Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN NO. 1 2017

Bassit La Kadi Dayta a Kamali a Pannakaawat?

Bassit La Kadi Dayta a Kamali a Pannakaawat?

Nakita ti bassit nga ubing ti asuk nga ipugpugso ti pabrika ket dimmakkel dayta a kasla kapas nga ulep. Impapanna nga agar-aramid ti pabrika kadagiti ulep. Makapakatawa ti kasta a bassit a kamali a pannakaawat ti ubing. Ngem saan a kasta ti dakkel a kamali a pannakaawat ta apektaranna ti biagtayo. Kas pagarigan, no di umiso ti pannakaawattayo iti naisurat iti bote ti agas, mabalin nga adda dagiti serioso nga epektona.

Mabalin a naserserioso pay ti epektona no kamali ti pannakaawattayo iti naespirituan a bambanag. Kas pagarigan, nagkamali ti dadduma iti pannakaawatda kadagiti pannursuro ni Jesus. (Juan 6:48-68) Imbes nga itultuloyda ti agsursuro, inlaksidda ketdi ti amin nga insurona. Nagsayang!

Agbasbasaka kadi iti Biblia tapno agpaidalan? Nagsayaat dayta. Ngem adda kadi posibilidadna a mabalin a kamali ti maawatam iti nabasam? Kasta ti mapaspasamak iti adu. Kitaem ti tallo a gagangay a kamali a pannakaawat.

  • Kamali ti maawatan ti dadduma iti bilin ti Biblia nga “agbutengka iti pudno a Dios.” Impapanda a masapul a napalalo ti panagbutengtayo iti Dios. (Eclesiastes 12:13) Ngem saan a kasta ti kayat ti Dios a marikna dagiti agdaydayaw kenkuana. Kunana: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto.” (Isaias 41:10) Ti simple a kaipapanan ti panagbuteng iti Dios ket ti nauneg a panagraem ken panagamanga kenkuana.

  • Mapuoranto kadi ti daga?

    Adda dagiti di umiso ti pannakaawatna iti daytoy a sasao ti Dios: “Iti tunggal banag adda naituding a tiempo, . . . tiempo ti pannakayanak ken tiempo ti ipapatay.” Impagarupda nga inkeddengen ti Dios ti eksakto nga oras a matay ti maysa a tao. (Eclesiastes 3:1, 2) Ngem ti tuktukoyen laeng dagita a bersikulo ket ti siklo ti biag ken ipakpakitana nga agturongtayo amin iti ipapatay. Isursuro pay ti Sao ti Dios nga adda epekto dagiti desisiontayo iti kapaut ti biagtayo. Kas pagarigan, mabasatayo: “Ti mismo a panagbuteng ken Jehova mangnayonto iti al-aldaw.” (Proverbio 10:27; Salmo 90:10; Isaias 55:3) Kasano? Kas pagarigan, gapu ta ikabkabilangantayo ti Sao ti Dios, liklikantayo dagiti aramid a pagdaksan ti salun-attayo kas iti panagbartek ken immoralidad.—1 Corinto 6:9, 10.

  • Literal ti pannakaawat ti dadduma iti ibagbaga ti Biblia a ti langlangit ken daga ket “maipaay iti apuy,” isu nga ipapanda a dadaelento ti Dios daytoy a planeta. (2 Pedro 3:7) Ngem ikarkari ti Dios a dina pulos ipalubos a madadael ti literal a daga. ‘Imbangon ti Dios ti daga kadagiti naipasdek a dissona; saanto a mapagdiwengdiweng dayta agingga iti agnanayon.’ (Salmo 104:5; Isaias 45:18) Saan a ti literal a planeta no di ket daytoy dakes a sistema ti bambanag ti lubong ti permanente nga agpatingga, a kas man la lamuten ti apuy. Ti met ngay langlangit? No nausar dayta a sao iti literal a pamay-an, mabalin a tuktukoyenna ti tangatang, ti nabituen nga uniberso, wenno ti paggigianan ti Dios. Awan kadagita ti madadaelto.

APAY A SABALI TI PANNAKAAWATDA ITI BIBLIA NO DADDUMA?

Kas makitam kadagita a pagarigan, kaaduanna a kamali ti pannakaawat dagiti tattao iti nabasada iti Biblia. Ngem apay nga ipalubos ti Dios a mapasamak dayta? Mabalin nga irason ti dadduma: ‘No talaga a ti Dios ti kasisiriban ken ammona ti amin, inikkannatayo koma iti libro a nalawag ti pannakaisuratna tapno nalaka a maawatan ti amin. Apay a saan a kasta ti inaramidna?’ Panunotem ti tallo a rason no apay a masansan a kamali ti pannakaawat ti dadduma iti Biblia.

  1. Nadisenio ti Biblia iti pamay-an a maawatan dagidiay napakumbaba ken sidadaan nga agsursuro. Imbaga ni Jesus iti Amana: “Idaydayawka iti publiko, Ama, Apo ti langit ken daga, agsipud ta dagitoy  a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga [wenno, ubbing].” (Lucas 10:21) Naisurat ti Biblia iti pamay-an a dagidiay laeng umiso ti kababalinna ti makatarus iti mensahe dayta. Kaaduanna a dagidiay napangato—a gagangay nga ugali ti “mamasirib ken nasasaririt” wenno nalalaing—ket kamali ti pannakaawatda iti Biblia. Ngem dagidiay agbasa iti Biblia nga addaan iti kababalin a kas iti ubing, a napakumbaba ken magagaran nga agsursuro, ad-adda a maawatanda ti mensahe ti Dios. Talaga a nagsayaat ti panangdisenio ti Dios iti Biblia!

  2. Ti Biblia ket para kadagiti pudpudno a mayat nga agpatulong iti Dios a mangtarus iti dayta. Impakita ni Jesus a kasapulan dagiti tattao ti tulong tapno matarusanda a naimbag dagiti insurona. Kasano a maawatda ti tulong? Kinuna ni Jesus: “Ti katulongan, ti nasantuan nga espiritu, nga ibaonto ti Ama iti naganko, isuronto dayta kadakayo ti amin a bambanag.” (Juan 14:26) Isu nga ipapaay ti Dios ti nasantuan nga espirituna—ti nabileg a puersa nga us-usarenna—a mangtulong kadagiti tattao a mangtarus iti nabasada iti Biblia. Ngem saanna nga ited ti espirituna kadagiti saan nga agpatulong kenkuana isu a kaaduanna a saan a nalawag ti Biblia kadakuada. Tignayen met ti nasantuan nga espiritu dagidiay ad-adu ti ammona a Kristiano tapno tulonganda dagidiay mangikagkagumaan a maaddaan iti naun-uneg a pannakaawat.—Aramid 8:26-35.

  3. Adda dagiti paset ti Biblia a maawatan laeng dagiti tattao iti umiso a tiempo iti historia. Kas pagarigan, naibilin ken propeta Daniel nga isuratna ti maysa a mensahe para iti masanguanan. Kinuna ti anghel: ‘Daniel, ilimedmo ti sasao ket [ikkam iti] selio ti libro, agingga iti tiempo ti panungpalan.’ Iti napalabas a ginasut a tawtawen, adu ti nangbasa iti libro ti Biblia a Daniel ngem talaga a dida naawatan. Uray ni Daniel a mismo, dina naawatan ti dadduma nga insuratna. Sipapakumbaba nga inaminna: “Nangngegko, ngem saanko a maawatan.” Siuumiso a maawatanto dagiti tattao ti padto ti Dios nga impaisuratna ken Daniel, ngem mapasamak laeng dayta iti partikular a tiempo ti historia a pinili ti Dios. Inlawlawag ti anghel: ‘Mapanka, Daniel, agsipud ta ti sasao nailimed ken [naikkan iti] selio agingga iti tiempo ti panungpalan.’ Asino ti makatarus iti mensahe ti Dios? “Awanto a pulos kadagiti nadangkes ti makaawat; ngem maawatanto dagidiay addaan iti pannakatarus.” (Daniel 12:4, 8-10) Ngarud, ipakaammo laeng ti Dios ti kaipapanan ti dadduma a paset ti Biblia no nadanonen ti umiso a tiempo.

Adda kadin kamali a pannakaawat idi dagiti Saksi ni Jehova maipapan iti Biblia gapu ta saan pay a dimteng ti umiso a tiempo? Wen. Ngem idi nadanonen ti tiempo ti Dios a lawlawagannan ti bambanag, dagus a binalbaliwanda ti pannakaawatda. Patienda a panangtulad dayta iti inaramid dagiti apostol ni Kristo a sipapakumbaba a nangbalbaliw kadagiti kapanunotanda no ilinteg ida ni Jesus idi.—Aramid 1:6, 7.

Ti imahinasion ti ubing maipapan iti paggapgapuan dagiti ulep ket mabalin a bassit la a kamali a pannakaawat. Ngem dakkel a banag dagiti pannursuro ti Biblia. Nakapatpateg ti mensahe ti Biblia isu a saan nga umdas a tarusam lattan a bukbukodmo babaen iti personal a panangbasam iti dayta. Isu nga agpatulongka tapno maawatam ti basbasaem. Agpatulongka kadagidiay napakumbaba a mangad-adal iti Biblia, kadagidiay agtaltalek iti nasantuan nga espiritu ti Dios tapno matarusanda ti Biblia, ken kadagidiay kombinsido nga itan ti tiempo a kayat ti Dios a maawatantayon a naimbag ti mensahe ti Biblia. Dika koma agpangadua a makisarita kadagiti Saksi ni Jehova wenno agbasa kadagiti nasukimat a naimbag nga artikulo iti website a jw.org/ilo. Ikarkari ti Biblia: ‘No agpukkawka maipaay iti mismo a pannakaawat, masarakamto ti pannakaammo iti Dios.’—Proverbio 2:3-5.

Ammuem ti Ad-adu Pay

SUNGBAT DAGITI SALUDSOD MAIPAPAN ITI BIBLIA

Saan Kadi nga Agtutunos ti Linaon ti Biblia?

Usigem ti kasla agkokontra a linaon ti Biblia ken ti prinsipio a mabalinmo nga usaren tapno nalawag a maawatam ti kaipapananda.