Mapan iti linaonna

Mapan iti listaan dagiti linaonna

“Napatpategkayo.”​—MATEO 10:31

Makitkitanaka Kadi ti Dios?

Makitkitanaka Kadi ti Dios?

TI MASURSUROTAYO ITI NAKAPARSUAAN

Nakapatpateg ti umuna nga 60 a minuto iti biag ti kayyanak nga ubing. Apay? Ngamin, iti dayta a tiempo, no maidekket ti kappasngay nga ubing iti inana, pasayaatenna ti panagdakkel ti ubing. *

Apay a sidudungngo nga as-asikasuen ti ina ti kappasngay nga anakna? Inlawlawag ni Professor Jeannette Crenshaw iti The Journal of Perinatal Education a ti immadu a hormone nga oxytocin ti “mangriing iti rikna ti ina kalpasan a naganak bayat nga iggaman, kitaen, ken pasusuenna ti anakna.” Ti sabali pay a hormone a mapataud iti daytoy a tiempo ket “tumulong iti ina a mangasikaso iti anakna” ken dayta ti ad-adda a mangisinged iti riknana iti anakna. Apay a nakaskasdaaw dayta?

Ti nadekket a relasion ti ina ken ti anak ket dinisenio ti naayat a Namarsua kadatayo, ni Jehova a Dios. * Binigbig ni Ari David a ti Dios ti ‘nangaon kenkuana iti tian’ ti inana ken ti naggapuan iti natalged a riknana no arakupen ti inana. Inkararagna: “Kenka [naipaaywanak] manipud iti aanakan; nanipud iti tian ni inak sikan ti Diosko.”​—Salmo 22:9, 10.

PANUNOTEM: No inaramid ti Dios dayta a komplikado a sistema tapno sigurado nga asikasuen a sidudungngo ti ina ti anakna ken ipaayna ti kasapulanna, saan kadi a sigurado met nga interesado ti Dios kadatayo nga ‘annak ti Dios’?​—Aramid 17:29.

TI MASURSUROTAYO ITI BIBLIA MAIPAPAN ITI PANANGAYWAN TI DIOS KADATAYO

Ad-adda nga am-ammo ni Jesu-Kristo ti Namarsua ngem iti asinoman. Insurona: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”​—Mateo 10:29-31.

Manmano kadatayo ti makadlaw kadagiti babassit a billit, nakarkaro manen a ditay madlaw no adda maysa kadakuada a matnag iti daga. Ngem makitkita ti nailangitan nga Amatayo ti tunggal maysa kadakuada! Nupay kasta, uray agtitipon ti nakaad-adu a billit, napatpateg latta kenkuana ti maysa a tao. Nalawag ti punto: Dika madanagan, makitkitanaka ti Dios ken interesado unay kenka!

Interesado unay ti Dios iti pagimbagantayo ken siaayat a bambantayannatayo

 Ipasigurado kadatayo ti Kasuratan

  • “Dagiti mata ni Jehova addada iti amin a lugar, a sisisiput kadagidiay dakes ken kadagidiay naimbag.”​—PROVERBIO 15:3.

  • “Dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.”​—SALMO 34:15.

  • “Agrag-oakto ken agragsakak iti naayat a kinamanangngaasim, ta nakitam ti pannakaparigatko; naammuam ti maipapan kadagiti tuok ti kararuak.”​—SALMO 31:7.

“NARIKNAK A DINAK AY-AYATEN NI JEHOVA”

Adda ngata epektona iti biagtayo no ammotayo nga interesado unay ti Dios iti pagimbagantayo ken siaayat a bambantayannatayo? Adda, kas ipakita ti kapadasan ni Hannah * a taga-England. Kinunana:

“Namin-adu a nariknak a dinak ay-ayaten ni Jehova ken dina sungsungbatan dagiti kararagko. Pampanunotek a baka kurang ti pammatik. Panagriknak idi ket madusdusaak wenno saanak a maikankano ta diak napateg. Panagriknak idi ket saan a maseknan ti Dios.”

Ngem ita, saanen a pagduaduaan ni Hannah ti atension ken ayat ni Jehova. Ania ti nangbalbaliw iti kapanunotanna? “In-inut a nagbalbaliw dayta,” kinunana. “Malagipko ti maysa a palawag a naibatay iti Biblia adun a tawen ti napalabas maipapan iti daton a pangsubbot ni Jesus. Nagdakkel ti naitulong dayta tapno mariknak a talaga nga ay-ayatennak ni Jehova. Ken no masungbatan dagiti kararagko, masansan a makasangitak ta mabigbigko nga ay-ayatennak gayam ni Jehova. Kasta met, gapu iti panagadalko iti Biblia ken pannakigimong, ad-adu ti naammuak maipapan ken Jehova, ti personalidadna, ken ti panangmatmatna kadatayo. Nalawag kaniak itan a tultulongan ken ay-ayatennatayo amin ni Jehova ken sisasagana a mangaywan kadatayo kas indibidual.”

Makaparegta ti imbaga ni Hannah. Ngem kasano a masiguradom a maawatan ken napateg iti Dios dagiti marikriknam? Masungbatan dayta a saludsod iti sumaruno nga artikulo.

^ par. 3 Ti dadduma nga inna a madepres kalpasan ti panaganakda (postpartum depression) ket marigatan a mangisinged iti riknada iti anakda. Ngem saanda koma a pabasolen ti bagida. Sigun iti U.S. National Institute of Mental Health, ti postpartum depression ket “mabalin a resulta ti pisikal ken emosional a rason . . . saan a gapu iti inaramid wenno saan nga inaramid ti ina.” Para iti ad-adu pay nga impormasion, kitaem ti artikulo a “Pannakaawat iti Postpartum Depression” iti Hunio 8, 2003, a ruar ti Agriingkayo!

^ par. 5 Jehova ti nagan ti Dios sigun iti Biblia.​—Salmo 83:18.

^ par. 15 Nabaliwan ti dadduma a nagan kadagitoy nga artikulo.