Mapan iti linaonna

Mapan iti listaan dagiti linaonna

Pannursuro ti Biblia—Di Agkupas a Prinsipio

Pannursuro ti Biblia—Di Agkupas a Prinsipio

PANUNOTEM: Agpaspasiarka iti museo a napno kadagiti nagkauna a monumento. Natippingan ken saanen a mailasin ti kaaduan kadagita. Awanen ti dadakkel a paset ti dadduma. Ngem adda maysa a kompleto pay laeng; mailasin pay ti nagpintas a diseniona. Dinamagmo iti tour guide-yo, “Daytoy kadi ti kabaruan?” “Saan,” insungbatna. “Maysa dayta kadagiti kadaanan, ken saan pay a pulos natartarimaan.” “Naprotektaran kadi daytoy?” insaludsodmo. “Saan,” kuna ti tour guide. “Naglabas daytan iti nakapigpigsa a tudo ken angin. Adu pay ti nangpadas a mangperdi.” Mabalin a masmasdaawka ket napanunotmo, ‘Ania ngata a material ti nausar?’

Mayarig ti Biblia iti dayta a nakaskasdaaw a monumento. Nakadadaanen a libro—maysa dayta kadagiti kadaanan. Siempre, adda pay dadduma a nagkauna a libro. Ngem kas kadagiti naperdi a nagkauna a monumento, kaaduan a daan a sursurat ti nakaron a nadadael iti panaglabas ti tiempo. Dagiti ibagbaga dagitoy a libro maipapan iti siensia, saanen a maitunos kadagiti kabaruan a pannakaammo. Kasla pagdaksan pay ketdi dagiti balakadda maipapan iti medisina imbes a makatulong. Adu kadagita a sursurat ti pirsay laengen, napukawen ti dadduma a pasetda wenno naperdin.

Nupay kasta, naidumduma ti Biblia. Nangrugi a naisurat daytoy nasurok a 3,500 a tawenen ti napalabas, ngem kompleto pay ti linaonna. Uray maulit-ulit a nabusbusor iti ginasut a tawen—napuoran, naiparit, ken nalalais—saan a naapektaran dagiti linaonna. Saan ngarud nga agpayso nga awanen serbi daytoy gapu kadagiti baro a pannakaammo, adu dagiti ibagbaga ti Biblia a pagsayaatantayo.—Kitaen ti kahon a “Nagpason Wenno Moderno?

 DAGITI PRINSIPIO A KASAPULANTAYO ITA

Mabalin a mapanunotmo, ‘Talaga kadi a makatulong dagiti pannursuro ti Biblia iti moderno a panawentayo?’ Tapno masungbatam, isaludsodmo: ‘Ania dagiti karirigatan a problema ti sangatauan ita? Ania kadagitoy ti pagbutbutngak?’ Mabalin nga ibagam a gubat, polusion, krimen, wenno korapsion. Ita, panunotem dagiti prinsipio nga isursuro ti Biblia. Sa damagem iti bagim, ‘No suroten dagiti tattao dagitoy a prinsipio, nasaysayaat ngata a pagyanan ti lubong?’

PANANGAYAT ITI TALNA

“Naragsak dagiti mannakikappia, yantangay maawagandanto iti ‘annak ti Dios.’” (Mateo 5:9) “No mabalin, agingga a makapagpannuray kadakayo, makikappiakayo iti amin a tattao.”—Roma 12:18.

ASI, PANANGPAKAWAN

“Naragsak dagiti naasi, yantangay maipakitaandanto iti asi.” (Mateo 5:7) “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, * kasta met ti aramidenyo.”—Colosas 3:13.

PANAGKAYKAYSA DAGITI PULI

“Manipud iti maysa a tao inaramid [ti Dios] ti tunggal nasion dagiti tattao, tapno agnaedda iti intero a rabaw ti daga.” (Aramid 17:26) “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.

PANANGRESPETO ITI DAGA

“Ni Jehova a Dios innalana ti tao ket insaadna iti minuyongan ti Eden tapno talonenna dayta ken tapno aywananna.” (Genesis 2:15) Ti Dios ‘dadaelennanto dagidiay mangdaddadael iti daga.’—Apocalipsis 11:18.

PANANGGURA ITI KINAAGUM KEN IMMORALIDAD

‘Agaluadkayo iti tunggal kita ti kinaagum, ta uray no addaan kinaruay ti maysa a tao ti biagna saan nga agtaud iti ik-ikutanna.’ (Lucas 12:15) “Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo, kas maitutop kadagiti nasantuan a tattao.”—Efeso 5:3.

MAPAGTALKAN, NAGAGET

“Kayatmi ti agbiag a mapagtalkan iti amin a bambanag.” (Hebreo 13:18) “Ti agtatakaw saan koma nga agtakawen, no di ket agtrabaho koma a sipipinget.”—Efeso 4:28.

TI PATEG TI PANANGTULONG KADAGITI AGKASAPULAN

“Agsaokayo iti makaliwliwa kadagiti malmaldaangan a kararua, saranayenyo dagiti nakapuy, maaddaankayo iti mabayag a panagitured iti isuamin.” (1 Tesalonica 5:14) ‘Taripatuen dagiti ulila ken balo a babbai kadagiti rigatda.’—Santiago 1:27.

Saan laeng a dinakamat ti Biblia dagita a prinsipio. Isurona pay no kasano nga ipateg dagita a prinsipio ken iyaplikar iti inaldaw a panagbiagtayo. No ad-adu ti mangsurot kadagitoy, basbassit la ketdi ti problema ti sangatauan. Talaga a makatulong dagiti prinsipio ti Biblia ken saan nga agkupas! Ngem ania ti maitulong kenka ita dagiti pannursuro ti Biblia?

 NO KASANO A MAKATULONG KENKA ITA TI PANNURSURONA

Imbaga idi ti kasisiriban a tao: “Ti kinasirib mapaneknekan a nalinteg babaen iti ar-aramidna.” (Mateo 11:19) Umanamongka kadi iti dayta? Ti sirib mapaneknekam a nalinteg no iyaplikarmo dayta. Isu a mabalin a maibagam: ‘No agpayso a makatulong ti Biblia, saan ngata a nasayaat ti epektona iti biagko? Kasano a makatulong dayta kadagiti problemak?’ Kitaem daytoy a pagarigan.

Naragsak ken okupado ti biag ni Delphine. * Ngem bigla a nagsasaruno a napukawan. Natay ti tin-edyer a balasangna. Nagsinada iti asawana. Naibus ti kuartana. Malagipna: “Saankon nga ammo no asinoak idi—awanen ti balasangko, ni lakayko, ti balayko. Panagriknak idi, awanen ti serserbik—awan ti pakabigbigak, ti pigsak, awan ti direksion ti biagko.”

Natarusan ni Delphine a pudno dagitoy a sasao: “Pitopulo a tawen dagiti aldaw ti tawtawenmi; ket no gapu iti naisangsangayan a kinabileg walopuloda a tawen, kaskasdi a ti panagreggetda agbanag laeng iti riribuk ken makapasakit a bambanag; ta sidadaras a lumabas dayta, ket tumayabkamin.”—Salmo 90:10.

Nagkonsulta ni Delphine iti Biblia iti oras nga agkasapulan.  Dakkel ti naitulong dayta kenkuana. Kas ipakita ti tallo a sumaruno nga artikulo, adu pay ti natulongan idi inusarda ti balakad ti Biblia a mangsolbar kadagiti problemada. Nariknada a ti Biblia ket kas iti monumento a naibaga iti rugi. Dayta ket saan a kas iti adu a libro a dimmaan ken saanen a mausar. Gapu kadi ta naidumduma ti pannakaaramid ti Biblia? Saan ngata a talaga a naglaon kadagiti pampanunot ti Dios—saan laeng a pampanunot ti tao?—1 Tesalonica 2:13.

Mabalin a maibagam a nagababa ti biag ken napno iti problema. No mariknam a kasla abakendaka dagiti problemam, pakabirokam iti liwliwa, suporta, ken mapagtalkan a balakad?

Kitaentayo ti tallo a pamay-an no kasano a makatulong ti Biblia. Isuronaka no kasano a

  1. maliklikan dagiti problema no posible.

  2. masolbar dagiti pakarigatan.

  3. maibturan dagiti kasasaad a saanmon a mabalbaliwan.

Mailawlawag dagitoy kadagiti sumaruno nga artikulo.

^ par. 10 Jehova ti nagan ti Dios a naipakaammo iti Biblia.—Salmo 83:18.

^ par. 24 Nabaliwan ti dadduma a nagan iti daytoy nga artikulo ken iti tallo a sumaruno.