Mapan iti linaonna

Mapan iti listaan dagiti linaonna

Ania ti Nagan ti Dios?

Ania ti Nagan ti Dios?

No adda kayatmo a maam-ammo, mabalin a ti umuna nga aramidem ket isaludsodmo, “Ania ti naganmo?” No isaludsodmo dayta iti Dios, ania ngata ti ibagana?

“Siak ni Jehova. Dayta ti naganko.”​Isaias 42:8.

Baro kadi kenka dayta a nagan? Mabalin a kasta, gapu ta manmano wenno saan pay ketdi nga us-usaren ti adu nga agipatpatarus iti Biblia ti nagan ti Dios. Masansan a suktanda dayta iti titulo nga “APO.” Ngem kinaagpaysuanna, makita ti nagan ti Dios iti agarup 7,000 a daras iti orihinal a lengguahe a nakaisuratan ti Biblia. Dayta a nagan ket buklen ti uppat a Hebreo a konsonante, a katupag ti YHWH wenno JHVH, ken nabayagen a maipatpatarus iti Iloko kas “Jehova.”

Mabasa ti nagan ti Dios iti intero a Hebreo a manuskrito ken iti adu a patarus

Ti Salmo iti Dead Sea Scroll Umuna a siglo C.E., HEBREO

Patarus ni Tyndale 1530, INGLES

Reina-Valera a bersion 1602, SPANISH

Union Version 1919, CHINESE

NO APAY A NAPATEG TI NAGAN TI DIOS

Napateg a mismo iti Dios ti naganna. Awan ti nangpanagan iti Dios; isu a mismo ti nangpili iti dayta. Impakaammo ni Jehova: “Dayta ti naganko iti agnanayon, ket dayta ti pangawag kaniak ti amin a henerasion.” (Exodo 3:15) Iti Biblia, ad-adu ti nadakamat a nagan ti Dios ngem iti aniaman kadagiti titulona, kas iti Mannakabalin-amin, Ama, Apo, wenno Dios, ken ad-adu ngem iti aniaman a personal a nagan, kas iti Abraham, Moises, David, wenno Jesus. Kangrunaanna, pagayatan ni Jehova a maipakaammo ti naganna. Ibaga ti Biblia: “Maammuan koma dagiti tattao a sika, nga agnagan Jehova, sika laeng ti Kangatuan iti intero a daga.”​—Salmo 83:18.

Napateg ken Jesus ti nagan ti Dios. Iti maaw-awagan nga Amami wenno ti Kararag ti Apo, insuro ni Jesus kadagiti pasurotna nga iyararawda iti Dios: “Masantipikar koma ti naganmo.” (Mateo 6:9) Inkararag a mismo ni Jesus iti Dios: “Ama, padayagem ti naganmo.” (Juan 12:28) Ti panangipadayag iti nagan ti Dios ti kangrunaan iti biag ni Jesus, ken dayta ti rason nga inkararagna: “Impakaammok kadakuada ti naganmo ken itultuloyko nga ipakaammo.”​—Juan 17:26.

Napateg ti nagan ti Dios kadagiti makaam-ammo kenkuana. Naawatan dagiti adipen ti Dios idi un-unana a ti pannakasalaknib ken pannakaisalakanda ket adda pakainaiganna iti awan kapadana a nagan ti Dios. “Ti nagan ni Jehova ket natibker a torre. Agtaray iti dayta ti nalinteg ket masalakniban.” (Proverbio 18:10) “Maisalakanto ti amin nga umawag  iti nagan ni Jehova.” (Joel 2:32) Ipakita ti Biblia a ti nagan ti Dios ti pakabigbigan dagiti agserserbi kenkuana. “Ta magnanto ti amin a tattao iti nagan ti diosda, ngem magnatayto iti nagan ni Jehova a Diostayo iti agnanayon nga awan inggana.”​—Mikias 4:5; Aramid 15:14.

NO ANIA TI IPAKAAMMO DAYTA A NAGAN

Dayta laeng a nagan ti makaipakaammo iti kinasiasino ti Dios. Adu nga eskolar ti mamati a ti kaipapanan ti nagan a Jehova ket “Pagbalinenna.” Impaawat ni Jehova a Dios ti kaipapanan ti naganna idi tinukoyna ti bagina kadagitoy nga imbagana ken Moises: “Agbalinakto iti Aniaman a Piliek a Pagbalinan.” (Exodo 3:14) Isu a saan laeng nga ipakita ti nagan ti Dios ti akemna kas Namarsua a nangpaadda iti amin a banag. Ipakita ti naganna a kabaelanna a pagbalinen ti bagina ken dagiti parsuana iti aniaman a kasapulan tapno matungpal ti panggepna. Nupay dagiti titulo ti Dios ket mabalin a mangiladawan iti posision, autoridad, wenno pannakabalinna, ti laeng naganna a Jehova ti mangirepresentar iti amin a maipapan kenkuana ken iti kabaelanna nga aramiden.

Ti nagan ti Dios ipalgakna nga interesado ti Dios kadatayo. Iparipirip ti kaipapanan ti nagan ti Dios a kanayon nga ipatpategna dagiti parsuana a pakairamanantayo. Gapu ta impakaammo met ti Dios ti naganna, kayatna ngarud a maam-ammotayo isuna. Ngamin, nabayagen nga impakaammona ti naganna sakbay pay a kayattayo nga ammuen dayta. Nalawag a kayat ti Dios nga isu ket ibilangtayo kas pudpudno a Persona a mabalintay nga asitgan, saan a kas espiritu nga adayo kadatayo ken ditay pulos maawatan.​—Salmo 73:28.

Ti panangusartayo iti nagan ti Dios ipalgakna nga interesadotayo kenkuana. Kas panangyilustrar, mabalin a kiddawem iti kayatmo a pakigayyeman nga awagannaka iti mismo a naganmo. Ania ti mariknam no kanayon a dina kayat nga usaren ti naganmo? Baka pagduaduaamton no talaga a kayatna ti suminged kenka. Kasta met la ti Dios. Imbaga ni Jehova ti naganna iti sangatauan ken parparegtaennatayo nga usarentayo dayta. No aramidentayo dayta, ipakpakitatayo ken Jehova a kayattayo ti suminged kenkuana. Ammona pay ketdi dagidiay “mangpampanunot [wenno, “mangipatpateg,” footnote] iti naganna”!​—Malakias 3:16.

Ti panangammo iti nagan ti Dios ti umuna a napateg nga aramidentayo tapno maam-ammotayo isuna. Ngem saan la a dayta. Masapul nga am-ammuentayo ti Persona a makinnagan iti dayta. Masapul nga adalentayo dagiti kualidadna.

ANIA TI NAGAN TI DIOS? Jehova ti nagan ti Dios. Dayta laeng a nagan ti makaipakaammo iti kinasiasino ti Dios kas Persona a makabael a mangitungpal iti panggepna