Mapan iti linaonna

Mapan iti listaan dagiti linaonna

3 Tulong Tapno Maibturan ti Problema

3 Tulong Tapno Maibturan ti Problema

Adda dagiti problema ita a saan a maliklikan wenno masolusionan. Kas pagarigan, no naturogen ken patay ti maysa nga ay-ayatem wenno adda nakaro a sakitmo, mabalin nga awan ti maaramidam no di ti mangkita iti pamay-an no kasano a maibturam dayta. Adda kadi maitulong ti Biblia?

NAKARO A SAKIT

Imbaga ni Rose: “Adda nakaro ken nakaut-ut-ot a sakitko ket namimpinsan a nagbaliw ti biagko gapu iti dayta.” Ti maysa a pakaseknanna unay, saanna a maipokus no dadduma ti agadal iti Biblia ken ti makiraman kadagiti naespirituan nga aktibidad. Ngem nagdakkel ti naitulong ti sasao ni Jesus iti Mateo 19:26: “Iti Dios amin a bambanag mabalin” wenno posible. Nakita ni Rose a saan laeng a maymaysa ti pamay-an ti panagadal. Gapu iti ut-ot, imposible kenkuana ti agbasa no dadduma, isu nga agdengngeg kadagiti rekording ti Biblia ken publikasion a naibatay iti Biblia. * Imbagana: “Diak ammo no kasano nga agtalinaedak a natibker iti naespirituan no awan dagita.”

No malidayan ni Rose gapu ta saanna a maaramid dagiti dati nga ar-aramidenna, maliwliwa iti 2 Corinto 8:12: “Ta no ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” Impalagip dayta ken Rose a maragsakan ti Dios kenkuana gapu ta ar-aramidenna ti amin a kabaelanna sigun iti ipalubos ti kasasaadna.

LADINGIT GAPU ITI IPAPATAY

Malagip ni Delphine, a nadakamat itay: “Idi natay ti 18 anyos a balasangko, nakaro ti ladingitko nga uray  la panagriknak, diak kabaelanen ti agbiag. Saanen a maisubli ti dati.” Ngem naliwliwa iti imbaga ti salmista iti Dios a mabasa iti Salmo 94:19: “Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.” Imbaga ni Delphine, “Inkararagko ken Jehova a tulongannak a makapanunot iti aramidek tapno maep-ep ti saem a marikriknak.”

Inusarna ti adu a tiempona iti makapnek a panagboluntario. Idi agangay, inyarigna ti bagina iti krayola—uray no tukkotukkolen, makakolor pay laeng. Kasta met, nakitana a nupay adda limitasionna, adda latta maitulongna. Malagipna: “Nakitak a no usarek dagiti prinsipio ti Biblia a mangliwliwa kadagiti iyad-adalak, dayta ti pamay-an ni Jehova a mangbang-ar ken mangliwliwa kaniak.” Inlistana dagiti karakter iti Biblia a nakapadas met iti nakaro a ladingit. Nabigbigna: “Aminda ket tattao a managkararag.” Nasursurona met nga “awan sungbat a makita, no saan a nakaukrad ti Biblia.”

Adda pay nasursuro ni Delphine iti panagadalna iti Biblia—agpokus iti masanguanan, saan nga iti napalabas. Naliwliwa iti namnama a mabasa iti Aramid 24:15: “Addanto panagungar agpadpada dagiti nalinteg ken dagiti nakillo.” Kasano kasigurado ni Delphine a pagungaren ni Jehova ti balasangna? Kastoy ti sungbatna: “Makitkitak ti balasangko iti masanguanan. Nakaplanon ti sumaruno a ‘panagdeytmi,’ a kasla addan dayta iti kalendario ni Amak. No kasano kalawag iti panunotko ti pannakakitak kenkuana idi nayanak, kasta met kalawag iti panunotko ti panagkaduaminto iti hardinmi.”

^ par. 4 Adu kadagita a rekording ti makita iti website a jw.org.

Maliwliwanaka ti Biblia uray iti karirigatan a situasion