Mapan iti linaonna

Mapan iti listaan dagiti linaonna

Apay a Lumakay ken Mataytayo?

Apay a Lumakay ken Mataytayo?

SAAN a panggep ti Dios a matay dagiti tattao. Naparsua dagiti umuna a nagannaktayo a da Adan ken Eva a perpekto ti isip ken bagida; mabalin a sibibiagda pay koma agingga ita. Nalawag dayta iti imbaga ni Jehova ken Adan maipapan iti maysa a kayo iti hardin ti Eden.

Imbaga ti Dios ken Adan, “Sigurado a matayka iti aldaw a pannanganmo iti [bunga ti kayo].” (Genesis 2:17) Awan ti serserbi dayta a bilin no naparsua ni Adan a lumakay ken matay. Ammo ni Adan a saan a matay no dina kanen ti bunga dayta a kayo.

SAAN A PANGGEP TI DIOS A MATAY DAGITI TATTAO

Saan a kasapulan a mangan da Adan ken Eva iti dayta a kayo tapno agbiagda ta adu ti agbungbunga a kayo iti hardin. (Genesis 2:9) No dida kanen ti bunga dayta a kayo, ipakpakitada nga agtultulnogda iti Daydiay nangted iti biagda ken bigbigbigenda ti kalintegan ti Dios a mangiwanwan iti biagda.

NO APAY A NATAY DA ADAN KEN EVA

Tapno maawatantayo no apay a natay da Adan ken Eva, masapul a maawatantayo ti saritaan a nangapektar kadatayo amin. Nagusar ni Satanas a Diablo iti uleg a mangibaga iti makadadael a kinaulbod. Kuna ti Biblia: “Ti uleg ti kaannadan iti amin nga atap nga animal nga inaramid ni Jehova a Dios. Kinuna ti uleg iti babai: ‘Agpayso kadi nga imbaga ti Dios a saanyo a kankanen ti bunga ti tunggal kayo iti hardin?’”​—Genesis 3:1.

Insungbat ni Eva: “Mabalinmi a kanen ti bunga dagiti kayo iti hardin, malaksid iti bunga ti kayo nga adda iti tengnga ti hardin, ta kinuna ti Dios: ‘Dikay mangan iti bungana ken diyo sagiden; ta mataykayo no aramidenyo dayta.’” Gapuna, kinuna ti uleg: “Sigurado a saankayto a matay. Ta ammo ti Dios nga iti aldaw a pannanganyo iti dayta, maluktan dagiti matayo ket agbalinkayto a kas iti Dios a makaammo iti naimbag ken dakes.” Parparuaren ngarud ni Satanas nga ulbod ni Jehova ken adda ipapaidamna a nasayaat a banag kadagiti umuna a nagannaktayo.​—Genesis 3:2-5.

Pinati ni Eva ti nangngegna. Miningminganna ti kayo. Nakitana a napintas ken makaay-ayo unay! Nangpuros iti bungana sa kinnanna. Kalpasanna, kuna ti Biblia: “Inikkanna pay ti asawana idi nagkaduadan ket nangan met.”​—Genesis 3:6.

Imbaga ti Dios ken Adan: “Sigurado a matayka iti aldaw a pannanganmo iti dayta.”​—GENESIS 2:17

Naladingitan la ketdi ti Dios idi nakitana nga inggagara dagiti ay-ayatenna nga annak ti sumukir kenkuana! Ania ti inaramidna? Imbaga ni Jehova ken Adan: “Agsublika iti daga a nakaalaam. Ta tapokka ket agsublikanto iti tapok.” (Genesis 3:17-19) Kas resulta, “nagbiag ni Adan iti 930 a tawen sa natay.” (Genesis 5:5) Saan a napan ni Adan idiay langit wenno iti lubong dagiti espiritu. Awan pay ni Adan sakbay a pinarsua ni Jehova manipud iti tapok ti daga. Isu nga idi natay, awan biagnan a kas iti tapok a nakaparsuaanna. Awan isunan. Anian a nagsaem!

 NO APAY A SAANTAYO A PERPEKTO

Gapu ta inggagara da Adan ken Eva ti simmukir, napukawda ti kinaperpektoda ken ti namnamada nga agbiag nga agnanayon. Nagbaliw ti bagida; nagbalinda nga imperpekto ken managbasol. Ngem saan la nga isuda ti naapektaran iti basol ken kinasukirda. Naipatawidda ti kinamanagbasolda kadagiti annakda. Kuna ti Roma 5:12: “Babaen ti maysa a tao [ni Adan], simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.”

Inladawan ti Biblia ti basol ken ipapatay kas “ti balkut a nangbungon iti amin nga ili ken ti abbong a nailaga iti amin a nasion.” (Isaias 25:7) Daytoy a balkut ti nangbungon iti amin a tattao kas iti makasabidong nga angin a di maitarayan ti asinoman. Wen, “matmatay ti amin gapu ken Adan.” (1 Corinto 15:22) Isu a ti saludsod ket kas iti insaludsod ni apostol Pablo: “Asino ti mangisalakan kaniak iti bagi a mangiturturong kaniak iti kastoy nga ipapatay?” Adda kadi?​—Roma 7:24.