Mapan iti linaonna

Mapan iti listaan dagiti linaonna

 PAKASARITAAN TI BIAG

Nasarakanmi ti “Perlas a Nangato ti Kalidadna”

Nasarakanmi ti “Perlas a Nangato ti Kalidadna”

AGSERSERBI da Winston ken Pamela (Pam) Payne iti sanga nga opisina iti Australasia. Naragsak ti biagda ngem adda latta dagiti problemada, kas iti pannakibagayda iti nadumaduma a kultura ken panangdaer iti saem ti pannakaalis ni Pam. Nupay kasta, napagtalinaedda ti ayatda ken Jehova ken kadagiti kakabsat kasta met ti rag-oda iti ministerio. Iti daytoy nga interbiu, iyestoriada ti dadduma a kapadasanda.

Winston, ibagam man no kasanom a nasarakan ti Dios.

Dimmakkelak iti maysa a farm idiay Queensland, Australia. Saan a relihioso ti pamiliami. Gapu ta addakami iti away, dagiti laeng kapamiliak ti kanayon a makalangenko. Binirbirokkon ti Dios sipud idi agarup 12 ti tawenko. Inkararagko a maammuak koma ti kinapudno maipapan kenkuana. Idi agangay, pimmanawak iti away ket nakabirokak iti trabaho idiay Adelaide, South Australia. Idi 21 ti tawenko, nagbakasionak idiay Sydney ket naam-ammok ni Pam. Nayestoriana ti narelihiosuan a grupo a British-Israel, a mangibagbaga a nagtaud dagiti British kadagiti napukaw a tribu ti Israel. Sigun kadakuada, dagidiay a tribu ket isu ti 10 a tribu ti makin-amianan a pagarian a naipanaw idi maikawalo a siglo B.C.E. Isu nga idi nagawidak idiay Adelaide, imbagak dayta iti maysa a katrabahuak a makipagad-adal iti Biblia kadagiti Saksi ni Jehova. Iti sumagmamano laeng nga oras a panagsaritami​—kangrunaanna maipapan iti patpatien dagiti Saksi—​nabigbigko a masungsungbatanen ti kararagko idi ubingak. In-inut a maam-ammuak ti kinapudno maipapan iti Namarsua ken iti Pagarianna! Nasarakakon ti “perlas a nangato ti kalidadna.”​—Mat. 13:45, 46.

Pam, rinugiam met a biroken dayta a perlas idi ubingka. Kasanom a nasarakan?

Dimmakkelak iti relihioso a pamilia iti ili ti Coffs Harbour, New South Wales. Namati dagiti nagannakko ken dagiti appongko kadagiti sursuro ti grupo a British-Israel. Siak, ti adingko a lalaki, ni manangko, ken ti adu a kasinsinko, napadakkelkami iti pammati a  pabpaboran ti Dios dagiti tattao a nagtaud kadagiti British. Ngem diak latta kombinsido ken nariknak a saanak a nasinged iti Dios. Idi agtawenak iti 14, pinadasko ti nadumaduma a relihion iti lugarmi, kas iti Anglican, Baptist, ken Seventh-day Adventist. Ngem didak natulongan a mangam-ammo iti Dios.

Idi agangay, immakar ti pamiliami idiay Sydney, ket naam-ammok idiay ni Winston, a madama idi nga agbakbakasion. Kas naibaganan, ti panagsaritami maipapan iti relihion ket nagresulta iti pannakipagadalna kadagiti Saksi. Sipud idi, puro tekston ti linaon dagiti suratna kaniak! Aminek a madanaganak idi damo​—masuronak pay ketdi. Ngem in-inut a nabigbigko a dayta ti kinapudno.

Idi 1962, immakarak idiay Adelaide tapno as-asidegak ken Winston. Inyurnosna a makipagyanak iti agassawa a Saksi​—da Thomas ken Janice Sloman—​a dati a misionero idiay Papua New Guinea. Nakaim-imbagda kaniak. Agtawenak laeng idi iti 18, ket dakkel ti naitulongda kaniak iti naespirituan. Rinugiak met nga adalen ti Sao ti Dios. Di nagbayag, nakombinsirak a nasarakakon ti kinapudno. Kalpasan ti kasarmi ken Winston, inrugimi a dagus ti makapnek unay a biag iti panagserbi ken Jehova. Siempre, adda latta dagiti problema, ngem dayta a panagserbi ti nangpauneg iti apresasionmi iti nagsayaat a perlas a nasarakanmi.

Winston, iyestoriam man ti damo a tawtawen ti panagserbim ken Jehova.

A. Mapa ti binisitami a sirkito

B. Dagiti selio manipud iti dadduma nga isla. Ti Kiribati ken Tuvalu ket dati a maawagan iti Gilbert and Ellice Islands

C. Ti Funafuti a nagpintas nga isla ti korales iti nasion ti Tuvalu. Maysa iti adu nga isla a binisitami sakbay nga adda misionero a naibaon idiay

Di nagbayag kalpasan ti kasarmi ken Pam, linuktan ni Jehova ti umuna kadagiti adu a “dakkel a ruangan” iti panagserbi kenkuana. (1 Cor. 16:9) Ti nangiturong kadakami iti umuna a ruangan ket ni Brother Jack Porter, nga agbisbisita idi kas manangaywan iti sirkito iti bassit a kongregasionmi. (Padak itan a miembro ti Branch Committee ti Australasia.) Ni Jack ken ni baketna a Roslyn ti nangparegta kadakami nga ag-regular pioneer​—pribilehio a tinagiragsakmi iti lima a tawen. Agtawenak iti 29 idi naibaonkami ken Pam nga agserbi iti sirkito iti South Pacific Islands, a sakup idi ti sangay iti Fiji. Karaman dita dagiti isla ti American Samoa, Samoa, Kiribati, Nauru, Niue, Tokelau, Tonga, Tuvalu, ken Vanuatu.

Agan-annadkami idi ta dagiti tattao kadagiti nasulinek nga isla pagsuspetsaanda dagiti Saksi ni Jehova. (Mat. 10:16) Babassit dagiti kongregasion, ket adda dagiti saan a makaipaay iti pagdagusanmi. Isu a bimmirokkami kadagiti lumugar a pagyananmi, ket nakaim-imbagda kadakami.

Interesadoka iti panagipatarus, Winston. Apay?

Idiay Samoa, bayat ti panangisuro kadagiti panglakayen

Iti isla ti Tonga, manmano laeng idi ti tract ken bokleta iti Tongan, maysa a lengguahe iti Polynesia. Iti ministerio, us-usaren dagiti kakabsat ti Ingles nga edision ti libro a Ti Kinapudno a Mangiturong iti Biag nga Awan Inggana. Isu nga iti uppat a lawas a panagadal dagiti panglakayen, immanamong ti tallo a panglakayen a lumugar a limitado ti Ingles-da a maipatarus iti Tongan dayta a libro. Ni Pam ti nangimakinilia iti manuskrito, sa impatulodmi dayta iti sangay iti United States tapno mayimprenta. Dandani walo a lawas dayta a proyekto. Uray no saan unay a napintas ti pannakaipatarusna, adu a Tongan ti lengguahena ti natulongan a mangammo iti kinapudno. Saankami a managipatarus ken Pam, ngem nagintereskami gapu iti dayta a kapadasanmi.

Pam, komusta ti biag kadagiti isla no ikompara iti biag idiay Australia?

Maysa kadagiti nagdagusanmi bayat ti panagserbimi iti sirkito

Dakkel ti nagdumaanda! Adda dagiti lugar a nakalamlamok, nakapudpudot, ken nakadagdagaang, adu ti bao, nadumaduma a sakit, ken no dadduma, bassit ti makan. Ngem no malemen, makapagin-awa a buyaen ti taaw manipud iti fale-mi​—ti awag dagiti Samoan iti gagangay a balay iti Polynesia  a pan-aw ti atepna ken awan didingna. No sellag ti bulan, aganniniwan dagiti niog, ken aganninaw ti bulan iti taaw. Nagsayaat dagita a kanito nga agutob ken agkararag, ket mapanunotmi dagiti positibo a banag imbes a dagiti negatibo.

Ipatpategmi dagiti ubbing, a nararagsak ken magusgustuanda ti makakita iti puraw a tattao. Iti ibibisitami idiay Niue, maysa a bassit nga ubing ti nangapros iti barbonan a takiag ni Winston sa imbagana, “Nagmayat, kasla dutdot ti billit.” Nalawag a di pay nakakitkita iti barbonan a takiag isu a saanna nga ammo nga iladawan!

Maasiankami a makakita iti nakapimpiman a kasasaad ti adu a tattao. Nagpintas ti lugarda ngem kurang ti pannakaaywan ti salun-atda ken bassit ti danum a mainumda. Ngem kasla saan a madanagan dagiti kakabsat. Normal dayta kadakuada. Naragsakdan a kaduada ti pamiliada, adda paggimonganda, ken adda pribilehioda a mangidaydayaw ken Jehova. Nakatulong kadakami ti ulidanda tapno agpokuskami iti kapatgan ken agbalin a simple ti biagmi.

Pam, adda dagiti gundaway a sika ti agsakdo ken agluto iti pamay-an a dimo nakairuaman. Kasano a naaramidam dayta?

Idiay Tonga, ni Pam bayat nga aglablaba iti badomi

Agyamanak ken tatangko. Adu a banag ti insurona, kas ti panagpasged iti apuy a pagluto ken no kasano ti agbiag uray awan unay ti alikamenmo. Iti maysa nga ibibisitami idiay Kiribati, nagyankami iti bassit a balay a pan-aw ti atepna, napino a korales ti suelona, ken kawayan ti didingna. Tapno makalutoak iti simple a makan, nagkaliak iti abut iti suelo tapno makaaramidak iti paglutuan a sinungrodak iti bunot ti niog. Tapno makasakdoak, pimmilaak iti bubon a kaduak dagiti lumugar a babbai. Agusarda iti kasla pagbanniit a kayo nga agarup dua a metro ken adda naigalut a lata iti ungtona, imbes a kawit. Agsisinnublat dagiti babbai a mangitinnag ken mangyaon iti pagsakdoda. Ituangda ti lata tapno makargaan iti danum. Ti ammok ket simple laeng, ngem idi siakon, narigat gayam. No namin-anok nga intinnag ti pagsakdok ngem timpaw laeng! Nagkakatawa ti amin, ngem kalpasanna, maysa kadakuada ti timmulong kaniak. Gagangay a manangtulong ken nasingpetda.

Agpada a naipategyo ti pribilehioyo a panagbisita kadagiti isla. Mabalin nga iyestoriayo dagiti diyo malipatan a kapadasan?

Winston: Saanmi a dagus a naawatan ti dadduma a kostumbre. Kas pagarigan, no agpakan dagiti kakabsat, gagangay nga ipasangoda ti amin a makanda. Idi damo, dimi ammo a masapul nga ibatianmi ida. Isu a kanenmi ti amin nga idasarda! Siempre, idi naawatanmin ti kostumbreda, ibatianmi idan iti makan. Mannakaawat dagiti kakabsat kadagiti pagkamalianmi. Ket maragragsakanda a makakita iti ibibisitami iti tunggal agarup innem a bulan. Malaksid kadagiti kalugaranda a kakabsat, dakami laeng ti sabali a Saksi a nakitkitada.

Idiay Niue Island, panangidaulo iti grupo a mapan mangasaba

Nasayaat a panangsaksi kadagiti lumugar ti ibibisitami kadakuada. Impagarup ti adu a lumugar nga inimbento laeng dagiti kakabsat ti relihionda. Isu nga idi bimmisitakami nga agassawa a naggapu iti sabali a nasion, nabigbigda a talaga a maysa a relihion daytoy ket nagsiddaawda.

Pam: Maysa kadagiti diak malipatan a kapadasan ket idiay Kiribati. Adda maysa a kongregasion a buklen ti sumagmamano a kakabsat. Inasikasonakami a naimbag ti kakaisuna a panglakayen, ni Itinikai Matera. Maysa nga aldaw, immay nga awitna ti basket nga adda kargana a maysa nga itlog. “Para kadakayo,” imbagana. Manmano idi a makaramankami iti itlog ti manok. Naapresiarmi dayta a bassit ngem naparabur a panangted.

 Pam, naalisanka sumagmamano a tawen kalpasanna. Ania ti nakatulong tapno mailiwliwagmo dayta?

Nagsikogak idi 1973 bayat nga addakami ken Winston idiay South Pacific. Nagdesisionkami nga agsubli idiay Australia ngem kalpasan ti uppat a bulan, naalisanak. Naladingitanak kasta met ni Winston. Iti panaglabas ti tiempo, naksayan ti saem a marikriknak, ngem saan a naan-anay a napukaw dayta agingga a nabasami ti Abril 15, 2009, a ruar Ti Pagwanawanan. Naisaludsod iti “Salsaludsod Dagiti Agbasbasa”: “Adda kadi pay namnama a mapagungarto ti maysa a natay a sikog?” Impasigurado ti artikulo a nakadepende dayta ken Jehova, a kanayon nga umiso ti ar-aramidenna. Aglunitto ti amin a sugat nga impalak-am kadatayo daytoy dakes a lubong inton siaayat a bilinenna ti Anakna a ‘mangdadael kadagiti aramid ti Diablo.’ (1 Juan 3:8) Natulongannakami pay ti artikulo nga ad-adda a mangapresiar iti nakapatpateg a “perlas” nga adda kadatayo kas adipen ni Jehova! Imbag laengen ta adda Pagarian a namnamatayo!

Kalpasanna, nagsublikami manen iti amin-tiempo a panagserbi. Nagserbikami iti sumagmamano a bulan iti Bethel iti Australia sa intuloymi ti agserbi iti sirkito. Idi 1981, kalpasan ti uppat a tawen a panagserbimi iti adayo a paspaset ti New South Wales ken Sydney, naawiskami iti sangay iti Australia, kas awag idi iti dayta, ket addakami pay laeng ditoy agingga ita.

Winston, kas miembro ti Komite ti Sangay iti Australasia, nakatulong kadi kenka dagiti kapadasam kadagiti Isla iti South Pacific?

Wen, iti adu a pamay-an. Idi damo, naited iti Australia ti panangaywan iti American Samoa ken Samoa. Idi kuan, ti sangay iti New Zealand ket naitipon iti sangay iti Australia. Ita, ti teritoria a masakupan ti sangay iti Australasia ket ti Australia, American Samoa ken Samoa, Cook Islands, New Zealand, Niue, Timor-Leste, Tokelau, ken Tonga​—a kaaduan kadagitoy ti nabisitak idin kas pannakabagi ti sangay. Ti pannakipagtrabahok kadagiti matalek a kakabsat kadagidiay nga isla ket nagdakkel a tulong ita ta pagserserbiak ida manipud iti sanga nga opisina.

Da Winston ken Pam iti sangay iti Australasia

Kas iti kapadasanmi ken Pam, kayatko nga ibaga nga idi pay a nabigbigmi a saan laeng a dagiti adulto ti agbirbirok iti Dios. Kayat met dagiti agtutubo ti “perlas a nangato ti kalidadna”​—uray no saan nga interesado ti dadduma a kapamiliada. (2 Ar. 5:2, 3; 2 Cron. 34:1-3) Siempre, ni Jehova a naayat a Dios kayatna a magun-od ti amin ti biag, agtutubo man wenno nataengan!

Idi rinugianmi ken Pam a biroken ti Dios nasuroken a 50 a tawen ti napalabas, saanmi a sigurado no ania ti pangiturongan dayta kadakami. Ti kinapudno maipapan iti Pagarian ket di magatadan a perlas! Determinadokami a mangikagumaan a mangpetpet iti daytoy nagpateg a perlas!