Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NO. 4 2016

 TOPIKO ITI AKKUB | DAGITI NALASATAN TI BIBLIA

Masapul a Maammuam

Masapul a Maammuam

Awanen ti sabali a libro iti relihion a kas iti Biblia. Dayta ti kakaisuna a libro a nakabaybayagen a mangim-impluensia kadagiti patpatien ti nagadu a tattao. Iti sabali a bangir, dayta ti kakaisuna a libro a dimmalan iti nakakarkaro a pannakabusisi ken pannakakritikar.

Kas pagarigan, adda dagiti eksperto nga agduadua no dagiti Biblia ita ket mapagtalkan a kopia dagiti orihinal a kopia. “Ditay masigurado no natuladtayo ti eksakto a kaipapanan ti orihinal a kopia,” kuna ti maysa a propesor a mangad-adal kadagiti relihion. “Dagiti laeng kopia a napno iti kamali ti adda kadatayo, ken kaaduan kadagitoy ket nakopia ginasut a tawen kalpasan a naisurat ti orihinal, ken nalawag a rinibribu ti nakaidumaan dagita a kopia iti orihinal.”

Kueskuestionaran met ti dadduma no pudpudno met laeng ti linaon ti Biblia gapu iti relihion a dimmakkelanda. Kas pagarigan ni Faizal, insuro kenkuana ti saan a Kristiano a pamiliana a ti Biblia ket nasantuan a libro ngem nabaliwanen ti linaonna. “Isu a medio agsuspetsaak idi no adda dagiti makisarita kaniak maipapan iti Biblia,” kunana. “Ngamin, ti Bibliada ket saan a ti orihinal. Nabalbaliwanen!”

Importante kadi no nabalbaliwan ti Biblia wenno saan? Panunotem a naimbag dagitoy: Makapagtalekka kadi a pumaysonto dagiti makaliwliwa a kari ti Biblia para iti masanguanan no dimo met masigurado no adda dagita a kari iti orihinal a kopia? (Roma 15:4) No dagiti Biblia ita ket kamali laeng a kopia nga inaramid dagiti tattao, surotem kadi dagiti prinsipio ti Biblia no mangaramidka kadagiti importante a desision maipapan iti trabaho, pamilia, wenno iti panagdaydayawmo iti Dios?

Uray awanen dagiti orihinal a libro ti Biblia, mabalintayo latta ti agkonsulta kadagiti nagkauna a kopia—a pakairamanan ti rinibu a manuskrito ti Biblia (dagiti naisurat a nagkauna a kopia dagiti paset ti Biblia). Kasano a nalasatan dagita a manuskrito ti pannakarunot, ibubusor, ken pannakabalbaliw dagiti linaonna? Kasano a makatulong dayta tapno tumibker ti panagtalekmo a saan a nabalbaliwan ti linaon dagiti moderno a Biblia? Ammuem ti sungbat kadagiti estoria maipapan iti nalasatan ti Biblia kadagiti sumaruno nga artikulo.