Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Abril 2016

Kasla Kadi Linnaaw ti Ministeriom?

Kasla Kadi Linnaaw ti Ministeriom?

NAKAPATPATEG ti ministeriotayo. Ngem adda dagiti saan a mangapresiar iti daytoy. Uray no adda aginteres iti mensahe ti Biblia, saanda a kanayon a makita a kasapulan a makipagadalda kadatayo iti Sao ti Dios.

Kasta ti kapadasan ni Gavin. Makigimgimong idin ngem nagkedked a makipagadal iti Biblia. Kunana: “Bassit ti ammok maipapan iti Biblia, ket diak kayat a maammuanda dayta. Diak ngamin kayat ti maallilaw, ken diak kayat ti makitulag.” Panagkunam, saanto kadin a pulos awaten ni Gavin ti panagadal iti Biblia? Saan! Usigem ti pagimbagan dagiti pannursuro ti Biblia iti maysa a tao. Kinuna ni Jehova kadagiti nagkauna nga adipenna: “Ti sasaok agaruyotto a kas ti linnaaw, kas arimukamok iti rabaw ti ruot.” (Deut. 31:19, 30; 32:2) Ti kasasaad ti linnaaw iladawanna no kasano a matulongantayo ti amin a kita ti tattao iti ministeriotayo.—1 Tim. 2:3, 4.

 KASLA LINNAAW A MINISTERIO—KASANO?

Nalamuyot ti linnaaw. In-inut a mabukel ti linnaaw. Maurnong dagiti babassit a tedted ti danum manipud iti sengngaw nga adda iti angin. Dagiti sasao ni Jehova ket ‘nagaruyot kas iti linnaaw’ ta naasi ken naalumamay ti panagsasaona ken ipakitana a matarusanna dagiti adipenna. Matuladtayo ni Jehova no raementayo ti panangmatmat ti sabali a tao. Paregtaentayo dagiti tattao nga agpanunot ken agdesision. Iti kasta, nalaklaka nga awatenda dagiti ibagatayo ken agbalin a mas epektibo ti ministeriotayo.

Makapabang-ar ti linnaaw. Mangbang-ar iti sabsabali ti ministeriotayo no mangpanunottayo iti nagduduma a pamay-an tapno maparayraytayo ti interesda. Ni Gavin, a nadakamat itay, ket saan a napilit nga agadal iti Biblia. Imbes ketdi, ni Chris, ti kabsat nga immuna a nangitukon kenkuana iti panagadal iti Biblia, pinadasna ti nagduduma a pamay-an tapno mayat a makisarita ni Gavin maipapan iti Biblia. Inlawlawag ni Chris nga adda tema ti Biblia ket no maammuanna dayta, ad-adda a maawatanna dagiti mangmangngegna iti gimong. Kalpasanna, imbaga ni Chris a dagiti padto ti Biblia ti nangkombinsir kenkuana a pudno ti Biblia. Gapu iti dayta, namin-adu a nagsaritaanda ti kaitungpalan dagiti padto. Nabang-aran ni Gavin gapu kadagitoy a panagsarita, ket idi agangay, nakipagadalen iti Biblia.

Mangsustiner iti biag ti linnaaw. Kanayon a nabara ti paniempo iti daga ti Israel ket awan ti tudo iti adu a bulan. No awan ti linnaaw, magango ken matay dagiti mula. Ita, adda met naespirituan a tikag kas imbaga ni Jehova. (Amos 8:11) Inkarina nga agbalin a kas “linnaaw manipud ken Jehova” dagiti napulotan nga ebanghelisador bayat nga ipakpakaammoda ti mensahe ti Pagarian, a kadua ti “sabsabali a karnero.” (Mik. 5:7; Juan 10:16) Ipatpategtayo kadi ti mensahe ti naimbag a damag ti Pagarian kas paset ti probision ni Jehova a naespirituan a linnaaw a mangsustiner iti biag?

Bendision manipud ken Jehova ti linnaaw. (Deut. 33:13) Ti ministeriotayo ket bendision kadagidiay umawat iti dayta. Inawat ni Gavin dayta a bendision. Gapu iti panagadalna iti Biblia, nasungbatan ti amin a saludsodna. Nagbiit a rimmang-ay agingga a nabautisaran. Ita, kaduanan ni Joyce a baketna a naan-anay a mangikaskasaba iti naimbag a damag ti Pagarian.

Isaksaknap dagiti Saksi ni Jehova ti mensahe ti Pagarian iti intero a daga

IPATEGMO TI MINISTERIOM

No panunotentayo ti linnaaw, maparegtatayo met a mangipateg iti pannakiramantayo iti ministerio. Kasano? Kasla awan maaramidan ti maysa a tedted ti danum, ngem ti minilion a tedted ti linnaaw mababasana ti daga. Kasta met, kasla awan mamaay ti indibidual a maar-aramidantayo iti ministerio. Ngem ti agtitipon a panagregget ti amin a natulok nga adipen ni Jehova makaipaay iti panangsaksi “kadagiti amin a nasion.” (Mat. 24:14) Agbalin kadi ti ministeriotayo a bendision a naggapu ken Jehova para iti sabsabali? Wen, no ti mensahe nga ikasabatayo ket kas iti linnaaw—nalamuyot, makapabang-ar, ken mangsustiner iti biag!