Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NO. 6 2016

 TOPIKO ITI AKKUB | DAGITI SIRMATA A MANGILADAWAN ITI LANGLANGIT

Pagarup Maipapan iti Lugar Dagiti Espiritu

Pagarup Maipapan iti Lugar Dagiti Espiritu

Napampanunotmo kadin ti maipapan kadagiti espiritu a persona ken ti lugar a paggigiananda? No wen, adu ti kas kenka. Iti rinibribu a tawen, nagduduma ti pagarup dagiti tattao. Adda dagiti mamati a ti lugar dagiti espiritu ti ayan dagiti natay a kapuonanda a maikari a mapadayawan. Mapampanunot met ti dadduma ti lugar a nakaragragsak ken nakataltalna a maawagan iti langit, nga ayan dagiti anghel ken natayen a nasingpet a tattao. Ngem para iti dadduma, ti lugar dagiti espiritu ti paggigianan ti ginasut a milion a didiosen.

Ikalintegan met ti adu nga imposible a maammuan ti maipapan iti lugar dagiti espiritu ta awan pay ti naggapu sadiay a makaibaga kadatayo. Ngem kamali dayta. Ngamin, sakbay nga immay ni Jesu-Kristo ditoy daga, nagbiag idin idiay langit, ti lugar dagiti espiritu. Sipaprangka nga imbagana kadagiti lider ti relihion idi umuna a siglo: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.” Isu nga imbaga ni Jesus kadagiti apostolna ti mismo a nakitana: “Idiay balay ni Amak adu ti pagyanan.”—Juan 6:38; 14:2.

Siempre, ti Ama ni Jesus ket ti Dios, nga agnagan Jehova, ken ti ‘balayna’ ket adda iti langlangit. (Salmo 83:18) Ngarud, ni Jehova a Dios ken ni Jesu-Kristo ti kasayaatan a mangiladawan iti dayta a di makita a lugar. Adu nga impormasion ti impakaammoda kadagiti matalek a tattao maipapan iti dayta a lugar babaen kadagiti nakaskasdaaw a sirmata—eksena nga impailadawanda iti panunot ti tao babaen iti pannakabalinda.

Ilawlawag ti sumaruno nga artikulo ti dadduma a paset ti Biblia a mangiladawan kadagiti sirmata a nakita ti sumagmamano a lallaki. Bayat nga ad-adalem dagitoy, laglagipem a ti lugar dagiti espiritu ket saan a pisikal, saan a maiggaman wenno makita dagiti adda sadiay. Isu a kadagita a sirmata, saan nga inladawan ti Dios dayta a lugar iti sasao a dagiti laeng espiritu a parsua ti makatarus. Nagusar ketdi kadagiti termino a maawatan ti tattao. Makatulong dagita a sirmata tapno matarusam ti maipapan kadagiti aggigian iti ‘adu a pagyanan’ iti lugar dagiti espiritu a persona.