panagayatna iti Dios ngem iti panagtarigagayna iti pornograpia. Ti panangpatanor iti nabileg a panagayat ken Jehova ken pananggura iti dakes ti kasayaatan a pamay-an tapno maadaywan ti pornograpia.​—Basaen ti Salmo 97:10.

 IKKATENYO TI PUNGTOT, MAKAPASAKIT A SASAO, KEN KINAULBOD

12. Ania ti nakatulong ken Stephen a mangikkat iti pungtot ken makapasakit a sasao?

12 Masansan a makayebkas iti nasakit a sasao dagiti tattao a nalaka nga agpungtot. Nalawag a saan a makatulong ti kasta nga ugali tapno agbalin a naragsak ti pamilia. Kinuna ni Stephen a taga-Australia: “Nakalalaingak idi nga agsao iti dakes ken kanayon nga agpungtotak uray kadagiti babassit laeng a banag. Namitlo a nagsinakami ken baketko ken impagnami pay idin ti panagdiborsiomi.” Ngem nakipagadal ti agassawa kadagiti Saksi ni Jehova. Ania ti resultana idi inyaplikar ni Stephen ti balakad ti Biblia? Kunana: “In-inut a simmayaat ti pamiliami. Gapu iti tulong ni Jehova, kalmadoak itan, saan a kas iti dati a kaslaak bomba ti pungtot ken unget, a bumtak a dagus uray masairak la bassit.” Ministerial nga adipen itan ni Stephen ken sumagmamano met a tawenen a payunir ni baketna. Kuna dagiti panglakayen iti kongregasion ni Stephen: “Naulimek, nagaget, ken napakumbaba ni Stephen.” Awan pulos ti malagipda nga agpungpungtot ni Stephen. Ania ti kuna ni Stephen iti dayta a panagbalbaliw? Kunana: “Diak koma naawat dagitoy a nagsasayaat a bendision no diak inawat ti tulong ni Jehova a mangbalbaliw iti intero a kinataok.”

13. Apay a napeggad ti panagpungtot, ket ania ti balakad ti Biblia?

13 Pagimbagantayo ti pakdaar ti Biblia maipapan iti panagpungtot, makapasakit a sasao, ken panagririaw. (Efe. 4:31) Makapaliday ta dagitoy nga ugali ket agresulta iti kinaranggas. Para iti daytoy a lubong, normal laeng ti panagpungtot, ngem saan a pakaidayawan dayta ti Namarsua. Para iti dadduma, masapul idi nga uksobenda dagita a makadangran nga ugali sakbay a maikawesda ti baro a personalidad.​—Basaen ti Salmo 37:​8-11.

14. Mabalin kadi a sumingpet ti managpungpungtot a tao?

14 Kitaentayo ti kapadasan ni Hans, a panglakayen iti maysa a kongregasion idiay Austria. “Isu ti maysa kadagiti kasingpetan a kabsat a kayatmo a maam-ammo,” kuna ti koordineytor ti bagi dagiti panglakayen iti kongregasion ni Hans. Ngem saan idi a kasta ni Hans. Mangnginum idi tin-edyer pay isu a managpungpungtot idi. Napatayna ti nobiana gapu iti pungtotna a resulta ti bartekna isu a nasentensiaan a maibalud iti 20 a tawen. Idi damo, uray nakabaluden, di latta a nagbalbaliw ni Hans. Naminsan, nakisarita ni nanangna iti maysa a panglakayen a mapan makisarita kenkuana iti pagbaludan, ket nakipagadal ni Hans iti Biblia. Kunana: “Nagrigatko nga inuksob ti daan a personalidadko. Nakatulong kaniak dagiti teksto a kas iti Isaias 55:​7, a kunana: ‘Ti nadangkes a tao panawanna koma ti dalanna,’ ken 1 Corinto 6:​11, a kunana maipapan kadagidiay nangpanaw kadagiti dakes nga aramidda: ‘Ket kaskasdi a kasta idi ti sumagmamano kadakayo.’ Adu a tawen nga inan-anusannak a tinulongan ni Jehova babaen ti nasantuan nga espirituna tapno maikawesko ti baro a personalidad.” Kalpasan ti 17 ket kagudua a tawen iti pagbaludan, nawayawayaan ni Hans kas maysan a bautisado a Kristiano. Kunana: “Agyamanak unay ken Jehova gapu iti dakkel nga asi ken pammakawanna.”

15. Ania a kababalin ti gagangay ita, ngem ania ti ibaga ti Biblia maipapan iti dayta?

15 Malaksid iti makapasakit a sasao, ti panagulbod ti maysa pay a karaman iti daan a personalidad. Kas pagarigan, gagangay a saan nga ibaga dagiti tattao ti eksakto a birokda tapno nababa ti buisda, wenno agulbodda tapno maliklikanda ti dusa dagiti basolda. Ngem saan a kasta ni Jehova ta isu ti  “Dios ti kinapudno.” (Sal. 31:5) Kalikagumanna ngarud nga ‘agsao iti kinapudno,’ saan a ‘kinaulbod,’ ti “tunggal maysa” kadagiti adipenna. (Efe. 4:25; Col. 3:9) Ngarud, masapul nga ibagatayo ti pudno uray no nakababain wenno saantayo a pagsayaatan dayta.​—Prov. 6:​16-19.

NO KASANO A NAGBALLIGIDA

16. Kasano nga agballigitayo a manguksob iti daan a personalidad?

16 Saan a kabaelan ti maysa nga uksoben ti daan a personalidadna a bukbukodna. Dagiti indibidual a nadakamat iti daytoy nga artikulo​—da Sakura, Ribeiro, Stephen, ken Hans​—ket nagregget tapno maikkatda dagiti dakes nga aramidda. Nagballigida ta impalubosda a ti pannakabalin ti Sao ti Dios ken ti nasantuan nga espirituna ti mangimpluensia iti pusoda. (Luc. 11:13; Heb. 4:12) Tapno magunggonaantayo iti dayta a pannakabalin, masapul nga inaldaw a basaentayo ti Biblia, utobentayo dayta, ken kanayon nga ikararagtayo ti sirib ken determinasion a mangyaplikar iti balakad ti Biblia. (Jos. 1:8; Sal. 119:97; 1 Tes. 5:17) Magunggonaantayo met iti Sao ti Dios ken iti nasantuan nga espirituna no agsaganatayo para kadagiti gimong. (Heb. 10:​24, 25) Kanayonanna, kayattayo a nanamen dagiti naespirituan a taraon a magun-odan itan dagiti adipen ti Dios iti intero a lubong iti nagduduma a pamay-an.​—Luc. 12:42.

Kasano nga agballigitayo a manguksob iti daan a personalidad? (Kitaen ti parapo 16)

17. Ania ti usigentayo iti sumaruno nga artikulo?

17 Nausigtayon ti sumagmamano a dakes nga aramid a masapul nga uksoben ken saanen nga isuot pay dagiti Kristiano. Ngem umdas kadi daytan tapno maay-ayotayo ti Dios? Saan. Masapul met nga ikawestayo ti baro a personalidad. Iti sumaruno nga artikulo, adalentayo ti sumagmamano nga aspeto ti baro a personalidad, a kasapulan nga agbalin a permanente a paset ti piguratibo a badotayo.

^ par. 7 Nabaliwan ti dadduma a nagan iti daytoy nga artikulo.

^ par. 8 Kitaen ti kapitulo 25 ti libro a Dagiti Saludsod nga Iyimtuod ti Agtutubo​Dagiti Sungbat nga Epektibo, Tomo 1.