Mapan iti linaonna

Mapan iti listaan dagiti linaonna

Maragragsakanak a makikadua kadagiti agtutubo a kakongregasionko

 TI BIBLIA BALBALIWANNA TI BIAG

Baseball ti Kapatgan Idi Kaniak!

Baseball ti Kapatgan Idi Kaniak!
  • PANNAKAYANAKNA: 1928

  • NAKAYANAKANNA: COSTA RICA

  • PAKASARITAANNA: NAISENTRO TI BIAGNA ITI ISPORT KEN PANAGSUGAL

TI NAPALABASKO

Dimmakkelak idiay Puerto Limón ken kadagiti aglawlawna a lugar. Masarakan dayta a sangladan a siudad iti makindaya a murdong ti Costa Rica. Maikapitoak iti walo nga agkakabsat. Natay ni Tatang idi walo ti tawenko isu a ni Nanang laengen ti nangpadakkel kadakami.

Kasilpo idi ti bagisko ti baseball. Magusgustuak dayta nga ay-ayam idi ubingak. Idi tin-edyerak, nakimiembroak iti maysa a nonprofessional team. Bayat a karamanak iti maysa a kompetision iti lugarmi idi nasurok a 20 ti tawenko, inawisnak ti maysa a rekruter no kayatko ti makimiembro iti maysa a professional team idiay Nicaragua. Ngem masakit idi ni Nanang ket siak ti paraaywan isu a diak inawat dayta. Idi agangay, adda manen rekruter a nangawis kaniak para iti national baseball team ti Costa Rica a buklen dagiti napili a miembro manipud kadagiti nonprofessional team. Ket inawatkon dayta. Idi 1949 agingga iti 1952, nagay-ayamak para iti national team, ket nakisalipkami idiay Cuba, Mexico, ken Nicaragua. Nalaingak a baseman, ken naminsan, diak nagmintis iti nagsasaruno a 17 a panagay-ayammi. Maay-ayatanak idi a mangdengdengngeg kadagiti agbuybuya a mangipukpukkaw iti naganko!

Makapaladingit ta immoral met idi ti kabibiagko. Maysa la ti nobiak ngem kanayon nga adda babbaik. Mammartekak pay. Naminsan, nabartekak unay ket idi nakariingakon, addaak metten iti iddak ken diak malagip no kasanoak a nakaawid! Nagsugsugalak pay idi iti domino ken nagtaytayaak iti lotto.

Bayat a kasta ti kabibiagko, nagbalin a Saksi ni Jehova ni Nanang. Inal-allukoynak nga ag-Saksi, ngem saannak a nakombinsir idi damo ta baseball laeng idi ti nakaisentruan ti biagko. No agsansanayak iti baseball court, diak pulos makarikna iti bisin uray pannanganen! Baseball laeng ti sangkapanunotko! Baseball ti kapatgan idi kaniak!

Ngem idi 29 ti tawenkon, naaksidenteak iti ay-ayammi  bayat a sipsippawek ti bola. Idi immimbagak, insardengkon ti agay-ayam iti baseball kas propesionko. Ngem inrugik ti mangsanay kadagiti baseball player iti team nga asideg iti balaymi.

NO KASANO A BINALBALIWAN TI BIBLIA TI BIAGKO

Idi 1957, pinatgak ti awis nga umatender iti kombension dagiti Saksi ni Jehova iti istadium a nagay-ayamak idi iti baseball. Bayat a nakatugawak, dagus a nadlawko a naiduma dagiti Saksi. Nadayawda, saan a kas kadagiti agbuybuya iti baseball a nakagulgulo. Gapu iti nakitak iti dayta a kombension, nakipagadalak iti Biblia kadagiti Saksi ken nakigimongak iti kongregasionda.

Nagustuak ti adu a sursuro ti Biblia a naadalko. Kas pagarigan, impakpakauna ni Jesus nga iti maudi nga al-aldaw, ikasaba dagiti adalanna ti naimbag a damag maipapan iti Pagarian ti Dios iti intero a lubong. (Mateo 24:14) Naammuak pay a saan a kuarta ti rason a mangaskasaba dagiti pudno a Kristiano. Imbaga ni Jesus: “Inawatyo nga awan bayadna, itedyo nga awan bayadna.”—Mateo 10:8.

Inkomparak dagiti maad-adalko iti Biblia iti makitkitak kadagiti Saksi ni Jehova. Apresiarek unay ti gagetda a mangidanon iti naimbag a damag maipapan iti Pagarian ti Dios iti intero a lubong. Nakitak kadakuada ti kinaparabur nga imbilin ni Jesus nga ipakita dagiti Kristiano. Isu nga idi nabasak ti awis ni Jesus iti Marcos 10:21 nga, “Umayka agbalinka a pasurotko,” kayatko idin ti ag-Saksi.

Isuna laeng ta diak nagtignay a dagus. Adu a tawen pay a linawas a nagtaytayaak iti lotto nga us-usarek ti “lucky” number-ko. Ngem naammuak iti Biblia a kagura ti Dios dagiti agdaydayaw iti “dios ti Naimbag a Gasat,” kasta met dagiti naagum. (Isaias 65:11; Colosas 3:5) Isu nga insardengkon ti agsugal. Iti umuna a Domingo kalpasan nga insardengko ti agtaya iti lotto, nangabak ti “lucky” number-ko! Kinankantiawandak ta diak nagtaya iti dayta a lawas, ken pinilitdak nga agtaya manen, ngem diak timmulok. Saanakon a nagsugsugal.

Iti mismo nga aldaw a nagbautisarak iti maysa a kombension dagiti Saksi ni Jehova, nasubok manen ti ‘baro a personalidadko.’ (Efeso 4:24) Iti dayta a rabii, nagsubliak iti hotel a nagdagusak ket nasangpetak ti dati a nobiak nga agur-uray iti ruangan ti kuartok. Ginargarinak: “Umaykan, Sammy. Agragsakta ita a rabii!” Ngem dagus a kinunak, “Saan!” Impalagipko kenkuana a sursurotek itan ti moral a paglintegan ti Biblia. (1 Corinto 6:18) “Ania?” imbugkawna. Sana imbaga a lausen ti linteg ti Biblia iti seksual nga immoralidad ken impapilitna nga agsinnublianankami. Ngem, simrekak lattan iti kuartok ken in-lock-ko ti ridaw. Maragsakanak a mangibaga a sipud idi nagbalinak a Saksi idi 1958 agingga ita, diak pulos sinublian ti dati a kabibiagko.

NO KASANOAK A NAGUNGGONAAN

No isuratko dagiti bendision nga inawatko gapu iti panagpaidalanko iti Biblia, baka makaaramidak iti maysa a libro! Addaanakon iti pudno a gagayyem, direksion iti biag, ken pudno a kinaragsak.

Magusgustuak pay laeng ti baseball, ngem binaliwakon dagiti prinsipiok. Bimmaknangak ken nagbalinak idi a popular gapu iti baseball, ngem saan a nagpaut dagitoy. Nupay kasta, ti relasionko iti Dios ken ti organisasion a nakaikamengak ket agpaut iti agnanayon. Kuna ti Biblia: “Ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:17) Ita, ni Jehova a Dios ken dagiti kapammatiak ti kapatganen kaniak!