Mapan iti linaonna

Mapan iti listaan dagiti linaonna

 TOPIKO ITI AKKUB | AWATEM KADI TI KASAYAATAN A REGALO TI DIOS?

Ti Kasayaatan a Regalo ti Dios—Apay a Nakapatpateg?

Ti Kasayaatan a Regalo ti Dios—Apay a Nakapatpateg?

Apay a makuna a nakapatpateg kenka ti maysa a regalo? Mabalin nga adda uppat a rason: (1) no asino ti nangted, (2) no apay a naited, (3) no ania ti naisakripisio tapno maited, ken (4) no talaga a kasapulan. Makatulong ti panangpampanunot kadagita tapno umuneg ti apresasiontayo iti subbot—ti kasayaatan a regalo ti Dios.

ASINO TI NANGTED?

Napateg ti dadduma a regalo ta inted dayta ti maysa nga adda autoridadna wenno resrespetuentayo unay. Adda met dagiti ipatpategtayo a regalo, uray saan a nangina, gapu ta inted ti dungdungnguentayo a kapamilia wenno pagtaltalkan a gayyem. Kasta ti regalo ni Russell ken Jordan a nadakamat iti immuna nga artikulo. Kasano met a kasta ti regalo a subbot?

Umuna, kuna ti Biblia: “Ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana.” (1 Juan 4:9) Isu a nakapatpateg daytoy a regalo. Awanen ti addaan dakdakkel nga autoridad ngem iti Dios. Maipapan kenkuana, insurat ti maysa a Hebreo a salmista: “Sika, nga agnagan Jehova, sika laeng ti Kangatuan iti intero a daga.” (Salmo 83:18) Awanen ti nangatngato pay a makaited kadatayo iti regalo.

Maikadua, ti Dios ti ‘Amatayo.’ (Isaias 63:16) Kasano? Isu ti nangted iti biagtayo. Ken kanayon nga ay-aywanannatayo kas iti ar-aramiden ti nadungngo nga ama iti annakna. Insaludsod ti Dios iti dadduma a nagkauna nga agdaydayaw kenkuana, nga inawaganna kas Efraim: “Ni Efraim maysa kadi a napateg nga anak kaniak, wenno maysa nga ubing a natrato a siaayat? . . . Sigurado a maasianakto kenkuana.” (Jeremias 31:20) Kasta met la ti marikrikna ti Dios kadagiti agdaydayaw kenkuana ita. Isu ti mannakabalin-amin  a Namarsua kadatayo ken napudno nga Ama ken Gayyemtayo. Isu a saan kadi a nagpateg ti aniaman a regalo a naggapu kenkuana?

APAY A NAITED?

Napateg ti dadduma a regalo ta naited gapu iti pudno nga ayat, saan a gapu iti obligasion. Ti talaga a naparabur a mangmangted dina namnamaen nga adda kasukat ti kinaimbagna.

Ti Dios intedna ti Anakna kadatayo ta ay-ayatennatayo. Kuna ti Biblia: ‘Babaen itoy naiparangarang ti ayat ti Dios iti kasasaadtayo, ta ti Dios imbaonna ti bugbugtong nga Anakna.’ Apay? “Tapno magun-odantayo ti biag babaen kenkuana.” (1 Juan 4:9) Obligado kadi ti Dios a mangaramid iti dayta? Saan! “Ti subbot nga imbayad ni Kristo Jesus” ket ebkas ti “di kaikarian a kinamanangngaasi [ti Dios].”—Roma 3:24.

Apay a maibilang a ‘di kaikarian a kinamanangngaasi’ ti regalo ti Dios? Kuna ti Biblia: “Ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.” (Roma 5:8) Gapu iti managsakripisio nga ayat ti Dios, nagtignay para kadagiti nakapuy, awan gawgawayna, ken managbasol a tattao. Ditayo nagbannogan dayta nga ayat ken ditayo mabayadan ti Dios. Ti regalona ti kasayaatan nga ebkas ti ayat iti intero a historia.

ANIA TI NAISAKRIPISIO?

Napateg ti dadduma a regalo ta nagdakkel ti insakripisio ti nangted iti dayta. No maragsakan ti maysa a mangited kadatayo iti banag a nakapatpateg kenkuana, talaga nga ipategtayo ti regalona gapu iti insakripisiona.

Inted ti Dios ti “bugbugtong nga Anakna.” (Juan 3:16) Awanen ti napatpateg pay kenkuana a maitedna kadatayo. Bayat ti nakabaybayag a tiempo a panangparsua ti Dios iti uniberso, nakipagtrabaho ni Jesus kenkuana ken nagbalin a “daydiay pakaay-ayatanna unay.” (Proverbio 8:30) Ni Jesus ti ‘dungdungnguen nga Anak’ ti Dios ken ti “ladawan ti saan a makita a Dios.” (Colosas 1:13-15, Ti Baro a Naimbag a Damag Biblia) Ditayo pulos mailadawan ti kinadekket ti relasion ti Dios ken Jesus.

Ngem ti Dios ‘saanna nga impaidam uray pay ti bukodna nga Anak.’ (Roma 8:32) Inted ni Jehova ti kasasayaatan nga adda kenkuana para kadatayo. Iti amin a regalona, dayta ti kadakkelan ti insakripisiona.

KASAPULAN UNAY

Napateg ti dadduma a regalo gapu ta talaga a kasapulan, ken masapul unayen. Kas pagarigan, no nasalbar ti biagmo gapu ta adda nagboluntario a nangbayad iti pinagpaagasmo a dimo kabaelan a bayadan, napalalo la ketdi ti panagyamanmo! Sigurado a di magatadan dayta a regalo, di ngamin?

“No kasano a ken Adan matmatay ti amin, kasta met nga iti Kristo mapagbiagto ti amin.” (1 Corinto 15:22) Gapu ta kaputotannatayo ni Adan, ‘matmataytayo’ amin ken ditayo malisian ti sakit ken ipapatay wenno ditayo maikappia ti bagitayo iti Dios tapno maaddaantayo iti nadalus a konsiensia. Ken gapu ta taotayo laeng, ditay ‘mapagbiag’ ti bagitayo wenno ti asinoman. Ibaga ti Biblia: “Awan maysa kadakuada ti makabalin iti aniaman a pamay-an a mangsubbot uray pay iti maysa a kabsat.” (Salmo 49:7) Talaga a kasapulantayo ti tulong ta saantayo a masubbot ti biagtayo wenno ti asinoman. No awan ti tumulong, awan ti namnamatayo.

Gapu iti dakkel nga ayat ni Jehova, sisasagana a binayadanna ti “pagpaagas” a kasapulantayo a mangsalbar iti biagtayo. Iti kasta, “mapagbiagto ti amin” babaen ken Jesus. Kasano a maaramidan  dayta ti subbot? “Ti dara ni Jesus nga Anakna dalusannatayo manipud iti amin a basol.” Wen, no adda pammatitayo iti naibukbok a dara ni Jesus, mapakawan ti basoltayo ken maaddaantayo iti namnama nga agbiag nga agnanayon. (1 Juan 1:7; 5:13) Ken ania ti maaramidan ti subbot kadagiti natay nga ay-ayatentayo? “Yantangay ti ipapatay ket gapu iti maysa a tao, ti panagungar dagiti natay ket gapu met iti maysa a tao [ni Jesus].”—1 Corinto 15:21. *

Awan kapada ti regalo a daton ni Jesus. Ngamin, naggapu dayta iti kangatuan nga autoridad ken intedna dayta gapu iti di maartapan nga ayatna. Awanen ti sabali a dakdakkel ti insakripisiona para kadatayo ngem ni Jehova a Dios. Ken awanen ti regalo a kasapulantayo unay no di ti daton a mangwayawaya kadatayo iti basol ken ipapatay. Wen, awan ti regalo a makapatas iti di mailadawan a pateg ti subbot.

 

^ par. 19 Para iti ad-adu pay nga impormasion maipapan iti panggep ti Dios a mangpagungar kadagiti natay, kitaem ti kapitulo 7 ti libro nga Ania a Talaga ti Isursuro ti Biblia? nga impablaak dagiti Saksi ni Jehova ken mabasa met iti www.jw.org/ilo.