Mapan iti linaonna

Mapan iti listaan dagiti linaonna

 TOPIKO ITI AKKUB | ANIA TI AGPAYSO MAIPAPAN KADAGITI ANGHEL?

Adda Kadi Dakes nga Anghel?

Adda Kadi Dakes nga Anghel?

Wen, adda. Naggapuanda? No malagipmo, pinarsua ti Dios dagiti anghel nga addaan iti wayawaya nga agpili. Di unay nagbayag kalpasan a naparsua ti umuna a lalaki ken babai a da Adan ken Eva, inabuso ti maysa a perpekto nga anghel ti wayawayana nga agpili ket inrugina ti panagrebelde ditoy daga. Nakombinsirna da Adan ken Eva nga agrebelde iti Dios. (Genesis 3:1-7; Apocalipsis 12:9) Saan nga imbaga ti Biblia ti nagan daytoy nga espiritu a parsua wenno ti posisionna idiay langit sakbay a nagrebelde. Ngem kalpasan a nagrebelde, inawagan isuna ti Biblia kas Satanas, a kaipapananna ti “Bumusbusor,” ken Diablo, a kaipapananna ti “Manangpardaya” wenno manangpadpadakes.—Mateo 4:8-11.

Makapaladingit ta saan a nagpatingga dita ti panagrebelde iti Dios. Idi panawen ni Noe, adda dagiti anghel a ‘nangpanaw iti bukodda nga umiso a lugar a pagnaedan’ iti nailangitan a pamilia ti Dios. Bimmabada ditoy daga ken naglasagda kas tao tapno agaramidda iti dakes ken immoralidad. Maikontra dagita iti nakairantaanda.—Judas 6; Genesis 6:1-4; 1 Pedro 3:19, 20.

Ania ti nagbanagan dagidiay a dakes nga anghel? Nagsublida idiay langit kas espiritu idi dinalusan ti Dios ti daga babaen iti sangalubongan a layus. Ngem saan idan a pinalubosan ti Dios nga agsubli iti ‘nakaisigudan a saadda.’ Inkabilna ida iti naipababa a kasasaad iti “napuskol [a naespirituan] a kinasipnget,” a pagaammo kas Tartaro. (Judas 6; 2 Pedro 2:4) Nagpaituray dagitoy a demonio ken Satanas a Diablo, ti “agturay kadagiti sairo,” a “pagbalbalinenna ti bagina a kasla anghel ti lawag.”—Mateo 12:24; 2 Corinto 11:14.

Isursuro ti Biblia a naipasdek idi 1914 ti Mesianiko a Pagarian ti Dios, a maysa a nailangitan a gobierno. * Kalpasan dayta a nakallalagip a pasamak, napapanaw ni Satanas ken dagiti demoniona idiay langit. Naitapuakda ditoy daga ket nalimitaran ti maaramidanda. Dagiti nagkaro a kinadakes ken immoralidad a mangparparigat kadagiti tattao ket ebidensia ti makadadael nga impluensiada ken ti panagibalesda.—Apocalipsis 12:9-12.

Ngem paneknekan ti bumabbaba a moral ken kumarkaro a kinaranggas nga asidegen nga agpatingga ti nakaam-amak a panagturayda. Dandanin mapasardeng dagitoy a naulpit nga espiritu a parsua. Ket kalpasan ti 1,000 a tawen a panagturay ti Pagarian ti Dios iti paraiso a daga, maikkanto dagidiay a nagdakes nga espiritu iti ababa ken maudi a gundaway a mangsubok kadagiti tattao. Kalpasanna, madadaeldanton iti agnanayon.—Mateo 25:41; Apocalipsis 20:1-3, 7-10.

^ par. 6 Para iti ad-adu pay nga impormasion maipapan iti Pagarian ti Dios, kitaem ti kapitulo 8 ti libro nga Ania a Talaga ti Isursuro ti Biblia? nga impablaak dagiti Saksi ni Jehova. Mabasa met iti www.jw.org/ilo.