Mapan iti linaonna

Mapan iti listaan dagiti linaonna

Dagiti Kari a Matungpalto

Dagiti Kari a Matungpalto

Maikaskasaban ti naimbag a damag maipapan iti Pagarian ti Dios iti intero a daga, kas impadto ni Jesus. (Mateo 24:14) Ibaga ti libro ti Biblia a Daniel a daytoy a Pagarian ket gobierno ti Dios. Naglaon ti kapitulo 2 dayta a libro iti padto maipapan iti panagsasaruno dagiti nabileg a gobierno, wenno pagarian, ti tao manipud pay iti nagkauna a Babilonia agingga ita. Kastoy ti naipadto iti bersikulo 44:

“Mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”

Ipakita dayta ken ti dadduma pay a padto iti Biblia a suktanto ti Pagarian ti Dios ti amin a turay ti tao ken mangyegto iti kinatalged ken talna ditoy daga. Kasanonto ti biagtayo iti sidong dayta a Pagarian? Dagitoy ti sumagmamano a nakaskasdaaw a kari nga asidegen a matungpal.

  • AWANTON TI GUBAT

    Salmo 46:9: “[Pasardengento ti Dios] dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”

    Panunotem ti kasasaad no ti amin a kuarta ken paglaingan a maus-usar ita iti panagaramid kadagiti armas ket mausar para iti pagsayaatan dagiti tattao imbes a mangpapatay kadakuada! Matungpalto dayta a kari iti sidong ti Pagarian ti Dios.

  • AWANTON TI SAKIT

    Isaias 33:24: “Awanto ti agtataeng nga agkuna: ‘Masakitak.’”

    Panunotem ti kasasaad inton awanen ti sakit iti puso, kanser, malaria, wenno dadduma pay a sakit. Saantayton a kasapulan ti ospital ken agas. Perpektonton ti salun-at ti amin nga agnanaed ditoy daga.

  • SAANTON NGA AGKIRANG TI TARAON

    Salmo 72:16: “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”

    Mangpataudto ti daga iti umdas a taraon, ket magun-odanto dayta ti amin. Awanton ti bisin ken malnutrision.

  • AWANTON TI UT-OT, LADINGIT, KEN IPAPATAY

    Apocalipsis 21:4: “Punasennanto [ti Dios] ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”

     Kayatna a sawen, agbiagtayton nga agnanayon iti perpekto a kasasaad iti paraiso a daga! Kari dayta ti naayat a Namarsua, ni Jehova a Dios.

“SIGURADO NGA AGBALLIGINTO”

Kasla kadi imposible dagita? Uray no umanamong ti kaaduan a nakasaysayaat ti biag a naikari ken nailadawan iti Biblia, saanda a maawatan ti ideya a panagbiag iti agnanayon gapu iti adu a rason. Ditay pakasdaawan dayta ta awan pay ti tao a nakapadas iti dayta tapno iyestoriana kadatayo.

Naadipen dagiti tattao iti basol ken ipapatay ken nabayagen nga agbibiagda a napno iti saem, rigat, ken problema isu nga imbilangen ti adu a dayta ti normal a biag. Ngem naiduma unay dayta iti panggep ni Jehova a Dios, ti Namarsua kadatayo.

Tapno agtalektayo a matungpal ti amin nga inkari ti Dios, impaganetgetna: “Saanto nga agsubli kaniak nga awanan kadagiti nagbanagan, no di ket sigurado nga aramidennanto daydiay pagragsakak, ket sigurado nga agballiginto iti banag a nangibaonak iti dayta.”​—Isaias 55:11.

Ibaga ti Biblia a ni Jehova ket Dios a “saanna a mabalin ti agulbod.” (Tito 1:2) Gapu ta inkarina amin dagitoy a nakaskasdaaw a banag para iti masanguanan, nagsayaat ngarud a panunotentayo: Talaga kadi a posible nga agbiag nga agnanayon dagiti tattao iti naikari a Paraiso a daga? Ania ti aramidentayo tapno mabenepisiarantayo iti kari ti Dios? Kadagiti sumaruno a panid, makitam ti sumagmamano a makatulong nga impormasion a mangsungbat kadagita a saludsod.