Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  No. 1 2017

 TI BIBLIA BALBALIWANNA TI BIAG

Diak Kayat ti Matay!

Diak Kayat ti Matay!
  • PANNAKAYANAKNA: 1964

  • NAKAYANAKANNA: ENGLAND

  • PAKASARITAANNA: REBELIOSO, TIN-EDYER NGA INA

TI NAPALABASKO

Nayanakak iti Paddington, maysa a lugar nga adu ti populasionna iti London, England. Agkakabbalaykami idi kada Nanang ken ti tallo a manangko. Lumned-tumpaw iti biagmi ni Tatang gapu iti panagbarbartekna.

Idi ubingak, sinuruannak ni Nanang a rinabii nga agkararag. Adda idi bassit a Bibliak a Salmo laeng ti linaonna. Inyaramidak dagita iti tono tapno makantak. Malagipko ti sasao ti maysa a libro a nabasak: “Addanto tiempo nga agpatingga ti amin.” Naimula dayta iti panunotko. Gapu kadagita a sasao, mapuypuyatak iti kapapanunot maipapan iti masanguanan. ‘Sigurado a saan la a kastoy ti biag,’ napanunotko. ‘Apay nga addaak ditoy lubong?’ Diak kayat ti matay!

Naginteresak unay iti okulto. Pinadasko ti makisarita kadagiti natay, napankami kadagiti kaeskuelaak a gagayyemko kadagiti sementerio, ken nagbuybuyakami kadagiti horror a pelikula. Ibilangmi a nakabutbuteng ngem makapagagar dagita.

Nagbalinak a rebelioso idi agtawenak iti sangapulo. Nangrugiakon nga agsigarilio ket nagalistoak a naadikto. Idi agangay, agmarmarihuanaakon. Idi agtawenak iti 11, pinadaskon ti uminum iti arak. Diak kayat ti ramanna ngem kayatko ti rikna ti mabartek. Magusgustuak met idi ti musika ken agsala. Impamuspusak ti mapan kadagiti party ken nightclub. Kanayon nga aglibasak iti rabii sa agsubliak met laeng sakbay a lumawag. Nabannogakon kabigatanna isu nga ag-cutting class-ak. No sumrekak man iti eskuelaan, kaaduanna nga uminumak iti arak sakbay ti sumaruno a klase.

Nakababbaba ti gradok iti maudi a tawenko iti eskuelaan. Idi nakita ni Nanang dayta, napalalo ti dismaya ken pungtotna ta idi la a naammuanna dagiti kalokuak. Nagapakami isu a nagtalawak. Temporario a nakikabbalayak iti nobiok a ni Tony a miembro ti relihion a Rastafari. Aglaklako idi iti droga ken agtaktakaw. Pagaammo pay isuna a nakarangranggas. Di nagbayag, nasikoganak ket iti laeng edad a 16, impasngayko ti anakmi a lalaki.

NO KASANO A BINALBALIWAN TI BIBLIA TI BIAGKO

Naam-ammok dagiti Saksi ni Jehova idi addaak iti pagyanan dagiti balasang nga inna ken annakda. Karamanak kadagiti  inikkan ti maysa nga ahensia ti gobierno iti kuarto a pagyanan sadiay. Dua a babbai a Saksi ti kanayon a bumisbisita iti dadduma nga agtutubo nga inna. Naminsan, nakiramanak iti saritaanda. Planok a paneknekan a kamali dagiti Saksi. Ngem kada agsaludsodak, kalmadoda ken nalawag ti panangsungbatda babaen iti Biblia. Nakasingsingpet ken nakaal-alumamayda ket nagustuak unay dayta. Isu nga immanamongak a makipagadal iti Biblia kadakuada.

Di nagbayag, adda naammuak iti Biblia a nangbalbaliw iti biagko. Sipud idi ubingak, mabutengak a matay. Ngem naammuakon ti pannursuro ni Jesus maipapan iti panagungar! (Juan 5:28, 29) Naadalko met nga ipatpategnak ti Dios kas indibidual. (1 Pedro 5:7) Ti nangnangruna a nangdanon iti pusok ket ti sasao iti Jeremias 29:11: “‘Ta siak pagaammok unay ti pampanunot a pampanunotek kadakayo,’ kuna ni Jehova, ‘pampanunot iti talna, ket saan nga iti didigra, tapno ipaayankayo iti maysa a masanguanan ken maysa a namnama.’” Nakombinsirak a mabalinko ti maaddaan iti namnama nga agbiag nga agnanayon iti Paraiso a daga.—Salmo 37:29.

Impakita dagiti Saksi ni Jehova a pudpudno nga ay-ayatendak. Idi damok ti umatender iti gimongda, inabrasadak ken mannakigayyemda amin! (Juan 13:34, 35) Naiduma unay dayta iti napadasak iti maysa a simbaan iti lugarmi. Inawatdak dagiti Saksi uray ammoda ti kasasaadko. Impaayandak iti tiempo, ayat, atension ken adu a tulong a kasapulak. Nariknak a kasla pasetak ti dakkel ken naayat a pamilia.

Gapu iti panagadalko iti Biblia, nabigbigko nga adda dagiti masapul a balbaliwak iti biagko tapno masurotko dagiti nangato a moral a paglintegan ti Dios. Narigatanak a nangisardeng iti panagsigariliok. Ken nakitak nga adda dagiti musika a mangrubrob iti riknak nga agmarihuana isu a binaliwak dagiti musika a dengdenggek. Gapu ta kayatko ti agtalinaed a nalawag ti panagpampanunotna, insardengkon ti mapan kadagiti party ken nightclub a pakasulisogak nga agbartek. Ken inkagumaak ti makigayyem kadagiti makatulong kaniak iti baro a kabibiagko.—Proverbio 13:20.

Makipagad-adal met idin ni Tony iti Biblia kadagiti Saksi ni Jehova. Bayat a masungsungbatan dagiti Saksi dagiti saludsodna maipapan iti Biblia, nakombinsir met a kinapudno ti maad-adalna. Adu ti binalbaliwanna iti biagna: insardengnan ti makikadua kadagiti naranggas a gagayyemna, dagiti illegal nga ar-aramidenna, ken ti panagusarna iti marihuana. Tapno naan-anay a maparagsakmi ni Jehova a Dios, nakitami a masapul a balbaliwanmi ti immoral a panagbiagmi ken maaddaan ti anakmi iti nasayaat a pamilia. Isu a nagkasarkami idi 1982.

“Saanakon a mapuypuyat iti kapapanunot maipapan iti masakbayan wenno ipapatay”

Malagipko a nagkitkitaak kadagiti artikulo iti magasin a Pagwanawanan ken Agriingkayo! * maipapan kadagiti pakasaritaan dagiti tattao a nagballigi a nangbalbaliw iti bambanag a kayatko a balbaliwan. Naparegtaak unay kadagiti ulidanda! Napabilegak nga agtultuloy nga agporsegi ken saan a sumuko. Inkarkararagko ken Apo Jehova a saan koma a mauma kaniak. Nabautisarankami ken Tony kas Saksi ni Jehova idi Hulio 1982.

NO KASANOAK A NAGUNGGONAAN

Nasalbar ti biagko gapu iti pannakigayyemko ken Jehova a Dios. Nariknami met ken Tony ti suportana kadakami kadagiti narigat a tiempo. Nasursuromi ti agsadag iti Dios no adda pakarigatan, ken nariknami a kanayon a tultulonganna ti pamiliami.—Salmo 55:22.

Naragsakanak a nangtulong kadagiti annakmi a mangam-ammo ken Jehova. Kasta met laeng ti ragsakko a makakitkita iti appokomi nga umun-uneg ti pannakaammoda iti Dios bayat a dumakdakkelda.

Saanakon a mapuypuyat iti kapapanunot maipapan iti masakbayan wenno ipapatay. Okupadokami unay ken Tony a bumisbisita iti linawas iti agduduma a kongregasion dagiti Saksi ni Jehova tapno paregtaenmi ida. Kaduaenmi ida a mangisuro iti dadduma a tattao a no ipakitada ti pammatida ken Jesus, agbiagdanto met iti agnanayon.

^ par. 17 Ipabpablaak met dagiti Saksi ni Jehova.

Ammuem ti Ad-adu Pay

PROGRAMA A PANAGADAL ITI BIBLIA

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?