Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN NO. 3 2016

 TOPIKO ITI AKKUB

No Adda Natay nga Ay-ayatem

No Adda Natay nga Ay-ayatem

“Ammo ti Dios no ania ti kasayaatan, anakko. . . . Dikan . . . agsangsangit.”

Nayarasaas dagita a sasao iti babai nga agnagan Bebe. Adda idi isuna iti pumpon ni tatangna, a natay iti maysa nga aksidente iti lugan.

Nakadekdekket ni Bebe ken ni tatangna. Dagiti sasao a nangngegna ket imbaga ti maysa a gayyem ti pamiliada a nasayaat met ti intensionna, ngem imbes a maliwliwa, ad-adda ketdi a nasaktan. “Saanko a pagsayaatan ti ipapatayna,” sangkaibagana iti bagina. Idi insurat ni Bebe iti maysa a libro no ania ti napasamak, nalawag nga agladladingit pay laeng uray tawtawenen ti napalabas.

Kas iti nabigbig ni Bebe, mabalin nga aglabas pay ti adu a tiempo sakbay a maep-ep ti saem, aglalo no nakadekdekket kadatayo ti tao a natay. Husto la unay ti panangdeskribir ti Biblia iti ipapatay kas “ti maudi a kabusor.” (1 Corinto 15:26) Awan ti makaigawid iti ipapatay. Masansan a mapasamak dayta iti tiempo a ditay ninamnama ket guluenna ti biagtayo. Alaenna pay kadatayo dagiti ipatpategtayo. Awan ti makalisi iti nasaem a resultana. Isu a normal laeng no marigatantayo a mangsango iti ladingit nga epekto ti ipapatay.

Siguro napampanunotmon: ‘Kasano kabayag tapno mailiwliwag ti ladingit? Kasano a mailiwliwag? Ania ti aramidek tapno maliwliwak dagiti natayan? Adda kadi pay namnama dagiti natayen nga ay-ayatentayo?’