Mapan iti linaonna

Mapan iti listaan dagiti linaonna

Adda Kadi Empatia ti Dios?

Adda Kadi Empatia ti Dios?

TI MASURSUROTAYO ITI NAKAPARSUAAN

Ti empatia ket “ti abilidad a makipagrikna iti sabali babaen ti panangikabil iti bagi iti situasion ti maysa a tao.” Kuna ti eksperto iti salun-at ti isip a ni Dr. Rick Hanson a nayanaktayo nga addaan iti abilidad a mangipakita iti empatia.

PANUNOTEM: Apay a maipakitatayo ti empatia, kualidad nga awan iti dadduma a parsua? Ilawlawag ti Biblia a ti Dios pinarsuana ti tao a kaladladawanna. (Genesis 1:26) Gapu ta naaramidtayo a kaladladawan ti Dios, kaipapanan dayta a maiparangarangtayo ti personalidadna ken maipakitatayo dagiti nagsasayaat a kualidadna. Gapuna, no tulongan ti maysa ti sabali gapu iti empatia, maipakpakitana ti empatia ti naasi a Namarsua, ni Jehova a Dios.​—Proverbio 14:31.

TI MASURSUROTAYO ITI BIBLIA MAIPAPAN ITI EMPATIA TI DIOS KADATAYO

Ipakpakitaannatayo ti Dios iti empatia ken dina kayat a makitanatayo nga agrigat ken agsagaba. Maipapan kadagiti Israelita idi un-unana, a nagan-anus iti naulpit a panangadipen ti Egipto ken sinaruno ti narigat nga 40 a tawen a kaaddada iti let-ang, kuna ti Biblia: “Bayat ti isuamin a pannakaparigatda isu naparigatan.” (Isaias 63:9) Saan la a basta ammo ti Dios ti rigatda, nariknana pay dayta. Kinunana: “Ammok unay dagiti rigat a sagsagabaenda.” (Exodo 3:7) Kuna ti Dios: “Ti mangsagid kadakayo sagidenna ti bukel ti matak.” (Zacarias 2:8) No adda mangpasakit kadatayo, masaktan met ti Dios.

Ipasigurado ti Biblia a nupay mabalin a makonkonsiensiatayo ken mariknatayo a ditay maikari iti empatia ti Dios, “ti Dios dakdakkel ngem kadagiti pusotayo ket ammona ti amin a bambanag.” (1 Juan 3:19, 20) Ad-adda nga am-ammonatayo ti Dios ngem kadatayo a mismo. Ammona ti amin a pampanunoten, marikrikna, ken kasasaadtayo. Adda empatiana kadatayo.

Makapagtalektayo nga ipaayannatayo ti Dios iti liwliwa, sirib, ken suporta, ta ammotayo a tulonganna dagiti naparigatan

 Ipasigurado kadatayo ti Kasuratan

  • “Umawagka, ket ni met laeng Jehova sumungbat; agpatulongka, ket kunaenna, ‘Adtoyak!’”​—ISAIAS 58:9.

  • “‘Ta siak pagaammok unay ti pampanunot a pampanunotek kadakayo,’ kuna ni Jehova, ‘pampanunot iti talna, ket saan nga iti didigra, tapno ipaayankayo iti maysa a masanguanan ken maysa a namnama. Ket pudno unay nga awagandakto ken umaykayo ken agkararagkayo kaniak, ket denggenkayto.’”​—JEREMIAS 29:11, 12.

  • “Ikabilmo dagiti luak iti lalat a boteliam. Saanda aya nga adda iti librom?”​—SALMO 56:8.

MAKITA, MAAWATAN, KEN MAKIPAGRIKNA TI DIOS KADATAYO

No ammotayo nga adda empatia ti Dios kadatayo, makatulong kadi dayta tapno maibturantayo dagiti pakarigatan? Kitaentayo ti kapadasan ni Maria:

“Nagsaem idi ti riknak ken kasla awan ti hustisia idi natay ti 18 ti tawenna nga anakko kalpasan ti dua a tawen a pananglabanna iti kanser. Kagurak idi ni Jehova ta awan man la ti inaramidna ken dina pinaimbag!

“Kalpasan ti innem a tawen, maysa a gayyemko iti kongregasion ti siaayat ken siaasi a dimngeg kaniak idi impeksak ti riknak a dinak ay-ayaten ni Jehova. Kalpasan ti adu nga oras a dimdimngeg laeng, natignayak iti teksto a kinotarna, ti 1 Juan 3:19, 20, a kunana: ‘Ti Dios dakdakkel ngem kadagiti pusotayo ket ammona ti amin a bambanag.’ Inlawlawagna a maawatan ni Jehova dagiti pakarigatantayo.

“Ngem narigatanak latta a nangikkat iti gurak! Kalpasanna, binasak ti Salmo 94:19, a kunana: ‘Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.’ Kasla naisurat daytoy a teksto para kaniak! Idi agangay, mabang-aranakon no maipeksak ken Jehova ti pakarigatak ta ammok a dengdenggen ken maawatannak.”

Makaliwliwa a maammuan a maawatannatayo ti Dios ken makipagrikna kadatayo! Ngem apay a nakaad-adu ti agsagsagaba? Dusdusaennatayo kadi ti Dios gapu kadagiti dakes nga aramidtayo? Adda kadi aramidento ti Dios tapno agpatingga ti amin a panagsagaba? Masungbatan dagitoy a saludsod kadagiti sumaruno nga artikulo.